Comelec Malay nakatakdang dalhin ang pagparehistro ng biometrics sa Boracay

Posted April 25, 2015

Ni Jay-ar M. Arante, YES FM Boracay

Mismong ang Commission on Elections (Comelec) Malay ang tatawid sa isla ng Boracay para dalhin ang pagpaparehistro ng biometrics sa mga botante.

Ayon kay Malay COMELEC Officer II, Elma Cahilig, sila na mismo ang pupunta sa tatlong brgy. sa isla para hindi na mahirapan ang mga magpaparehistro na tumawid sa munisipyo ng Malay.

Sinabi nito na nagsimula ang ganitong proseso noong nakaraang eleksyon kung saan nakakapagtala sila ng maraming botante kung sila mismo ang dadayo sa mga lugar.

Nabatid na ngayong darating na Mayo 6-12 ay nakatakda silang pumunta sa Brgy. Yapak para sa nasabing biometrics registration na gaganapin naman sa Daycare Center habang ang Balabag at Manoc-manoc ay sa buwan naman ng Hunyo.

Samantala, sinabi pa ni Cahilig ang walang biometrics ay hindi makakaboto sa darating na halalan sa Mayo 9, 2016.

Traffic re-routing sa Boracay ikinasa para sa paghahanda sa APEC Summit sa Mayo

Posted April 25, 2015

Ni Jay-ar M. Arante, YES FM Boracay

Mag iisang-linggo ng ipinatutupad ng Malay Transportation Office ang traffic re-routing sa isla ng Boracay bilang paghahanda sa APEC Summit ngayong Mayo.

Ayon kay Malay Transportation Officer Cezar Oczon, ang programa umanong ito ay para maibsan ang traffic congestion lalo na sa area ng D’Mall kung saan dagsa ang maraming tao.

Samantala, tinukoy ni Oczon na ang lahat ng mga delivery at service vehicle na mula sa Cagban Port na diritsong brgy. Yapak ay kinakailangang dumaan sa AKY Tulubhan at ang mga sasakyan naman na mula Station 3 patungo rin ng station 1 ay lilikong Bloomfield at tatahakin ang lake town palabas ng Lying Inn.

Nabatid na ang ipinapatupad ngayong one way lane o re-routing sa Boracay ay kabilang sa paghahanda sa gaganapin APEC Ministerial meeting sa Boracay sa Mayo.

BFI, aminadong nag-aalala sa pag-operate ng Yellow Submarine sa Boracay

Posted April 25, 2015

Ni Gloria Villas, YES FM Boracay

Aminado ang Boracay Foundation Incorporated (BFI) na nag-aalala sila sa pagkakaroon ng Yellow Submarine sa isla ng Boracay.

Ayon kay BFI President Jony Salme, wala pa silang alam tungkol sa operasyon ng Yellow Submarine at ang maaaring epekto nito sa mga korales sa Boracay.

Subalit ipinahayag nito na magsasagawa sila ng pagsusuri kung ito ba ay magkakaroon ng hindi magandang epekto sa mga korales o iba pang marine life sa isla.

Samantala, nabatid na ang BFI ay bahagi ng Coral REEFurbishment Project o ang proyekto para sa tinatawag na “Coral Restoration” para sa Boracay.

Ang Coral Reef Refurbishment Project ay bahagi ng proyekto ng Coastal Resource Management Program at sa ilalim rin ng Boracay Beach Management Program.

Pagpapaunlad ng RO-RO Ramp sa Caticlan, aprobado na sa SP Aklan

Posted April 24, 2015

Ni Gloria Villas, YES FM Boracay

Aprobado na sa Sangguniang Panlalawigan (SP) Aklan ang pag- re-allign ng 20 percent development fund para sa pagpapaunlad at pag-sasaayos ng RO-RO Ramp sa Caticlan Jetty Port.

Sa ginanap na 14^th SP Regular Session nitong Miyerkules, tinalakay ang nasabing urgent request ni Governor Florencio Miraflores, kung saan una namang iminungkahi ni SP Member Plaridel Morania na aprobahan at sinang-ayunan naman ng iba pang kasapi ng konseho.

