Paki-usap para sa proteksiyon ng Bulabog Beach sa Boracay, ikinasa

Ni Edzel Mainit, Senior Field Reporter, YES FM Boracay

“Let us save Bulabog for Boracay!”

Ito ngayon ang sigaw ng mga residente at ng Sea Sports Association na pinangungunahan ni Nenette Graf kasabay ng inilunsad nitong online signing sa petition letter para sa kanilang pagsusumamo o panalangin.

Sa petition letter ni Graf, nakasaad ang kanilang pakiusap para sa Department of Public Works and Highways (DPWH), Department of Tourism (DOT), at Aklan Congressman Florencio Joeben Miraflores, lokal na pamahalaan ng Malay at iba pang ahensiyang may kinalaman sa sinusulong na proyektong Circumferential Road sa Boracay.

Sa kasalukuyan ay daan-daang lagda na ang nakalap nila sa ipinaglaban na proteksiyon ang Bulabog Beach na pinangangambahang maaaring gawaing bahagi ng proyekto.

Ayon kay Graf sa panayam dito nitong umaga, ang nais lamang nila sana ay huwag nang gawing kalsada ang beach sa likod na bahagi ng isla at sundin na lamang kung ano ang dating napagkasunduan na nila, na ang highway ay idaan na lang sa lugar na tinukoy na dati, na hindi na kailangang sirain pa ang 120 meter na beach sa Bulabog.

Bagamat ang lupa o property na dating nang natukoy na dadaanan ng proyekto ay pribado at pag-aari ng apat na inbidwal, naniniwala si Graf hindi naman umano siguro ganun kahirap kausapin ang nga taong ito katulad sa ginawa nila dati.

Samantala sa kasalukuyan, aminado si Graf na hindi pa sila nakakapag-usap ng Miraflores ukol sa bagay na ito, para hilinging kung maaari ay ilipat ng daan ang natitirang bahagi ng proyektong  circumferential road, at huwag nang gawaing highway ang 120 meter na White Beach sa Boracay sa Bulabog.

Ang paninindigang ito di umano ayon kay Graf ay laban ng bawat Boracaynon gayong ang Bulabog Beach ay kilala bilang World Best Kite at Wind Surfing spot at dagdag atraksiyon para sa turismo ng Boracay. 

Direct Flights mula China at Taiwan sa Kalibo International Airport, tuloy pa rin

Ni Edzel Mainit, Senior Field Reporter, YES FM Boracay

Sa kabila ng tensiyong namamagitan sa China at Pilipinas sa ngayon, nananatiling normal pa rin ang biyahe ng International Flights mula sa Shanghai, China papuntang Kalibo International Airport (KIA).

Ito ang nilinaw ni Kalibo International Airport KIA Administrator Percy Malonesio sa panayam dito nitong umaga.

Bagamat may ilang paliparan umano sa bansa ang nakatangap ng abiso na kinansela na ang mga flights ng mga sasakyang panghimpapawid na nagmula sa Shanghai, China, siya bilang administrador ng KIA, ay wala pa umanong natatanggap na komunikasyon ng pagkasela ng mga direct flights mula China, gayong ang nangyayari umano kapag mayroong ginagawang pagbabago sa petsa o oras man ng paglapag sa paliparan dito, lalo na ang mga international flights ay ipinapa-alam aniya sa kaniya.

Pero sa pagkakataong ito ay wala pa silang black and white o dokumentong pinanghahawakan na nagsasabing apektado ang flights ng mga ito lalo na ng mga turistang papunta ng Boracay.

Maging ang direct flights mula sa Taipei, Taiwan ay hindi rin umano ikinansela.

Ang  direct flights mula Taiwan at China sa KIA ay halos araw-araw ayon kay Malonesio, at sa ngayon ay tuloy pa rin ang paglapag, hanggat wala umano siyang abiso na natatanggap mula sa airline company.

