Akelco nagpasiguro na hindi kakapusin ng suplay ng kuryente!

Ni Alan Palma Sr., YES FM Boracay

“Sapat ang suplay para sa buong Panay.”

Ito ang tugon ni Engr. Joel Martinez ang AGM for Engineering ng Aklan Electric Cooperative (AKELCO) sa ipinatawag na hearing ng Committee on Public Utilities ng Sangguniang Bayan ng Malay kahapon.

Malaki kasi ang pangamba ng mga miyembro ng SB at ilang stakeholders sa isla lalo pa at kinakapos ng suplay ng kureyente ngayon ang buong Mindanao na posibleng makakaapekto sa industriya ng turismo sa Boracay.

Sa kasalukuyan ay may surplus o sobra pang suplay ng kuryente ang buong Panay na mula sa ilang pinagkukunanan nito na may kabuoang demand na 263 MegaWatts (MW).

Hindi kagaya ng Negros at Cebu na meron ng naitatalang posibleng problema sa suplay dahil na rin sa demand.

Sa pahayag naman ni Rodson Mayor Jr. Operations Manager ng AKELCO, sa kasalukuyan ay may 30MW na suplay ang inilaan para sa Boracay bagamat 21MW lamang ang kinukunsumo base sa kanilang datos.

Samantala, posibleng kukulangin ng suplay ang isla ng Boracay pero ito ay mangyayari pa sa taong 2016.

Sec. De Lima, bumisita sa Ati Village sa Boracay

Ni Christy Dela Torre, YES FM Boracay

Labis na ikinatuwa ng mga Ati sa Sitio Lugutan, Brgy.Manoc-Manoc, ang pagdalaw ni Department of Justice Secretary Leila De Lima sa kanilang komunidad kahapon.

Ang naging layunin ng pagpunta ni De Lima sa nasabing lugar ay upang alamin ang tungkol sa pagkamatay ng Ati Spokesperson na si Dexter Condez at ang lupa na kinatitirikan ng mga bahay ng mga Ati doon.

Sa pambungad na pahayag ni Sec. De Lima, sinabi nitong kasalukuyang nasa preliminary investigation ang kaso ni Dexter.

Ipinaliwanag ni De Lima na magkakaroon ng hearing ang mga piskalya kung may probable cause ang pagkamatay nito,dito malalaman kung may kremin at kung sino ang dapat na papanagutin.

Kung sakali aniyang may malaman o mapatunayan sa imbestigasyong kanilang gagawin ay kanila itong ipa-file sa Korte.

Ipa-“fast track” daw nila o mamadaliin ang prosesong kanilang gagawin, pero nabanggit nito na malapit nang ma-resolve ang kaso ni Dexter.

Sa ginawa nitong pagdalaw sa mga Ati, ay nagkaroon din ng tanong-sagot sa pagitan nina De Lima at ng mga Ati.

Hindi din napigilan ng mga ito na ilabas ang kanilang hinanaing sa mga taong may kinalaman sa pagkamatay ni Dexter, maging ang kanilang sama ng loob sa LGU.

Pagdating naman sa lupa, ayon kay De Lima, ay nasa korte na ito at nakikipag-ugnayan na lamang sila sa Regional Trial Court sa Kalibo.

Bukod dito, nagbigay din pag-asa sa mga Ati, hinggil sa mga inihayag ni De Lima na mahigpit nilang mimonitor ang kaso ni Condez maging ang sitwasyon sa lupa ng mga ito.

Ang kaniyang pagdalaw umano sa mga ito, ay isang paraan din na maiparamdam sa mga Ati doon na alam ng DOJ ang nangyari sa kanilang spokesperson at ang mga problemang kanilang nararanasan at kinakaharap.

Sinabi pa nito na sa susunod na linggo ay kaniyang ipag-uutos sa mga prosecutor na ipasa na ang resolusyon ukol dito nang sa ganun ay mapadali ang pag-resolve sa kaso ni Dexter Condez.

Si De Lima ay dumating sa isla ng Boracay upang bisitahin ang Ati Community, kasama ang iba pang miyembro ng piskalya.

