Mga driver sa Boracay, isasailalim sa seminar kaugnay sa proyektong inilatag ng MTO, LGU at BLTMPC

Ni Christy Dela Torre, YES FM Boracay

Isang proyekto ang kasalukuyang pinaghahandaan ng Boracay Land Transportation Multi-Purpose Cooperative o BLTMPC para sa mga tricycle at multicab drivers sa Boracay.

Ayon kay Ryan Tubi, Chairman BLTMPC, magsasagawa ng dalawang araw na Front liner Enhancement Seminar ang Land Transportation office at Department of Labor para sa mga driver dito sa isla, na magsisimula ngayong araw, Nobyembre a bente-tres hanggang a bente-kwatro ng taong kasalukuyan.

Pag-uusapan umano sa naturang seminar ang mga ordinansa ng transportation, performances ng mga drivers sa kanilang trabaho kabilang na ang kung paano nila i-handle ang maraming pasahero, at kung ano ang kanilang gagawin at paano susundin ang ordinansang kanilang inilatag.

Isa rin sa mga layunin ng nasabing seminar ay mabigyan ng certificate at award ang isang driver upang makapag-renew ng permit sa susunod na taon.

Nauna rito, nagkaroon muna ng registration ang lahat ng mga drivers sa isla kung saan kinuhanan sila ng profiling at binigyan ng kopya ang LGU at BLTMPC, nang sa ganoon kung sakaling nagkaroon sila ng paglabag ay lalagyan ito ng tatak, isang patunay na sila ay lumabag.

At kung sakaling umabot sa limang violations ang isang driver ay hindi na ito papayagang magrenew ng permit.

Habang bibigyan naman ng certificate at award na makapag-renew ng permit ang isang driver na walang anumang report ng kahit na anong paglabag sa kaniyang trabaho.

Ayon pa kay Tubi, naglaan ng budget ang pamunuan ng BLTMPC at lokal na pamahalaan para sa nabanggit na proyekto.

At kung sakali aniyang kulang ang dalawang araw na ito ay handa silang mag-extend ng isa pang araw para mas lalo pang maging handa at mabigyan ng karagdagang impormasyon ang mga drivers may kinalaman sa kanilang trabaho.

Napag-alamang ang nasabing proyekto ay sa pangunguna ng Malay Tourism Office, katuwang ang lokal na pamahalaan ng Malay.

Mga tricycle, posibleng kulanging ngayong “super peak season” sa Boracay

Hindi imposibleng kukulangin ng mga tricycle sa Boracay ngayong super peak season na.

Lalo pa at nagpapatupad parin sa isla ng color coding sa mga sasakyang ito.

Sa panayam kay Boracay Land Transport Multi-purpose Cooperative Chairman Ryan Tubi, sinabi nitong pinag-iisipan na rin nila ang bagay tungkol sa posibilidad na kukulangin ang mga unit ng tricycle sa isla, lalo na ngayong magpapasko kung saan dadagsa na rin ang mga turista.

Kaya sa rasong ito, posible rin aniya nilang hilingin sa lokal na pamahalaan ng Malay na kung maaari ay kanselahin muna ang pagpapatupad ng color coding.

Maliban dito, idadagdag din nila sa apela, ang kanilang paliwanag na hindi ang mga tricycle sa ang pangunahing dahilan kung bakit nagsisikip ang kalye at bumibigat ang trapiko sa Boracay.

Ayon kay Tubi, napatunayan nila noong ika-27 ng Oktubre ng dumating ang Caribbean Cruise sa isla at nang ipagbawal ang mga delivery truck at iba pang pribadong sasakyan sa mga oras na iyon.

Dahil nakita umano nila na maayos naman ang trapiko sa kalye gayong mga tricycle lamang ang pumapasada, kung saan ibig sabihin hindi ang mga tricycle at driver nila ang problema sa kalye.

Isa pa umano sa ipupunto nila ay isang taon ang binabayaran nilang Mayor’s Permit bawat unit, nagre-renew at nagbabayad din sila ng rehistro taon-taon.

Kaya dapat ay buong taon din umano ang operasyon nila at hindi yaong kalahati lamang, dahil sa ipinapatupad na color coding. #ecm112012

Mga boatmen at kapitan ng BIHA, nakapag-SOLAS na

Halos lahat na ng kapitan ng bangkang pang-island hopping ng BIHA ay dumaan na sa pagsasanay sa Safety of Life at Sea (SOLAS).

