Dengue patuloy ang paglaganap sa kabila ng panahon ng tag-init

Posted April 2, 2016

Ni Jay-ar M. Arante, YES FM Boracay

Sa kabila ng mainit na panahon mahigpit parin ang monitoring ng Malay Health Office (MHO) kaugnay sa sakit na dengue.

Ito’y sa kabila ng mga naitatalang kaso ngayon ng dengue sa nasabing bayan kahit na tag-init.

Dahil dito muling pinaalala ni Malay Municipal Health Office (MHO) Health and Educational Promotion Officer Arbie Aspiras ang “4-S”.

Nabatid na ang unang S ay “seek and destroy” na nagsasabing dapat linisin ang mga lugar na posibleng pamugaran ng mga lamok, pangalawa ang “seek early consultation” na nagpapaalalang huwag nang hintayin pa ang paglala ng lagnat at magpa-konsulta agad sa doktor.

Ang sumunod namang S ay “self protection” kung saan kailangang magsuot ng mga damit na may mahahabang manggas lalo na sa mga bata at maglagay ng kulambo sa oras ng pagtulog.

At ang pang-huling “S” naman ay “say no to fogging” dahil dapat na gamitin lamang ito kung may dengue outbreak na sa lugar.

Dahil dito pinayuhan naman ni Aspiras ang publiko na panatilihing malinis ang kanilang kapaligiran lalo na ang mga posibleng pagamuran ng lamok kung saan maaari parin itong mangitlog kahit na hindi tag-ulan.

Planong pagpapatayo ng bahay ng National Housing Authority, ipinasuspendi

Posted April 1, 2016

Ni Inna Carol L. Zambrona, YES FM Boracay

Ipinasususpendi umano ngayon ang planong pagpapatayo ng bahay ng National Housing Authority o (NHA) sa Brgy. Briones, Kalibo, Aklan.

Itoy kaugnay sa apela ng National Irrigation Administration (NIA) sa SP Aklan para suriin muna ang lugar na pagtatayuan ng kabahayan dahil umano sa kanilang nakikitang problema kung saan dapat umanong maglaan ng lugar ang mga developer sa pagdadaluyan ng tubig dito.

Sa ginanap na 10th SP Regular Session, inihayag dito ang inaasahang magiging problema kung hindi muna i-check ang lugar at para hindi umano maapektuhan ang mga manggagawa at mga taong naninirahan dito.

Samantala, ini-refer naman ang naturang usapin sa Brgy. Council ng Briones at developer kung saan magkakaroon umano sila ng agreement tungkol dito, kung saan labas na dito sa naging  usapin ng Sangguniang Panlalawigan (SP) Aklan.

Nabatid na mahigit 851 na kabahayan ang itatayo sa lugar at ang mga biktima ng bagyong Yolanda ang maninirahan dito.

Caticlan at Boracay isang araw na mawawalan ng suplay ng kuryente- AKELCO

Posted April 1, 2016

Ni Inna Carol L. Zambrona, YES FM Boracay

Isang araw na makakaranas ng brown-out ang Brgy. ng Caticlan sa bayan ng Malay at ang buong isla ng Boracay bukas araw ng Sabado Abril 2, 2016.

Base sa inilabas na kalatas ng Aklan Electric Cooperative (Akelco) magsisimula ang power interruption ng alas-8 ng umaga hanggang ala-5 ng hapon.

Nabatid na ang dahilan ng nasabing power interruption ay ang pag-shutdown ng 69KV Avon-Caticlan-Boracay line para ma-accommodate ang hiling ng Global Business Power Corp.- AVON Rivers.

Boarding house ng isang babae, niluoban ng magnanakaw

Posted April 1, 2016

Ni Inna Carol L. Zambrona,YES FM Boracay

Laking gulat umano ng isang babae matapos itong pagnakawan habang natutulog sa kanyang boarding house sa Sitio Hagdan, Brgy. Yapak, Boracay.

Nakilala ang biktima na si Claire Aspera 24-anyos isang Lady Guard at residente ng Li-ong Roxas City habang temporaryong nakatira sa nasabing Brgy.

Ayon sa blotter report ng Boracay Tourist Assistance Center o (BTAC), nagising nalang umano ito na nawawala na ang kanyang tatlong cellphone, I’d at cash na nagkakahalaga ng P4,800.

Nabatid sa report na nilagay umano ng biktima sa kanyang bag ang pera at I’d nito at saka itinabi sa gilid ng kanyang kama habang ang cellphone naman ay naka-charge sa itaas ng lamesa.