Father Crisostomo, nanawagan sa LGU para sa kaso ni Dexter Condez

Ni Bert Dalida, News Director, YES FM Boracay

Ang pakikipaglaban para sa karapatan ng mga Ati at hustisya para kay Dexter ay hindi lamang para sa mga katutubo.

Ito ay pakikipaglaban din para sa lahat, sa kadahilanang tayo ay bahagi at nagmula sa kanila.

Ito ang naging pananaw ni Boracay Holy Rosary Parish team mediator Rev.Fr Arnaldo Crisostomo, kaugnay sa kasong pagpatay kay Boracay Ati spokesman Dexter Condez.

Anya, ang gobyerno-lokal ang dapat tumulong upang protektahan ang karapatan at mabigyan ng hustisya ang mga katutubo dito.

Kaya naman nanawagan ngayon si Crisostomo sa LGU na kumilos na ayon sa mandato sa kanila ng batas na tulungan ang mga mamamayan, lalo na ang mga maliliit at ang mga Ati sa Boracay.

Maliban dito, nanawagan din ang nasabing pari sa mga non-government organizations (NGOs) na tulungan sa anumang paraan ang mga Ati, para sa kanilang kabuhayan at ikauunlad.

Partisipasyon ng mga taga-business sector sa pagpapatupad ng mga ordinansa sa Boracay malaking tulong --- Glenn Sacapaño

Ni Mackie Pajarillo, YES FM Boracay

Ang partisipasyon ng mga establishments sa front beach ng Boracay ay may malaking kontribusyon para sa maigting na pagpapatupad ng mga ordinansa.

Ito ang sinabi ni Island Administrator Glenn Sacapaño kaugnay sa mga ipinapatupad na batas sa isla ng Boracay.

Kung saan malaki umanong tulong ito kung maikakalat ng mabuti ang mga impormasyon sa mga bisita ukol dito.

Ang mga taga-business sector ang mga establishments umano ang maaaring makapag-sabi sa mga turista kung ano ang mga bawal sa isla, particular na sa front beach.

Hindi rin naman umano sila nagkulang ng paalala sa mga bisita dahil may mga tarpaulins at nakapaskil din sa mga sasakyan kung ano ang mga bawal sa Boracay.

Kung kaya’t kapag nahuli ng MAP o Municipal Auxiliary Police ang sinumang turistang lumabag ay talagang iisyuhan nila ng ticket.

Samantala, aminado din si Sacapaño na kulang sila ng tao para mag monitor sa mga bisitang lumalabag ng ordinansa dito sa isla.

Kahit sabihin pang hindi na Holy Week dagsa at siksikan pa rin ang mga bisita na dumadayo dito, marami pang mga arrivals, muling iginiit ng administrador na magtulungan na lang ang lahat para sa ikabubuti ng Boracay.

Mga basurahan sa beach front ng Boracay, dadagdagan

Ni Bert Dalida, News Director, YES FM Boracay

Dadagdagan ang mga basurahan sa beach front ng Boracay.

Ito ang kinumpirma sa panayam ng himpilang ito kay Boracay Island Administrator Glenn Sacapaño, kaugnay sa mga inilagay na basurahan nitong nagdaang Semana Santa.

Kung saan sinabi nito na maliban sa pagiging permanente na doon ng may 25 basurahan ay dadagdagan pa ang mga ito.

Isang aktibidad umano kasi ang nakatakdang ilarga sa darating na Mayo kaugnay sa isang malawakang paglilinis sa buong isla.

Dagdag pa ni Sacapaño na sa ngayon ay 25 pa lamang ang inilagay nila sa beach front, mula sa kabuuang siyamnapung basurahan.

Ito’y dahil sa nahirapan umano silang imonitor ang mga ito, dahil na rin sa mga umano’y pasaway na mga batang nangunguha ng mga basura sa nasabing basurahan.

Kaya naman iginiit ng administrador na ang mga establisemyento sa beach front ay dapat ding tumulong sa pagbabantay upang ang mga basurahang ito ay hindi masalaula at hindi kumalat ang mga basura.