Kung saan, ayon kay Rigoberto Gelito Jr., Chairman ng Boracay Island Hopping Association (BIHA), 250 na sa kanilang mga boatmen at boat captains ang nakapag- SOLAS na sa Iloilo nitong buwan ng Nobyembre.

Sa kasalukuyan, umaabot sa 280 ang bangkang miyembro ng asosasyong ito.

Ito ay kaugnay pa rin sa layunin ng BIHA na mapanatiling ligtas ang kanilang mga pasahero at kliyente sa nasabing aktibidad.

Sa paraan din umano ng SOLAS training na ito, alerto at handa na rin ang mga tripulante nila sa pag-aksiyon gayong alam na ng mga boatmen at kapitan ang kanilang gagawin sa oras ng emerhiya.

Kasunod nito, dahil sa ang asosasyon at mga may-ari ng bangka umano ang gumastos sa training ng mga tripulante nila, maghihigpit din umano ang BIHA sa mga may balak lumipat ng trabaho, gaya sa paglipat sa ibang grupo ng mga kapitan at boatmen na ito.

Dahil ang pinakalisensiya umano nila mula sa MARINA, o sertipikasyon na sumailalim sila sa SOLAS ay nakapangalan sa bangka nilang ginagamit sa ngayon.

Samantala, maliban sa SOLAS training, nagtakda na rin umano ayon kay Gelito ang lokal na pamahalaan ng Malay, partikular ang Municipal Tourism Office, ng enhancement seminar sa mga ito. #ecm112012

E-trikes ng BLTMPC, handa nang lumarga

OK na ang lahat para sa paglarga ng electric tricycle o e-trike ng BLTMPC sa Boracay.

Katunayan ay naihanda na rin umano ang mga e-trike unit at ano mang araw ay pwede na itong i-release o ibigay na ng supplier sa kooperatiba.

Ito ang nabatid mula sa Boracay Land Transportation Multi-purpose Cooperative (BLTMPC) chairman Ryan Tubi.

Aniya, kamakailan lamang ay nagtungo ang mga ito sa Metro Manila para makita ang mga unit.

Lalo na at hiniling umano nila na palitan ang motor na gagamitin para sa Boracay na yaong akma naman para sa mga matataas na daan dito, hindi katulad umano sa nauna nang dinadala dito ng supplier.

Kung saan sa pagkakataong ito ay mas pwersado at ang desinyo ay bagay talaga dito sa isla.

Dahil sa nakatakdang ibigay na ang mga unit na ito sa BLTMPC para masimulan ng gamitin Boracay.

Sa darating na Lunes, ika-26 ng Nobyembre ay tutungo aniya dito ang supplier ng e-trike para sa gagawing inauguration sa ilalagay na Charging Station sa Boracay.

Subalit wala namang petsa na binangit si Tubi kung kaylan dadalhin sa isla ang mga unit. #ecm112012

DTI-Aklan, pinag-iingat ang mga konsyumer sa mga produktong bibilhin ngayong nalalapit na Kapaskuhan

Ni Bert Dalida, YES FM Boracay

Inaasahang tataas na naman ang mga bilihin at mga produktong kinahuhumalingan ng lahat ngayong nalalapit na Kapaskuhan.

Hudyat din upang ang mga konsyumer ay maaaring tangkilikin ang mga mura o abot-kayang presyo, at isantabi na lamang ang kalidad ng mga bibilhing produkto.

Ang masaklap, kapag hindi naging maingat, ay maaaring mauwi pa sa pagbili ng mga botcha o double dead na karne o di kaya’y expired na produkto ang publiko.

Kaugnay nito, ang DTI o Department of Trade and Industry ay pinag-iingat ngayon ang mga kunsumidor.

Bagama’t nilinaw ni DTI Aklan Director Diosdado Cadena na ang mga suplay at presyo lamang ng mga produkto ang kanilang binabantayan.

Sinabi nito na nakikipag-ugnayan na rin sila sa iba pang sektor katulad ng Department of Agriculture, upang matiyak na walang nakakalusot na botcha sa Aklan, kasama na ang Boracay.

Sa mandato na umano kasi ng NMIS o National Meat Inspection Service, na sa ilalim naman ng Department of Agriculture ang pagdetermina kung ligtas o hindi ang mga uri ng karneng ibinibenta sa mga pamilihan.

