MRT meeting ng APEC sa Boracay, pormal nang nagbukas ngayong araw

Posted May 23, 2015

Ni Bert Dalida/Jay-ar M. Arante, YES FM Boracay

               

Tapos na kahapon ang SOM2 o Second Senior Officials Meeting ng APEC.

Kasunod nito, pormal na ring binuksan kanina ang opening session ng MRT o Ministers Responsible for Trade Meeting na isinagawa sa Sagana Ballroom, Shangri-La.

Ang MRT ang siyang itinuturing na pinakamahalagang pagpupulong sa mga events ng APEC meetings sa taong ito.

Dito kasi tinutukan ng mga delegado lalo na ng APEC Business Advisory Council ang tungkol sa multilateral trading system, regional economic integration at ang partisipasyon ng MSME o Micro, Small and Medium Enterprises sa regional at global markets.

Kaugnay nito ngayong ala-sais naman ng gabi magaganap ang welcome dinner ng mga delegado na gaganapin rin sa Shangri-La Boracay.

Ayon naman kay Trade and Industry Secretary Gregory Domingo sa isa umano at kalahating araw na MRT bukas ay ilang serye ang magaganap na meeting kasama na ang ilang social functions.

Nabatid na ang MRT ay nakatuon sa tatlong main areas kung saan ito ay ang pagsuporta sa multilateral trading system, regional economic integration na kadugtong ng agenda sa APEC at ang fostering MSMEs’ participation sa regional at global markets kung saan ito ang proyoridad ng Pilipinas.

Samantala, bukas na rin magtatapos ang Asia Pacific Economic Cooperation (ASEAN) sa Boracay na ginanap sa loob ng dalawang linggo.

Mga asong gala sa beach front, nananatiling panganib sa mga turista sa Boracay

Posted May 23, 2015

Ni Bert Dalida Yes FM Boracay

Nananatiling panganib sa mga turista sa Boracay mga asong gala sa beach front.

Malaya parin kasi ang mga itong namamasyal sa dalampasigan, sa kabila ng ordinansa, paalala at kampanya tungkol sa pagiging responsabling pet owner.

Ayon sa mga nakausap na residente ng isla, hindi dapat pinapayagang gumala ang mga nasabing aso, dahil nakakahiya at delikado din ito sa mga turista.

Ilang mga dayuhang turista din ang napapailing sa mga nakikita nilang asong gala, na maliban sa gusgusin, nanghahabol pa at dumudumi sa buhanginan.

Samantala, base sa impormasyon, nabatid na paminsan-minsan na lang nag-ooperate ang mga dog catcher sa isla ngayon.

Dalawang lalaki sa Boracay, timbog dahil sa kasong pagnanakaw

Posted May 23, 2015

Ni Bert Dalida YES FM Boracay

Kalaboso ang inabot ng dalawang lalaki sa Boracay matapos umanong pagnakawan ng cell phone ang isang turista kaninang umaga sa station 2 beach front.

Nakilala sa police report ng Boracay PNP ang mga suspek na sina Amading Tortona, 31 anyos at Reynald Poblete, 26 anyos, at pawang mga taga Pasay City.

Base sa imbistigasyon, nakita umano ng biktimang si Aisha Bint Castillo, 34 anyos ng Talamba Area, Cebu City ang suspek na si Amading na lumapit sa beach bed kung saan nakalagay ang Iphone 6 nito.

Maya-maya pa, kinuha na umano ng suspek ang kaniyang Iphone, bagay na kinumpronta niya ito.

Samantala, pasimple sana nitong ibinalik sa beach bed ang Iphone at kinausap ang kaniyang kasamang si Reynald upang tumakas, subali’t kaagad namang nakahingi ng saklolo sa police at sa mga tao sa lugar ang kasama ng biktima.

Resulta, naaresto ang dalawa at kasalukuyang nasa kostodiya ng Boracay PNP Station.

