2012 tourist arrival ng Boracay, umabot ng 1.2 milyon

Mahigit 1.2 milyong turista sa Boracay ang naitala ngayong nagdaang taon.

Kung saan, sobra-sobra na ito sa inaasahan para sa 2012 target tourist arrival sa Boracay.

Dahil kung isang milyon ang target para sa taon ng 2012, nalampasan na ito at sumobra pa.

Sapagkat umabot sa 1, 206,052 ang lahat ng turista na naitala hanggang nitong ika-31 ng Disyembre.

Mas mataas ngayong taon ang naitala ng 33% kung ikukumpara sa record noong pagtatapos ng taong 2011 na may kabuoang bilang na 908, 874 turista lamang.

Nabatid mula kay Malay Municipal Tourism Chief Operation Officer Felix Delos Santos na mga Koreans parin ang nangu-nguna sa listahan sa nasyonalidad ng pinakamaraming dumayo dito na umabot sa 156, 445.

Sinundan ito ng Taiwanese na umabot ng 92, 009 at ika-tatlo ang Chinese na 82, 358.

Habang ika-apat naman sa listahan ang lahi ng mga Kano na umabot sa bilang na 18, 283, segunda ang Russia, Australia, United Kingdom (UK), Hongkong, Germany at Japan.

Ang sampung nabanggit na bansa ang pangunahing naging bisita ng Boracay sa loob ng isang taon, sa taong 2012. #ecm012013

Helmet na may ICC sticker na nasa 9,000 na --- DTI Aklan

Umabot halos sa 9,000 na helmet ng mga motorista sa Aklan ang pakapasara sa pagsusuri ng DTI at natatakan ng ICC Sticker.

Pero kung ikukumpara ayon kay DTI Aklan Director Diosdado Cadena sa bilang na nakarehistro ngayon sa Land Transportation Office (LTO) Aklan na may labin apat na libo at pitong daan motorsiklo.

Kaya mas marami pa rin ang hindi nagsuri ng kanilang helmet kaysa sa nagpatatak sa DTI.

Nasa 30% lamang kasi ang mayroong ICC Sticker na sa ngayon at may pitongpung pursiyento pa ang wala.

Bagay na hindi naman umano malaman ng DTI kung bakit hindi nagpakita sa tanggapan nila ang 70% na ito para nagpa-inspeksiyon ng helmet.

Nabatid mula kay Cadena na mahigit pitong libo at walong daang helmets ang natatakan na nila na Import Commodity Clearance (ICC) Sticker.

Habang isang libo at isang daan naman ang mayroon ng ICC na agad ng binili ng mga may-ari bago ipa-inspeksiyon sa DTI.

Umabot naman sa mahigit limang daan ang hindi na pumasa pa sa helmet standard kaya hindi na inaprobahan ng ahensiyang ito.

Ito ay sa ginawang pagsi-sertipiko ng DTI Aklan sa mga helmet kung ligtas pa ba itong gamitin ng mga motorista at sa mga angkas ng mga ito.

Ganoon pa man, bahala na umano ng LTO sa mga hindi nagpasuri ng kanilang helmet dahil may alituntunin ding sinusunod ang LTO para sa mga mahuhuling motorista na walang ICC sticker ang helmet.

Samantala, sa kasalukuyan ay hindi na tumatanggap pa ng mga ipapa-inspeksiyon na helmet ang DTI Aklan matapos na magdeadline sila noong ika-29 ng Disyembre taong 2012 na sinimulan naman noong Hulyo ng nasabing taon din. 

Mga “lady boy” sa Boracay, problema na!

Aminado ang Pulis Boracay na problema talaga nila ngayon ang mga tinaguriang “lady boy” sa islang ito.

Sa panayam kay Boracay Tourist Assistance Center (BTAC) Deputy Chief P/S Insp. Fidel Gentallan, sinabi nito na marami na rin silang naririning na mga usap-usap hinggil sa ginagawa ng mga lady boy na naghahatak ng mga dayuhang turistang lasing lalo na kapag madalaing araw.

Kung saan ang ilan umano sa mga ito ay nakilala na rin ng Pulisya sa ganitong gawain lang.

Kaya may pagkakataon minsan na kapag nakikita nila ang mga ito ay sinasaway na rin nila at pinapaalis kung saan pumi-puwesto ang mga ito.

Nahihirapan din umano ang awtoridad na nahuli o maaktuhan ang mga lady boy na ito sa kanilang gawain sapagkat tila ang mga Pulis din ang binabantayan na kapag nakatalikod na sasalakay na rin mga ito.  

Ganoon pa man, mayroon naman umano sila minsang nahuhuli.

Subalit makaraang ibalik ang mga gamit na ninakaw mula sa mga turistang ito, hindi na aniya sinasampahan ng kaso kaya paulit-ulit lamang sa ginagawa ang mga ito.