Sinabi pa ni Sacapaño na paunti-unti ay ipapaintindi din ng LGU Malay ang kahalagahan ng mga nasabing basurahan sa isla.

LGU Malay may mas mataas na responsibilidad sa Boracay kaysa sa DoT

Ni Edzel Mainit, YES FM Boracay

LGU Malay ang dapat na sasagot at aaksiyon sa mga reklamo at tanong may kaugnayan sa Boracay.

Ito ay dahil ang lokal na pamahalaan ng bayang ito ang may mas mataas na responsibilidad at siyang nagdedisiyon pagdating sa Boracay kaysa sa DoT.

Sapagkat ang papel umano sa ngayon ng Department of Tourism o DoT sa Boracay kahit na sabihing Tourism Zone ang isla ay ang pagbibigay ng accreditations sa mga establishemento , gayon din pag-market at promosyon ng Boracay sa mga turista.

Dahil ayon kay Boracay DOT Officer In-charge Tim Ticar, ipinasa na sa LGU ang karapatan sa pamamahala sa islang ito di tulad ng dati kaya sila parin ang may “last say” kaysa sa DoT.

Pero sa ngayon umano ay may panukalang batas na kaugnay dito na nakasaad sa Republic Act 9593 o Tourism Act of 2009 na madadagdagan na ang kapangyarihan ng DoT sa mga lugar gaya ng Boracay kapag naipatupad na.

Ganon paman ang DoT umano ay tumatanggap naman ng mga reklamo, subalit ang mga problema umano sa Boracay ay dapat idulog sa LGU.

Maliban dito, sa ibang problema naman gaya ng reklamo sa  umano ay “mahal na presyo” ng mga bilihin ay pwede umanong ipa-abot sa Department of Trade and Industry o DTI.

Sa DILG naman kaugnay sa suliranin sa pamamahala at iba pa, DENR naman kung sa kapaligiran at sa iba pang departamento ng pamahalaan depende sa tanong o reklamo.

Paliwanag kasi ni Ticar, may kaniya-kaniyang trabaho din sila at hindi kakayanin ng DoT na sila lang ang tutugon dito.

Ang pahayag ni Ticar ay sagot sa madalas na tanong ng mga indibidwal at iba’t ibang sector sa isla kaugnay sa tambak na problema na nararanasan sa sikat na islang ito.

Malay naglaan ng P300,000 para sa mga Malaynong nagsa-summer job

Ni Edzel Mainit, YES FM Boracay

Umabot sa mahigit 100 Malaynon ang naka-summer job sa LGU Malay ngayong taon.

Pero matatanggap lamang ng mga estudyanteng ito ang kaniyang sahod kapag nakapag-enrol na ayon kay Malay Public Employment Service Office o PESO Officer Dennis Briones.

Sapagkat isa ito sa requirement na hihilingin ng pamahalaan na siyang makakapagpatunay na mag-aaral nga ang mga ito.

Layunin aniya ng progmang ito ng LGU at Department of Labor ay tulungang kumita ang mga estudyante upang mayroong pandagdag sa panustos sa kanilang pag-aaral.

Ngayong taon, ayon kay Briones, nakakatanggap ng tig-P277.00 bawat araw ang isang estudyante na nagtatrabaho sa loob ng dalampung araw na sinumulan noong ika-25 ng Marso at magtatapos naman sa ika-24 ang Abril ng taong ito.

Naglaan naman umano ang Malay ng P300,000.00 para sa sahod ng mga estudyanteng ito at ang iba ay magmumula din sa DOLE.

Ang mga estudyanteng  ito ay na-distribute ngayon sa iba’t ibang departemento ng LGU sa bayan ng Malay.

Mga proyekto sa Aklan, tuloy pa rin kahit may bagong gobernador na

Ni Edzel Mainit, YES FM Boracay

Matutuloy pa rin ang mga proyekto ng pamahalaang probinsiya kahit may bagong gobernador na ang Aklan.

Ito ang inihayag ni Governor Carlito Marquez sa panayam dito kahapon.

