APPO, naka-full alert status dahil sa Marawi Terror Attack

Posted May 26, 2017

Ni Danita Jean A. Pelayo, YES FM Boracay

Naka- full alert status na ang Aklan Provincial Police Office bilang tugon sa krisis na hinaharap ngayon ng Marawi City.

Sa panayam ng himpilang ito kay APPO Public Information Officer SPO1 Nida Gregas, nakahanda na umano ang kanilang hanay at pwede ng i-deploy anumang oras pagkatapos ng nangyaring gulo sa Mindanao Region.

Nais ng Aklan Police na masiguro ang seguridad at kaayusan kung saan asahan na umano ang mga gagawing checkpoints para sa preventive security measures.

Dagdag pa ni Gregas, nais ng pambansang pulisya na masiguro na mas mapatibay ang vital installations at key economic points, intensified security patrols, intelligence monitoring, close coordination katuwang ang AFP counterparts at iba pang law enforcement agencies para sa mga update ng sitwasyon.

Samantala, ipinaaabot nito sa publiko na maging vigilant, iwasan din umano ang pagpo-post ng mga impormasyon sa social media habang hindi pa ito napapatunayan ng sa ganun ay maiwasan ang public panic at agad na mag-report sa mga hanay ng kapulisan sakaling may mapansing kahinahinalang galaw o personalidad.

Magugunitang dahil sa pag-atake ng mga teroristang grupo ng Maute na pinaniniwalaang kaanib na ng ISIS ay nagdeklara si President Duterte ng Martial Law sa Mindanao.

Boracay, tututukan ng bagong DENR Chief

Posted May 26, 2017

Ni Danita Jean A. Pelayo, YES FM Boracay

Tututukan ng bagong talagang DENR Chief na si Environment Secretary Roy Cimatu ang isla ng Boracay para i-monitor ang kalidad ng tubig at waste management ng isla.

Ayon kay Cimatu, ang problema sa environment ang siyang pangunahin niyang aayusin sa mga tourists destination katulad ng Boracay kung saan tututukan niya ang pamamahala ng solid waste sa kilalang top attraction sa bansa.

Aniya, ang batas ay nariyan na at ang kailangan na lamang dito ay implementasyon kung saan may direktiba na rin umano ito sa DENR Officials ng Western Visayas ang pagbibigay sa kanya ng weekly reports kaugnay sa kalidad ng tubig sa Boracay.

Kaugnay nito, tutulong naman ang naturang ahensya sa Lokal na Pamahalaan ng Malay ukol sa isyu ng Solid Waste Management.

Nabatid na kilala ang 1,032-hectare island na ito dahil sa mala-polbong buhangin at ang malinis na dagat na dinarayo ng mga turista.

Kung matatandaan, nahaharap ngayon ang Boracay sa isyu ng basura at waste water management.

Boracay PNP, naka-full alert status hinggil sa pag-atake ng Maute Group sa Mindanao

Posted May 25, 2017

Ni Inna Carol L. Zambrona, YES THE BEST Boracay

Photo Credit: Boracay PNP

Dahil sa nangyaring pang-aatake ng Maute Group sa Marawi City sa Mindanao, naka-full alert status ngayon ang hanay ng mga kapulisan ng probinsya partikular sa isla ng Boracay.

Sa panayam kay Deputy Director Police Inspector Jose Mark Gesulga ng Boracay PNP, kahit wala umanong sightings dito sa probinsya ay gumagawa sila ng hakbang upang ipaalam sa mga tao kung ano ang mga dapat gawin ng dahil sa nangyayaring pag-atake sa Marawi City.

Ani Gesulga, nagkaroon na umano sila ng pakikipag-ugnayan sa Muslim Community para sa mas mabilis na koordinasyon ng otoridad sakaling may mapansing mga kahina-hinalang elemento sa paligid.

Samantala, sa kanilang pag-uusap ni Senior Superintendent Deputy Regional Director for Operations at Chief of PNP Regional Drug Enforcement Unit (FDEU) Christopher Tambungan ng PRO-6, sa tulong umano ng media ay madaling maipababatid sa publiko ang kanilang security measures at ng sa gayon ay maiwasan ang pagpasok ng mga may masasamang balakin.

Kaugnay nito, malaki umanong tulong ang resulosyon sa pag-buo ng “Joint Task Force Boracay” nito lamang nakaraang linggo dahil ito ay may kaugnayan upang masiguro, maging maagap at handa ang Boracay at Malay sa anumang banta sa seguridad at para pagtibayin ang kaalaman ng publiko laban sa mga taong may masamang binabalak.

Magpupulong ngayon ang Boracay PNP at iba pang security forces ng Task Force Boracay upang pag-uusapan ang karagdagang hakbang na gagawin lalo at hindi pa humuhupa ang tensyon sa Marawi City.