Bookings ng mga Chinese National sa Boracay, ang iba nakansela na

Ni Edzel Mainit, Senior Field Reporter, YES FM Boracay

Kinumpirma ni Boracay Foundation Incorporated (BFI) President Dionesio Jony Salme na may mga resort na sa Boracay ang nabatid nitong mayroon mga Chinese national na nagkansela ng kanilang ng bookings para magbakasyon sana sa isla.

Katunay, sa kanilang resort umano ay may mga guests na noong nagdaan linggo pa nagkansela, at ang rason aniya ng mga ito ay dahil sa siguridad ng mga turista ito dahil sa patuloy na pakikipag-girian ng Pilipinas at China sa Panatag o Scarborough Shoal.

Maliban dito, sa impormasyon na nakuha mula sa isang malaking resort sa Front Beach ng Station 2 (Boracay Regency), kahapon di umano ay nagkasela na rin sa online bookings ang ilang Chinese nationals na magbabakasyon pa sana sa Boracay sa susunod na mga araw.

Nabatid kay Bb. Athena Dorin ng nasabing resort na batay di umano sa mga Travel Agencies na nakaka-usap nila, gusto pa rin sanang ituloy ng mga Chinese ang kanilang pagpunta sa isla.

Ngunit dahil sa ayaw, silang payagan o paalisin ng Chinese Government kung kaya’t nagkansela na lang ni kani-kanilang bookings.

Gayon pa man, nabatid mula dito na hindi naman lahat ng nakapagpa-book na ay nagkasela.

Samantala, sa obserbasyon di umano nila sa mga Chinese na naririto sa Boracay, wala naman aniya silang nakitang pag-aalala sa mga ito, at sa halip at tila normal naman ang kanilang sitwasyon sa pamamalagi isla.

Pero sa impormasyon, sa kasalukuyan ay wala pa namang naitala o napapabalitang may guest na naririto ngayon   na nag-alsa balutan dahil sa takot o pangamba kaugnay sa ika-kasang rally laban sa pamahalaan ng China. 

Pagkabaha sa gastos ng mga magulang sa bagong K-12 curriculum, pinawi ng DepEd Aklan

Ni Edzel Mainit, Senior Field Reporter, YES FM Boracay

Pinawi ni Dr. Jesse Gomez, Aklan Division Superintendent ng Department of Education (DepEd), ang pagkakabahala ng mga magulang ng mag-aaral kasabay ng pagpapatupad ng bagong Curriculum na K-12 program sa pagbubukas ng klase sa Hunyo 4.

Naniniwala at batid umano ni Gomez na nababahala ang mga magulang sa programang ito dahil madadagdagan ang taon na igugugol ng mga estudyante sa paaralan at nanganaghulugan din ito nang gastos sa bahagi ng mga magulang.

Subalit ayon sa opisyal, para mapawi ang pag-alala ng mga ito, ipinapaintindi ni Gomez sa mga magulang na sa kasalukuyan unamo ay isinusulong na nang mga mambabatas upang ganap na maging batas at gawin na lamang na tatlong taon ang kolehiyo.

Ito ay dahil sa siniksik na umano sa Senior High School pa lang ang mga aralin, kaya pagdating sa kolehiyo ay pawang mga pang-professional education o Major Subject na aniya ang ituturo doon at wala na halos ang General Education o minor subjects.

Mula doon, kapag na-aprubahan na, mas makakatipid pa nga  umano sa gastos ng isang taon sa koliheyo  ang mga magulang. 

Tabon Port, sinisimulan nang ayusin para sa Habagat Season

Ni Edzel Mainit, Senior Field Reporter, YES FM Boracay

Nasimulan nang ayusin ang kalsada papasok sa Tabon port mula sa National High way.

Katunayan, ayon kay Malay Administrator Godofredo Sadiasa, sa ngayon ay ginagawa na ang “widening” o pagpapalapad sa kalsada at pagkonkreto doon, bilang paghahanda sa nalalapit na Habagat Season.

