Mga lifeguard sa Boracay, isinailalim sa water safety training

Ni Edzel Mainit, Senior Field Reporter, YES FM Boracay

Isinailalim sa 5 araw na water safety training ang mga lifeguard ng LGU Malay sa Boracay noong Marso 19 -24, 2012.

Pinangunahan ng Philippine Red Cross (PRC)  partikular ng trainer na si David Field, isang propesyunal na life guard sa Australia at volunteer din ng Red Cross, kasama ang anim pang Australian Life Guard na pinadala ng nasyunal PRC, ang nasabing pagsasanay sa mga lifeguard sa Boracay.

Nabatid mula kay Marlo Schoenenberger, administrator ng Red Cross Boracay na labing apat na lifeguard ng LGU sa isla ang pumasa sa level 3 training na ngangahulugang bihasa na ang mga ito pagdating sa water safety.

Samantala, maliban dito may siyam namang life guard ang nagtapos din kahapon kasabay ng mga ito na pawang mga staff ng resort sa Boracay at labing dalawang junior students ng highschool sa isla.

Bunsod nito, umaasa at kampante si Schoenenberger na nasa standard na ang kakayahan ng mga life guard na ito at handa nang isabak sa emergency.

Ang pagsasanay ng Red Cross sa mga life guard na ito sa isla ay bahagi ng nakatakdang lagdaang kasunduan ng PCR at Punong Ehekutibo ng bayan para mas lalong mai-angat ang kakayahan ng mga taga sagip-buhay sa baybayin ng Boracay. 

Mga e-trike sa Boracay, kolorum! --- BLTMPC drivers

Ni Edzel Mainit, Senior Field Reporter, YES FM Boracay

Kolorum maituturing ng mga tricycle driver sa Boracay ang 10 e-trike na pang-test drive sa isla.

Ito ang inamin ni Sangguniang Bayan SB Member Dante Pagsugiron.

Sinabi nito na nagsusumbong minsan sa kaniya ang mga driver ng E-trike dahil sinisigawan sila ng mga driver ng tradisyunal na tricycle na kolorum umano.

Pero paliwanag nito may Permit to Transport at Permit to Operate ang mga unit na ito.

Bunsod nito, bagamat may mga negatibong komento umano silang natatanggap, hindi na nito pinapatulan pa kahit may selosang nangyayari.

Kaugnay nito, umapela ang konsehal sa mga driver sa Boracay ng pag-unawa at huwag naman sanang pag-isipan ng masama ang mga bagong unit na ito ng sasakyan.

Ito ay dahil para naman umano ito sa pagpreserba ng isla at mabigyang sulosyon ang matagal nang problema sa pulosyon sa hangin at ingay.

Kung maaari din umano ay suportahan na lang ang e-trike dahil maaaring maging solusyon din ito sa patuloy na pagtaas sa presyo ng gasolina.

Samantala, sa kabila ng mga negatibong komentong laban sa e-trike dito, ibinunyag ni Pagsugiron na naging maganda naman ang pagtanggap ng ilang sector katulad ng mga stakeholder, at commuter.

Pero naniwala si Pagsugiron na hindi naman lahat ng mga driver dito ay may katulad na iniisip sa iba, na naninigaw pa.

Paniningil ng pasahe ng e-trikes, “natural” lang --- Pagsuguiron

Ni Edzel Mainit, Senior Field Reporter, YES FM Boracay

Sinagot naman ngayon ni SB Member Dante Pagsugiron ang usapin tungkol sa paniningil ng pamasahe ng mga pumasadang e-trike sa Boracay gayong pang test drive pa lang ang layunin ng sampung unit na ito sa isla.

Bilang namamahala sa mga electric tricycle na ito, inihayag ni Pagsugiron na “natural” lamang na maningil sila sapagkat may mga gastusin din sa operasyon ang mga de kuryenteng sasakyang ito  na dapat mamentina lalo pa at hindi naman ito subsidize ng lokal na pamahalaan ng Malay at walang programa ngayon na may libreng sakay.

Pero nilinaw nitong ang perang kinikita ng mga unit na ito ay napupunta sa driver at supplier lamang.

