Department of Agriculture tumulong na rin sa Boracay Rehabilitation

Posted June 28, 2018

Maliban sa Inter-agency Task Force, nag-ambag din ngayon ang Department of Agriculture ng sarili nilang inisyatibo para makatulong sa mga apektado ng Boracay closure.

Sa pagbisita kahapon ni Secretary Emmanuel Piñol, hinandogan nila ang mga katutubong ati sa isla ng sampung bangka na  sa pangingisda at kagamitan para sa pagtatanim.

Ayon kay Evangielyn Tamboon tagapagsalita ng Ati Community, malaking tulong ang ipinagkaloob ni Sec. Piñol dahil may pagkukunan na sila ng makakain at tulong para sa kanilang pangkabuhayan.

Aniya, maraming oportunidad na ibinigay sa kanila si Sec. Piñol katulad nalang umano na pwede silang magloan ng pera para sa kanilang negosyong binabalak na siya namang imomonitor ng Department of Agriculture.

Nabatid, hindi lang ang Ati Community ang nais  ng DA dahil lahat ng organisasyon sa isla na apektado ng Boracay Closure ay isinasailalim nila sa orientation para mabigyan ng oportunidad na mabigyan ng ayuda magmula sa DA.

#YestheBestBoracayNews

17 opisyal sa Aklan , sinampahan ng kaso sa Ombudsman

Posted June 27, 2018

Inakyat na ng DILG sa Office of the Ombudsman ang kasong administratibo at paglabag sa RA 3019 o Anti-graft and Corrupt Practices Act laban sa labim-pitong public official sa Aklan at Malay.

Kabilang sa mga kinasuhan ay sina Aklan Governor Florencio Mirafores, Malay Mayor Ceciron Cawaling, Malay Vice-Mayor Abram Sualog at ang walong incumbent Sangguniang Bayan Members.

Kinasuhan din sina Licencing Officer Jen Salsona, MENRO Officer Edgardo Sancho, PENRO Officer Valentin Talabero at ang tatlong Punong Barangay ng Boracay na sina Chona Gabay , Lilibeth Sacapano, at Hector Casidsid.

Sa complaint affidavit na isinumete ni DILG Usec. Epimaco Densing, naghain ito ng mga reklamo para sa kasong graft, gross negligence, at grave misconduct.

Nang matanong ang isang mataas na opisyal ng Malay patungkol sa kaso, aantayin daw muna niya ang pormal na reklamo bago magbigay ng reaksyon.

Kung maaalala, nagsagawa muna ng imbestigasyon ang DILG hinggil sa sinapit ng Boracay at pinasiguro noon ni Densing na may mananagot na mga lokal na opisyal dahil sa kapabayaan at pag-abuso sa kapangyarihan.

#YesTheBestBoracayNEWS

Aklanon, kinoronahang Miss Manila 2018

Posted June 27, 2018

(c) Luz Paton

Tinanghal at kinoronahan bilang Miss Manila 2018 ang tubong Aklan na si Kathleen Paton sa pageant night na ginanap sa Philippine International Convention Center kagabi.

Maliban sa titulo at , naiuwi rin ni Kathleen ang Best in Swimsuit, Miss Photogenic, Miss Cherry Mobile at Miss Derma world.

Nabatid na bago itong kompetisyon ay sumasali na si Paton sa mga beauty contest sa kanilang lugar sa Australia at nitong nakalipas na taon ay kinoronahan din ito bilang Miss Teen International sa Bangkok, Thailand.

Ang ama ni Paton ay isang Australian National at ang ina nito ay si Luz Sinag Paton na tubong Laserna, Nabas, Aklan at minsan na ring nanirahan ang pamilya sa isla ng Boracay.

Ikinagalak ng mga Aklanon ang pagkapanalo ng dalaga na ang ambisyon ay maging susunod na Miss Universe.

Labis naman ang pasasalamat ng ina ni Paton sa lahat ng mga tumulong sa kanyang anak at sumuporta lalo na ang mga fans ni Katleen sa Australia at dito sa Pilipinas.

“Go-signal” inaantay para sa anti-tambay campaign sa Probinsya ng Aklan

Posted June 27, 2018

Inna Carol L. Zambrona, YES THE BEST Boracay

Wala pang go-signal subalit sumasang-ayon si APPO Chief PCR PSUPT Antonio Dizon na ipatupad ang anti-tambay campaign ng Pangulong Rodrigo Duterte sa probinsya ng Aklan.

