Identification Card, requirements parin upang makapasok sa Boracay

Posted February 16, 2018

Ni Inna Carol L. Zambrona, YES THE BEST Boracay

Isa parin ngayon sa mga requirements ang magpakita ng ID o Identification Card upang makatawid sa isla ng Boracay.

Ito ang pangunahing napagkasunduan ng komitiba sa ginanap na pagpupulong sa Sangguniang Panlalawigan hinggil sa mga reklamong natatanggap kung ano ang mga patakaran ng Jettyport sa tuwing tatawid papuntang isla.

Sa naturang pagdinig ay iginiit ni Jetty Port Administrator Niven Maquirang na kailangan pa rin mag-presenta ng ID na magpapatunay kung Aklanon o manggagawa sa Boracay ang mga dadaan sa pantalan.

Sinabi pa ni Maquirang na kinokonsidera rin nila ang pagpapakita ng cedula at kung fluent magsalita ng Aklanon.

Suhestyon naman ni Malay Sangguniang Bayan Member Frolibar Bautista na magkaroon sila ng mga Barangay ID katulad ng ipinapatupad sa Boracay dahil aniya importante ito at makatutulong rin sa mga kabarangayn sa probinsya.

Dinaluhan ito ni Vice Governor Reynaldo “Boy” Quimpo, miyembro ng Sangguniang Panlalawigan Aklan, Stakeholders, Jetty Port Administrator Niven Maquirang, Malay SB Members Frolibar Bautista, Jupiter Gallenero, Dante Pagsuguiron at marami pang iba.

Blood Samaritan Program, isinusulong sa Sangguniang Panlalawigan Aklan

Posted February 16, 2018

Ni Inna Carol L. Zambrona, YES THE BEST Boracay

Isinusulong ngayon sa Sangguniang Panlalawigan Aklan ang pagkakaroon ng Blood Samaritan Program.

Itong programa ay para umano sa labing pitong bayan ng probinsya ng Aklan at sa pakikipagtulungan narin ng Philippine Red Cross.

Layunin umano nito na makalikom ng dugo para hindi na pumunta pa sa Roxas, o Iloilo sa tuwing nangangailangan ng dugo.

Pag-uusapan naman ito sa Committee Hearing kasama ang labing pitong alkalde, at Philippine Red Cross Aklan Chapter sa Miyerkules.

Itong programa ay inindorso ni Aklan Sannguniang Panlalawigan Member Jay Tejada.

Mga Lady Boy sa Front Beach sitahin – SB Malay

Posted February 16, 2018

Ni Inna Carol L. Zambrona, YES THE BEST Boracay

Upang mawala na ang  na ginagawa ng mg lady boy sa isla ng Boracay, ipinagutos ngayon ng Sangguniang Bayan ng Malay na sitahin ito sa tuwing sila ay umaantabay sa kahabaan ng long beach.

Ayon kay Sangguniang Bayan Member Frolibar Bautista, dapat sitahin ang mga lady boy at tanungin kung ano ang kanilang ginagawa dahil nakaka-isturbo na umano ito sa mga turista dahil ang iba sa mga ito ay sinusundan at kinukulit habang naglalakad.

Aniya, mawawala itong lady boy kung may nagbabantay at tumitingin sa kanila sa kahabaan ng long beach at sa oras umano na mahuli ang mga may iligal na ginagawa maaaring puntahan ang tinutuluyan ng mga ito, hingan ng ID para makilala at kung walang maipakita hulihin.

Malaki ang papel ng Barangay para mahinto ang kalokohan na ginagawa ng mga ito sa isla kung saan inabisuhan rin ni Bautista ang opisina ng DOT at Malay Tourism Office na makipagtulungan sa mga pulis para ma-monitor ang hindi magandang gawain ng mga “lady boy”.

Komento naman ni Punong Barangay Hector Casidsid ng Yapak, ang modus naman umano sa kahabaan ng kanilang area sa Puka Beach ay nakikisabay rin ang mga lady-boy sa pag-sun bathing sa turista at paunti-unting kinukuha ang kanilang gamit.

Samantala, nag-request naman si BTAC Chief PSI Jose Mark Anthony Gesulga na kung maaari ay maglay ng office of prosecutor sa bayan ng Malay ito’y upang hindi mahirapan sa pagsampa ng kaso gayundin ang mga biktima ng iba pang kaso.

Ayon sa hepe, ang ilang turista ay gahol na sa oras sa pagproseso dahil pumupunta pa sa Kalibo para i-file ang kaso.

Dahil dito,  magre-request ang Sangguniang Bayan sa Department of Justice na maglagay ng Prosecutor Office sa Malay para sa agarang pagresolba ng mga kaso.