Dagdag pa ng konsehal, naniningil sila ng kapareho sa singil at sa taripa din ng BLTMPC para sa mga tradisyonal na tricycle sa isla.

Dahil kung magpataas aniya sila ng singil aalma naman ang pasahero, at kung bababaan man nila, paniniyak nito na magre-react din ang mga tricycle drivers sa Boracay.

Sapagkat siguradong pipiliin ng pasahero ang sumakay sa e-trike dahil mura na, komportable at walang ingay o anumang polusyon na dala.

Sinabi din ng naturang konsehal na hindi naman din sila maaaring gumawa ng sariling taripa na iba sa taripa ng BLTMPC sapagkat sa bandang huli ay ang kooperatiba din mismo ang mamamahala sa mga unit na ito kapag nagkataon.

Ang pahayag na ito ni Pagsugiron ay kasunod ng pag-alma ng mga driver sa Boracay, sa paniningil ng e-trike gayong wala namang taripa.

Samantala, ang mga driver at operator ng tradisyunal na tricycle sa isla ay sumusunod sa lahat ng batas at nagbabayad ng tama sa lokal na pamahalaan ng Malay para sa kabuhayan nila. 

SB Member Pagsuguiron, inaming sa kanya nakapangalan ang mga e-trikes sa Boracay

Ni Edzel Mainit, Senior Field Reporter, YES FM Boracay

Nilinaw ni SB Member Dante Pagsugiron, na ang 10 units ng electric tricycle o e-trike sa Boracay ay hindi pagmamay-ari ng konseho o ng sa lokal na pamahalaan ng Malay, taliwas sa mga naunang napabalita.

Ito ay dahil sa aminado ang nasabing konsehal na lahat ng dukomento katulad ng permit to transport at permit to operate ay nakapangalan sa kaniya lamang at hindi sa SB o LGU man.

Gayon pa man, ang ownership umano ng mga unit na ito ay nananatiling sa supplier pa rin at si Pagsugiron lamang ang namamahala nito sa Boracay.

Maliban dito, aminado rin si Pagsugiron na ang 10 unit na ito dito ngayon hindi yaong programa ng Pangulo o ng Department of Energy (DoE) at Asian Development Bank (ADB), kundi ito pala ay pag-aari ng isang pribadong supplier lamang.

Dahil ang estado ayon sa konsehal ng e-trike na nais ipasok ng DoE at ADB ay wala pang linaw kung kaylan ito ipapatupad sa isla kaya ang mga de kuryenteng sasakyang ito muna ang tinanggap nila.

Kaugnay nito, sakaling matuloy ang ikakasang letter of Inquiry ng  Boracay Land Transportation Multi-purpose Cooperative o  BLTMPC sa konseho para mabatid kung sino talaga ang totoong may-ari ng e-trike na ito.

Maluwag naman umanong tatanggapin ng Sangguniang Bayan kung i-susumite na ito lalo pa kampanti naman ang konsehal na alam na ng BLTMPC ang hinggil sa operasyon ng e-trike dahil kasama din sila sa mga pag-uusap ukol dito.

Matatantandaang, inihayag ni BLTMPC Chairman Ryan Tubi sa panayam dito kamakalawa na nakatakdang magpa-abot ng sulat ang kooperatiba sa SB upang itanong kung sino ang totoong may-ari ng mga unit na ito upang doon nalang din nila ipaabot ang kanilang obserbasyon ukol sa operasyon ng e-trike sa isla.

Biyahe ng mga sasakyang pandagat patawid sa Boracay, 24 oras na

Ni Edzel Mainit, Senior Field Reporter, YES FM Boracay

Tila hindi na mangyayari pa, ang pagka-stranded ng mga pasahero sa Caticlan Jetty Port kapag inabot ng gabi sa pag biyahe.

Sapagka’t ayon kay Lt. Commander Terence Alsosa, Station Commander ng Caticlan Coast Guard, binigyan na ng  Marina ang Fast Craft ng Montenegro Shipping Lines ng Certificate of Public Conveyance o CPC para maaaring makapaglayag sa loob ng bente kuwatro oras.

Maliban dito, ang Oyster Ferry umano ay may CPC na rin katulad ng malalaking bangka ng kooperatiba na Mermaid.