Idinagdag pa ni Cadena na dapat ay maging vigilante o lalong mag-ingat ang publiko tungol dito, lalo pa’t marami din ang mga nagtitinda ng mga tinatawag na home-made products at backyard slaughter house.

Samantala, maliban sa siniguro nitong walang bocha sa Aklan tiniyak din ng DTI Aklan na magiging ligtas ang publiko kung uugaliin din ng mga itong hanapin at piliin ang mga produktong hindi expire, sumailalim at may tatak ng pag-inspeksyon ng mga otoridad.  

Bangka ng BIHA, magiging “color coded” na

Makikilala na ang mga bangka na hindi rehistrado sa BIHA kapag naipatupad na ang color coding sa mga bangkang pang-island hopping sa Boracay.

Sapagkat plano ngayong ng lokal na pamahalaan ng Malay na magkaroon ng opisyal na kulay ang mga bangka ng Boracay Island Hopping Association o BIHA.

Ito ay upang madaling makilala kung saang grupo kasali o miyembro ba nila ang mga ito para na rin sa seguridad ng turistang pasahero kapag lehitimong pang-island hopping ang masasakyan.

Nabatid mula kay BIHA Chairman Rigoberto Gelito Jr., na sa kasalukuyan ay umaabot na sa 280 ang miyembro nila.

Sa dami umano ng bangka ng BIHA, inaasahang hahati-hatiin ang mga ito kapag nagsimula nang mag-iskedyul para sa pagpipintura ang mga sasakyang pandagat na ito.

Pero sa ngayon ay naghihintay pa umano sila ng “go signal” mula sa Punong Ehekutibo kung kailang ito sisimulan at kung saan nila ito gagawin dahil iniingatan din nila na hindi makulayan ang mapuputing buhangin ng Boracay.

Aasahang din umano ayon kay Gelito na sa bawat bangka ay maglalagay na rin ng logo ng LGU Malay. #ecm112012

Mayor Yap, umapela sa mga Boracaynon para sa “Light a Boracay Christmas Star”

Umapela ng suporta ngayon si Malay Mayor John Yap sa mga Boracaynon at stakeholders sa isla na magsabit ng Parol para sa nalalapit na kapaskuhan.

Ito ay kasunod sa programang ikinasa ng lokal na pamahalaan ng Malay sa Boracay na “Light a Boracay Christmas Star” para iparamdam sa nga bisita ng isla ang diwa ng Kapaskuhan.

Dahil dito, humiling ng tulong ang Punong Ehikutibo sa mga Punong Barangay ng tatlong barangay din sa Boracay na kung maaari ay tulungan ang LGU sa kanilang adhikain.

Ito ay para sa promosyon ng masayang pasko, kaya kahit ang mga residente sa isla pati mga stakeholder lalo na ang malapit sa mga daanan ay hinihikayat nito na magsabit ng parol o kaya ay mga pailaw na nagsisimbolo ng Pasko.

Kung saan ang mga parol at pailaw na ito ay sabay umanong sisindihan sa darating na ika-14 ng Disyembre kung saan may progrmang isasagawa sa Balabag Plaza kasabay ng paglulunsad sa “Light a Boracay Christmas Star”.

Ang programang ito ng LGU Malay patikular ng Municipal Tourism Office sa Boracay ay sinang-ayunan at sinusuportahan naman ng Red Cross Malay-Boracay Chapter, Boracay Chamber of Commerce and Industry (BCCI), at Boracay Foundation Incorporated (BFI).  #ecm112012

Timbog sa buy bust operation sa Boracay, ihaharap na sa prosecutor

Pormal nang isinampa ang kaso laban sa dalawang suspek na tiklo sa isinagawang buybust operation kahapon ika-20 ng Nobyembre.

Ang suspek na sina Jim Raymond Comula ng Tibiao, Antique at Johnny Kris Delongines ay kapwa nahulihan ng pinapaniwalang illegal na droga.

Ito ay makaraang makuha sa posisyon ng mga ito ang limang sachet ng pinaghihinalaang shabu sa mismong operasyon na ikinasa ng Provincial Intelligence Branch Operative at Boracay Tourist Assistance Center.

Dagdagan pa dito na nakakuha ng isang .38 calibre ng baril mula sa posisyon ni Delongines.

