PCG, muling ipinaalala ang mga safety tips sa paglalayag

Posted August 5, 2014

Ni Bert Dalida, YES FM Boracay

Muling ipinaalala ng Philippine Coastguard (PCG) sa mga mangingisda at bangkero ang mga safety tips sa paglalayag.

Kasunod ito ng nangyaring paglubog ng bangka sa Hambil, Romblon nitong nakaraang Sabado kung saan nahirapan ang PCG sa paghahanap sa mga biktima.

Ayon kasi kay Philippine Coastguard Boracay sub-station commander PO1 Arnel Zulla, dapat alamin ng mga maglalakbay at mangingisda ang lagay ng panahon bago pumalaot lalo na ang may mga maliliit na bangka.

Dapat din umanong sumunod sa mga alituntunin ng coast guard lalo na kapag may bagyo o panahon ng Habagat.

Ayon pa kay Zulla, dapat ipagbigay-alam sa mga barangay o lokal na opsiyal ang gagawing paglalayag at mag-iwan ng contact number sa oras ng emergency.

Samantala, ipinaalala din ni Zulla na dapat magpa-inspeksyon sa coastguard ang mga maglalayag kapag may mga dala silang hayop katulad ng baboy o manok.

Magugunitang lumubog ang isang bangka sa Hambil na papunta sanang Caticlan nitong Sabado upang mag-deliver ng baboy at manok, subali’t pinasok umano ito ng tubig dahil sa malalalakas na alon dulot ng masamang panahon.