Kaya anumang oras ay may masakyan na ang mga pasahero, kahit pa ang mga bangka ng kooperatiba ay hanggang alas diyes lamang ng gabi.

Magugunitang nitong nagdaang buwan ng Disyembre ay na-stranded sa Caticlan Jetty Port ang halos dalawang daang pasahero lalo na ang mga turistang nagmula pa sa ibang bansa at probinsiya, sa dahilang walang masakyan patawid ng Boracay, kaya doon nalang ang mga ito nagpalipas ng gabi.

Rason naman para hindi ito magustuhan ng pamahalaan probinsiya, sapagkat hindi umano ito kagandahan para sa industriya ng turismo ng Aklan at Boracay.

Kahit aprubado ang Cadastral Survey sa Boracay, mga lot owners, pwede pang umapela

Ni Edzel Mainit, Senior Field Reporter, YES FM Boracay

Sakaling ma-aprubahan ang bagong Cadastral Survey ng mga lupain sa Boracay ng Department of Environment and Natural Resources ay hindi umano ibig sabihin na hindi na ito pwedeng mahabol o hindi na pwedeng umapela pa ng mga lot owners.

Ayon kay Boracay CENRO Officer Mirza Samillano, mangyayari ito kung may sapat na dokumentong magpapatunay na ang claimant nga ang tunay na nagmamay-ari ng lupa.

Kahit pa umano may problema ito sa hugis, sukat, at lot number man, ay tatanggapin umano ng DENR kapag nanaisin nilang ipatama o ipabago ang nakasaad sa kadastro.

Sa mga nagtataka umano kung bakit nag-iba ang lot number ng mga ito, inihayag ng CENRO Officer na mag-iiba talaga ito dahil kapag naaprubahan na ang Cadastral magkakaroon na ng bagong lot number ang mga lupaing ito sa isla.

Samantala, aminado rin si Samillano na maliban sa mga problemang nabanggit, nabatid na rin umano nila ang hinanaing ng ilang lot owners nang ipresenta ng surveyor sa mga may-ari ang bahagi ng kanilang pagsisiyasat.

Ito ay dahil nagrereklamo umano ang mga ito na lumiit ang ilan sa mga propidad, samantala ang iba naman ay kinain na umano o nabawasan at napunta sa kalsada.

Bunsod nito, inihayag ni Samillano na hanggang sa ngayon ay tumatanggap pa ng correction mula sa mga lot owners ang surveyor na kinontrata ng DENR, upang maitama ang at maaayos ang nilalaman ng kadastro. 

Cadastral Survey sa Boracay, aaprubahan sa loob ng dalawang buwan

Ni Edzel Mainit, Senior Field Reporter, YES FM Boracay

Inaasahang dalawang buwan simula ngayon ay aaprubahan na ng Department of Environment and Natural Resources (DENR) ang resulta ng Cadastral Survey sa Boracay nitong taong 2011.

Ito ang inhayag ni Merza Samillano, CENRO Officer ng Boracay.

Ayon dito, sa kasalukuyan ay wala pa umano sa kanila ang resulta ng nasabing survey, kaya sa kasalukuyan ay hindi pa umano nito masabi sa ngayon kung ano na talaga ang estado.

Ito ay dahil patuloy pa ang isinasagawang pagtatama at pagkonsulta sa claimants ng mga lupa sa Boracay sa kabila ng napag-alaman nitong tapos na ang pasisiyasat sa lahat ng lupain sa isla.

Ngunit, hindi naman umano lingid sa kaalaman ni Samillano na may ilan pang dapat pang-ayusin sa gitna ng surveyor at may-ari ng lupa.

Pero sa pagkaka-alam aniya nito ay tuloy pa rin ang pagtanggap ng surveyor ng mga correction mula sa mga nagmamay-ari.

Magugunitang dinidinig at nasa Sangguniang Bayan ng Malay na ang resulosyong humihiling sa DENR na suspendihin muna ang pag-aproba sa Cadastral Survey na ito, dahil sa ilang suliraning nararanasan partikular ang umano’y pagbabago sa hugis at sukat lalo na ang pagkabahala ng mga stakeholder sa kanilang mga lot number. 