Kapwa kaso sa pag-iingat at pagdadala ng ipinagbabawal na gamot ang isasampa sa mga ito, kung saan nito umaga lang ay dinala rin sa bayan ng Kalibo para maiharap sa prosecutor. #ecm112012

Akelco, may bagong taripa ngayong Nobyembre

Kung nitong nagdaang buwan ng Oktubre ay halos nasa P10.50 per kilowatt hour ang binabayaran ng konsyumer sa residential areas, ngayong Nobyembre ay halos aabot na ito sa onse pesos.

Kung sa pang-komersiyal naman dati ay nasa P9.75 per kilowatt hour, ngayong buwan ay aabot na ito sa sampung piso.

Ito ay makaraang magpalabas ng bagong taripa sa paniningil ang Aklan Electric Cooperative (Akelco) na ipapatupad ngayong buwan, kung saan mahigit dalawangput walong sentimos ang idinagdag.

Ayon sa pamunuan ng Akleco, ang sunod-sunod na pagtaas ng singil nila nitong Oktubre at nitong Nobyembre ay dahil din sa pagtaas ng presyo ng enerhiyang binibili ng Akelco sa spot market.

Kung maalala, buwan ng Setyembre ay bumaba ng mahigit piso ang taripang ipinatupad ng kooperatibang ito makaraang bumaba din ang gastos ng isa sa pinagkukunan nila ng eherniya partikular na ang nagmula sa hydropower plant dahil sa madalas na pag-ulan noong buwan ng Agosto at Setyembre.

Muling nagpa-alala naman ang Akelco sa mga konsyumer, na maliban sa pag-galaw ng presyo ng binibiling enerhiya sa merkado.

Pwedeng magiging rason din umano sa pabago-bagong taripa nila ay ang generation cost na pinapataw ng mga energy producer gaya ng system loss. #ecm112012

2013 budget ng LGU Malay, tumaas: umabot na sa P305M!

Tumaas ng P25-M ang Annual Budget ng LGU Malay sa taong 2013 kung ikukumpara ito sa taong 2012.

Sapagkat kung ngayong taon ng 2012 ay umabot lamang sa P280-M ang pondo na ginugol sa mga proyekto, programa at iba pang gastusan ng Malay kasama na ang sa isla ng Boracay.

Sa susunod na taon ng 2013, 305 milyong piso na ang pondo na maaaring gamitin ng gobyerno para sa pagpapatakbo sa bayang ito at ng isla ng Boracay.

Dahil dito, noong ika-21 ng Nobyembre ay nagkaroon na ng Budget Hearing sa Sangguniang Bayan ng Malay para sa pagpaplano at alokasyon ng pondong ito.

Dito ay nakatakdang ipatawag ng SB ang mga Department Heads ng LGU Malay para masimulan ang pagdinig, kung gaano kalaking pondo ang ilalaan sa bawat departamento na magsisilbing budget nila sa loob ng isang taon.

Sa pagdinig na gagawin bukas, dito malalaman kung saan at para sa ano gagastusin ang halaga ng alokasyon.

Ang SB Malay ang may mandatu para magrebyu ng mga pondo o alokasyon bago ito aprubahan ng Punong Ehekutibo. #ecm112012

Mga naglalako sa front beach, umapela sa SB

Nag-iisip na ngayon ang Sangguniang Bayan ng Malay kung ano ang magiging aksiyon nila sa sunud-sunod na apela ng mga naghahanap buhay sa vegetation area sa front beach ng Boracay.

Sapagkat kung ang mga hair braiders o taga-tirintas ng buhok sa Boracay ay humingi ng pag-unawa kaugnay sa kanilang kabuhayan sa lokal na pamahalaan ng Malay bagay na nagpadala ng sulat na kung maaari ay gawin ng legal ang kanilang propisyon na napili.

Ang mga ambulant vendors gaya ng nagbibenta ng taho at isda sa front beach ay nagpaabot din ng sulat sa SB na naglalayong mabigyan sila ng kahit dalawang oras na makapaglako sila sa area na ito.

Gayong ang nasabing mga vendors ay hinuhuli ng MAP o pulis kapag nakita ang mga ito na nagsasagawa ng kanilang aktibidad sa front beach.

Kaugnay nito, nilinaw ni Vice Mayor Ceceron Cawaling na hindi ipinagbabawal ang mga naglalako ng taho at isda sa mga eskinita sa Boracay.