Dahil kampante ito na ang mga planong proyekto umanong ito ay suportado at ini-endorso na rin ng mga LGUs gaya na lamang ng reklamasyon sa Caticlan na na-endorso na rin ng Sangguniang  Bayan kaya hindi nito ikinababahala dahil matutuloy pa rin ito kahit may bagong administrasyon na.

Samantala, pinasalamatan naman ni Marquez ang mga Malaynon, lalo na ang mga sumuporta dito sa siyam na taon nitong panununkulang bilang gobernador ng probinsiya.

Si Marquez ay magtatapos na ng kaniyang termino ngayong Hunyo kasabay ng pagkakaroon ng bagong halal na mga opisyal ng probinsiya ngayong May 13, 2013 elections.

2nd batch ng Libreng Sakay ID ng mga Senior Citizen sa Malay, dumating na

Ni Edzel Mainit, YES FM Boracay

Handa nang ipamigay ang 2nd batch ng Libreng Sakay ID ng mga senior citizens.

Sapagkat nasa tanggapan na ito ng punong ehekutibo sa ngayon at ipinamimigay na sa mga Malaynon na senior citizens.

Bagamat ang unang batch ng mga ID na ito ay natanggap na ng ilang Malaynon na may edad 60 pataas noong nagdaang taon pa.

Aasahang maliban sa 2nd batch na ito ay may mga ID pang susunod para sa iba na hindi makakatanggap sa ngayon.

Ang Libreng Sakay ID na ito na programa ng lokal na pamahalaan ng Malay at isang Foundation ay ibinibigay sa lahat ng kwalipikadong mga senior citizen sa mga Barangay ng Malay kasama na ang isla ng Boracay

Kung saan sa mga sasakyan gaya ng tricycle at bangka dito ay pwedeng sumakay ang mga ito na walang bayad ang mga may edad ng Malaynon na may hawak ng mga ID na ito.

Karagdagang share ng LGU Malay mula sa koleksiyon ng Terminal Fee sa Jetty Port, OK sa gobernador

Ni Edzel Mainit, YES FM Boracay

Pwede nilang i-request, pero nasa Sangguniang Panlalawigan na ang desisyon kung papayagan nila.

Ganito inilarawan ni Aklan Governor Carlito Marquez ang posibleng mangyayari sa balak na panukala ni Sangguniang Bayan Member Wilbec Gelito.

Ito ay ang hilingin sa pamahalaang probinsiya na taasan na rin ang share ng Malay mula sa nakokolektang terminal Fee sa Cagaban at Caticlan Jetty Port.

Para sa gobernador, hindi naman ito problema kung para sa kabutihan naman ang layunin, subalit nasa SP umano ang mandatu sa pagpayag kaugnay dito.

Lalo na ngayon at binabalak nang ipatupad ang “unification” sa dalawang pantalan upang iisang window na lamang ang pagkukunan ng ticket at lahat ng fees na sinisingil sa mga turista.

Inihayag pa nito sa panayam ng YES FM News Center na wala ding problema sa bahagi ng pamahalaang probinsiya kung magtanong man ang SB Malay kaugnay sa pinag-gamitan ng kita mula sa nakokolektang Environmental Fee, kung transparency ang pag-uusapan.

Gayong kita naman ayon kay Marquez ang mga programa at proyekto ng probinsiya sa mga barangay sa Malay na naibabalik naman.

Kung maaalala, kinuwestiyon ng SB Malay kung saan napupunta ang 25% share ng probinsya mula sa nakukulektang Environmental Fee sa Boracay.

Maliban dito naging laman din ng mga deliberasyon ng konseho ang balak na panukala na hihilinging taasaan na rin ang share ng Malay mula sa nakokolektang Terminal Fee ng probinsiya sa dalawang pantalang nabanggit.

Sunod-sunod na brownout sa Aklan, ipinaliwanag ng Akelco

Ni Edzel Mainit, YES FM Boracay

“Ang palagiang nararanasang brown out nitong nagdaang mga araw ay hindi indikasyon na kinikulang na sa suplay ng kuryente ang probinsiya.”