LTO, aminado sa green plate ng BLTMPC

Ni Edzel Mainit, Senior Field Reporter, YES FM Boracay

Pinatotohanan ng LTO ang pahayag ni BLTMPC Chairman Ryan Tubi tungkol sa pag gamit ng green plate ng mga multi-cab ng kooperatiba.

Ito’y makaraang kumpirmahin ni Land Transportation Office Officer-Aklan LTO Director Valtimor Conanan na may basbas nga mula sa tanggapan nito ang pag-gamit ng green plate ng Boracay Land Transportation Multi-purpose Cooperative (BLTMPC) para sa mga unit na multi-cab ng kooperatiba sa isla.

Paliwanag ni Conanan, wala umanong available na plaka ang LTO kaya pansamantala ay ito muna ang ibinigay nila.

Subalit sa panayam ditto, inihayag ni Conanan na may mga plaka na sila ngayon doon kaya kung nanaisin ng BLTMPC ay pwede nang mabigyan ang kanilang mga multicab.

Samantala, inihayag din ni Conanan na may sapat na mga dokumento mula sa tanggapan nila ang kooperatiba para sa operasyon ng mga unit na ito.

Matatandaang pinuna ng ilang mga driver sa isla ang ilang unit ng multicab ng BLTMPC dahil sa gumagamit ito ng green plate, samantalang ginagamit ito ng pampublikong sasakyan.

Ito ay sa kabila ng kaalaman ng lahat na ang green plate ay para sa pribado at ang dilaw na plaka dapat ang gamitin, dahit ito’y para sa pampublikong mga sasakyan.

Magugunita ring inihayag ni Tubi sa panayam dito kahapon na hindi kasalanan ng BLTMPC ang pagkakaroon ng green plate kundi pagkukulang sa bahagi ng LTO.

Green plate ng multicab ng BLTMPC, kakulangan ng LTO

Ni Edzel Mainit, Senior Field Reporter, YES FM Boracay

Aminado ang Boracay Land Transportation Multi-purpose Cooperative (BLTMPC) na may ilang unit sila ng multicab na green talaga ang plate number, pero bumibiyahe ang mga ito sa Boracay bilang isang pampublikong sasakyan.

Paliwanag ni BLTMPC Chairman Ryan Tubi, ang pag-gamit nila ng green plate ay may basbas na umano mula kay Valtimor Conanan, Aklan Director ng Land Transportation Office (LTO).

Ayon kay Tubi, kung kulay green man na plate number ang gamit ng ilang unit nila, ito ay hindi kasalanan ng kooperatiba kundi pagkukulang sa bahagi ng LTO, sapagka’t wala umanong available na plaka sa nasabing tanggapan kaya pinahintulutan nalang ng LTO na gamitin ito.

Pero paglilinaw ng Chairman na kumpleto sa dokumento bilang pampublikong sasakyan ang mga multicab ng kooperatiba, at plaka lamang ang kulang.

Ang green o berdeng plaka sa mga sasakyan ay para sa pribadong gamit lamang, samantalang ang dilaw ay para naman sa pampublikong sasakyan. 

Operasyon ng e-trike sa Boracay, kukuwestiyunin ng BLTMPC sa SB Malay

Ni Edzel Mainit, Senior Field Reporter, YES FM Boracay

May nakahanda nang sulat ng pagtatanong ang Boracay Land Transportation Multi-purpose Cooperative (BLTMPC) sa Sangguniang Bayan ng Malay ukol sa operasyon ng e-trike sa Boracay.

Ayon kay BLTMPC Chairman Ryan Tubi, layunin ng nakatakda nilang pagtatanong sa konseho ay malaman kung sino talaga ang may-ari ng sampung e-trike na ito, ng sa ganon ay doon nila sa totoong may-ari ipa-abot ang kanilang mga obserbasyon.

Sa pagkaka-alam aniya nila ay pang test drive lamang sa Boracay ang pinaka-layunin ng mga unit na ito.

Subalit nagtataka din sila kung bakit naninigil ng pamasahe at sinusunod ang gamit na taripa ng kooperatiba.

Kung saan ang paniningil ng e-trike ang isa sa inaalburuto naman ng mga driver ng tricycle sa kasalukuyan.

