Caticlan Airport nabulabog dahil sa nakitang pekeng granada malapit sa lugar

Posted September 5, 2015

Ni Jay-ar M. Arante, YES FM Boracay

Nabulabog kaninang alas-9 ng umaga ang Caticlan Airport sa bayan ng Malay matapos ang nakitang pekeng granada malapit sa nasabing paliparan.

Ayon kay PO2 Denver Pagayon ng Malay PNP Station isa lamang umanong replica o pekeng granada ang nakita sa gate ng Ecedele Hotel na halos 50 metro ang distansya sa airport terminal building.

Dahil dito mabilis naman umanong rumisponde ang Bomb Disposal Team kung saan nagpadala rin ang grupo ng K9 Dog para masiguro ang seguridad sa lugar.

Samantala, patuloy parin ang ginagawang imbestigasyon ng mga otoridad sa naturang insidente kung saan lumikha ito ng pag-panik sa mga turista at residente sa lugar.

Mga lugar sa Aklan binalaan sa umano’y nakakalason na mga shell mula sa Capiz

Posted September 5, 2015

Ni Jay-ar M. Arante, YES FM Boracay

Ikinaalarma ng Fisheries and Aquatic Resources Aklan ang napabalitang pagpositibo sa Red Tide Toxic ng mga shell na galing sa kalapit na probinsya na Roxas Capiz.

Dahil dito mahigpit na ipinagbabawal ng nasabing ahensya ang pagpasok ng tinatawag na Shell Fish na napag-alamang mula sa Sapian Bay, Capiz.

Ayon kay BFAR Aklan Chief May Guanco, binalaan na nila ang mga bayan sa probinsya ng Aklan na huwag tanggapin ang nasabing mga shell partikular ang galing sa bayan ng Sapian bay.

Nabatid na kilala ang Roxas City bilang sea foods capital of the Philippines kung saan napag-alaman na karamihan din sa mga paluto restaurant sa isla ng Boracay ay sa nasabing siyudad  kumukuha ng mga sea foods.

Danyos sa nangyaring sunog sa Boracay kagabi tinatayang umabot sa P800 libo

Posted September 5, 2015

Ni Jay-ar M. Arante, YES FM Boracay

(UPDATE) Tinatayang umabot sa walong daang libong peso ang pinsala sa nangyaring sunog sa Boracay kagabi na umabo sa isang bahay.

Ito ay base sa inisyal na imbestigasyon ng Bureau of Fire Boracay sa pangunguna ni FO3 Cerielo Ciroche.

Sa ngayon umano ay hindi pa nila matukoy kung saan nagmula ang naturang sunog ngunit isa sa kanilang sinusundang lead ay ang wire sa loob mismo ng bahay.

Nabatid na ang bahay ay pagmamay-ari ni Leonida Gestiyega isang massage therapist kung saan wala ito sa kanyang bahay ng mangyari ang nasabing sunog.

Samantala, dakong alas-8 kagabi ng mangyari ang nasabing sunog kung saan idinilara naman itong fire out bandang alas-9: 12 kagabi.

100% attendance ng lahat ng municipal police station sa Aklan hinangaan ng NPC 6

Posted September 5, 2015

Ni Jay-ar M. Arante, YES FM Boracay

Hinangaan at binati ng National Police Commission 6 ang Aklan Police Provincial Office (APPO) sa pangunguna ni Provincial Officer ng Aklan na si Inspector 4 Napoleon Arostique Jr.

Ito’y matapos makakuha ang lahat ng municipal police station sa Aklan at sa buong region 6 ng 100% attendance sa ginanap na surprise annual inspection, monitoring at audit na sinimulan noong Agosto 4 na isinagawa ng NAPOLCOM.

Maliban dito binati naman ni Arostique ang tatlong municipal police station sa lalawigan dahil sa pagiging best municipal police station para sa CY 2015 kung saan ang Nabas Municipal police station ay tinanghal na first place sumunod ang Malinao at Banga municipal station.

Samantala, ipinunto naman ni Arostique na ang mga policemen umano ay hindi lamang mga law enforcers kundi sila rin umano ay mga community leaders.

Bahay sa Manoc-manoc Boracay kagabi, naabo matapos masunog

Posted September 5, 2015

Ni Jay-ar M. Arante, YES FM Boracay

Abo na ng madatnan ng mag-ina ang kanilang bahay sa Sitio. Bung-aw Manoc-manoc Boracay matapos itong masunog kagabi.

Ayon sa Bureau of Fire Protection Unit ng BFP Boracay alas-8:58 kagabi ng makatanggap sila ng tawag mula sa mga residente ng nasabing lugar na may isang bahay na nasusunog.

Sa imbestigasyon ng BFP ang bahay umano ay pagmamay-ari ni Leonida Gestiyaga isang massage therapist sa Boracay.

Napag-alaman na wala sa bahay ang mag-ina ng maganap ang nasabing sunog kung saan mabilis itong natupok ng apoy dahil sa yari lamang ito sa light materials.