Karagdagang 310 firefighters itinalaga sa Boracay

Posted May 23, 2015

Ni Jay-ar M. Arante, YES FM Boracay

Bukas na magtatapos ang Asia-Pacific Economic Cooperation (APEC) Second Senior Officials Meeting and Ministers Responsible for Trade (MRT) Meeting sa isla ng Boracay.

Ngunit nagdagdag ng 310 firefighters ang Bureau of Fire Protection (BFP) sa Boracay mula sa national at regional headquarters para sa nasabing meeting upang mapaigting ang security forces.

Nabatid na ang mga ito ay under sa supervision ni Senior Superintendent Eleuterio N. Iturriaga, BFP Region 6 director at APEC Fire and Fire Safety Task Unit commander.

Dadalhin din ng BFP ang kanilang Chemical, Biological, Radiological, at Nuclear Explosion Team; Special Rescue Unit; at Emergency Medical Services group na kasama sa kanilang vehicles at equipment.

Samantala, ang APEC meetings sa Boracay ay nakatuon sa pagsuporta at pag-invest sa human resources, at fostering participation ng small at medium enterprises sa regional at global markets.

Napag-alaman na kahit matatapos na ang APEC meetings bukas ngunit ilan sa mga delegates nito ay mag-papaiwan pa sa Boracay.

Pagbisita ni Australian Trade Minister Andrew Robb, ikinatuwa ng PRC Boracay Life Guards

Posted May 23, 2015

Ni Bert Dalida, YES FM Boracay

Ikinatuwa ng PRC Boracay Life Guards ang pagbisita ngayong hapon ni Australian Trade Minister Andrew Robb.

Nabatid na kasama si Robb sa mga dumating sa bansa para sa APEC Ministers Responsible for Trade meeting, at dumating ngayon sa isla para bisitahin ang mga Australia-certified PRC Lifesavers.

Ang mga PRC o Philippine Red Cross Lifesavers ang sinasabing tanging professional team sa Pilipinas na sinanay ni safety expert at Australian Red Cross Volunteer David Field sa ilalim ng Australian standard.

Kaugnay nito, sa isang programang inihanda ng PRC Boracay, ipinamalas ng mga life savers ang kanilang mga natutunan sa pagliligtas ng buhay, partikular ang sa mga nalulunod.

Australian Trade Minister Andrew Robb, dumating ngayong araw sa Boracay para sa PRC Lifeguard stations

Posted May 22, 2015

Ni Bert Dalida YES FM Boracay

Dumating ngayong araw sa Boracay si Australian Trade Minister Andrew Robb.

Nabatid na bibisitahin nito ang mga PRC o Philippine Red Cross Lifeguard stations at ang mga Australian-certified PRC Life Savers.

Kaugnay nito, nakatakdang ipamalas ng PRC Boracay Team ang isang Life Saving Demonstration na itinuro naman sa kanila ng safety expert at Australian Red Cross Volunteer na si David Field.

Nabatid na gaganapin mamayang alas 3:30 ng hapon ang nasabing aktibidad sa Beach Front ng Nigi-Nigi Too, Station 1.

Samantala, maliban kay Australian Trade Minister Andrew Robb, inaasahan din ang pagdalo sa aktibidad ni PRC Secretary General Dr. Gwendolyn Pang.

Nabatid na isa si Robb sa mga dumating sa bansa para sa APEC Ministers Responsible for Trade meeting.

Mga nabiktima umano ng babaeng miyembro ng ‘budol-budol’sa Boracay, naglabasan

Posted May 22, 2015

Ni Bert Dalida Yes FM Boracay

Nakatakdang isailalim ngayong araw sa inquest proceedings ang babaeng miyembro umano ng ‘budol-budol’ na nahuli matapos magnakaw sa isla ng Boracay kahapon.

Subali’t bago nito, nabatid na naglabasan din kahapon ang ilan sa mga nabiktima ng suspek na si Geralyn Mamar, 29 anyos ng Lapaz, Iloilo.

