Mga ayaw tumanggap ng citation tickets, walang lusot ---- Enriquez

(Ni Edzel Mainit, YES FM Boracay Field Reporter)

Pinatotohanan ni Malay Municipal Ordinance Officer Wilson Enriquez na tinatanggihan ng ibang mga lumalabag sa ordinansa ang ibinibigay na citation tickets kapag nahuhuli ang mga ito.

Pero hindi pa rin anya ito makakalusot lalo pa at napag-tibay ang mga ito ng mga ordinansa.

Kaya ang ginagawa nila ay hindi na pinagre-renew pa ng Mayor’s Permit ang mga offenders, depende sa kasalanang nagawa o ordinansang nalabag.

Sa nagmamatigas anyang tanggapin ang citation ticket, ang ginagawa nila ay iniipon ito at ipinapatong sa bayaran ng establishimiyento kung magre-renew ito ng kanilang dokumento para sa operasyon.

Ayon kay Enriquez, may mga pagkakataon umanong hindi sinasabi ng mga nahuhuli ang pangalan ng mga establishimiyento at ang nagmamay-ari nito para makaiwas sa citation tickets.

Nang tanungin si Enriquez kung batid na rin ba ng publiko ang tungkol sa ordinansang ipinagbabawal nila, sinabi nitong naniniwala siya na alam na rin ng lokal na mamamayan at ilang lokal na turista ang tungkol dito, partikular na ang anti-smoking ordinance.

Pero sa mga dayuhang turista, naniniwala ito na batid na rin nila ang tungkol dito dahil sa mga information dissemination materials tulad ng mga stickers na makikita sa mga bangka at mga pribadong sasakyan; subalit dahil sa sobrang excited ang mga ito ay parang nakakalimutan din ang tungkol dito. Ngunit gayon pa man, nagbabala ang ordinance officer na wala silang pinipili pagdating sa pagpapatupad ng ordinansa.

Erosion sa Boracay, aaksyunan na

(Ni Edzel Mainit, YES FM Boracay Field Reporter)

Inatasan na ni Aklan Governor Carlito Marquez ang DENR Boracay na magsagawa ng inspeksyon sa baybayin ng isla dahil sa erosion nagbubunga ng paglitaw ng mga tubo sa dalampasigan ng Boracay, at sea sport activities na pinaniniwalaang nakaka-apekto sa pagkasira ng mga korales sa isla.

Ito ang inihayag ni Boracay CENRO Officer Merlita Ninang ng makapanayam ng YES FM News Center Boracay ukol sa problemang nararanasan ngayon sa isla.

Ayon dito, ang usaping ito ay idinulog na rin sa pulong ng Task Force Boracay nitong nakaraang ika-apat ng Mayo at napagpasyahan ng gobernador na imbestigahan ito.

Ang mga lugar na target na inspeksyunin ay ang bahagi ng Yapak, partikular na ang West Cove, papuntang Grotto.

Samantala, mula naman sa resulta ng isinagawang inspeksyon ng DENR ay gagawa ng resolusyon ang Task Force Boracay na magbibigay ng otoridad kay Mayor John Yap upang aksyunan kung ano ang nararapat sa mga apektadong lugar na ito.

Sa kasalukuyan, target din umanong isagawa ang inspeksyon ngayong linggio kung maisisingit sa kanilang iskedyul at kung makiki-ayon ang panahon.

Ninang, “no comment” sa kinasasangkutan ni dating Boracay CENRO Officer Aborka

(Ni Edzel Mainit, YES FM Boracay Field Reporter)

Magalang na humihingi ng pang-unawa si Boracay CENRO Officer Merlita Ninang sa pag-distansya nito tungkol sa usapin ng imbestigasyon na kinasasangkutan ng ilang opisyal ng DENR sa isla at maging ng probinsyal na siyang naging instrumento upang maglabas ng tatlumpu’t-isang titulo ng mga aplikante ng lupa sa Boracay.

Kaugnay nito, tumanggi muna siyang magbigay ng pahayag hinggil dito dahil hindi pa anya tapos ang imbestigasyon ng Regional at Central Office ukol dito.

