Seguridad sa Kalibo Ati-Atihan Festival 2015, kasado na

Posted January 10, 2015

Ni Gloria Villas, YES FM Boracay

Tiniyak ngayon ng Aklan Police Provincial Office (APPO) at Kalibo PNP na all set na ang kanilang security measures na ipatutupad sa Kalibo Ati-Atihan Festival 2015 celebration.

Ayon kay Kalibo Chief Police Supt. Pedro Enriquez, partikular na tutukan ng security forces ang fluvial at foot procession.

Masusi na rin umanong nakikipagkoordinasyon ang mga ito sa AFP command at iba pang force multipliers para sa  pagpapanatili ng peace and order sa nasabing makasaysayang okasyon.

Sinabi din nito na magpapakalat din umano ang APPO ng monitoring team at dinagdagan na ang police visibility sa mga matataong lugar upang maiwasan ang kaso ng mga pandurukot.

Samantala, nanawagan din ang pulisya sa publiko na mag-ingat at iwasan na magdala ng maraming pera at saka magsuot ng mamahaling alahas upang hindi mabiktima ng mga isnatser.

Inaasahan na marami na naman ang dadalo na mga deboto sa kapistahan ni Sr. Santo Niño sa Kalibo na ipinagdiriwang tuwing ika-tatlong linggo ng buwan ng Enero.

Kalibo Sto. Niño Ati-Atihan Festival umarangkada na

Posted January 10, 2015

Ni Jay-ar M. Arante, YES FM Boracay

Umarangkada na kahapon ang inaabangang selebrasyon ng Santo Niño Ati-Atihan Festival 2015 sa bayan ng Kalibo sa lalawigan ng Aklan.

Nagsimula ito kahapon Enero 9 at magtatapos sa Enero 18 kung saan isang makulay at masayang selebrasyon ang inaasahang masasaksihan sa araw ng Sabado at Linggo.

Nabatid na sa sampung araw na selebrasyon ibat-ibang okasyon at patimpalak ang isasagawa ng Local Government Unit ng Kalibo kasama ang Kalibo Santo Niño Foundation Inc. (KASAFI) at ang Provincial Government ng Aklan.

Kabilang rito ang isinagawang koronasyon ng Mutya it Kalibo Ati-Atihan 2015 kagabi kasama na ang isasagawang sad-dad o street dancing ng ibat-ibang departamento, organisayon, paaralan at mga establisyemento sa Aklan at ang Higante at Festival contest sa darating na Huwebes kasama ang lahat ng LGU sa probinsya .

Samantala, bilang highlight ng nasabing okasyon ngayong darating na Sabado at Linggo, magaganap naman ang street competition tampok ang mahigit sa 20 mga kalahok na tribo para sa Ati-Atihan contest.

Kaugnay nito inaasahang libo-libong tao at deboto ni Senior Santo Niño ang dadalo sa sikat na Ati-Atihan Festival at tanyag na “mother of all festival” sa bansa.

Babae sa Boracay nabiktima ng text scam, mahigit 70 libong piso natangay

Posted January 10, 2015

Ni Bert Dalida, YES FM Boracay

Isang babae sa Boracay ang natangayan umano ng mahigit 70 libong piso dahil sa text scam.

Sa report ng Boracay PNP, nakatanggap ng text message ang biktima nitong nakaraang December 30, 2014 na nanalo umano ito ng P 780, 000.00.

Kaagad namang tinawagan ng babae ang numero ng nag-text sa kanya kung saan isang nagpakilalang Atty. Ricardo Rivera na staff umano ng Central Bank Office ang kanyang nakausap.

Ayon sa nagpakilalang taga Central Bank Office, nagpapa-raffle ang Central Bank kada sampung taon at ang numero nito ang nanalo.

Ilang saglit pa, isang Grace Lopez na head personnel umano ng Smart Padala ang tumawag sa kanyang cell phone at inutusan itong magpadala ng P 2, 800.00 bilang raffle payment.