Samantala, bagamat ang suliraning ito ay ilang buwan na rin napupuna ng mga driver sa Boracay, hindi ibig sabihin ayon kay Tubi na wala nang aksiyon ang kooperatiba hinggil dito lalo pa at apektado ang kabuhayan ng mga drivers na nagrereklamo. 

Mga paaralan sa Malay at Boracay, ipapasuri din sa Health Office

Ni Edzel Mainit, Senior Field Reporter, YES FM Boracay

Bagamat napaloob sa ipapasang Sanitation Code ng Malay at Boracay na lahat ng mga estudyante ng pribado at pampublikong paaralan ay idadaan sa pagsisiyasat ng Health Office.

Nilinaw sa deliberasyon ng sisyon ng konseho kamakalawa na hindi ibig sabihin nito ay kailangan na rin kumuha ng bawat estudyante ng Health Certificate.

Sapagkat ayon kay Sangguniang Bayan Member Rowen Aguirre, napasama lang din ang mga estudyante, dahil may pasilidad ang mga paaralan katulad ng palikuran na dapat masuri ng Health Office pero hindi ang mga estudyante.

Paglilinaw din ni Aguirre, na lahat nga ng mga empleyado ng mga establishemento sa Boracay ay hindi pinipilit na kumuha ng Health Certificate, maliban sa mga food handler.

At kung hindi man food handler ang mga ito, basta’t empleyado ng food establishment ay kailangan umano itong kumuha ng Health Certificate.

Ang nasabing usapin, ay bahagi parin ng pagdinig ng konseho sa Sanitation Code ng Malay at pag-adopt ng National Sanitation Code.

BLTMPC, nagpahayag ng Open Book sa mga miyembro

Ni Edzel Mainit, Senior Field Reporter, YES FM Boracay

Atensyon sa mga miyembro ng BLTMPC:

Nagpahayag ng kahandaan si Ryan Tubi, Chairman Board of Director ng Boracay Land Transportation Multi-Purpose Cooperative (BLTMPC) sa mga miyembro ng kooperatiba na nais makasilip sa audited na libro ng koop ano mang araw.

Ito ang inihayag ni Tubi sa panayam dito nitong umaga, kasunod ng pagkwestiyon ng ilang miyembro kung bakit hindi buwanan ang pamimigay ng debidendo sa mga ito.

Paliwanag ng Chairman, isang beses sa isang taon ay magkakaroon ng general assembly ng BLTMPC kaya doon na rin nila sinasabay ang pamamahagi ng debidendo sa mga miyembro.

Pero malinaw umanong walang lamangang nangyayari kahit pa isang beses lang itong ginagawa bawat taon dahil binubusisi umano ito ng auditor at inilalatag naman nila ang lahat ng nilalaman ng libro.

Katunayan, mas mabuti na umano ngayon kaysa dati, dahil may natatanggap nang debidendo ang mga miyembro, hindi katulad noong una, na siyang ipinagpasasalamat umano nila sa kasalukuyan.

Samantala, inihayag din ni Tubi na isang beses sa isang taon ang pamamahagi ng dibedindo ang sistemang sinusnod nila dahil ito ang nakasaad sa By Laws ng kooperatiba. 

Sakit na makukuha mula sa tubig, pinag-usapan sa Sanitary Code ng Malay

Ni Edzel Mainit, Senior Field Reporter, YES FM Boracay

“Sino ang magde-determina kung ang isang tao ay walang nakakahawang sakit sa balat kapag naliligo ito sa swimming pool at sa baybayin ng Boracay? Sino ang magbabawal sa pag-ihi at pagdura ng mga ito sa tubig?”

Ito ang naibulalas na tanong ni Sangguniang Bayan Member Dante Pagsugiron sa pagpapatuloy sa pagdinig ng konseho para sa pagsasabatas ng Sanitary Code ng Malay.

Bagama’t tila natatawa ang konseho sa nasabing usapin, subalit ayon kay Presiding Officer Ceceron Cawaling, disiplina na ng bawat isang indibidwal ang dapat ipairal sa ganitong isyu.

Ayon naman kay SB Member Rowen Agguire, kung halata namang may sakit sa balat ang isang tao at nakitang naliligo ay bakit pipilitin pang lumusong.

