Drainage, sanhi ng maitim na tubig baha sa mga kalsada - Sualog

Posted March 25, 2017

Ni Danita Jean A. Pelayo, YES FM Boracay

Sa 10^th Regular Session nitong Martes ay pinuna ni Vice Mayor Abram Sualog ang problema sa drainage sa isla ng Boracay.

Inilarawan ni Sualog ang nakikitang maitim na tubig na lumalabas sa drainage system  na posibleng epekto ng illegal connection.

Ang drainage raw na ito ay naglalabas ng maruming tubig na nagiging sanhi ng pagbaha sa mga kalsada maging sa Bolabog area.

Dahil dito, nais ngayon ng Bise-Alkalde  na maagapan na dapat ito ng Tourism Infrastructure and Enterprise Zone Authority (TIEZA) kung hindi man ay ibigay na lamang ito sa Boracay Island Water Company (BIWC) para sa mabilisang aksyon.

Kung maalala, inilatag na ng TIEZA ang unang bahagi ng proyekto ng drainage system sa Bolabog  na bahagi ng Phase 2  para hindi na bahain ang nasabing lugar kabilang ang Boracay National High School.

Sa paliwanag ng TIEZA, nasa bidding process na ito at inaantay na lamang umano kung sino ang contractor na tatrabaho sa proyekto na inaasahang maumpisahan bago ang panahon ng tag-ulan.

SP Aklan humiling sa DepEd na pondohan ang Division Office ng Aklan

Posted March 24, 2017

Ni Inna Carol L. Zambrona, YES FM Boracay

Isang resulosyon ngayon ang ipinasa ng Sangguniang Panlalawigan (SP) Aklan na hingin kay Education Secretary Leonor Briones na pondohan ang pag-papaayos ng Division Office ng DepEd Aklan.

Sa session nitong Lunes, binanggit ni Emmanuel Soviet Russia Dela Cruz Committee Chairman on Education dapat ng matapos ang ginagawang konstruksyon ng bagong Division Office sa Numancia ng sa gayon ay magamit na ito ng mga estudyante.

Dagdag pa nito, na parami na ng parami ang mga estudyante kaya dapat ang gusaling ito ay mapapakinabangan na sa madaling panahon.

Kaugnay nito, nakapaloob sa naturang resulosyon na una nang naglaan ng pondo ang probinsya na nagkakahala ng P 11 milyon kung saan nagbigay rin ng mahigit P 2,700,000 na halaga si dating Vice-Governor Calizo Quimpo para dito subalit hindi parin ito sapat.

Samantala, hinihintay nalang nila ngayon ang tugon ni Secretary Briones sa naturang kahilingan.

Probinsya ng Aklan, deklarado na bilang Retiree Friendly Province

Posted March 24, 2017

Ni Inna Carol L. Zambrona, YES FM Boracay

Aprubado na ang resulosyong inihain sa Sanguniang Panlalawigan (SP) Aklan may kaugnayan sa pagkilala sa probinsya ng Aklan bilang Retirement Area or Deemed as Retire-Friendly Province.

Sa ginanap na SP Session nitong Lunes, inaprubahan ang resulosyong ini-akda ni Vice -Governor Reynaldo Quimpo at Sangguniang Panlalawigan Member Immanuel Sodusta na layuning buksan ang pinto ng probinsya para sa mga retirees.

Sa resolusyon, nakasaad na ang magandang klima, trabaho at kultura ng mga Aklanon ang siyang dahilan na angkop ang Aklan para sa mga retirado.

Umaayon din ang kwalipikasyon ng probinsya sa kampanya Philippine Retirement Authority para sa mga retiradong kababayan natin dito at sa abroad dahilan na posibleng magkaroon ng PRA Satellite Office dito.

Samantala,  ang pagdeklara na retire-friendly area ay isa ring hakbang upang makapag-imbita ng mga negosyante at makapagbukas pa ng maraming trabaho sa probinsya.

Mga Water Providers sa bayan ng Malay, humarap sa Sangguniang Bayan

Posted March 24, 2017

Ni Danita Jean A. Pelayo, YES FM Boracay

Muling naging panauhin sa ginanap na 10^th Regular Session nitong Martes ang mga nagsusuplay ng tubig sa isla ng Boracay at sa Mainland Malay.

Ang pagharap ng Malay Water District at BIWC ay para masiguro ng
LGU-Malay ang maayos na serbisyo ng dalawang kumpanya lalo na sa tubig na maiinom.

Sa nakalipas na sesyon kasi ay tumanggap ng reklamo si LIGA President Juliet Aron na hindi raw maayos at nawawalan ng suplay ang Malay Water District.

