BNHS, nagpaalala tungkol sa pagtangkilik sa Wikang Filipino

Posted August 5, 2014

Ni Gloria Villas, YES FM Boracay

Tatak ng pagiging isang Pilipino ang wikang Filipino.

Kaya naman dapat umano itong pagyamanin at huwag kalimutan.

Ito ang ipinaabot ni Boracay National High School (BNHS) Principal II Jose Niro Nillasca sa mga kapwa guro at sa mga mag-aaral kasabay ng pagdiriwang ng buwan ng wika ngayong Agosto.

Ayon pa kay Nillasca, nakasalalay nalang sa kung paano pananatilihin ang pagmamahal sa wika habang nagiging bukas sa paggamit ng ibang wika dahil na rin sa globalisasyon.

Samantala, nabatid na may iba’t-ibang aktibidad at patimpalak ang nakatakdang gawin mula Agosto 1-31 sa iba’t-ibang sining tulad ng pagsusulat at pagbigkas na may temang “Filipino: Wika ng Pagkakaisa”.

Ang “Buwan ng Wika” ay ipinagdiriwang taon-taon bilang pagtalima sa Pampanguluhang Proklamasyon 1041 na nilagdaan ni Pangulong Fidel V. Ramos noong Hulyo 1997.