Kung sa bahagi naman ng establishemento at sa swimming pool, nakadepende na aniya sa namamahala at sa alituntuning ipinapatupad ng mga resort/hotel sa isla ang mga nasabing usapin.

Malabong pailaw sa mga panindang karne at isda sa Malay at Boracay, ipagbabawal na

Ni Edzel Mainit, Senior Field Reporter, YES FM Boracay

Ipagbabawal na sa mga palengke ng Malay at Boracay ang pag-gamit ng malabo at may iba’t-ibang kulay na ilaw sa mga panindang isda at karne.

Ito’y kasabay ng ginagawang deliberasyon ng Sangguniang Bayan ukol sa Sanitation Code ng Malay at Boracay upang pormal na itong maipasa ng konseho.

Sa ginawang pagkuwestiyon ni SB Member Dante Pagsugiron sa kahalagahan ng pailaw na ito partikular sa seksiyon ukol sa nakasaad sa draft ng oridinansa.

Sinabi ni SB Member Rowen Agguire, may akda ng ordinansa na importanteng magkaroon ng maliwanag na ilaw sa mga paninda.

Subali’t nararapat lamang na ipagbawal ang mga ilaw na may iba’t-ibang kulay para sa mga paninda upang maproteksyunan at hindi madaya ang mga mamimili.

Nabatid din mula kay Agguire na Market at Sanitary inspector na ang magdi-determina kung anong uri ng ilaw ang gagamitin ng mga vendors upang malaman at makita ng mamimili ang estado ng kanilang binibili. 

Pag-apruba sa Cadastral Survey sa Boracay, ipinasususpende

Ni Edzel Mainit, Senior Field Reporter, YES FM Boracay

Seryosong hiling para ipasuspende ang pag-apruba sa pinal na pagsisiyasat o Cadastral Survey sa Boracay.

Ito ang nais mangyari ngayon ni SB Member Wilbec Gelito, kasunod ng mga natanggap nitong reklamo mula sa mga stakeholders kaugnay sa nagdaang Cadastral Survey sa isla.

Bunsod nito, hiniling ngayon ni Gelito sa konseho na kung maaari ay magpasa ng resolusyon ang Sanggunian upang suspendihin ang pag-aproba sa mga datos na isinumiti ng Sustainable Development Solution (SDS) na siyang nagsagawa ng Cadastral survey sa Boracay, sa Department of Environment and Natural Resources (DENR).

Sa resolusyong nais na isulong, hihilingin naman ng konseho sa DENR Regional Office na huwag munang aprobahan ang pinal na resulta ng nasabing Cadastral Survey.

Sapagka’t maraming stakeholder pa umano sa Boracay ang nagpa-abot ng hinanaing lalo pa’t may ilang isyung hindi pa malinaw partikular ang mgay kaugnayan sa mga lot numbers. 

Pagsasaayos sa tatlong boat station sa Boracay, hiniling na huwag i-asa sa DOT

Ni Edzel Mainit, Senior Field Reporter, YES FM Boracay

Bagamat hindi tutol sa balak ni Vice Mayor Ceciron Cawaling na humingi ng tulong pinansiyal sa Department of Tourism (DOT), ngunit iminugkahi si SB Member Essel Flores sa konseho na kung maaari ay huwag nang i-asa pa sa DOT ang pagsasa-ayos ng tatlong boat station sa Boracay.

Ito ay sa kadahilanang nakikita nito na dadaan pa sa matagal na proseso ang nasabing resolusyon bago aprubahan ng tourism, gayong tatlong linggo na lang ay Holy Week na.

Maliban dito, hiniling ni Flores na kung pwede lang naman na ang lokal na pamahalaan ng Malay na lang ang bumalikat sa pagsasa-ayos nito, gayong tila kakayanin naman ito kung nanaisin.

Agad namang tinaggap ni Cawaling ang proposisyon ni Flores, pero posible umanong sa susunod na taon pa ito mangyayari.

Gayon paman, inatasan na ni Cawaling ang kalihim ng Konseho na ilagay ito sa record at magkaroon ng koordinasyon sa Engineering Department ng Malay ukol sa usaping ito.

