Demolisyon ng West Cove, nakalutang!

Ni Edzel Mainit, Field Reporter, YES FM Boracay

Nakakasa na ang demolition team at nakabantay na din ang kapulisan.

Pero hindi pa talaga masasabi sa ngayon kung matutuloy ang demolisyon o kung may pagtitibag na mangyayari sa area na hindi sakop ng Flag-T na ibinigay sa West Cove sa Sitio Diniwid, Brgy. Balabag.

Bagamat pagdating ng grupo na kakatawan sa iba’t-ibang departamento ng pamahalaan nitong umaga sa resort upang ilatag ang demolition order ay naging mainit ang pagsalubong dahil sa hindi pinapasok ang mga ito.

Kinalaunan, tila lumamig na rin ang tensiyon makaraang makapag-usap at simulan na ng surveyos na dala ng DENR ang pagsukat sa area na pasok sa 998 meters na nakapaloob sa Flag-T.

Nakasalalay naman ang desisyon sa DENR kung may mangyayaring demolisyon, depende sa mapag-uusapan nila ng management ng West Cove.

Subalit bahagyang natigil ang nasabing pagsusukat nang biglang nawala o umalis ang representante ng DENR sa katauhan ni PENRO Officer Ivien Reyes na sa kasalukuyan ay hinihintay pa rin.

Sa kasalukuyan ay patuloy na naka-stand by ang mga kawani ng LGU sa labas ng resort.

Ang pagsisilbi ng demolition order ay pinangunahan ng DENR at Malay Mayor John Yap.

Kung maaalala, ang West Cove ay naging laman na din ng national TV dahil sa umano ay kawalan ng aksyon ng DENR at LGU Malay sa pagpapasunod sa batas, kabilang na ang pagbibigay ng penalidad sa nalabag na bahagi ng Flag-T at pag-o-operate ng walang permiso mula sa LGU.

“Pacquiao Resort” sa Boracay, ipapagiba na!

Ni Malbert Dalida, News Director, YES FM Boracay

Sa halip na mga turista ang makikita sa West Cove, ang tinaguriang Pacquiao Resort sa Boracay, mga sundalo, pulis at mga miyembro ng Malay municipal auxiliary police ang naroon matapos isama ang mga ito ni Mayor John Yap.

Hindi upang ipasyal, kundi upang ipatupad ngayong umaga ang isang demolition order laban sa nasabing resort.

Napag-alamang dalawang beses na pala itong pinadalhan ng closure order ng alkalde dahil sa mga umano’y naging violation o paglabag nito.

Wala kasi umano itong mga kaukulang permit katulad ng mayor’s permit, business permit, building at occupancy permit at maging ng Environmental Compliance Certificate.

Samantala, iginiit naman ng may-ari ng naturang resort na si Crisostomo “Cris” Aquino na may pinanghahawakan itong Forest Land Use Agreement for Tourism Purposes o Flag-T, mula sa dating DENR Secretary Lito Atienza.

Kung kaya’t kampante ito sa paniniwalang ang kinatatayuan ng kanyang resort ay hindi sa “no build zone”, dahilan upang magpasaklolo ito sa pamamagitan ng Temporary Restraining Order, upang matuloy ang kanilang operasyon.

Samantala, matapos ang umano’y patuloy na paglabag ng nasabing resort katulad ng hindi na dapat nito pagdagdag ng anumang istraktura doon, minarapat ngayon ni Mayor John Yap at ng DENR na ipatupad na ang nasabing demolisyon.

Mga sirang access road sa bayan ng Malay, ipinaalala ni Vice mayor Cawaling sa konseho

Ni Malbert Dalida, News Director, YES FM Boracay

Dahil sa tila masyado nang nabaling ang atensyon ng mga elected officials ng Malay sa mga problema sa Boracay, nagpaalala ngayon si vice mayor Cesiron Cawaling sa mga komitiba ng konseho na bigyang pansin naman ang mga problema sa bayan ng Malay.

Partikular na tinumbok nito ang mga sira nang access road sa mga barangay katulad ng sa sitio Bacolod at Malamig.

Nakita kasi umano ni Cawaling sa kanyang pagpunta doon na delikado at halos nawawala na ang kalsada sa naturang lugar, dahil sa nawa-wash out o naaanod ng ulan ang lupa.

At sa paniniwalang marami na ring mga turista ang pumupunta doon, hinimok ngayon ng bise alkalde ang committee on tourism, committee on public works and highways maging ang committee on barangay affairs na tingnan naman ang kondisyon ng nasabing lugar.

Hinimok din ni Cawaling ang konseho na laanan ng budget ang pagpapalagay ng graba at pagsasayos muli ng naturang kalsada.