Ayon pa sa report, kabuuang P 72, 000.00 ang natangay ng mga suspek mula sa biktima.

Eleganteng barko ng MS Costa Victoria, dadaong sa Boracay ngayong Lunes

Posted January 10, 2015

Ni Jay-ar M. Arante, YES FM Boracay

Ngayong Lunes na muling dadaong sa isla ng Boracay ang MS Costa Victoria.

Sakay ng eleganteng barko ang 2, 394 na pasahero at 800 na crew.

Ayon kay Special Operations Officer III Jean Pontero ng Catilcan Jetty Port, dadaong ang bandang alas-12 ng tanghali at aalis naman bandang alas-8 ng gabi.

Sinabi din nito na wala umanong maiden call na mangyayari sa pagbisita ng nasabing cruise ship dahil sa makailang beses na rin itong bumisita sa isla.

Sa kabila nito mas paiigtingin din umano nila ang kanilang gagawing seguridad sa mga lugar na bibisitahin ng sakay ng mga cruise ship katulad ng Mt. Luho, Puka Beach, D’Mall at Ati-Village.

Nabatid na ang MS Costa Victoria ay kilala bilang isa sa mga eleganteng barko na dumaong dito sa Boracay dahil sa angkin nitong ganda at mga pasilidad sa loob.

Samantala, karamihan sa mga pasahero ay mga European at isang daang Chinese passengers habang 20 porsyento sa 800 crew ay mga pinoy.

Boat man, natagpuang patay sa Unidos, Nabas, Aklan

Posted January 10, 2015

Ni Bert Dalida, YES FM Boracay

Isang boatman ang natagpuang patay sa Sitio Sumagawsaw, Barangay Unidos, Nabas, Aklan kagabi.

Ayon kay SPO4 Crispin Calzado ng Nabas PNP, may gunshot wound o tama ng bala ng baril sa ibabang bahagi ng ulo ang biktimang si Mike Malacad, 29 anyos ng San Jose Romblon nang matagpuan sa nasabing lugar.

Base sa inisyal na imbistigasyon, umaandar pa at naka side stand ang motorsiklo ng biktima nang maratnan ng mga taga Nabas PNP.

Ayon pa kay Calzado, malayo ang mga kabahayan sa lugar kung kaya’t walang residente doon ang nakarinig ng putok o nakasaksi sa insidente.

Samantala, base pa sa imbistigasyon, hinatid ng biktima ang hiniram nitong motorsiklo sa Tagaroroc, Nabas, Aklan subali’t maaaring tinambangan umano ito at binaril.

Napag-alaman din na nagdedeliver ng coco lumber sa isla ng Boracay ang biktima.

Traffic re-routing para sa Ati-Atihan 2015 sa Boracay, ipinaalala ng MAP

Posted January 10, 2015

Ni Gloria Villas, YES FM Boracay

Walang grupong dadaan sa main road.

Ito ang paalala ng Municipal Auxiliary Police (MAP) Boracay para sa Boracay Sto. Niño Ati-Atihan Festival sa Linggo, kasabay ng inilabas na traffic re-routing.

Ayon kay, Municipal Auxiliary Police Chief Rommel Salsona, galing plaza lalabas sa likod at dadaan ang mga grupo papuntang mainroad papuntang Willy’s Beach Front.

Iginiit din nito na one way lamang at walang magsasalubong at ganito rin ang ruta pagbalik.

Para naman sa mga sasakyan at tracking, sinabi ni Salsona na nagpadala na rin ng notice ang BFI sa kanilang mga myembro, kung saan iiwasan anya ang traffic.

Mas maganda na rin umano para sa mga che-check out na mag-check out na nang maaga upang hindi maipit sa daloy ng trapiko.

Kaugnay nito, ipinaalala din ni Salsona na iwasan ang traffic o ruta sa Balabag Plaza dahil sa inaasahang pagdagsa ng maraming grupo ngayong taon.