Construction sa Reclaimed Area, kinuwestiyon sa SB Session

Posted May 25, 2017

Ni Danita Jean A. Pelayo, YES THE BEST Boracay

Nakatakdang ipatawag sa Sangguniang Bayan Session ng Malay ang nasa likod ng konstruksyon ng piling foundation sa reclaimed area sa Caticlan.

Sa ginanap na 15^th Regular Session ng SB Malay naging laman ng Privilege Speech ni Frolibar Bautista ang tungkol sa nabanggit na isyu.

Nabatid na ang nakalaan lamang na sukat na pinayagan para sa reclamation ay  2.6 Hectares kung saan kinuwestiyon ni Bautista ang konstruksyong na nagyayari na wala man lamang umanong abiso o endorsement mula sa Lokal na Pamahalaan ng Malay.

Sa deliberasyon ay binasa ni SB Gallenero ang ilan sa mga nilalaman ng resolution sa gitna ng LGU-Malay at probinsya kung saan dito ibabase kung may nilabag ang Provncial Government o Jettyport Administration.

Sa kasalukuyan, tuloy ang pagbabaon o piling sa reclaimed area na posibleng gawing rampa para sa bangka ng CBTMPC at mga sasakyang pandagat na dadaong doon.

Magugunitang naging topiko na ang isyung ito sa mga nakalipas na taon kung saan ang proyektong ito umano ay isang expansion lamang para mas mapaganda ang pasilidad na ilalagay sa reclaimed area mas maging maayos ang serbisyo sa mga turista subalit parang nagkaroon pa ng karagdagang expansion.

Ani Pagsuguiron, imbitahan umano ang Jetty Port Administrator nang sa ganun ay maliwanagan ang lahat sa naturang isyu.

Samantala, napagkasunduan naman na sa susunod na sesyon ay ipapatawag ang Engineering, Zoning Office, BFI, Jetty Port Administrator at representante ng Provincial Government.

63 blood bags, nakolekta sa bloodletting activity ng BFI

Posted May 24, 2017

Ni Danita Jean A. Pelayo, YES FM Boracay

Naging matagumpay ang ginanap ng Blood Letting Activity ng BFI nitong linggo bilang bahagi ng kanilang 20^th anniversary.

Nakolekta sa nasabing aktibidad ng 63 blood bags o katumbas ng 28,350 ml na galing sa mga blood donors.

Nabatid na ang "Bleed for a Cause” ay isang inisyatibo ng Boracay Foundation Incorporated (BFI) katuwang ang Philippine Red Cross-Boracay Malay Chapter kung saan layun nitong itaas ang awareness ng kahalagahan ng blood donation na makatutulong sa mga pasyente at maging mga turista na nangangailangang salinan ng dugo.

Samantala, ang BFI ay binubuo naman ng mahigit sa 150 miyembro ng mga establisyemenmto sa isla kasama na ang mga resorts, hotels, restaurants, water sports stations, airlines, banks, island organizations, residents, at expatriates.

Establisyemento sa Boracay, ipapatawag re: Waste Disposal

Posted May 24, 2017

Ni Danita Jean Pelayo, YES FM Boracay

Balak ngayong ipatawag ang atensyon ng ilang establisyemento kasama na ang BIWC kaugnay sa mga bumabahang  dulot ng tagas mula sa drainage system.

Nag-ugat ang usaping ito ng maging laman ng Privelege Speech ni SB Dante Pagsuguiron ang tungkol sa isang establisyemento sa Balabag Area kung saan ay sentro na pinupuntahan ng mga turista.

Ani Pagsuguiron, nagsisilbing sentro na umano na pasyalan ng mga turista ang establisyementong ito subalit makikita naman dito ang pagbaha ng nasabing lugar.

Kaugnay nito, nais ni SB Jupiter Gallenero na ipatawag ang atensyon ng Boracay Island Water Company dahil sila ang in-charge sa sewerage at ang may alam sa STP.

Kapansin-pansin umano na used water na ang lumalabas at posibleng hindi konektado sa sewer dahilan kung bakit tumatagas at kung minsan ay may kasama pang hindi kanai-nais na amoy.

Samantala, napagkasunduan ng SB na pagpaliwanagin ang mga kinatawan ng mga ipapatawag para sa mas malinaw na pag-resolba sa isyu.

CCTV cameras, paiigtingin pa sa Boracay

Posted May 24, 2017

Ni Danita Jean A. Pelayo, YES FM Boracay

Naging usapin sa ginanap ng 15th Regular Session ng SB Malay ang tungkol sa pagkabit ng mga CCTV sa lahat ng mga crime prone areas sa isla ng Boracay.