Pero sa vegetation area kung saan doon din ang mga turista ay tila hindi umano pwede.

Dahil dito, aalamin aniya ng konseho mula sa Punong Ehikutibo kung ano ang saloobin nito kaugnay sa apela ng mga naghahanap buhay sa front para magawan nila ng Ordinansa ng SB kung kailangan pa o kaya ay ma-rebyu nila ang ordinansa kung ano ang mayroon na. #ecm112012

“Best Driver Award”, ibibigay ng LGU sa mga tricycle drivers sa Malay

“Best Driver Award.”

Ito ang ibibigay ng lokal na pamahalaan ng Malay bilang pagkilala sa mga tricycle driver na nagbibigay ng magandang serbisyo sa mga turista.

Ang award na ito sa “tsuper” ng traysikel ay hindi lamang dito sa Boracay kundi maging sa mainland Malay.

Ito ay isang pasasalamat na rin ng LGU sa maayos na serbisyong ibinibigay nila bilang sa mga frontliner o may direktang makikisalamuha sa mga bisita.

Target ng Municipal Tourism Office (MTO) na mapa-unlad ang kalidad ng serbisyo upang makamit ang International Standard ng mga front liners na ito.

Sa programang ikinasa ng MTO na “Tourism Front Liners Enhancement for Sustainable and Globally Competitive Tourism Industry”, sa gagawing ebalwasyon at pagmonitor ng tanggapang ito kung nagagamit ba ang mga itinuro sa mga drivers.

Makakatanggap ng premyo ang mga driver na ito mula sa LGU Malay.

Ayon kay MTO Chief Operation Officer Felix Delos Santos Jr., may pondo nang inilaan ang LGU dito at aasahang matatanggap ang award na ito sa gaganaping Malay Day sa ika-15 ng Hunyo sa susunod na taon.

Pagbabasihan aniya nila sa pagbibigay ng Award ay kung: matapat ang isang driver na hindi naniningil ng sobra; may sapat na kaalaman gayong driver/tour guide na sila ngayon; palakaibigan at palangiti; may dispilina; propesyunal, kabilang na ang maayos na pananamit at pakikipag-kapwa tao; at higit sa lahat, ang pagiging matulungin.

Ang mga katangian umanong ito ang dapat taglayin ng isang frontliner na siyang makakatulong sa promosyon ng industriya ng turismo sa Boracay na Premiere Tourist Destination at 7 Wonders of Malay. #ecm112012

BTAC, nag-ala tindahan ng motorsiklo

Animo ay tindahan na ng motorsiklo ang harapan ng himpilan ng Boracay Tourist Assistance Center (BTAC), dahil sa dami ng nahuling lumabag kagabi sa ordinansa at batas trapiko na ipinapatupad dito.

Tila hindi man lang natinag ang ilang motorista sa Boracay sapagkat nitong nagdaang linggo ay marami na rin ang na impound subalit heto at sige pa rin ang biyahe sa kabila na batid ng mga ito ang kanilang mga kakulangan.

Sa naitala noong gabi ng ika-18 ng Nobyembre, 18 ang motorsiklong nasa kustodiya ngayon ng Boracay Police habang 9 na mga drivers license naman ang hawak ng awtoridad.

Ang pagkakahuli sa mga motorista ay sa pamamagitan ng check point na pinagunahan ni P/Insp. Kennan Ruiz.

Agad naman umanong dadalhin ang mga drivers license na ito sa tanggapan ng Land Transportation Office o LTO, habang ang mga motorsiklo ay pansamantalang sa kustudiya ng BTAC.

Inaasahan naman na ang mga nahuling motorsiklo na walang Permit to Transport (PTO) ay isasama sa iba pang nauna nang nahuli para itakda na ipadala sa main land Malay gayon bawal na ito sa isla batay sa Executive Order ng Punong Ehekutibo kaugnay sa Moratorium o pagpapatigil sa pagbibigay ng PTO sa layuning ang mga rehistradong motorsiklo na lamang ang matira sa isla. #ecm112012

Akelco, magtataas ulit ng singil ngayong Nobyembre

Aasahan na ang mataas na babayaran sa kuryente ngayong Nobyembre.

Dahil sa halos P0.22 ang idadagdag sa taripa ng Akelco.

Sa ginawang kumpirmasyon ni Rence Oczon, Public Information Officer ng Akelco, inihayag nito nasa P0.22 ang itaas kada kilowatt hour ngayong buwan.