Base sa police report ng Boracay PNP, positibong kinilala ng sales lady na si Shinalo Supetran ang suspek na siyang pumunta sa kanilang stall at nagpakilalang inutusan ng kanilang amo upang kolektahin ang pera.

Dahil dito, nakuha umano ng suspek ang P12, 000.00 na income sa kanilang tindahan.

Kasunod nito, isang service crew na si Risel Espolong naman ang sumunod na nagpa-blotter sa Boracay PNP laban kay Geralyn.

Kuwento ni Risel, nagpakilala umano sa kanya ang suspek na magkaibigan sila ng may-ari ng kanilang stall, at inutusan siya nitong bumili ng gulaman sa kalapit na stall.

Nagulat na lamang umano siya nang wala na ang P5, 000.00 nilang benta pagbalik niya pagkatapos bumili ng maiinom.

Samantala, nabatid na inamin din ng suspek sa Boracay PNP na siya rin ang nagnakaw ng pera ng isang babae sa Sitio Balinghai, at itinapon niya ang wallet nito sa Cagban Manoc-manoc, na narekober naman ng mga kapulisan.

History ng isla ng Boracay ibinahagi ni Usec. del Rosario sa mga APEC Delegates

Posted May 22, 2015

Ni Jay-ar M. Arante, YES FM Boracay

Mismong si Foreign Affairs Undersecretary for international economic relations Laura Del Rosario ang nagbahagi ng kasaysayan ng isla ng Boracay sa mga APEC delegates.

Kung saan ikinuwento niya umano sa mga delegado kung saan nagmula ang sikat na pangalan ngayon na Boracay at kung paano ito naging kilala sa buong mundo bilang isang tourist destination.

Ayon kay Usec. wala pa umanong pangalan noon ang nasabing isla ng makarating at manirahan dito ang isa mga negosyante sa Boracay na si Lamberto Tirol kasama ang kanyang asawa na si Sofia.

Noon umano ay namamasyal si Tirol, na sinasabung isa sa mga kauna-unahang nanirahan sa isla sa may dalampasigan kung saan dito niya nakita ang malaking bula (bubbles).

Dahil sa pagkamangha umano nito ay tinawag niya ang kanyang asawa sa local dialect na “Acay! Hanggod ka bora!” kung saan dito na umano nagmula ang pangalang Boracay na ang ibig sabihin ay "darling bubbles."

Dagdag pa nito na ang "bora" umano ay bubbles at ang "acay" ay isang term ng endearment na ang kahulugan ay “darling.”

Beach patrol group sa Boracay nakatanggap ng siyam na bisiklita

Posted May 22, 2015

Ni Jay-ar M. Arante, YES FM Boracay

Siyam na mga bisiklita ang ipinamahagi ng Provincial Government ng Aklan sa mga sundalo sa Boracay para sa kanilang beach patrol.

Ayon kay Captain Lord Laurence Medina, 12th Infantry Battalion (12IB) civil military officer, ang ibinigay umanong bisiklita sa Army beach patrol group ay para matulungang ma-protektahan ang mga turista at residente sa lugar.

Nabatid na ginanap ang pag-turn over ng mga biskilita para sa mga Philippine Army nitong Mayo 16 sa ABL Sports Complex sa Kalibo, Aklan kung saan nagkakahalaga naman ng P15,000 bawat isa.

Sinabi pa ni Medina na ang naganap na-turnover ay isa sa mga highlights ng Spearhead Troopers Unity Ride for Peace and Progress ng 12IB based sa Camp Jizmundo sa Barangay Libas, Banga, Aklan.

Samantala, mismong si Gov. Florencio Miraflores naman ang nag-abot ng mga bisiklita kay Major General Rey Leonardo Guerrero, 3rd Infantry Division commander kung saan matapos nito ay pumirma naman si Miraflores at Rep. Teodorico Haresco Jr. ng “Commitment for Peace.”