Nangako naman ang konseho na kanilang bibigyang pansin ang inilatag nitong problema, matapos magpasalamat ng mga ito sa kanyang naging paalala nitong nagdaang Martes sa sesyon. 

Istandard para sa mga motorcycle helmets, isinusulong ng DTI

Ni Malbert Dalida, News Director, YES FM Boracay

Ang motorcycle helmet mo ba ngayon ay ligtas gamitin? Walang bawas? Walang gasgas? O ito ba’y lisensyado at may ICC sticker ng Bureau of Product Standards? 

Kung wala pa, para sa’yo ang balitang ito:

Ang DTI o Department of Trade and Industry-Aklan ay nagpalabas ngayon ng panawagan at paalala sa publiko tungkol sa paggamit ng standard protective motorcycle helmets.

Base kasi sa Republic Act No. 10054 o Motorcycle Helmet Act of 2009, ang lahat ng mga gumagamit o sumasakay sa motorsiklo ay dapat magsuot ng helmet na naaayon sa istandard.

Kung kaya’t iginigiit ngayon ng DTI na ang mga helmet na isusuot ng mga motorista ay yaong may ICC o PS stickers.

Huhulihin kasi ng mga taga LTO o Land Transportation Office ang mga motoristang walang sticker ng BPS o Bureau of Product Standard.

Nararapat lamang ayon sa DTI na dalhin at ipa-check ng mga motorista sa kanila ang ginagamit nilang helmet upang masuri kung ito ba’y buo pa, walang gasgas, ligtas gamitin at nakapasa sa standard.

At sa mga walang ICC sticker, maaaring maghanda lamang ng I.D, isangdaang pisong processing fee at uno bente singko sentimos para sa sticker.

Ang tanggapan ng DTI ay matatagpuan sa JSM Bldg., Veterans Avenue, Kalibo, Aklan para sa karagdagang katanungan.

Pagpapailaw sa mga access roads sa Boracay, binigyang pansin ng SB Malay

Ni Malbert Dalida, News Director, YES FM Boracay

Dahil sa mga nangyayaring insidente at kriminalidad sa Boracay, binigyang pansin na ngayon ng SB Malay ang pagpapailaw sa madidilim na bahagi ng isla, partikular sa mga access road katulad ng sa Mt. Luho sa barangay Balabag.

Kung saan ang bagay na ito ay iginiit ni SB Member Wilbec Gelito sa sesyon kahapon, lalo na’t may mga street lights na palpak at hindi umiilaw sa gabi.

Bagay na pinuna ni Gelito ang mga naturang poste ng ilaw kung papaanong hindi na ito napapakinabangan.

Samantala, kaagad namang nagsuhestiyon si Vice mayor Ceciron Cawaling na kaagad tawagin ang atensyon ng barangay at ang komitiba ng turismo tungkol dito.

Baka naman kasi, ayon kay Cawaling, ay ninanakaw na maging ang kuryente ng mga streetlights na ito.

Matatandaang ang matagal nang hinaing ng mga residente at turista tungkol dito ay inilatag kahapon sa sesyon bilang hamon ni SB Member Welbic Gelito kung saan sinabi nitong kung nais umanong mapangalagaan ng Boracay ang pagiging World’s Best Island nito ay kailangang bigyang pansin ang seguridad ng isla laban sa mga kriminalidad.

Mga akyat-bahay at insidente ng nakawan sa Boracay, ikinabahala ng SB Malay

Ni Malbert Dalida, News Director, YES FM Boracay

Tinatawagan ang atensyon ng mga pulis, municipal auxiliary police, barangay chairman at mga tanod sa Boracay!

Nababahala na ngayon ang Sangguniang Bayan ng Malay sa pananalasa ng mga kawatan at mga insidente ng nakawan sa isla.

Ito’y matapos idulog sa sesyon kahapon ni SB Member Welbic Gelito, ang problemang may kaugnayan sa mga akyat-bahay na pinangangambahan dito ng mga residente.

Sinabi ni Gelito na natatakot at nag-aalala na umano ang ilan sa mga nakausap nitong residente na lumabas tuwing gabi, sa pangambang masalisihan o pasukin sila ng akyat-bahay.

At dahil ang naturang sitwasyon ay patungkol din sa seguridad ng isla, iminungkahi nito sa sesyon na magsumite ang mga kapulisan dito ng kanilang security plan.

Nababahala din umano kasi ito na ang pami-merwisyo ng mga kawatan sa Boracay ay kumalat sa internet na magiging pangit naman sa industriya ng turismo.

Nagsuhestiyon din ito na kung maaaring tingnan din nila ang posibilidad kung makakapagdagdag pa sila ng budget, upang mapalawig pa hanggang sa gabi ang trabaho ng MAP o municipal auxiliary police dito.