Nabatid na sinabi mismo ni Jetty Port Administrator Special Operations Officer IV Niven Maquirang na kailangan na ang agarang pagsasaayos ng nasabing pantalan lalo na’t parami ng parami ang mga dumadaang turista o bisita doon.

Anya, may abala din kasi sa pagdaong ng mga barko sa lugar dahil sa kailangan munang antayin na makaalis ang isang barko bago makadaong ang susunod na barko.

Samantala, nagpapatuloy din ngayon ang isinasagawang reclamation project sa Cagban Port sa Manoc-Manoc Boracay.

9th Boracay International Dragon boat Festival umarangkada na

Posted April 24, 2015

Ni Jay-ar M.  Arante, YES FM Boracay

Umarangkada na ang tatlong araw na 9th Boracay International Dragon boat Festival sa isla tampok ang labin 17 grupo mula sa ibang bansa at Pilipinas.

Pagalingan at pabilisan sa pagsagwan ang mga kalahok para tanghalin bilang kampeon ngayong taon na ginanap sa beach area ng Boracay Regency Station 2.

Ilang grupo naman ang sumali mula sa Boracay kabilang na rito ang sikat na Boracay Dragon All Stars na ilang beses na ring tinanghal na kampeon sa ibat-ibang lugar.

Kaninang umaga ay pinaglaban ng mga kalahok ang 500M championship at bukas naman ng umaga ang 250M championship.

Nabatid na ang Boracay International Dragon boat Festival ay taon-taong ginagawa sa isla sa pangunguna ng Boracay Island Paddlers Association (BIPA).

Samantala, nakatakda naman ang awarding bukas ng alas-7 ng gabi at susundan naman ito ng beach party na gaganapin rin sa naturang lugar.

APEC Delegates idadaan sa bagong Tangalan-Ibajay diversion road

Posted April 24, 2015

Ni Jay-ar M. Arante, YES FM Boracay

Kinumpirma mismo ni Aklan Congressman Teodorico Harisco na dadaan sa bagong gawang Tangalan-Ibajay diversion road ang APEC delegates na mula sa paliparan papuntang Boracay.

Ito ay para maiwasan umano ang traffic sa National road kung saan makikita din umano ng mga delegado ang preskong tanawin sa diversion road, katulad ng naggagandahang fine tress at dagat na madadaanan sa nasabing kalsada.

Ayon pa kay Haresco inaasahan umano nilang kikita ng P1 billion ang probinsya mula sa pagkain, serbisyo, transportasyon at iba pang-gastusin sa panahon ng nasabing event sa isla ng Boracay.

Tinukoy din nito na naglalatag na ang ibat-ibang ahensya na nagpapatupad ng batas ng kahandaan para masiguro ang seguridad sa isa sa pinakamalaking pagtitipon ng economic ministers sa Asia-Pacific.

Ang Boracay na kilala bilang isa sa pinakamagandang beach destination sa buong mundo ang siyang napiling mag-host ng Second Senior Officials and Ministers Responsible on Trade ngayong Mayo.

DOST, mahigpit ang ginagawang pagtutok ngayong panahon ng tag-init

Posted April 23, 2015

Ni Gloria Villas, YES FM Boracay

Posibleng magtuluy-tuloy pa hanggang sa Mayo ang tag-init sa bansa.

Ayon kay Department of Science and Technology (DOST) Region VI Assistant Regional Director for Technical Operations Dr. Emelyn Flores.

Normal lang na ngayong summer season ay mararanasan talaga ang mainit na panahon lalo na yaong mga malalapit sa beach tulad ng Boracay.

Ngunit sa kabila nito, ani Flores hindi maiiwasan na may hindi pa rin magandang epekto ang mainit na panahon lalo na sa agrikultura at kalusugan.

Kaya naman, mahigpit umano ang kanilang isinasagawang pagtutok sa lagay ng panahon o klima upang mabigyan ng tamang impormasyon at kaalaman ang publiko.