Aniya, mandato ng PNP na sundin ang kautusan ng pangulo para sa ikakaganda at ikaka-ayos ng komunidad pero sa ngayon  ay wala pa silang natatanggap na kautusan na ipatupad ito sa probinsya.

Paglilinaw pa ni Dizon, pwede itong ipatupad sa mga munisipalidad pero kailangan munang magkaroon ng ordinansa ang Sangguniang Bayan para sa legalidad ng implementasyon.

Naniniwala ito na may mga lokal na batas ang 17 bayan sa Aklan na anumang oras ay pwedeng iutos sa mga kapulisan.

Halimbawa na lamang sa bayan ng Malay at Boracay na maigiting ang kampanya tulad ng “Oplan Bakal” at “Oplan Sita” na iniikot at pinapasok ang mga bars, establisyemento , tambayan, maging ang pagbantay sa kakalsadahin para masawata ang anumang kriminalidad.

Samantala, ng matanong si Malay PNP OIC PCI Ruel Firmo sa usaping ito, mas maganda aniya kung may ordinansa ang bayan ng Malay na ipagbabawal ang inuman sa mga eskinita at pampublikong lugar.

Sa ngayon umano ay sinisita lang muna nila ang mga tambay sa Boracay paglagpas ng alas-onse ng gabi at kung may “disobedience” at nanggugulo ay doon na sila pwedeng mag-aresto.

Sa pangkalahatan, hinihintay na lang ng pamunuan ng Aklan Police Provincial Office ang proposal ng mga munisipalidad kung ipapatupad nila ang Oplan-Tambay Campaign ni Duterte.

#YestheBestBoracayNews

Basurang iniwan sa kasagsagan ng pagdiriwang ng San Juan, pinuna ni SB Graf

Posted June 26, 2018

Ni Inna Carol L. Zambrona, YES THE BEST Boracay

Mariing pinuna ni SB Member Nenette-Graf, Chairman ng Committee on Environment ang mga iniwang basura sa kasagsagan ng pagdiriwang ng San Juan de Bautista nitong Linggo sa Boracay.

Sa naging Privilege Speech ni Graf, labis siyang nadismaya sa kanyang nakita sa area ng Station 3 dahil sa iniwang kalat na basura ng mga tao matapos ang paliligo sa dagat.

Aniya, hindi naman nagkulang sa pagpapa-alala sa publiko kung ano ang mga regulasyon na dapat sundin bago maligo sa kahabaan ng long beach.

“Lack of discipline” ito ang pagsasalarawan ni Sangguniang Bayan Member Frolibar Bautista dahil mayroon umanong ordinansa na bawal uminom at pagdala ng pagkain sa dalampasigan.

Pagtatanong pa ni Bautista, ano ang ginagawa ng mga itinalagang empleyado ng lokal na pamahalaan para magbantay sa kahabaan ng long beach partikular ng mga Beach Guard at monitoring team?

Ito rin ang puna ni SB Member Jupiter Gallenero kung saan ipinunto nito na walang masama sa inaprobahang resolusyon ng SB na pagpayag sa paliligo sa kapiyestahan ni San Juan pero mukhang nakalimutan ng ilang taga-LGU na may obligasyon pa rin sila.

Hirit pa nito na hindi rin kailangan pang i-post sa facebook ganitong klaseng problema dahil pangamba ng konsehal na magdulot ito ng panibagong pagpuna mula sa national government.

Paglilinaw naman ni Vice Mayor Abram Sualog, maging maingat sa mga ipino-post sa facebook at aniya ay maaari naman itong resolbahin sa ibang pamamaraan.

Nabatid, samut-saring reaksyon ang naglalabasan patungkol sa naturang isyu dahil ipinost ito sa “social media”.

Kaugnay nito, sa panayam kay Engr. Jan Michael Tayo Executive Assistant for Environmental Concerns , mayroon silang monitoring na ginagawa subalit “disiplina” lang aniya ang kailangan at dapat maging leksyon ito sa publiko para hindi na ito mauulit.

Sinabi pa nito na ang basura ay hindi problema ng isa o ibang tao kundi problema ng lahat na kailangang resolbahin.

Kung maaalala, isyu sa basura at baha na kumalat sa social media ang isa sa dahilan kung bakit isinailalim sa anim na buwang pagsasara ang Boracay.

#YestheBestBoracayNews

#SBMalayNews