Samantala, sinabi naman ni SB Member Esel Flores na mas makabubuti ring tawagin ang pansin ng mga barangay chairman at hindi lamang ang mga kapulisan.

Ang mga kapitan din umano kasi ng barangay ang may mandato sa mga tanod, at may mas malaking responsibilidad sa pagsugpo ng krimen.

Maliban naman sa pagtawag-pansin sa mga kinauukulan, iginiit din ni Gelito ang pagpapalagay na ng ilaw sa mga madidilim na lugar sa isla, katulad ng daan papunta sa Mt. Luho sa barangay Balabag.

BFI, kinilala ng LGU Malay

Ni Malbert Dalida, News Director, YES FM Boracay

Malaki ang naging partisipasyon ng Boracay Foundation Incorporated (BFI) sa anumang narating ngayon ng Malay at Boracay.

Isa na rito ang mahaba-haba at mabusising pakikipaglaban sa proyektong reklamasyon ng pamahalaang probinsya ng Aklan.

At ang labang ito ay nagbunga na, matapos ipag-utos ng Korte Suprema nitong nagdaang Huwebes na tuluyan nang ihinto ng probinsya ang apatnapung ektaryang reklamasyon sa Caticlan, bagay namang ikinatuwa ng lokal na pamahalaan ng Malay ang nasabing desisyon.

Kaugnay nito, sinabi kanina sa sesyon ni SB Member Rowen Aguirre na nararapat lamang kilalanin din ng LGU Malay ang pakikipaglabang ng BFI sa karapatan ng bayang ito , sa pamamagitan ng isang komendasyon.

Samantala, kaagad namang sinang-ayunan ng mga miyembro ng konseho ang naturang proposisyon ni Aguirre.

Matatandaang ang BFI ay nakipaglaban kasama ng LGU Malay sa naging pamamaraan ng pamahalaang probinsya sa paglatag ng naturang proyekto at sa animo’y kawalan nito ng respeto sa kapangyarihan ng lokalidad dito. 

Mga local tour guide sa Boracay, isinailalim sa seminar

Ni Malbert Dalida, News Director, YES FM Boracay

Hindi lamang pala basta-basta ang pagiging tour guide.

Dahil ayon kay DOT Boracay Officer Judith Icutanim, ang pagiging tour guide ay isang propesyon.

Ito ang kanyang mariing sinabi tungkol sa isinasagawang seminar ngayong araw sa barangay Balabag hall, kung saan mahigit apatnapung lokal na tour guide sa isla ang nakapagsimulang magparehistro kahapon.

Ayon pa kay Icutanim, importanteng i-seminar ang mga tour guide dito, upang matiyak na naaabot ang standard o panuntunan ng isang totoong tour guide.

Karamihan umano kasi sa mga tour guide dito ay nagtatrabaho sa mga resorts, unemployed, na iba naman tumutugma sa hinihinging panuntunan ng ordinansa ng LGU Malay.

Dahil dito ang mga tour guide na nagse-seminar ngayon, ay talaga umanong isinailalim sa dalawampu’t isang araw na training na kinatatampukan ng effective communication, geography, at Philippine government at mga pagsusulit.

Matapos ang nasabing seminar, makakatanggap naman ang mga ito ng kaukulang sertipikasyon na maaari nilang magamit sa pag-aplay ng kanilang business permit.

Umaasa naman ang DOT na magkakaroon na ng de kalidad na serbisyo ang mga tour guide dito para sa munisipalidad ng Malay.

Nakabalandrang kable ng kuryente ng mga establisimyento sa beach front ng Boracay, paiimbistigahan na

Ni Malbert Dalida, News Director, YES FM Boracay

Isang napakagandang implikasyon para sa Boracay ang makilala bilang numero uno at magdala ng titulong “2012 World’s Best Island”.

Bagay na ikinatuwa ng lokal na pamahalaan ng Malay ang naturang pagkilala, dahil sa ikagaganda umano ito lalo ng turismo dito.

Subali’t ang mga nakabalandra at animo’y unregulated na mga kable ng kuryenteng ikinakabit  ng mga establisemyento sa beach front ng isla ay itinuturing ng mga dumadaan doon na delikado sa kanilang kaligtasan.

Isa na nga rito ang reklamo ng isang bente y nuwebe anyos na lalaki sa Boracay matapos umano itong makuryente nitong nagdaang Linggo sa harap ng isang establisemyento sa station 2, Balabag.

Sa sumbong ng biktima sa Boracay PNP, dakung alas sais y medya ng gabi noon, matapos ng mga itong maligo sa dagat ng kanyang kasama ay nakuryente ito ng extension wire ng isang negosyante ng mais doon.

Hinila umano ito ng kanyang kasama at subali’t nadamay din itio sa pagkakuryente.