Boracay, nakapagtala ng mas mababang crime rate ayon sa PRO 6

Posted May 22, 2015

Ni Bert Dalida YES FM Boracay

Bumaba ngayon ang crime rate sa isla ng Boracay ayon sa PRO o Police Regional Office 6.

Ayon sa report, mas mababa ng halos sampung porsiyento ang naitalang kriminalidad sa isla mula Enero hanggang buwan ng Abril 2015 na may 982 na kaso, kung ikukumpara sa kaparehong period ng nakaraang taon na meron 1,086.

Aminado naman ang mga kapulisan na malaki ang naitulong mismo ng LGU Malay at mga stakeholders upang masawata ang kriminalidad sa isla.

Samantala, sa isang pahayag, sinabi ni Pangulong ‘Noynoy’ Aquino III na hindi siya kuntento sa pagbaba ng nasabing crime rate, sa kabila ng mga idinagdag na kapulisan at pinaigting na kapasidad ng mga imbistigador ng Boracay PNP.

Kaugnay parin nito, aminado naman si Boracay PNP Chief-PSInps.Frensy Andrade na bumaba ang naitalang kriminalidad ngayon sa isla dahil sa police augmentation kasabay ng ginaganap na APEC Ministerial meeting.

1st Honorable John P. Yap Malay Football Festival umarangkada na

Posted May 22, 2015

Ni Jay-ar M. Arante, YES FM Boracay

Umarangkada na kahapon ang 1^st Honorable John P. Yap Malay Football Festival na ginanap sa Balusbus Football Field Malay sa probinsya ng Aklan at magtatapos ngayong araw.

Ito ay nilahukan ng mga kasaling grupo mula sa Manila, Parañaque, Iloilo City, Cotabato, Cagayan de Oro, Negros Football Club, Calapan Mindoro, Masbate, Capiz, Kalibo, Buruanga at Boracay-Malay Football team.

Ayon kay Municipal Sports Coordinator Cesar Oczon, isang maikling programa umano ang isinagawa kahapon sa Malay Elementary School bago magsimula ang laban kung saan mainit namang tinanggap ng LGU Malay ang mga kalahok.

Maliban dito may mga panauhing pandagal din umano sila na mga International Football Players para sa pagbubukas ng kauna-unahang palaro.

Samantala, ikinatuwa naman ni Mayor Yap ang naging success ng nasabing laro kung saan inaasahan nitong magtuloy-tuloy pa ito sa mga susunod na taon.

Nabatid na layunin ng patimpalak na mabigyan ng pagkakaton ang mga kabataang mahilig maglaro sa larangan ng Football.

Matapos magnakaw, babaeng miyembro umano ng ‘budol-budol’gang, timbog sa Boracay

Posted May 21, 2015

Ni Bert Dalida YES FM Boracay

Timbog ang isang babaeng miyembro umano ng ‘budol-budol’gang, matapos magnakaw kagabi sa isla ng Boracay.

Ayon sa police report ng Boracay PNP, maghahanda ng kanilang hapunan ang nagreklamong si Jezrel Almero nang pinasok ng suspek na si Geralyn Mamar, 29 anyos ng Lapaz, Iloilo ang kanilang motor shop sa Sitio Cagban, Barangay Manoc-manoc.

Kinuha umano ng babae ang perang nagkakahalaga ng P6, 000.00 doon sa cash box at mabilis na sumakay ng trisekel.

Kaagad niya itong hinabol hanggang sa station 3 kung saan niya ito na-ispatan.

Suwerte namang nakahingi siya ng saklolo sa isang miyembro ng MMDA o Metropolitan Manila Development Authority sa lugar kung kaya’t naaresto ang suspek.

Narekober din ang perang nagkakahalaga ng P5, 760.00 mula sa kanya.

Samantala, nabatid naman mula sa Boracay PNP na isang miyembro ng ‘budol-budol’ ang suspek at nakapambiktima na sa isla ng Boracay.

Modus umano ng babae na magpakilala bilang supervisor, at saka kukunin ang perang kita ng biktimang establisemyento.