Ganito ipinaliwanag ni Aklan Electric Cooperative o AKELCO Engr. Joel Martinez ang patay sinding suplay ng enerhiya mula sa mga generators na pinagkukunan na siyang dini-distribute din ng kooperatiba sa Aklan.

Sa panayam dito kahapon, sinabi ni Martines n

a ang naranasang malawakang brown out nitong nagdaang Biyernes at Sabado ay dahil sa nagka-problema ang linya ng National Grid Corporation of the Philippines o NGCP na siyang nagsisilbing daluyan ng kuryente.

Dahil nitong Biyernes may nakitang sawa na sumampay sa live wire ng NGCP sa area ng Barangay Calizo, Balete kaya hindi nakapag-transmit ng kuryente mula Capiz papuntang Kalibo.

Habang sinundan din ito ng brown out noong Sabado dahil sa tinamaan ng kidlat ang isa pang linya ng NGCP at na-apektuhan ang sub-marine cable nila.

Pero sa mga naranasang aberiya umanong ito, walang dapat na ikabahala ang publiko dahil walang power shortage sa Aklan.

Katunayan ay sobra pa umano ito dahil sa dami ng source o mapagkukunan ng enerhiya dito sa Panay.

Samantala dito naman sa Boracay, aminado si Engr.  Wyane Bucala na may ilang gabi na ring nakakaranasang low voltage at pag-fluctuate ang suplay ng kuryente maliban sa ilang oras na mga brown out na nararanasan.

Eksplinasyon nito, dahil nasa dulo ang Boracay kaya naramdaman ito dito.

Ngunit paglilinaw nito, hindi naman umano ito maka-epekto sa mga de kuryenteng gamit sa loob ng bahay at mga establishemento, kaya walang dapat ikabahala. 

Lumang wirings sa bahay, palitan na para iwas sunog --- BFP Boracay

Ni Edzel Mainit, YES FM Boracay

Para maka-iwas sa sunog, sikaping mapalitan na ang mga lumang wirings na ginagamit sa loob at labas man ng bahay o establishemento, lalo na kapag may sampung taon na itong ginagamit.

Sapagkat kalimitan ay ito rin umano ang dahilan kung bakit nagkakaroon ng sakuna na nagreresulta sa sunog.

Kung saan ang mga lumang kawad na ito ang dahilan na animo ay pumuputok na ang insulator ayon kay F03 Franklin Arubang ng Bureau of Fire Protection o BFP sa Boracay.

Maliban dito, pinayuhan din ni Arubang ang mga Boracaynon na ipa-check din sa lisensiyadong electrician ang mga linya nila bago magdagdag ng load o ano mang gamit dahil kapag na over load umano, doon na nagkakaroon na ng problema.

Ang pahayag na ito ng Fireman ay kasunod ng mga sakuna na nararanasan sa isla lalo na sa Metro Manila na nagsisimula sa simpleng spark lang ng kuryente lalo na ngayong tag-init. 

Sobra-sobrang load at sanga-sangang wiring, rason sa pagkasunog ng mga poste sa Boracay

Ni Edzel Mainit, YES FM Boracay

Electrical fire ang kalimitang dahilan ng pagkasunog ng mga poste sa Boracay dala ng sanda makmak na mga linya na nakakabit dito.

Sapagkat maliban sa linya o wirings ng Akelco, naka-kabit din ang linya ng telepono at cable sa iisang poste lamang, ayon kay FO3 Franklin Ar
ubang ng Bureau Fire Protection o BFP Boracay.

Ganon paman, pasalamat naman umano sila dahil walang mga establishemeneto at pamamahay na nadadamay na siyang labis na ikinababahala nila sa ngayon.

Bunsod nito balak na rin umanong padalhan ng sulat ng BFP Boracay ang Akelco upang maayos na ang mga linyang ito.

Sa panig naman ng Akelco, mahalaga umano magbigay ng paabiso muna sa kooperatiba ang nais magdagdag o magkabit ng linya sa poste upang maagapan at hindi na lumala ang problema kaugnay dito.

Sapagkat ayon kay Akelco Boracay Engr. Wyane Bucala, ang drop wire at load o karagdagan linya mula sa poste papunta sa bahay o establishemento ang dahilan ng pagkasunog kapag nagkakaroon ito ng leakage at madikit pa sa ibang linya.