Vice Mayor Cawaling, Magpapatulong sa DOT upang ipaayos ang mga Boat Stations sa Boracay

Ni Edzel Mainit, Senior Field Reporter, YES FM Boracay

Magpapatulong si Vice Mayor Ceciron Cawaling sa Department of Tourism (DOT) para sa pagpapaayos ng mga boat stations sa Boracay.

Sa draft ng resolusyong ipinasa nito sa SB Malay, nabatid na humihiling ito ng tulong pinansyal sa DOT, partikular kay Secretary Ramon Jimenez, para ayusin ang tatlong istayong ito.

Nalalapit na umano kasi lang ang Holy Week at kailangan ng matinong pampublikong palikuran para sa mga turista sa beach front ng Boracay.

Maliban dito, hihilingin din sa resolusyon, ayon pa kay Cawaling, na magkaroon ng Tourist Information Center sa Station 1 na merong international standard.

Pero sinabi nito na sakaling pumayag ang Tourism ay dapat kausapin muna ng DOT ang pamliya Elizalde na siyang may-ari ng lupang pagtatayuan nito sa Station 1, kahit pa sabihing noong una’y pinayagan na ang naunsyaming plano.

Isinulong umano ang nasabing panukala, sapagka’t ang tatlong istayong ito, kasama ang tourist assistance center ay proyekto umano ng DOT, at walang kaugnayan dito ang lokal na pamahalaan ng Malay.

Subali’t kung nanaisin aniya ng DOT na ibigay sa LGU Malay ang pagpapa-ayos sa mga ito ay maluwang naman aniya sigurong tatanggapin ng local na pamahalaan ng Malay, lalo na ang implementasyon ng proyekto. 

Pagdetermina sa peke at totoong pera, Isasapubliko ng Bangko Sentral ng Pilipinas

Ni Malbert Dalida, News Director, YES FM Boracay

Isasa-publiko ngayong araw ng representante ng Bangko Sentral ng Pilipinas ang tamang paraan sa pagdetermina ng peke at totoong pera.

Ito ang kinumpirma kahapon ni Police Inspector Fidel Gentallan, Deputy Chief ng Boracay Tourist Assistance Center.

Ito’y may kaugnayan sa nangyaring pagkakatiklo ng mga suspek sa pagpapakalat ng mga pekeng pera sa Boracay at Caticlan nitong nagdaang linggo.

Ayon kay Gentallan, ang sinumang interesadong saksihan ang nasabing munting demonstrasyon ay maaaring sumadya lamang sa estasyon ng pulis sa Boracay.

Maliban kasi sa pagsusuri kahapon ng mga perang nasamsam mula sa mga suspek, nakahanda rin umanong mag extend ng hanggang ngayong araw ang dalawang representante ng Bangko Sentral ng Pilipinas na narito ngayon sa isla, para ibahagi sa publiko ang tamang paraan ng pagkilala ng pekeng pera.

Samantala, ang nasabing hakbang ay depende na lamang umano sa mga nasabing ahente, kung hanggang anong oras ang kaya nilang ibigay para sa naturang aktibidad.

Coast Guard Caticlan, naghahanda na para sa Semana Santa

Ni Malbert Dalida, News Director, YES FM Boracay

Naghahanda na ang Coastguard Caticlan para sa inaasahang pagdagsa ng mga turista papuntang Boracay.

Ayon kay Caticlan Coastguard Commander Terrence Alsosa, nagsagawa ng ibayong pagsasanay sa bayan ng Kalibo ang mga taga Coastguard Auxiliary.

Napapaloob umano sa nasabing pagsasanay ang pagliligtas ng buhay sa dagat.

Maliban dito, sisimulan din umano nila bukas ang pagmonitor sa operasyon ng mga RORO sa Caticlan, at maging ng mga barkong dumadaan sa Dumaguet sa bayan ng New Washington, Aklan.

Ilang assistance center naman ang ilalaan para sa mga turista at mga pasaherong mangangailangan ng tulong.

 Idinagdag pa ni Alsosa ang mahigpit na implementasyon ng pagsusuot ng life jacket sa lahat ng mga pasaherong sakay ng mga bangkang may open hose deck.

Ipapatupad din ang tamang bilang ng mga pasaherong sasakay ng mga bangkang bumibyahe sa isla, para maiwasan ang over loading.