Estonian national at kasamang bading, kalaboso dahil sa pag-iskandalo sa isang bar sa Boracay

Posted January 9, 2015

Ni Gloria Villas, YES FM Boracay

Kalaboso ang isang Estonian national at kasama nitong bading matapos na mag-iskandalo sa isang bar sa Boracay kaninang madaling araw.

Ayon sa blotter report ng Boracay Tourist Assistance Center (BTAC), nagsimula ang insidente nang inumin umano ng lasing na Estonian national na si Eduard Raats, 55 anyos ang mga inumin ng mga guest doon.

Nang-asar din umano ito ng ilang customer ng bar, kung kaya’t nilapitan na ito ng sekyu at pinayuhang lumabas.

Subalit sa halip na sumunod, nairita pa ang nasabing Estonian national at patuloy sa kanyang pangungulit.  

Nagreklamo din ang waitress ng nasabing bar nang sinubukan niya umano itong hipuan.

Nang paalis na, sinira pa ng suspek at kasama nitong bading ang pinto ng bar.

Nang arestuhin naman ng mga pulis ay hindi na halos makatayo ang mga ito matapos bumagsak sa kalsada dahil sa kalasingan.

Nang isailalim naman sa medical checkup sa ospital ay nagpatuloy parin umano ang dalawa sa pagwawala kung kaya’t nasira ang isang upuan ng pagamutan.

Samantala, sinampahan naman ng kasong Alarm and Scandal at Malicious Mischief ng Administrative Head ang dalawa.

Sentro ng pagdiriwang ng Santo Niño Ati-atihan sa Linggo, ipinaalala ng HRP Boracay

Posted January 9, 2015

Ni Bert Dalida, YES FM Boracay

Talagang masaya ang pagdiriwang ng Ati-atihan dito sa Aklan lalo na sa Boracay.

Malaya kasing nakakasali sa sadsad o merry making at street dancing ang sinuman.

Maliban dito, malaya rin ang lahat na magsuot ng anumang costume ang sinuman lamang maipakita ang pakikiisa sa selebrasyon.

Subali’t nagpaalala ngayon ang HRP Boracay sa lahat ng mga partisipante ng Boracay Ati-atihan na huwag makalimot sa sentro ng selebrasyon.

Ayon kay HRP o Holy Rosary Parish Boracay Team Moderator Fr. Arnold Crisostomo, may mga indibidwal o maging grupong sumasali sa Ati-atihan na taliwas sa selebrasyon at debosyon sa Santo Niño.

Sa kanyang pahayag, sinabi ni father Nonoy na may mga costumes na hindi nakakatulong sa pagpapahalaga sa pananampalataya at pagpapaala tungkol sa Diyos.

Kaugnay pa nito, hindi lamang ang tungkol sa mga costume ang ipinaalala ni Crisostomo kungdi ang pagdalo dapat sa mga misa na gaganapin para sa Boracay Ati-atihan.

Samantala, kapansin-pansin na may mga indibidwal o grupo na nagsusuot ng nakakatakot kung hindi man malalaswang costume at nakikilahok sa Ati-atihan, bagay na ikinadismaya din ng mga debotong Katoliko.

Supreme Court Chief Justices sa ibat-ibang bansa bibisita sa Boracay ngayong Marso

Posted January 9, 2015

Ni Jay-ar M. Arante, YES FM Boracay

Nakatakdang bumisita sa Boracay ang mga Supreme Court Chief Justices mula sa ibat-ibang bansa para dumalo sa isang pagpupulong kaugnay sa ASEAN integration.

Ito ang sinabi ni SB member Rowen Aguirre sa ginanap na 1^st regular SB Session ng Malay nitong araw ng Martes.