Pero kalimitan umano sa pangyayaring ito ay naitatala lamang kapag summer season, ngunit hindi naman umano ganon kadalas.

Kung maaalala, nitong linggo lamang, nakapagtala ng ilang kaso ng pagkasunog ng poste o kaya ay pagliyab ng gawad ng kuryente sa Boracay, na labis na ikinababahala naman sa ngayon na baka makakapagdulot ng sunog lalo pa at napakainit ng panahon.

Buwaya sa Boracay na posibleng ipalit kay Lolong, babawiin na ng DENR

Ni Edzel Mainit, YES FM Boracay

Anumang oras ay pwedeng nang ilabas o bawiin sa Boracay ang dalawang buwayang nasa pangangalaga ngayon ng negosyanteng si Lenard Tirol.

Bagamat isa ito sa itinuturing na tourist attraction sa ngayon, ngunit dahil sa kakulangan umano sa dukomento bago paman dalhin papasok sa islang ito ang dalawang “Salt Water Crocodile” ayon kay Boracay CENRO Officer Merza Samillano.

Nakatakda nang kunin ito ngayon ng DENR at ibalik sa pinag-mulan.

Bagamat sinubukan naman umano ng kampo ni Tirol na mag-aply ng permiso sa CENRO Boracay para sa pag-aalaga ng mga “endangered species” na ito.

Subalit hindi na umano binigyan pa ng permiso dito sa Boracay, dahil kulang parin ang kanilang dukomento kahit na mayroon pang “donation paper” mula sa accredited wildlife farm na pinagkunan sa dalawang buwaya.

Sa ngayon ay nakatangap na umano si Samillano ng kautusan mula sa legal division ng DENR Regional Office 6, na nagsasabing ilalabas na ng isla dalawang species.

Kaya may sulat na at kinausap pa umano ng CENRO si Tirol na boluntaryo nang isuko ang dalawang hayop sa posisiyon ng DENR.

Sa kasalukuyan ay tina-trabaho na rin umano ng tanggapan nito na magkaroon ng pormal na turn-over ng mga buwayang ito sa CENRO at ang DENR Regional Office na ang bahala sa pagdadala pabalik o palabas ng isla.

Bagamat isa umano sa ikinokunsidera nilang opsiyon sa ngayon ay panatilihin na lamang sa islang ito ang mga buwaya, subalit ayon kay Samillano, sa ngayon ay wala talagang accredited wildlife farm sa Boracay na siyang pwede mangalaga sa dalawang dambuhalang hayop na ito.

Samantala, hindi pa aniya masasabi nila sa ngayon kung ang buwayang ito sa Boracay ang ipapalit sa namatay na buwayang si Lolong bilang pinakamalaking buwaya sa mundo.

Bagay na pinag-aaralan at ini-imbentaryo na rin umano sa ngayon upang makumpirma.

Mga pasahero sa Boracay, pinayuhan ng BLTMPC na habaan pa ang pasensiya sa pagsakay ng tricycle

Ni Edzel Mainit, YES FM Boracay

Haba ng sinturon o pasensiya pa rin umano ang dapat na baunin ng mga pasahero sa Boracay sa ngayon, ayon sa payo ng BLTMPC.

Sapagkat kulang pa rin talaga ang mga tricycle na pumapasada sa bawat araw sa isla batay sa pag-aamin na ginawa ni BLTMPC General Manager Ryan Tubi sa panayam dito.

Ayon kay Tubi, sa dami talaga ng pasahero lalo na at summer season, dagdagan pa na nanatili pa rin ang “color coding scheme” sa mga tricycle kaya marami parin

umano sa ngayon ang hindi kayang isakay ng pampulikong sasakyan na ito.

Kung saan wala pa aniya silang magagawa sa sitwasyong ito, kundi ang pag-unawa mula sa publiko ang hiling nila.

Aminado din ito na hindi pa nila nasusubukang hilingin muli sa lokal na pamahalaan ng Malay na kaselahin ang color coding scheme.