Pagpuna ni SB Nenette Aguirre-Graf, hanggang ngayon ay hindi pa rin kaya ng MWD na magsuplay ng potable water dahil hindi pa rin ganoon kaganda ang kalidad ng tubig na lumalabas sa mga gripo ng mga taga-Malay.

Dagdag pa ng konsehala, ang problemang ito ng Malay Water District ay nananatili pa ring problema hanggang sa ngayon.

Dahil dito, minamadali ngayon na malagdaan ng Tourism Infrastructure and Enterprise Zone Authority (TIEZA) ang Memorandum of Agreement sa Malay Water District para payagan na magsuplay din ng tubig ang Boracay Island Water Company (BIWC) sa Mainland.

Inusisa naman ni SB Fromy Bautista kung bakit hanggang ngayon ay hindi pa rin nalalagdaan  ang MOA na napag- alaman na noong buwan pa ng Oktubre ng nakalipas na taon ang nasabing kasunduan.

Paglilinaw ng representante ng TIEZA na si Michelle Rivera na may mga babaguhin pa sa provision na nakalathala sa kontrata na dapat munang ayusin bago selyuhan ang MOA para sa paglagda ni Mayor Cawaling.

Samantala, pinaabot naman ni Vice Mayor Sualog na sana ay mabigyan na ng agarang hakbang ang problemang ito dahil ang consumer ang napeperwisyo.

Dr. Salaver nagbigay paalala sa pag-selebra ng Rabies Awareness Month

Posted March 23, 2017

Ni Danita Jean A. Pelayo, YES FM Boracay

“Pagiging responsable ng mga pet owners”.

Ito ang unang hakbang ayon sa Malay Health Office para maiwasan ang mga insidente ng rabies sa paggunita ng Rabies Awareness Month na may temang “Rabies Iwasan, Alaga'y Pabakunahan” ngayong buwan ng Marso.

Sa panayam ng himpilang ito kay Municipal Health Officer Head Dr. Adrian Salaver, nabanggit nito na  hindi lamang umano dapat maging aware sa rabies sa buwan ng Marso kundi sa buong taon.

Aniya, kailangan na maging responsible ng mga pet owners kung saan dapat na alagaan, pakainin, pabakunahan at paliguan ang mga alaga nilang hayop katulad ng pag- aaalaga sa tao.

Sinabi din nito na na hindi dapat ipagsawalang-bahala ang kagat ng mga hayop dahil ang rabies ay nakamamatay kung kaya’t agad itong hugasan ng running water at linisin ng sabon bilang paunang lunas.

Kaugnay nito, nabanggit din ni Salaver na ang mga animal bite center sa bayan ng Ibajay at Kalibo ay bukas para sa pagbigay ng lunas sa mga nabiktima ng rabies.

Nais din na ipaabot ni Dr. Salaver sa kinauukulan ang pagpapatypad ng ordinansa tungkol sa mga pagala-galang mga aso na nakikita sa Beachfront na kadalasan ay nanghahabol.

Samantala, nananatiling Rabies Free pa rin ang Bayan ng Malay.

MRF ng Balabag at Yapak, balak i-reactivate

Posted March 23, 2017

Ni Inna Carol L. Zambrona, YES FM Boracay

Inaayos na ngayon ang Materials Recovery Facilities o (MRF) ng Balabag at Yapak para makatulong sa pag-manage ng basura ng Boracay.

Sa panayam kay Committee Chairman on Environmental Protection SB Nenette Aguirre-Graf, ang pag-activate ng MRF sa Balabag at Yapak ay makakatulong umano para maibsan ang volume ng basura na tinatambak ngayon s Centralized MRF ng Manoc-manoc.

Sa ganitong paraan, tuloy-tuloy umano ang paghakot ng mga nakatambak doon na basura lalo na ng mga residual waste papuntang sanitary landfill ng Malay.

Nabatid kasi noon na hindi raw nahahakot ng Balabag at Yapak ang kanilang basura papuntang MRF dahil kulang sila sa truck at trabahador.

Wika naman ni Otic Macavinta Executive Assistant for Solid Waste Management, para makapag-function na ng mabuti ang Balabag at Yapak MRF, hiniling nito na magsumite na ng mga dapat nilang kailangan para sa operasyon upang mahanapan na nila ito ng paraan at maaayos na.

Ito ang kanilang nakikitang hakbang para mapadali at masolusyonan ang suliranin na hinaharap ngayon Centralized MRF sa Manoc-manoc.

Samantala, nagpapasalamat naman si Graf na meron na umanong nag-presenta ng mga barge para mapadali ang pag-haul ng basura patawid ng mainland.

Muli nitong paalala sa mga residente sa Boracay na gawin na lamang umano ng bawat isa ang obligasyon hindi lang sa salita kundi sa gawa.