Subalit, sa paghahanap naman ng biktima ay dito niya umano nadiskubrihan na ang pintuan ng kanyang kusina ay naka-bukas na kung saan sinasabing dito dumaan ang hindi nakilalang magnanakaw.

Re-shuffle ng mga Comelec Officer epektibo na ngayong araw

Posted April 1, 2016

Ni Jay-ar M. Arante, YES FM Boracay

Epektibo na umano ngayong araw ang re-shuffle ng mga Comelec Officer sa ibat-ibang bayan para sa gaganaping national at local election 2016 sa Mayo 9.

Ayon kay Malay Comelec Officer II Elma Cahilig na matatalaga sa bayan ng Nabas, ito ay base umano sa ipinalabas na memorandum ni Comelec Chairman Andres Bautista kung saan ngayong araw ay dapat na kalipat na sa kanilang mga designated areas ang mga Officer.

Kaugnay nito matatalaga naman sa bayan ng Malay si Comelec Aklan PIO Chrispin Raymundo Gerardo kung saan nakatakda naman itong mag-courtesy call sa LGU at sa mga departamento na magiging katuwang nila sa halalan.

Ang pagtalaga sa mga Comelec Officer sa ibat-ibang bayan ay magtatagal hanggang sa matapos ang eleksyon sa Mayo.

Lalaking wanted sa kasong pananakit sa Boracay, arestado sa Masbate

Posted April 1, 2016

Ni Inna Carol L. Zambrona, YES FM Boracay

Kulong na ngayon sa Boracay PNP ang isang lalaking wanted sa kasong RA No. 9262 o Violence Against Women and their Children matapos itong mahuli ng mga pulis sa Masbate.

Sa report ng Boracay PNP, itinurn-over umano kagabi ng Masbate PNP ang suspek na si Rowen Salvacion 41-anyos residente ng Poblacion,Tibiao Antique at temporaryong nakatira sa Sitio Bulabog, Brgy. Balabag, Boracay.

Nabatid na nahaharap sa dalawang parehong kaso ang suspek kung saan may inilaang piyansa rito na P 12, 000 at ang isa naman ay P 24. 000.

Samantala ang kaso ay nilagdaan naman ni presiding judge Pienvenido Barrios Jr ng RTC Branch 3 Kalibo at may petsang May 27, 2015 at January 28, 2016.

Kalibo traffic lights sumailalim na sa testing; Rotonda Sarok hindi parin tinatanggal

Posted April 1, 2016

Ni Jay-ar M. Arante, YES FM Boracay

Sumailalim na nitong nakaraang araw sa testing ang bagong install na Kalibo Traffic Lights sa crossing Banga-New Washington sa bayan ng Kalibo.

Ngunit sa kabila nito, hindi parin tinatanggal ang Rotonda Sarok sa gitna ng kalsada na sinasabing tatanggalin sa sandaling ma-install ang nasabing traffic lights.

Nabatid na ito ang kauna-unahang Traffic Lights sa probinsya ng Aklan dahil na rin sa patuloy na pagdami ng mga sasakyan at pag-asenso ng lalawigan.

Samantala, hati naman ang reaksyon ng publiko sa pagpapatayo nito kung saan sinasabi ng iba na mas maganda pa umano ang roundabout dahil sa hindi na kailangan ang intayan ngunit pabor naman rito ang iba dahil madami umanong mga driver ang hindi nagbibigayan ng linya partikular sa crossing kung saan dumadaan ang halos karamihan sa mga sasakyan.

LGU Kalibo at Aklan Provincial Government, sumailalim sa Earthquake Drill

Posted March 31, 2016

Ni Inna Carol L. Zambrona, YES FM Boracay

Sumailalim ang Local Government Unit (LGU) Kalibo at Aklan Provincial Government sa Earthquake drill sa Provincial Capitol Building ngayong araw.

Ayon kay Local Disaster Risk Reduction Management Council Officer 3 o (LDRRMCO) Head Terence June Toriano, yearly umano nila ginagawa ang simultaneous earthquake drill. Ilan sa mga ginawang drill ay ang “ Duck ,Cover and Hold” alinsunod sa nais mangyari ng Phivolcs.

Kaugnay nito, ang naturang drill ay inorganisa ni Regional Director of Civil Defense Rosario Cabrera at sa pamamagitan din ng dalawang evaluator ng PDRRMO- Capiz, Shella Mae Secular ng Region 1V at Esperidion Pelaes kung saan inalalayan nila ang dalawang lokal na sektor na nagsagawa ng drill.