Sapagkat hinihintay pa rin nila ang “petition letter” mula sa dalawang paaralan sa Boracay na nagsasabing kailangang-kailangan ang serbisyoso ng mga-tricycle na ito, upang magkaroon na rin umano ng lakas ang BLTMPC na umapela sa LGU.

Sa ngayon ay ang paaralan sa Barangay Manoc-manoc pa lang umano ang nakapag-bigay sa kooperatiba ng petition letter at hinihintay pa nila ang magmumula sa Balabag at Yapak.

Dahil ayaw din umano ng mga Board of Directors ng BLTMPC na mapahiya at hindi mapakinggan ng LGU Malay ang kanilang mga apela kung wala naman batayan.

Kung matatandaan, simula nitong nagdaang buwan ng Disyembre ay naramdaman na ang kakulangan ng tricycle sa Boracay, kung saan pahirapan sa pag-abang ng masasakayan lalo na ng mga lokal na pasahero. 

Tubig sa beach ng Boracay, kahit may lumot, safe pa rin sa mga naliligo --- CENRO

Ni Edzel Mainit, YES FM Boracay

Wala umanong dapat na ikabahala ang publiko sa presensiya nga mga berdeng lumot na makikita sa dalampasigan ng Boracay.

Ito ang inihayag ni Boracay CENRO Officer Merza Zamillano sa panayam dito ng YES FM News Center Boracay.

Ito ay kaugnay sa kung may eksplinasyon na ba ang DENR sa nakikitang mga lumot sa beach na ito na siyang paborito pa namang puntahan ng mga turista, dayuhan man o lokal.

Pero ayon dito, ang Environmental Management Bureau o EMB ng DENR lamang umano ang may mandato hinggil sa nasabing usapin upang mag-eksplika.

Subalit ang malinaw aniya dito ngayon ay “safe” o ligtas para sa publiko ang tubig dito.

Aniya, batay sa mga isinagawang pagsisiyasat ng EMB ng DENR Regional Office sa tubig ng Boracay, na-classify bilang Class B ang tubig sa beach na ito na nagsasabing ligtas para sa mga naliligo.

Kung matatandaan, ang presensiya na ito ng mga lumot sa Boracay ay matagal na ring pala-isipan sa mga bista na hindi parin maipaliwanag hanggang sa ngayon kung ano ang sanhi gayong kusa naman itong nawawala  pagkatapos ng Summer Season.

Kung saan para sa mga Boracaynon noon paman umano na hindi pa nakikilala ang islang ito ay may mga lumot na, na siyang pinapaniwalaang nakakatulong sa pag-puti ng mga buhangin dito.

Tatlong opsital sa Aklan makakatanggap ng pondo mula sa DoH ngayong 2013

Ni Edzel Mainit, YES FM Boracay

Bagamat hindi napasama sa mga bibigyan ng pondo ng DoH para sa pagpapaunlad ng Boracay Hospital ngayong taon, tatlong pampublikong hospital naman sa Aklan ang maa-ambunan ng grasya mula sa Department of Health o DoH Western Visayas na nagkakahalaga ng P23.5 million.

Natukoy ang tatlong pagamutan na ito na ang: (1.) Dr. Tumbukon Memorial Hospital o kilala sa tawag na Provincial Hospital, (2.) Ibajay District Hospital, at (3.) Altavas District Hospital.

Ayon sa ulat mula sa Sangguniang Panlalawigan ng Aklan, P3
.5 mula sa kabuuang halaga na ito ay ilalagak para sa pagsasa-ayos ng Provincial Hospital.

Habang ang Ibajay at Altavas District Hospital ay parehong makakatanggap ng tig-dalawang milyong piso para sa pagsasa-ayos ng kanilang mga pasilidad.

Maliban dito naglaan din ng walong milyong piso upang madagdagan pa ang kani-kanilang mga gamit o equipment sa pagamutan ng sa ganoon ay mai-angat din ang kanilang serbisyo.