Payo naman ni Alsosa sa mga turistang magbabakasyon sa isla ng Boracay, na magpa book ng maaga upang maiwasan ang mabagot sa pagpila ng matagal sa port.

Mas makabubuti din umanong huwag nang ipilit pa ng mga pasaherong sumakay ng barko, kapag puno na ang mga ito.

Ilan sa mga narekober na counterfeit money sa Caticlan, kinumpirmang peke ng BSP

Ni Malbert Dalida, News Director, YES FM Boracay

Kinumpirma ngayon ng Bangko Sentral ng Pilipinas (BSP) na peke ang ilan sa mga perang narekober ng mga pulis sa Caticlan.

Partikular na tinukoy ng mga ito ang perang narekober mula kay Enrique Lastimoso ng Lambunao Iloilo, na siyang unang natimbog ng mga operatiba.

Ayon sa dalawang ahente ng BSP, peke ang mga nakuhang anim na pirasong tig-iisang libong piso mula sa nasabing suspek.

Kung saan dalawa rito ang lumang pera, at apat naman ang NDS o new denomination series.

Matatandaang ang nasabing suspek ay naunang napasakamay ng mga pulis matapos mahulihan ng pekeng isang libong piso, nakaraang Sabado ng gabi.

Nakatakda namang i-inquest sa prosecutor’s office sa bayan ng Kalibo ang suspek ngayong araw, habang patuloy pa ring pinag-iingat ng mga otoridad ang publiko sa mga kumakalat na pekeng pera dito.

Lodging House ng mga nagpapakalat ng pekeng pera sa Boracay, sinalakay ng mga pulis

Ni Malbert Dalida, News Director, YES FM Boracay

Tuluyan nang nasakote ng mga pulis ang mga suspek sa pagpapakalat ng pekeng pera sa Boracay.

Ito’y matapos salakayin ng pinagsanib na pwersa ng Boracay at Malay PNP ang tinutuluyang lodging house ng mga ito sa barangay Caticlan nitong araw ng Sabado.

Maliban kasi sa ikinanta ng naunang naarestong suspek ang mga kasama nito.

Natunugan din ng mga otoridad ang umano’y paparating pang kontrabando mula sa mga kasamahan ng suspek sa Iloilo.

Dahil dito, kaagad nagsagawa ng follow-up operation ang mga taga Boracay Tourist Assistance Center, na nagresulta sa pagkakaaresto ng walo pa nitong mga kasamahan.

Kinilala ni Police Inspector Fidel Gentallan, deputy chief ng Boracay Police ang mga suspek na sina Ernesto Marcelino y Acosta alias Ching, ng Delgado Iloilo, Joseph Villanueva y Bayhon ng Bacolod City, Josie Marie Laurel y Bayhon ng San Mateo Rizal, Jerry Palerer y Billiones ng Sum-ag Bacolod City, Joseph Escuton y Marilao ng Calatrava, Negros Oriental, na naaresto sa mismong Caticlan Jetty Port.

Naaresto din ang iba pang mga kasamahan ng mga suspek na sina Julian Reboles Sr. y Baylen at Julian Reboles Jr. y Herrera ng Molo Iloilo, at Eddie Dubrea y Galicia ng Arevalo Iloilo.

Nabatid sa imbistigasyon ng mga pulis na mahigit isang taon na palang nanunuluyan sa nasabing lodging house doon ang mga suspek.

Sinasabing natutulog umano ang mga ito sa umaga at sa gabi gumagala upang isagawa ang modus operande.

Kung saan, pumupunta umano ang mga ito sa mga tindahan at bumibili gamit ang mga pekeng denominasyon ng pera.

Napag-alamang isa sa mga suspek na si Enrique Lastimoso ng Lambunao Iloilo ay natimbog ng mga sekyu sa D’mall of Boracay matapos bumili ng bulaklak doon gamit ang pekeng isanglibong piso, nitong nakaraang gabi ng Biyernes.

Samantala, umaabot naman sa mahigit walumpo’t siyam na libong piso ang mga nasamsam ng mga otoridad mula sa mga suspek.

Nakatakda namang ipaberipeka sa representante ng Bangko Sentral ng Pilipinas ang mga umano’y pekeng pera.