Nabatid na dakong alas-9: 12 naman kagabi ng ideklarang fire out ng mga bombero ang naganap na sunog kung saan masuwerte naman at hindi nadamay ang mga katabi nitong bahay.

Sa ngayon patuloy parin ang ginagawang imbestigasyon ng Bureau of Fire kung ano ang sanhi ng nasabing sunog at kung magkanoo ang iniwan nitong danyos.

PSInsp. Gentallan itinalaga bilang bagong OIC Chief of Police ng Boracay PNP

Posted September 4, 2015

Ni Jay-ar M. Arante, YES FM Boracay

Muling itinalaga ngayon bilang bagong Officer In Charge ng Boracay Tourist Assistance Center (BTAC) si PSInsp. Fidel Gentallan.

Si Gentallan ang pumalit sa isang buwan pa lamang na umupo bilang hepe ng Boracay PNP na si PSUPT Danilo Delos Santos na ngayon ay nasa Tourist Police Unit na kung saan under ang BTAC.

Nabatid na ang kakaalis na si Delos Santos ang siyang pumalit sa anim na buwang OIC ng BTAC na si PInsp. Frensy Andrade noong nakaraang buwan at ngayon ay ay-assign na rin sa Malay PNP bilang deputy ni Chief of Police PSInsp. Renante Jomocan.

Samantala, si Gentallan ay dati na ring na assign bilang OIC ng BTAC matapos masibak sa puwesto ang dating hepe na si PSInspector Mark Evan Salvo noong nakaraang taon.

Illegal fish vendor sa Boracay, hindi na pinalagpas ni Island Administrator Sacapaño

Posted September 4, 2015

Ni Jay-ar M. Arante, YES FM Boracay

Hindi na pinalagpas ni Boracay Island Administrator Glen Sacapaño ang mga illegal fish vendor sa Boracay dahil sa paulit-ulit na pagsuway ng mga ito sa ordinansa ng LGU Malay.

Ayon kay Sacapaño pangit sa mata ng mga turista ang mga nakahilirang binibintang isda sa Bloomfield area kung saan wala umano itong mga permit at matapang pa kung sinusuway ng mga nanghuhuli.

Aniya, mabaho na umano ang nasabing lugar dahil doon lang din nila mismo itinatapon ang tubig na pinagbabaran ng isda maliban sa wala itong maayos na sanitasyon.

Sinabi pa nito na matagal na silang nagbibigay ng warning sa mga nagbibinta ng isda sa naturang lugar dahil meron naman umanong ispasyo kung saan silang puweding magbinta katulad ng Talipapa at ibang market sa isla.

Samantala, iginiit naman ni Sacapaño na hindi bawal ang pag-nenegosyo bastat nasa tama at sumusunod sila sa ordinansa ng LGU Malay dahil sa madami na umano ngayon ang kinakaharap na problema ng isla lalo na sa trapik kung saan nakikisabay pa umano ang mga ito.

Samantala, kahapon ay sinarado na ng Municipal Auxiliary Police (MAP) Boracay ang lugar kung saan nagbebenta ang mga nasabing negosyante.

Aklan Tourism week celebration 2015 kasado na ngayong Setyembre

Posted September 4, 2015

Ni Jay-ar M. Arante, YES FM Boracay

Kasado na ang inaabangan Aklan Tourism week celebration2015 ngayong darating na Setyembre 14 hanggang 19.

Ito ay inorganisa ng Aklan Tourism Officers Association (AkTOA) at Aklan Provincial Tourism Office (APTO).

Kabilang sa mga inaabangan na aktibidad ay Tinda Turismo, Tourism Quiz Bee, Sabor Akean –Cooking Challenge, Tourism Awareness Seminar, Bisikleta Karera, CSR Activity at AkTOA Fellowship.

Ang nasabing mga aktibidad ay gaganapin naman sa Aklan Trade Hall sa bayan ng Kalibo, Training Center, at sa Malinao – Lezo – Numancia para naman sa Bisikleta Karera.

Nabatid na ito ay taunang ginagawa ng mga tourism officials sa probinsya para ipakita ang pagpapahalaga at pangangalaga sa turismo ng lalawigan ng Aklan.

Pulis Ko, Titser Ko Program ng BTAC muling isinagawa

Posted September 4, 2015

Ni Jay-ar M. Arante, YES FM Boracay 

Muling nagsagawa ng Pulis Ko, Titer Ko Program ang Boracay Tourist Assistance Center (BTAC0 sa ika-anim na taon sa  Manoc-manoc Elementary School sa Boracay kaninang umaga.

Ito ay pinangunahan ni PSI Fidel Gentallan at PINSP Joey Delos Santos ng Boracay PNP kasama si Democrito Barrientos II, School Principal I ng nasabing paaralan.

Nabatid na ang programang ito ay proyekto ng PNP-PRO6 at Department of Education Western Visayas kung saan layunin nito na mapalawak ang kaalaman ng mga mag-aaral kaugnay sa mga batas at gumawa ng tama sa kinakaharap na maaari nilang madala sa kanilang pagtanda.