Ayon kay Executive Officer IV Rowen Aguirre, mayroon ng kabuuang 18 na mga CCTV Cameras na ikakabit para sa dagdag na seguridad sa isla kung saan ang isa rito ay nasa Mainland.

Ang security cameras na ito ay bahagi ng Phase 2 project ng lokal na pamahalaan ng Malay na may kabuuang budget na P6 million.

Layun nito na mamonitor ang matataong lugar para maagap na matugunan sakaling may insidenteng nagyayari sa isla.

Suhestiyon naman ng mga kinatawan ng SB na dapat dagdagan pa ang mga CCTV Cameras ng mas mapaigting pa ang seguridad at monitoring sa isla.

Dagdag pa ni Aguirre, nakatuon na umano ang LGU-Malay sa pag-activate ng isang Operation Center na nakabase sa isla para sa mabilis na koordinasyon maging sa Emergency Team.

Samantala, magiging malaking tulong din ang mga CCTV sa pagresolba ng anumang krimen na maaaring gamitin ng otoridad.

“No Id, No Entry” sa Caticlan at Cagban Port, naging usapin sa session ng SB-Malay

Posted May 24, 2017

Ni Inna Carol L. Zambrona, YES FM Boracay

“No ID, No Entry”.

Ito ang naging pang-bungad sa Privilege Speech ni Sangguniang Bayan Member Nenette -Graf sa ika- 16^th Regular Session ng SB-Malay nitong Martes.

Ani Graf, incompetent umano ang mga empleyado sa dalawang port at kahit umano Malaynon ay kinukwestyon kahit nagsasalita na ng Aklanon sa tuwing dadaan at kukuha ng gate pass sa Jetty Port at Cagban Port.

Komento naman ni SB Jupiter Gallero, dapat umanong turuan ang mga clerk kung paano pakitunguhan ang mga bisita dahil minsan ay nakaka-insulto pa umano kung makatitig ang mga nagbabantay dito.

Sa suhestiyon ni SB Pagsuguiron, kailangan na imbitahan si Jettyport Administrator Niven Maquirang para pagpaliwanagin dahil kung ID lang naman ang pagbabasehan ay pwede rin umanong magpagawa ng ID sa Recto para lang makapasok sa Jetty Port.

Kung si SB Bautista naman ang tatanungin, mariing namang sinabi nito na ang “batas ay batas” at sundin dapat kung ano ang nakalagay sa ordinansa at dapat maging practice ito sa mga tao dahil ito ang tama.

Nakita rin ni Bautista na maaring masolusyonan ang problema kung tutulong ang LGU-Malay sa bawat Barangay na magkaroon ng makina na gagamitin para sa pag-issue ng Baranggay ID.

Sa ganito umanong paraan ay iwas na sa abala at malalaman na ang pagkakakilanlan ng tao kung ito ba ay Malaynon.

Kaugnay nito, sinang-ayunan ni Vice Mayor Abram Sualog na tama umano ang sinabi ni Bautista kaya nais niya ngayong hikayatin ang mga Barangay na mag-isyu ng Barangay ID.

DTI Aklan, mino-monitor na ang presyo ng mga school supplies

Posted May 24, 2017

Ni Inna Carol L. Zambrona, YES FM Boracay

Dalawang linggo bago ang pagbubukas ng klase, nagsimula na ang kaliwa’t kanang preparasyon para sa pagbabalik-eskuwela.

Todo bantay na ngayon ang Department of Trade and Industry-Aklan sa pag-monitor ng mga bilihin partikular sa school supplies ng mga estudyanteng mag-aaral.

Ayon kay OIC DTI-Aklan Ma. Carmen Iturralde, nagsisimula na ang kanilang monitoring sa mga nagbebenta ng school supplies sa probinsya subalit hindi pa niya alam kung may mga pagbaba o pagtaas sa presyo.

Samantala, makikita naman sa website na www.dti.gov.ph. ang presyo ng mga bilihin para sa mga gamit sa paaralan na siyang malaking tulong sakaling sila ay pumunta sa mga pamilihan.

Dito umano nakapaloob na hindi lang suggested retail price ang tingnan kundi pati na ang quality nito kagaya nalang nang sa pad, sa notebook, tingnan ang number of pages, labeling, name ng manufacturer at brand nito.

Dagdag pa dito tingnan din umano ang mga bibilhan na gamit kung may pangalang “Non Toxic”.

Kaugnay nito, kahapon araw ng Martes, nagsimula na ang kanilang “Balik Eskwela Diskwentro Sale” sa Covered Court ng Altavas, kasunod nito bukas May 25 sa Covered Court naman ng Nabas at May 26 sa Tangalan Public Market ng Tangalan.

Itong tatlong araw na Diskwentro Sale ng DTI-Aklan ay para matulungan ang mga magulang at makatipid sa pagbili ng gamit sa eskwela ngayong nalalapit na pasukan.