Aniya, inaasahang tutungo ang mga ito sa Boracay ngayong darating na Marso 1-3 kung saan mayroon umano silang mga pipirmahang dokumento na may kaugnayan sa nagpapatuloy na ASEAN integration.

Samantala, inaasahan umanong aabot sa lima hanggang anim na raang ka tao ang dadalo para dito na gaganapin naman sa Shangri-la Boracay.

Kaugnay nito kailangan umano nilang maghanda para sa kanilang ilalatag na seguridad sa lahat ng mga pangunahing lugar sa Boracay.

Sa kabilang banda sa darating naman ng buwan ng Mayo 10-26, 2015 gaganapin ang Asia Pacific Economic Cooperation sa Boracay.

Russian National, ninakawan sa loob ng restaurant sa Boracay, 2 suspek huli sa CCTV

Posted January 8, 2015

Ni Jay-ar M. Arante, YES FM Boracay

Huli sa CCTV camera ang dalawang suspek na pinaniniwalaang nagnakaw ng wallet at passport ng isang Russian National sa loob ng isang restaurant sa Boracay kaninang alas-3 ng hapon.

Sumbong ng 32-anyos na biktimang lalaki sa Boracay PNP kumakain umano sila sa loob ng restaurant kung saan isinukbit nito ang kanyang bag sa likod ng kanyang upuan.

Hindi umano nito na malayan na ninanakawan na pala siya kung saan nakuha mula sa biktima ang kanyang wallet na naglalaman ng ilang libong pesong pera kasama na ang kanyang passport na nakalagay sa loob ng nasabing bag.

Ayon naman sa naka saksing waitress may dalawa umanong lalaki ang naka upo sa likod ng inuukupahang lamesa ng biktima na kung saan ay nag-order din ang mga ito ng pagkain.

Nabatid na agad namang nawala ang mga sinasabing suspek matapos na umpisang maghanap ang biktima sa kanyang mga nawawalang gamit.

Dahil dito agad na sinuri ng management ng restaurant ang kanilang CCTV footage at doon nga ay kitang-kita ang ginawang pagnanakaw ng dalawang suspek sa bag ng biktima.

Sa ngayon ay patuloy na pinag-aaralan ng Boracay PNP Station ang kuha sa camera para sa agarang ikadarakip ng dalawang suspek.

Samantala, balak naman ng himpilan ng pulisya na bigyan ng blotter certification ang biktima bilang pamalit sa kanyang nawawalang passport para ito ay makabalik sa kanilang bansa ngayong darating na Miyerkules.

Mga empleyado sa Boracay, maaari nang magproseso ng PESO I.D sa Municipal Action Center

Posted January 8, 2015

Ni Gloria Villas, YES FM Boracay

Magandang balita sa mga trabahador sa Boracay!

Epektibo nitong nakaraang ika-5 ng Enero, lahat ng mga empleyado at mga trabaho sa Boracay, maging foreign o local, ay pwede nang mag-process ng kanilang PESO ID sa Malay Municipal Action Center MPDC Zoning Department.

Sa mga kukuha, hanapin lamang si Hoven Tayco o tumawag sa numero 288-2016 o sa cellphone number 09284135787 o 09177215366.

Samantala, para naman sa mga kukuha ng endorsement sa Malay Tourism Office, narito ang mga kailangan.

FOR AGENCY/ASSN./COOP: Endorsement from Agency/Association/Cooperative.

FOR INDIVIDUAL/ESTABLISHMENTS/TRAVEL & OPERATORS: Certification of Employment.

FOR FOREIGN TOUR GUIDES: Working Permits/Visa and other related documents, Municipal Tourism Front Liners’ Enhancement Program Certificate (Executive Order No. 011, Series of 2012), Accomplished Municipal Tourism Front liner’s Form/Profile (Municipal Ordinance No. 150, Series of 2002).

Requirements for PESO ID are: Individual Occupational Permit, Local/Foreign Tourist Guide, Coordinator & Escort and Foreign Tour Guide & Coordinators.