Aniya, ang pagtaas na ito ay resulta ng pag-galaw din ng presyo ng enerhiyang binibili ng Akelco, partikular na sa Wholesale Electricity Spot Market (WESM).

Kung maaala, buwan ng Setyembre ay bumababa ang singil ng mahigit P1.00 kada kilowatt hour.

Pero dahil sa dalawang buwang sunod-sunod na pagtaas simula nitong Oktubre kung saan nagtaas din ng mahigit P0.60, at ang dagdag ngayong Nobyembre na P0.22, halos bawi na rin ang ibinaba noong nakaraang buwan.

Dahil dito, nagpaalala si Oczon sa mga konsyumer na maging responsable, at magtipid pa rin sa pag-gamit ng kuryente lalo na at magpa-Pasko na, kung saan inaasahan aniyang taas ang konsumo ng elektrisidad. #ecm112012

Problema sa drainage, di pa masiguro kung tatanggapin ng TIEZA Regulatory Office sa Boracay

Nilinaw ng TIEZA na ang kanilang tanggapang ilalagay dito ay Boracay na nakatakdang buksan ay para sa operasyon ng BIWC lamang.

Ito ang inihayag ni Atty. Marites Alvares, Officer In-Charges ng Tourism Infrastructure and Enterprise Zone Authority Regulatory Office sa isla.

Kung saan ito aniyang tanggapan nila ay siyang magmonitor sa operasyon ng Boracay Island Water Company sa serbisyo ng tubig at sewerages system para masigurong napoprotektahan ang mga konsyumer. at kapaligiran dito.

Kaya para masigurong magkaroon ng maayos na relasyon ang TIEZA sa kumunidad ng Boracay at hindi nag-aabuso ang BIWC sa mga ito, nais ngayon ng ahensiyang na kumuha sila ng Quality and Customer Services Officer na nagmula mismo dito sa isla o kaya ay isang Aklanon para madaling malapitan ng kahit ordinaryong mamamayan kung may isusumbong man.

Aniya, ang taong ilalagay sa posisyong ito ay siyang magpapa-abot na rin ng problema nararanasan ng mga konsisyuner dito.

Pero nananatiling tanong parin sa ngayon, kung ang TIEZA Regulatory Office na ito ay handa na rin bang tumaggap ng mga reklamo kaugnay sa nararansang pagbabaha dito sa Boracay dahil sa problema sa drainage system. #ecm112012

Ordinansa sa pag-alalaga ng aso sa Boracay, hindi lubos na naintindihan --- Island Administrator

Wala sanang nahuhuling pagala-galang aso kung lubos nang naiintindihan ang ordinansang ipinapatupad sa Boracay kaugnay dito.

Ito ang buwelta ni Island Administrator Glenn Sacapaño sa mga nag-aalaga ng aso na patuloy pa ring hinahayaan na gumala-gala sa kabila ng pagkakaroon ng batas na nagbabawal dito dahil sa maaaring problema sa madadala sa komunidad at sa industriya ng turismo ng Boracay.

Naniniwala si Sacapaño na kapag rehistrado ang mga aso at nakatali ang mga iyon ay wala nang mahuhuli pa ang mga dog catcher.

Labis din umanong nagtataka ito dahil kapag hinuli ng hayop gaya nito na pagala-gala ay mayroong nangrereklamo.

Pero kung hahayaan na lamang di umano nila ito, binabato rin ang lokal na pamahalaan ng Malay ng kung anong kumento lalo na kapag makadisgrasya ito ng mga turista.

Inihayag din nito na mayroon namang dog pound sa Boracay sa Brgy. Manoc-manoc.

Pero hindi nito masabi ngayon kung may pondong inilaan para sa pagkain ng mga asong nahuhuli.

Samantala, bukas naman umano sila sa maaaring kaso na isampa laban sa mga dog catcher sa Boracay, lalo na kung may sapat naman na dahilan at may tumatayong saksi.

Maaalalang nitong nagdaang buwan ay naging sentro ng usaping ito ang dog catcher na si Junjun Mendoza makaraang ireklamo ito ng dalawa Swiss National sa di umano ay hindi nito pagpapakain, gayon din pagkatay at pagbenta pa nito sa mga asong hindi pa nakukuha ng may ari habang nasa posesyon nito. #ecm112012