Dagdag pa ni Toriano na ang layunin naman ng nasabing drill ay para maging  handa ang lahat sa anumang kalamidad na maaring mangyari sa ating bayan at bilang preparasyon narin sakaling gumalaw ang West Panay Fault at West Tablas Fault.

Budol-Budol gang na bumiktima sa Money Changer sa Boracay, nahuli ng mga pulis

Posted March 31, 2016

Ni Jay-ar M. Arante, YES FM Boracay

Photo Credit to Datu Yap

Nahuli na ng mga pulis ang dalawang suspek na nambiktima sa isang Money Changer nitong nakaraang araw sa D’Mall Boracay station 2.

Sa panayam ng himpilang ito kay P01 Anthony Balderama, Desk Officer ng Malay PNP, nahuli umano nila ang dalawang suspek sa tulong ng mga security guard ng Caticlan Jetty Port kung saan sila na tiklo kaninang umaga.

Ayon kay Balderama, sinasabing mula sa Boracay ang dalawa at pupunta sanang siyudad ng Iloilo ng mga corner ng mga otoridad.

Kinilala naman ang dalawang suspek na sina Vicente Galecia ng Bohol, habang ang isa naman ay si Hector Paredes ng Barotac Viejo Iloilo.

Agad namang dinala ang dalawa sa Malay PNP at ikinulong kung saan nakuha din sa kanila ang ilan sa pera na kanilang ninakaw sa nasabing money changer sa Boracay.

Nabatid na nagpapalit umano ang isa sa mga suspek ng 1600 US Dollar sa money changer kung saan aabot ito sa P74, 000 nitong Martes ng gabi.

Nang mapalitan ay agad umanong tinago sa bulsa ng suspek ang P50, 000 sabay sabing ibabalik nalang nito ang pera at sa iba nalang magpapalit.

Dito naman pinasa ng suspek ang nakuhang pera sa paparating na kasama na tila nanlito sa nagbibilang na kahera ng money changer.

Ang nasabing insidente ay kitang-kita naman sa CCTV camera kung saan agad na namukhaan ang dalawang suspek.

Samantala nakatakda namang e-inquest sa BJMP ngayong hapon ang dalawang suspek kung saan nahaharap ang mga ito sa kasong Estafa.

Bayan ng Malay sumailalim na sa Regional evaluation ng DILG para sa SGLG

Posted March 31, 2016

Ni Jay-ar M. Arante, YES FM Boracay  

Photo Credit to Sir Frensy Andrade

Isinailalim na nitong Martes ang bayan ng Malay sa Regional evaluation ng Department of Interior and Local Government (DILG) para sa Seal of Good Local Governance (SGLG) 2016.

Mismong mga taga Regional Office ang nagtungo sa nasabing bayan para sa nasabing evaluation kung saan lahat ng mga department heads magmula sa Department of Education at Philippine National Police ay sumailalim rin para rito.

Kaugnay nito tiniyak naman ng PNP Malay na magiging isang daan umano ang kanilang grado pagdating sa peace and order na isa sa mga kwalipikasyon para makakuha ng award.

Nabatid na layunin ng nasabing evaluation na masukat at malaman ang kalidad sa paninirbersyo ng isang LGU sa tao at kung paano nila napapalakad ng maayos ang kanilang bayan sa pamamagitan ng kanilang mga proyekto.

Matatandaan, na nakakuha ng tatlong parangal ang LGU Malay nitong nakaraang taon kung saan nakatanggap din sila ng mahigit sa tatlong milyong peso na siya ring ginamit sa pagpapatayo ng proyektong light house sa Sambiray.

British National, ini-reklamo ng pang-iiskandalo sa isang restaurant

Posted March 31, 2016

Ni Inna Carol L. Zambrona, YES FM Boracay

Ini-reklamo sa pulis ang isang turistang British national matapos itong mag-iskandalo sa loob ng isang restaurant sa Station 2 Brgy. Balabag, Boracay kagabi.

Ayon sa blotter report sa Boracay PNP, ini-reklamo ni Ralph Roque 25-anyos residente ng Cainta Rizal at isang turista ang suspek na si James Kelly 35-anyos.

Sumbong nito sa mga pulis, basta nalang umanong nag-iskandalo sa lugar ang suspek at nang-hahamon pa ng away kung saan na nagresulta naman ito takot sa mga customer at tao sa lugar.