Mabuti na lamang at kinalauna’y nasagip pa ang nasabing biktima ng ibang naroon at minarapat na tanggalin ang extension wire.

Kaugnay nito, nangako naman ang DOT Boracay na magpapatawag ng pulong kasama ang Boracay Foundation Incorporated, Boracay Chamber of Commerce, Akelco at Municipal Engineers Office upang maimbistigahan at matugunan ang naturang insidente.    

Probinsya ng Aklan, wala pang dengue outbreak

Ni Malbert Dalida, News Director, YES FM Boracay

Wala pang dengue outbreak sa probinsya ng Aklan.

Ito ang pinasiguro ngayon ng Provincial Health Officer ng Aklan Dr. Victor Santa Maria hinggil sa pinangangambahang sakit na Dengue dito.

Bagama’t nang makapanayam ng himpilang ito na ay sinabi ni Santa Maria na tumaas nga ang dengue cases dito sa Aklan at Malay, sinabi nitong hindi naman ito maidedeklarang nakakaalarma.

Kaugnay nito, bilang provincial health officer ng Aklan, minarapat ni Santa Maria na muling ipaalala ang kampanya tungkol sa tinatawag na “ABAKADA” o “Aksyon ng Barangay Kontra Dengue”, upang tuluyan nang masugpo ang pagdami pa ng lamok na nagdadala nito.

Nararapat talaga umano na tiyaking ang mga lata, o goma ng mga sasakyang maaaring pasukin ng tubig at pamahayan ng lamok ay butasan o pataubin.

Nagpaalala naman ito sa lahat ng mga nakakaranas ng ilang mga palatandaan ng naturang sakit katulad ng lagnat na magpasuri kaagad sa pinakamalapit na doctor, upang maagapan kaagad.

Mga nakawan sa mga resort sa Boracay, dapat ireport sa Barangay! --- Admin. Sacapaño

Ni Malbert Dalida, News Director, YES FM Boracay

Dapat i-report sa barangay ang mga insidente ng nakawan sa mga resort o establisemyento sa Boracay.

Ito ang iginiit ni Boracay Island Administrator Glenn Sacapaño sa panayam nitong umaga, tungkol sa mga halos magkakasunod ng insidente ng nakawan dito sa isla.

Bagama’t dapat umano talagang magreport sa mga pulis tungkol sa mga kahalintulad pangyayari, sinabi ni Sacapaño na nararapat ding magreport sa barangay upang ito’y mag-usapan.

Nagkakapagtaka nga naman umano kasi na nananakawan pa ang isang resort kahit may mga guwardiya naman.

Dagdag pa nito,kanya ring ibinalik ang hamon sa mga resort kung talaga nga bang kinikilatis ng mga ito ang mga nagtatrabaho sa kanila.

Hindi naman umano kasi lahat ng mga nagtatrabaho dito ay kumukuha ng clearances mula sa barangay at maaaring naghihintay lamang ng pagkakataon.

Maliban dito, naniniwala rin si Sacapaño na may mga nangyayari ngang inside job sa loob mismo ng mga resort o establisemyento sa Boracay.

Kung kaya’t payo nito sa mga guwardiya at mga establisemyento ay mag-team work upang maiwasan ang mga nasabing insidente.

Kaugnay nito, nangako naman ang naturang administrador na pag-uusapan nila sa Boracay Action Group ang bagay na ito. 

2000 punla ng kahoy, naitanim sa tree planting activity sa Brgy. Nabaoy

Ni Malbert Dalida, News Director, YES FM Boracay

Tinatayang umabot sa dalawang libong seedlings o punla ng kahoy ang matagumpay na naitanim sa barangay Nabaoy, Malay, Aklan nitong Sabado.

Ito’y matapos sama-samang akyatin ng pinagsanib na puwersa ng Boracay Island Water, DENR-Cenro, mga pulis Boracay at Malay, barangay officials ng Nabaoy, Yes FM at Easy Rock Boracay ang bundok ng nasabing lugar, upang tamnang muli ng kahoy.

Kasama din ng iba pang grupo at indibidwal na nagmamahal sa kalikasan, isa-isang inilipat ang mga punla sa inihandang butas sa lupa na magsisilbing permanente nilang lugar.

Ayon pa kay BIWC customer service officer Acs Aldaba, ang pagod nila sa paglalakad at pag-akyat sa bundok ng halos apat na kilometro ay napalitan ng saya dahil sa naging matagumpay na aktibidad.

Ang mga punlang ito ay inilaan at inihanda ng DENR, Boracay Water, at iba pang nag-ambag ng tulong upang mapalitan ang mga pinutol na punong kahoy doon.

Tiniyak naman ni Aldaba na ang mga itinanim na punla ay mabubuhay upang makatulong na maabot ang isang bilyong punong kahoy sa buong Pilipinas na target ng DENR.