Samantala, ipanabatid din nito na normal lamang ang temperatura katulad ng nararanasan taun-taon.

Kaugnay nito, nakabantay din anya ang PAGASA sa mga maaaring pagbabago sa panahon, at tuloy-tuloy ang ugnayan nila sa pamunuan ng mga dam upang tiyakin na may sapat na imbak ng tubig para sa tag-araw.

Fish vendor na may warrant of arrest sa kasong murder, arestado sa Boracay

Posted April 23, 2015

Ni Gloria Villas, YES FM Boracay

Arestado kahapon ng hapon sa D’Mall Balabag Boracay ang isang fish vendor sa kasong murder.

Ayon sa report ng mga pulis, inaresto ang akusado na si Gerald Nacepo, 21 anyos ng Brgy. Samalague, Tobias Fornier, Antique sa bisa ng warrant of arrest para sa kasong murder.

Ang nasabing kautusan ay inisyu sa RTC 6^th Judicial Region, Branch 12 ng San Jose Antique nitong ika - 29 ng Setyembre taong 2014.

Samantala, wala namang nakalaang pyansa para sa pansamantalang kalayaan ng akusado.

Building official hinahanap pa ang mga nawawalang dokumento ng The Lind Boracay

Posted April 23, 2015

Ni Jay-ar M. Arante, YES FM Boracay

Hinahanap pa umano ngayon ng mga Building Official ng LGU Malay ang mga nawawalang dokumento ng kontrobersyal na The Lind Boracay.

Ayon kay Azur Gelito ng Boracay Redevelopment Task Force (BRTF), hindi pa umano ito nabibigyan ng conclusion dahil magsasagawa pa umano sila ng panibagong meeting tungkol sa problema ng The Lind.

Sa ngayon umano ay kailangan pa nila itong e-verify at e-double check dahil may mga nawawala pa umanong mga dokumento rito kung saan sa nauna nilang meeting ay wala ang mga taong involve sa nasabing problema.

Samantala, sa panig naman ng Municipal Planning at Zoning Office hindi umano makakapagbigay ng komento rito si Municipal Planning Officer at Zoning Administrator Alma Belejerdo dahil sa na-inspeksyon na umano ito ng kanilang building official kung saan isang conference ang naganap sa pagitan ng mga kinatawan ng The Lind at ng BRTF.

Nabatid na lumabag sa Municipal Ordinance No. 328 ang kagagawa pa lamang na pitong palapag na gusali ng nabanggit na hotel kung saan pahihintulutan lamang ang anim na palapag o 6-storey building kung may land area na 2,000 sq. meter ang isang resort.

Pamunuan ng TIEZA at SB Malay nagharap na sa Sangguniang Bayan Session

Posted April 23, 2015

Ni Jay-ar M. Arante, YES FM Boracay

Matapos ang mahaba-habang paghihintay nagharap na nitong Martes ang pamunuan ng Tourism Infrastructure and Enterprise Zone Authority (TIEZA) at SB Malay.

Ito’y matapos silang ipatawag sa 15^th Regular SB Session ng Malay nitong Martes na dinaluhan naman ni Atty. Jose Bechayda, Atty. Guiller Avido at Engineer Geovanie Rulla ng TIEZA.

Dito napag-usapan ang ilang problema sa drainage system sa isla kasama na ang kanilang mga natapos na proyekto at ang pumutok na coliform issue sa Boracay nitong nakaraang buwan.

Ayon naman kay Atty.Bechayda, gumagawa naman sila ngayon ng hakbang para maisaayos ang mga problema sa drainage system sa isla partikular sa tinukoy ni Liga President Abram Sualog na pagbabaha sa D’Talipapa at Station 3 dulot ng bardong drainage.

Samantala, ngayon umano ay puspusan narin nilang tinatrabaho ang phase 2 na kanilang proyekto sa Boracay katulad ng drainage system at outfall sa Bolabog.

Nabatid na paulit-ulit na pinapatawag ang TIEZA sa naturang SB Session ng Malay ngunit palaging bigo ang mga itong makadalo.