Samantala, nagtamo naman ng pasa sa kanyang mukha ang suspek matapos itong suntukin ng hindi nakilalang lalaki para tumigil sa ginagawang pag-iiskandalo.

MS Seaborne Sojourn muling dadaong sa Boracay ngayong Martes

Posted March 31, 2016

Ni Jay-ar M. Arante, YES FM Boracay

Dadaong na naman sa ikalawang pagkakataon sa isla ng Boracay ang barkong MS Seaborne Sojourn ngayong darating na Martes Abril 8, 2016.

Ayon kay Special Operation III Jean Pontero ng Caticlan Administration, nasa apat na daan at limampu umano ang sakay nitong pasahero kabilang na ang tatlong daang crew.

Karamihan din umano sa mga pasahero nito ay mga European Tourist na mamamasyal sa isla ng Boracay.

Samantala, darating ang naturang barko bandang alas-9 ng umaga at ang departure time naman nito ay alas-6 ng gabi ng kapareho ring araw.

Ang MS Seaborne Sojourn ay nauna ng dumaong sa isla ng Boracay nitong nakaraang taon sakay din ang daan-daang pasahero.

Boracay pasok sa World's top Eleven destinations 2016 base sa Cheapflights.com

Posted March 30, 2016

Ni Jay-ar M. Arante, YES FM Boracay

Muli na naman ngayong kinilala ang isla ng Boracay matapos itong mapabilang sa World's top Eleven destinations 2016.

Base sa datus na inilabas ng Cheapflights.com. nasa ika-labin isa ang Boracay kung saan nanguna naman rito ang Melbourne sa Australia, sinundan naman ng Newcastle England at pumangatlo ang Buenos Aires, Argentina.

Kabilang naman sa ika-Apat na puwesto ang Halifax, Nova Scotia, Cambodia; ika-lima ang Siem Reap; Pang-anim ang Chiang Mai, Thailand; sumunod ang The Floreda Keys, Pang-Walo ang Auckland, New Zealand; Pang-siyam ang Galway, Ireland; Pang-sampu naman ang Barcelona Spain at ang Boracay na nasa-ika Labin isang puwesto.

Nabatid na ang cheapflights.com. ay kumikilala sa mga magagandang lugar sa buong mundo na dinarayo ng maraming turista kung saan ang pikalayunin din nila ay mag-offer ng mababang presyo sa mga nais mag-travel sa ibat-ibang bansa sa mundo.

Ang Boracay ay patuloy na namamayagpag dahil sa angking ganda nito dahil sa malapulbos na buhangin at ibat-ibang island activity kasama ang masayang night life na nagpapasigla ng gabi ng isla.

MDRRMO Malay, handa na sa Rescue Olympic 2016 ng Governors Cup

Posted March 30, 2016

Ni Inna Carol l. Zambrona, YES FM Boracay

Handang-handa  na umano ngayon ang Municipal Disaster Risk Reduction and Management Office (MDRRMO) Malay sa gaganaping Rescue Olympic 2016 ng Governors Cup sa Abril 20, 2016.

Ayon kay Valerie Tumaob Nurse ng MDRRMO Malay, isang araw lang ang isasagawang Rescue Olympic sa Calangcang Sports Complex kung saan ang magiging kalaban nila dito ay ilan sa mga bayan sa Aklan.

Nabatid na nag-undergo na umano sila ng training para sa kanilang paghahanda sa nasabing Olympic at ang magiging kasama nila rito ay ilan sa mga empleyado ng LGU Malay.

Samantala, sinabi nito na ang Rescue Olympic ay inorganisa ng Provincial Risk Reduction and Management Council o (PDRRMC) na ginagawa taon-taon bilang isa sa mga pagsasanay o paghahanda sa ibat-ibang kalamidad na maaaring manalasa sa probinsya.

Tourist arrival sa Boracay nitong Holy Week tumaas ng 8% kumpara noong 2015

Posted March 30, 2016

Ni Jay-ar M. Arante, YES FM Boracay

Tumaas ngayon ng walong porsyento ang naitalang tourist arrival sa Boracay nitong Holy Week kumpara sa kaparehong petsa noong 2015.

Base sa datus na inilabas ng Municipal Tourism Office (Mtour) Malay pumalo sa 49, 026 ang tourist arrival nitong Holy Week, kung ikukumpara sa Holy Week tourist arrival na 45, 055 ng nakaraang taon.