Pagbigay ng anim na buwang pagsasa-ayos ng Boracay, isang “Wakeup Call” –SB Malay

Posted February 14, 2018

Ni Inna Carol L. Zambrona, YES THE BEST Boracay

“Wake up call”.

Ito ang pahayag ng karamihan na miyembro ng Sangguniang Bayan ng Malay kaugnay sa anim na buwan na ibinigay ng  Rodrigo Duterte upang maayos ang isla ng Boracay.

Ayon kay SB Committee Chairman on Environment Nenette Graf, oras na para magtulungan at  magsagawa na sila sa LGU-Malay ng  aksyon at mga gagawing hakbang para maisaayos ang problema sa isla.

Ayon kay SB Dante Pagsuguiron, sapat na ang mga ordinansa ng Malay subalit hindi lang ito nai-implementa ng maayos at wala rin umanong katotohanan ang sinasabi na may coliform ang isla.

Bagamat nagkaroon ng Task Force na inatasan para suriin ang mga iligal na kumokonekta sa drainage, ayon kay SB Fromy Bautista ang pitompu’t-anim na mga violators ay hindi naman naparusahan.

Dagdag pa ni Bautista, may balita rin umano sa isang news paper na may labing isang establisyemento  na lumabag sa kahalintulad na violation subalit hindi rin nabigyan ng penalidad at pinapabayaan lang.

Dahil dito, umapela si SB Graf na amyendahan ang ordinansa na naglalayong ipasara agad ang establisyemento at bubuksan o papayagan lang oras na nag-comply.

Komento naman ni SB Member Lloyd Maming, hindi na umano kailangan pang gumawa ng panibagong ordinansa dahil marami na ang nahuli sa problemang ito pero wala namang pinatawan ng parusa.

Ani Maming, kaya umano nagbigay ng anim na buwan ang Pangulong Duterte dahil hindi ito kayang ayusin pero iginit ni Maming na dapat ipakita at patunayan ng Malay sa national government na mareresolba itong isyu.

Samantala, ayon kay LGU Executive Assistant IV Rowen Aguirre ay hindi makatuwiran na ibuntong ang lahat ng sisi sa LGU Malay dahil may mga pagkukulang din ang ilang ahensya ng gobyerno.

MDRRMO Malay lalahok sa Nationwide Simultaneous Earthquake Drill

Posted February 14, 2018

Ni Inna Carol L. Zambrona, YES THE BEST Boracay

Makiki-isa ang Municipal Disaster Risk Reduction and Management Office (MDRRMO) Malay sa nationwide earthquake drill na pangungunahan ng National Disaster Risk Reduction and Management Council (NDDRMC).

Ayon kay Catherine Ong ng () Malay, gaganapin ang Nationwide Simultaneous Earthquake Drill (NSED) sa Huwebes, Pebrero 15, alas-2 ng hapon sa Fairways Resort Boracay.

Sabay-sabay itong gagawin ng LGU Malay, mga pampublikong paaralan, ilang pribadong paaralan, Non Governmental Office at mga establisyemento na magsasanay san g bais dril tulad ng “duck, cover and hold” habang lumalabas sa gusali.

Hinimok ni Ong ang publiko na makilahok sa kanila upang isulong ang kahandaan laban sa anumang kalamidad na pwedeng mangyari.

Layunin ng aktibidad na mabigyan ng kaalaman at kasanayan ang mga makiki-isa lalo na ang mga mag-aaral hinggil sa dapat gawin kapag may lindol.

I-monitor ang mga anak- Supetran

Posted February 14, 2018

Ni Danita Jean A. Pelayo, YES THE BEST BORACAY

“I-monitor ang mga anak”.

Ito ang pahayag ni ManocManoc National High School  Principal Victor Supetran patungkol sa mga pabayang mag-aaral ng nasabing paaralan.

Dahil papatapos na ang School Year 2017-2018, paalala ni Supetran sa mga magulang na alamin at subaybayan ang kanilang mga anak na pumupunta sa paaralan kung ang mga ito ba ay pumapasok.

Ayon kay Supetran, sa naging pagpupulong nila ng mga teachers ang pangunahing problema talaga ay ang Non-Personal Apperance ng mga estudyante sa paaralan.

Dagdag pa nito hindi pa huli ang lahat dahil may mga reports itong naitala na baka akala ng mga magulang ay pumapasok ang kanilang mga anak pero drop na pala sa mga advisers.

Nabatid na matagal ng adbokasiya ni Supetran ang parents participation at unannounced visit ng eskwelahan para doon nila malaman kung ito ba ay aktibong pumapasok o hindi.

Kailangan umanong gabayan ng mga magulang ang mga bata at hikayatin ang mga ito na seryosohin ang pag-aaral.

Napag-alamang ngayong taon ang first batch ng pagtatapos ng mga Grade 12 na bahagi ng K – 12 Program ng DepEd.