Ang Pulis Ko Titser Ko ay muling isasagawa sa susunod na linggo sa nasabi ring paaralan kung saan pag-uusapan dito ang good values, patriotism at nationalism.

Samantala, maliban sa Men and Women ng BTAC, meron din silang Pulis Ko Tister Ko Volunteers mula sa Philippine Red Cross Boracay-Malay Chapter sa pangunguna ni Marlo Schoenenberger.

Kwarto ng isang hotel sa Boracay nilooban, mga mamahalang gamit tinangay

Posted September 4, 2015

Ni Jay-ar M. Arante, YES FM Boracay

Hindi na ngayon mahagilap ng dalawang Deutsch national na babae ang kanilang mamahaling gamit matapos na nilooban ang kanilang inuupahang kwarto sa isang hotel sa station 3 Boracay.

Sa blotter report ng Boracay PNP, kinilala ang mga biktimang sina Nina Hilde Gassauer 29-anyos at Anna Viktoria Wagner 19-anyos.

Sa inisyal na imbestigasyon ng mga pulis nadatnan nalang umano ng mga biktima na wala na ang kanilang mga gadget na dalawang Macbook, iphone 6 at 5 at isang sunglasses.

Ayon kay Gassauer iniwan umano nila ang kanilang kwarto alas-6: 30 ng gabi kahapon at ang lahat ng naturang mga gamit ay naiwan doon sa loob ng kwarto bago sila umalis.

Samantala, sa ginawang follow-up investigation ng mga pulis sa lugar ng insidente pinilit umanong sirain ng mga magnanakaw ang pinto ng nasabing kwarto.

Napag-alaman din na walang naka-duty na security guard at front desk sa nasabing hotel ngunit mayroon naman umanong naka-install na CCTV sa building bagamat hindi naman ito gumagana.

3.5 milyong halaga ng mga ari-arian naabo sa sunog kagabi sa manoc manoc Boracay

Posted September 3, 2015

Ni Dinnes Young, YES FM Boracay

Tinatayang aabot sa P3.5 milyon ang halaga ng nasunog na bahay at mga produkto sa naganap na sunog dakong alas otso y media, sa brgy.manoc-manoc Boracay kagabi.

Sa inisyal na imbestigasyon ng Boracay fire protection unit sa pamumuno ni Chief Inspector Stephen Jardeleza, electrical overload sa second floor ng establisyemento ang pinagmulan ng sunog.

Ang bahay ay pag mamay-ari ni Corsino Pelayo na inuupahan naman ng negosyanteng si Leo Rufino.

Paglalarawan pa ni Jardeleza, agad silang rumesponde ngunit nang abutan nila ang bahay ay pabagsak  na ang pangalawang palapag  dulot ng lumalagablab na apoy.

Naubos din ang lahat ng produktong gulay, canned goods at iba pang groceries sa stock room ng chee lee store sa ground floor ng gusali.

Katuwang naman ng Boracay special fire protection unit ang tatlong tanker ang BIWC, Philippine Red Cross, at kabalikat Civicom upang agad na maapula ang apoy.

Dineklarang fire under control and sunog dakong 8:44 at nadeklara itong fire out bandang alas-10 na ng gabi.

Aklan Governor Miraflores, dawit sa bagong P500M pork scam

Posted September 3, 2015

Ni Jay-ar M. Arante, YES FM Boracay

Panibagong reklamo ngayon ang kinakaharap ni Aklan Governor Florencio Miraflores kaugnay sa P500M pork scam.

Kasama si Florencio sa 20 na dati at mga kasalukuyang mambabatas na pinaiimbestigahan ni Atty. Levito Baligod dahil sa umano'y pagkakadawit sa kahalintulad na pork barrel scam na kinasangkutan ni Janet Lim Napoles.

Kabilang din sa isinangkot sa reklamong malversation sa Ombudsman sina Senador Juan Ponce Enrile, Bong Revilla at dating senador Edgardo Angara dahil sa umano'y paglalagak ng kanilang Priority Development Assistance Fund (PDAF) sa mga kdwestyonableng non-government organization (NGO), mula 2007 hanggang 2010.

Si Miraflores at mga kasama nito ay hindi umano konektado sa mga NGO ni Napoles na siyang itinuturong utak ng P10 bilyon scam.

Si Miraflores na dating Congressman ay gumastos ng P25 million na may Saro number na ROCS-07-00722, ROCS-0608146, ROCS-07-03483, ROCS-07-07405, ROCS-08-00420 para sa Center for Mindoro Integrated Development Foundation at Uswag Guimaras Foundation at suppliers.

Matatandaang dawit din noong 2014 sa 67 kongresista si Miraflores sa Pork Barrel Scam ni Janet Lim Napoles kasama ang 12 senador. 

Idiniin naman ni Baligod na tulad ng plunder ay hindi maaaring maghain ng piyansa sa malversation.

Samantala, sinubukan ng himpilang ito na kunin ang pahayag ni Miraflores ngunit wala pa umanong silang natatanggap na sulat kaugnay sa P500M pork scam.