Sa nasabing datus simula Marso 29 hanggang Ester Sunday ang kinuhang kabuuang total ng Mtour kung saan nagpapakita na ang Huwebes Santo ang siyang may pinakamaraming turistang pumunta sa isla ng Boracay na may bilang na 11, 096.

Samantala, Local tourist naman ang may pinakamaraming turistang pumunta sa Boracay nitong Holy Week kung saan umabot ito sa 26, 513 na sinundan naman ng Foreign tourist na may bilang na 17, 453 at OFW na 820.

Nabatid na isa ang isla ng Boracay sa dinarayong lugar sa bansa tuwing Semana Santa dahil sa mahabang bakasyon kahit na sa kabila ng pagbabawal ng “No Party” tuwing Biyernes Santo.

Patay na Pawikan napadpad sa Bulabog beach sa Boracay

Posted March 30, 2016

Ni Jay-ar M. Arante, YES FM Boracay

Photo Credit to Djila Winebrenner

Patay na ng matagpuan ang isang Pawikan o Sea turtle kaninang alas-7 ng umaga sa dalampasigan ng Bulabog beach sa isla ng Boracay.

Ayon sa Philippine Coastguard Boracay Sub-Station, ang babaeng pawikan ay may habang102 centimeter at may lapad namang 116 centimeter.

Nakitaan din umano ito ng sugat sa ulo at sa kaliwang mata na pinaniniwalaang tinaga dahilan ng kanyang agarang pagkamatay bago anurin papunta sa dalampasigan kung saan malakas ang alon dulot ng amihan.

Agad naman umano nila itong itinur-over sa Cenro-Boracay para maisailalim sa pagsusuri ang katawan nito at matukoy ang totoong dahilan ng kanyang pagkamatay kung saan sila na rin umano ang magpapalibing nito.

Nabatid na ilang pawikan na rin ang natagpuan sa mga dalampasigan ng isla ng Boracay kung saan ang kahuli-hulihan ay nitong lamang nakaraang buwan ng Disyembre na umabot ng siyam sa loob lamang ng isang araw.

Cashier ng isang money changer sa Boracay, nabiktima ng magnanakaw

Posted March 30, 2016

Ni Inna Carol L. Zambrona, YES FM Boracay

Nanlumo ang itsura ng cashier na babaeng nagsumbong sa Boracay PNP matapos mabiktima ng magnanakaw ang kanyang binabantayang money changer sa Station 2, Brgy. Balabag, kahapon.

Nakilala ang nag-rereklamo na si Jezrel Bieles 28-anyos residente ng Carles Iloilo at temporaryong nakatira sa Brgy. Manoc-manoc.

Sa report ng Boracay PNP, may isa umanong lalaki ang nagpapalit ng dollar sa kanya ngunit tinanggihan niya umano ito dahil sa wala siyang cash na pamalit sa nasabing pera ng lalaki na siya ring suspek.

Subalit nagpumilit umano ang suspek kung saan sinabihan pa umano nito ang biktima na kahit magkano lang ang cash niya ay ayos lang umano sa suspek.

Ngunit dahil sa pagtanggi ay tila may napansin ang biktima sa suspek na tila kakaiba kung saan sa ginawang pagsusuri nito ng kanyang cash box ay doon na nito napansin na nawawala na ang kanyang P21, 000.00 na pera.

Sa kabila nito, sa pag-imbestiga nila sa CCTV sa lugar ay dito natuklasan na kinuha pala ng sinasabing lalaki ang pera sa nasabing box.

Paggunita ng Semana Santa sa Aklan, “generally peaceful” ayon sa APPO

Posted March 30, 2016

Ni Inna Carol L. Zambrona, YES FM Boracay

Maituturing umanong “generally peaceful” ang paggunita ng Semana Santa sa probinsya ng Aklan.

Ayon kay PO1 Jane Cahilig Vega ng Aklan Police Provincial Office (APPO) Public Information Department, wala namang naitalang major incident sa lalawigan maliban sa vehicular incidents at arrested wanted person dahil narin sa kanilang “Oplan Lambat Sibat” monitoring.

Sinabi pa ni Vega na dahil sa “full force” na pagbantay at pag-deploy ng mga pulis sa mga lugar na pinupuntahan ng tao sa paggunita ng Semana Santa ay wala silang na-irekord na malalaking insidente.

Gayundin dito sa Boracay kung saan Theft at Physical injury lang din ang na-iparekord dito.

Samantala, nakabantay parin ang kanilang police personnel sa pagsugpo ng kriminalidad sa probinsya ng Aklan.