Kung maaalala nitong taong 2012, nauso na sa front beach ng Boracay ang di umano ay panghaharang ng mga prostitute na lady boy sa mga lasing na turista at inaalok ng serbisyo saka nanakawan. #ecm012013

Pagdiriwang ng Pasko at Bagong Taon sa Aklan, “generally peaceful” --- PNP Aklan

Maituturing umanong “generally peaceful” ang isinagawang pagdirawang ng Pasko at Bagong Taon sa Aklan bago at ngayong pumasok na ang taong 2013.

Ayon kay P/Supt. Pedrito Escarilla, Provincial Director ng Aklan Provincial Police Office, ikinatuwa nila at walang anumang naitalang malaking insidente may kinalaban sa selebrasyon.

Maliban na laman sa ilang insidente umanong maitinuturing na isolated lamang o karaniwang nangyayari mayroon o walang mang selebrasyon.

Kaugnay naman sa kaso ng mga biktima ng paputok, sa ngayon umano ang hinihintay pa nito ang report kung mayroon man.

Sa ngayon ay pina-iimbestahan na aniya ang pangyayari sa SOCO o Scene of the Crime Operatives Aklan hinggil umano sa isang babae na di umano ay tinamaan ng ligaw na bala.

Ito ay upang malaman kung sinadya o talagang nabiktima ng ligaw na bala ang 26-anyos na si Mayet Tulio ng Brgy. New Buswang, Kalibo na ikinamatay nito sa kasagsagan ng pagdiwang ng Bagong Taon.

Ayon sa ulat, nagtamo ng tama ng baril sa dibdib habang papasok sa kwarto ng kanilang bahay ang bikita, na siyang itinuturing na nag-iisang biktima ng ligaw na bala kaugnay sa pagsalubong sa Bagong Taon. #ecm012013

Boracay, zero sa fire cracker incident nitong Pasko at Bagong Taon

Zero fire Cracker incident sa pagsalubong ng 2013.

Kaya labis na ipinagpapasalamat ngayon ng Pulis Boracay dahil sa kasagsagan ng pagdiriwang ng Pasko at Bagong Taon dito sa isla ay walang naitalang kaso na may nabiktima ng paputok.

Ito ang inihayag ni P/S Inspector Fidel Gentallan, Deputy Chief of Police ng Boracay Tourist Assistance Center (BTAC).

Matatandaang noong nakaraang taong sa pagsalubong sa taong 2012 ay nakapagtala ng isa biktima dahil sa pagpapaputok.

Aniya maliban sa “zero fire cracker incident”, wala din umano silang naitalang ano mang krimen o insidente may kinalaman sa pagdiriwang Pasko at Bagong Taon.

Kahit pa sinabayan ito ng napakaraming dagsa ng turista kung ikukumpara noong mga nakalipas na taon ay naging maayos naman ang selebrasyon sa pagkukumahog na rin ng mga awtoridad para masiguro ang kaligtasan ng lahat.

Bunsod nito, ikinatuwang inihayag ni Gentallan na naging mapayapa ang selebrasyon ng Pasko at Bagong Taon sa isla.  #ecm012013

Bilang ng naputukan sa Aklan, bumaba; Pagsalubong sa Bagong Taon sa Boracay, naging mapayapa

Ni Christy Dela Torre, YES FM Boracay

Sa pagdiriwang ng Bagong Taon sa probinsya ng Aklan, apat lamang ang naitalang naputukan ng iba’t-ibang firecrackers ngayong taon kumpara nang nakaraang taon.

Base sa listahan ng Aklan Provincial Hospital, umabot sa 13 katao ang bilang ng naputukan sa probinsya noong nakaraang taon ng 2012.

Ayon kay Dr. Cornelio Cuatchon, Chief of Hospital ng Aklan Provincial Hospital, ito ay isang patunay umano na umiiwas na nga ang mga Aklanon sa mga paputok.

Dagdag pa niya, mas minabuti na lamang umano ng mga tao na gumamit ng mga pampa-ingay tulad ng torotot sa pagsalubong ng Bagong Taon.

Samantala, nakauwi na rin naman sa kanya-kanyang mga bahay ang mga biktima pagkatapos gamutin sa ospital.

Ngunit isa namang biktima ang naitalang tinamaan ng stray bullet, na agad namang naisugod sa ospital ang biktima at nabigyan ng lunas.

Samantala, dito naman sa isla ng Boracay, ay naging maayos naman ang pagsalubong sa Bagong Taon.

Nakabantay sa buong magdamag ang Philippine Coast Guard, Boracay Police at maging ang Red Cross Unit ay naka-antabay rin.

Ito ay para mapanatili ang kaayusan sa ginanap na fireworks display sa Boracay at kaligtasan ng lahat ng sumaksi na halos ika-puno ng beachfront.