Kaugnay nito, nagpasa na ang SP Aklan ng Resolusyon na may numero 2013-055 na nagbibigay awtorisasyon kay Aklan Governor Carlito Marquez na pumasok na sa isang Memorandum of Agreement o MOA sa DoH Western Visayas upang agad na maibigay sa pamahalaang probinsiya ang pondong ito.

Biyahe ng bangka sa Boracay hanggang alas-10 lang ng gabi --- PCG Caticlan

Ni Edzel Mainit, YES FM Boracay

24 oras ay may naglalayag na maaaring masakyan patawid ng Boracay.

Pero hindi umano 24/7 ang biyahe ng mga bangka dito ayon kay ni Caticlan Phil. Coast Guard Lt. Commander Jimmy Oliver Vingno.

Sapagkat ang bihaye lamang umano ng mga bangka
ay hanggang alas-10 lang ng gabi o night navigation na siyang nakasaad sa kanilang mga Certificate of Public Conveyance o CPC na ibinigay ng Marina.

Kaya ang dalawang Fast Craft umano ang pwedeng bumiyahe ng 24 oras.

Samantala, mariin nitong sinabi na “bawal na umano ang chartered o pag-arkila sa ng bangka”.

Ito ang nilinaw ni Vingno sa panayam dito.

ito ayd ahil dapat umano ay hindi namimili ng pasahero ang mga bangka lalo na sa night navigation hanggang pasok pa sa oras ng kanilang serbisyo.

Ang pahayag na ito ni Vingno ay bilang sagot din nito sa mga tanong ng publiko kung hanggang anong oras pwedeng may masakyan ang mga pasahero, lalo na ngayong summer season na.

MHO Malay sa Boracay nagpa-alala kontra sa heatstroke

Ni Shiela Casiano at Edzel Mainit, YES FM/Easy Rock Boracay

Bagamat wala pang naitatalang kaso ng heatstroke sa Boracay sa kasalukuyan,  pinayuhan ngayon ng Malay Heath Office o MHO ang publiko lalo na ang turista na mag-ingat kaugnay sa uso at nakakamatay na sakit na ito.

Ito ang sinabi ni MHO Boracay Nurse I Mae Bandiola sa panayam ng 93.5 Easy Rock at YES FM News Center.

Bunsod aniya ito ng nararanasang init ng panahon ngayon, gayong karamihan sa mga turistang dayuhang ito ay nagmula sa malalamig na bansa.

Payo nito, mahalaga umano ang pag-inum ng tubig o mag-water therapy sa panahong ito.

Lalo na at ang mga may edad bente anyos ay nabibiktima na rin ng sakit na ito.

Habang ang mga nasa edad apat napu pataas ay siyang dapat na mag-ingat umano sa sakit na ito dahil lubhang mapanganib para sa kanila ang sobrang init.

Mahalaga din aniya sa ngayon ang pag-gamit ng mga panangga sa init, gaya ng payong at sumbrero maging ang pag- gamit ng sun protection lotions para sa balat.

Mga pasahero, bawal sumakay sa bangkang pang-cargo! --- PCG Caticlan

Ni Edzel Mainit, YES FM Boracay

Umabot na rin umano sa tanggapan at pamunuan ng Philippine Coast Guard o PCG Caticlan ang umano pagsakay ng ilang pasahero sa bangkang pang-cargoes.

Ito ay sa kabila ng mahigpit na implementasyon ng Provincial Ordinance na “one-entry, one-exit” policy sa Boracay.

Pero ayon kay Lt. Commander Jimmy Oliver Vingno, naaksiyunan na rin nila ang sumbong na ito, at sa ginawa nilang pagberipika ay nakahuli umano sila ng ilang pasahero.

Pero ang mga ito ay may-ari aniya ng mga karga na dinadaan sa Cargo Port.

Ganoon pa man, mahigpit aniya itong ipinagbabawal alinsunod sa “one-entry, one-exit” policy, at malinaw na paglabag sa nakasaad sa Certificate of Public Conveyance o CPC na inisyu sa mga bangkang ito ng Marina.

Dahil dito kinausap at pinaalalahanan na umano ni Vingno ang mga may-ari ng bangkang pang-cargoes na huwag na itong gawin pa ulit.