Sa kasalukuyan, nasa proseso pa ng pagrerekomenda ang mga tanggapang ito sa kung ano ang dapat at ano ang mangyayari sa inilabas na tatlumpu’t-isang titulo.

Paglilinaw nito, ayaw nitong mapigilan ang desisyon ng opisina nila kaya ayaw muna niyang mag-komento.

Matatandaang nasangkot sa isyung ito ang dating Boracay CENRO Officer na si Merlyn Aborka na isa sa mga sasailalim sa imbestigasyon matapos nitong pumirma sa mga inilabas na tatlumpu’t-isang titulo ng mga aplikante ng lupa sa Boracay.

DENR, maingat na sa pagbibigay ng titulo ng lupa sa Boracay

(Ni Edzel Mainit, YES FM Boracay Field Reporter)

Tila sobrang maingat na ngayon ang Department of Environment and Natural Resources (DENR) sa pagbibigay ng titulo ng mga lupa sa isla ng Boracay.

Ito ay matapos magbaba ng utos si DENR Secretary Ramon Paje na pansamantalang itinigil muna ang pagbibigay nila ng mga land titles resulta ng isinagawang survey at maging ang pag-tanggap ng aplikasyon sa pagkakaroon ng titulo ay ipinatigil din.

Ayon kay Boracay Community Environment and Natural Resources Office (CENRO) Officer Merlita Ninang, hinihintay pa nila sa ngayon na maaprubahan ang cadastral survey sa buong isla na idadaan pa sa tatlumpung araw na correction o pagtatama mula sa nagmamay-ari para hindi maging problema sa hinaharap bago nila i-endorso sa Provincial ENRO at sa Regional at Central Office.

Magugunitang nabahiran na ng negatibong imahe ang pangalan ng DENR dahil na rin sa umano’y maling pagbibigay ng titulo na siyang dahilan na rin para mag-ingat ang naturang departamento sa kanilang pagbibigay ng titulo.

“Buruanga: Next to Boracay”

(Ni Edzel Mainit, YES FM Boracay Field Reporter)

Nasa priyoridad na ngayon ng local na pamahalaan ng Buruanga ang hakbang tungo sa ekonomiyang turismo, ito ang inihayag ni Mayor Quezon Labindao ng bayan ng Buruaga sa pinaka-una nitong Panagat Festival na ipinagdiwang nitong nagdaang Biyernes, ika-anim ng Mayo.

Kaugnay nito, inihayag ng Alkalde na bukas siya sa mga suhestiyon mula sa nasasakupan nito upang makamit nila ang perpektong pamamahala sa kanilang bayan.

Patunay sa pagbabago ng kanilang ekonomiya ay ang paglulunsad nila ng Panagat Festival para maipakita ang kanilang ikinabubuhay, kultura at ang iba pang ipinagmamalaking yaman ng kanilang bayan.

Buruanga bilang Tourism Area, isang “brilliant idea” --- Casiño

(Ni Edzel Mainit, YES FM Boracay Field Reporter)

Isang magandang ideya ang pag-dedevelop sa Buruanga bilang isang tourist area.

Ito ang naging reaksyon ni Bayan Muna Partylist Rep.Teddy Casiño sa malaking pagbabagong inaasahan sa bayan ng Buaranga kung gagawing tourism area ang nasabing lugar.

Naniniwala din ito na ang Panagat Festival ay isa din sa magtatampok sa naturang bayan para makikilala at maging isangt dagdag na atraksyon sa isinusulong na turismo.

Pero, para kay Casiño hindi ibig sabihin na kapag tourism area na ang nasabing lugar ay gaganda ang lahat pati ang buhay ng mga tao, gayon din ang kapaligiran sa lugar na ito.

Sapagkat para dito, ang turismo ay maituturing na isang “double-edged sword”, at nakadepende aniya kung papano ito palalaguin ng namamahala para hindi matulad sa ibang tourist destination sa bansa na mayroon mga negatibong epekto.

Inihalintulad din ng nasabing mambabatas ang sitwasyon ng isla ng Boracay na, ayon dito, ay mistula nang “Shoe Mart” (SM).