Hanggang ngayon ay patuloy pa rin ang ginagawang pagsusubaybay ng mga ahensya ng gobyerno na may kinalaman sa pagdiriwang ng Bagong taon partikular sa isla ng Boracay.

Kung saan karaniwan nang dinarayo ng mga turista lalo na pagsapit ng Kapaskuhan at Bagong taon.

Mga pasahero sa Boracay, nag-aalburuto dahil sa kakulangan ng masasakyang traysikel! Color coding scheme ng BLTMPC, tuloy pa rin!

Ni Malbert Dalida, News Director, YES FM News Center Boracay

Nagmamadali ka na bang makauwi subali’t walang masasakyang traysikel?

Nag-aalburuto ka na ba dahil tila dinadaanan ka na lamang ng pinapara mong traysikel?

Wala ka na bang choice kundi ang sumakay ng habal-habal kahit bawal?

Talaga ngang magiging ganito ang eksena dito sa Boracay lalo pa’t dumarami na ang mga turista sa isla.

Ito’y matapos kumpirmahin ni Boracay Land Transport Multi-Purpose Cooperative o BLTMPC Chairman Ryan Tubi, na tuloy ang color coding scheme nila sa kanilang mga traysikel.

Sa panayam kasi ng himpilang ito kay Tubi, sinabi nito nito na hindi natapos ang kanilang request sa LGU Malay na i-lift off o kanselahen muna ang nasabing color coding.

Magkaganon paman, sinabi parin ni Tubi na ang kanilang mga “gurot” o reliever na mga multicab na bumibiyahe ng Yapak papuntang Cagban ay hindi muna nila pinagpahinga.

Ito’y upang kahit papaano ay matugunan ang kakulangan ng mga masasakyang traysikel.

Samantala, pinayuhan naman Tubi ang publiko na huwag sumabay sa tinatawag na rush hour, upang hindi sila mahirapan.

Matatandaang kamakailan ay hiniling ng BLTMPC sa LGU Malay na kanselahin na ang color coding sa isla, dahil na rin sa mga natatanggap na reklamo ng kanilang kooperatiba at panahon pa ng Kapaskuhan.

DPWH may clearance mula sa DENR sa pagtatambak ng lawa sa Balabag

Tuloy na tuloy na ang pagtatambak sa bahagi ng isang lawa sa Boracay na dadaanan ng proyektong circumferencial road.

Sapagka’t tinapos na ng DENR at DPWH ang kanilang bangayan sa ginagawang pagtatambak sa nasabing lawa sa mainroad ng barangay Balabag.

Nabatid mula kay Boracay CENRO officer Merza Samillano na may hawak nang CNC o certificate of non coverage ang DPWH, na siyang clearance mula sa Department of Environment of Natural Resources o DENR para matuloy na ang ginagawang pagtatambak doon bilang bahagi ng kalsada.

Mismong central office ng DENR na umano ang nagbigay ng CNC para matuldukan na rin ang usapin at makausad na ang nasabing proyekto ng DPWH.

Pero nabatid mula kay Samillano na bahagi lamang ng lawa ang tatambakan.

Una nang umalma ang DENR nang magsimulang magtambak doon ang DPWH na walang kaukulang permiso mula sa kanila, gayong ang lawa na ito sa isla ay isa sa mga pinoprotektahan ng DENR.

Kung maaalala, mismong ang DPWH-Aklan na rin ang nagsabi na nagkaroon ng isyu ang dalawang departamento kaugnay sa proyektong ito sa Boracay kung saan ang kanilang mga kalihim na umano ang nag-usap para masolusyunan ang nasabing suliranin. #cm122012

Noche Buena products sa Aklan bahagyang gumalaw ang presyo

Kung may paggalaw man sa presyo ng Noche Buena products sa Aklan sa mga panahong ito, napakaliit lamang umano ito ayon sa DTI.

Sa panayam kay Department of Trade and Industry o DTI-Aklan Director Diosdado Cadena, sinabi nitong rasonable naman ang limang pursiyentong dagdag presyo sa mga produkto na mabibili ngayong magbabagong taon.

Subalit, wala na umanong tataas pa sa limang pursiyentong pagtaas na ito.

Aminado si Cadena na tumaas nga, pero bahagya lamang at hindi naman lahat kundi mga piling produkto gaya ng Ham, condense milk, fruit cocktail, mayonnaise, pasta at pasta sauce.

Ganoon pa man, ang mga nabanggit na produktong ito umano ay marami namang mapagpipiliang mga brand.

Kaya depende na sa mga mamimili kung ano ang kakayanin ng kanilang budget.

Samantala, pinasiguro naman ng DTI na may sapat na suplay ng Noche Buena Products sa Aklan.

Ito rin umano ang rason kung bakit hindi gaanong nagmahal ang mga pangunahing bilihin para sa pagsalubong ng Bagong Taon. #ecm122012