Dahil sa nitong mga nagdaang buwan ay sa Tabon Port ang ruta ng bangka nang lumakas ang hangin at alon, ramdam sa lugar na ito ang usad pagong na daloy ng trapiko dahil sa halos hindi na magkasya ang mga tourist bus sa kalsada kapag nagkakasalubong at sabay-sabay.

Maliban dito, simula sa Lunes ay ayusin na rin aniya ang pampulikong palikuran sa Tabon Port upang maihiwalay ang para sa lalaki at babae.

Dagdag na ni Sadiasa, bukas ay aayusin na rin aniya ang mga shade o passenger holding area.

Samantala, dahil sa wala pang-pondo para maglagay ng kongkretong pantalan na magsisilbing daungan ng bangka sa Tabon Port, nagdisisyon ayon kay Sadiasa ang Alkalde na ang nakalutang na tulay para maging daungan ng bangka o pontoon parin muna sa ngayon ang gagamitin doon.

Pero mas lalaparan na aniya ito kumpara sa dati at gagawing mas doble pa lapad para maging kumbenyente para sa mga pasahero. 

Konstraksiyon worker sa Boracay, nakuryente na, nahulog pa

Ni Edzel Mainit, Senior Field Reporter, YES FM Boracay

Maliban sa pagkakakuryente sa isang konstraksiyon worker nitong umaga, posibleng dahil sa pagkakahulog din umano ng biktima sa gusaling ginagawa nila ang dahilan ng kamatayan nito.

Sa pangungusisa ng Boracay Police, nabatid na makaraang makuryente ay nahulog pa mula sa 3^rd Floor ang biktimang si William Postorioso ng Makato, Aklan.

Ayon sa kasamahan din nitong konstraksiyong worker na si Ructhil Mateo, nakita nito ang biktima na nagputol ng isang kapirasong alambre para itali sa pundasyon ng kanilang ginagawa sa 3^rd floor.

Ngunit sa hindi sinasadyang pagkakataon ay natabing o nasagi ng alabre ang live wire ng Akelco na halos may isa at kalahating metro ang layo mula sa pundastong ginagawa nila.

Mula doon ay nakita lang din aniya ni Mateo na nahulog na ang biktima.

Sa ganong ayos, na lapnos ang katawan dala ng pagkakakuryente at pagkahulog mula sa gusali, deniklarang Dead on Arrival ni Dra. Florence Aubrey Manon ng Boracay Hospital si Postorioso.

Naganap ang nasabing insedente nitong umaga banda 10:30 sa Sitio Bantud Barangay Manoc-manoc. 

CLUP ng Boracay, nasa provincial level pa rin

Ni Edzel Mainit, Senior Field Reporter, YES FM Boracay

Nasa estado pa rin ng pagsasatama o correction ang Comprehensive Land Used Plan CLUP ng Boracay na nasa Provincial Planning Office parin hanggang sa ngayon.

Sa panayam kay Engr. Roger Esto, Provincial Planning Officer nitong umaga,  aminado ito na nitong nagdaang unang bahagi ng buwan ng Abril ay ipinatawag ang Municipal Planning Officer ng Malay upang masagot nito ang ilang mga tanong para malinawan na ang mga bagay na nakalatag sa CLUP ng Boracay.

Inihayag din ni Esto na hanggang sa ngayon ay hindi pa rin ito tapos sapagkat may kumento pa hinggil sa mapa ng Boracay ang ibang pang kasama sa composite team na siyang susuri sa CLUP katuld ng sa DENR.

Dagdag pa nito, isinumite pa kasi ang CLUP sa Housing Regulatory Board kaya natagalan din.

Ganoon pa, man sa darating na katapusan ng linggo ng buwang ito ng Mayo ay muli umanong uupuan nila bagay na ito.

Kaya kung maaayos umano ang lahat ng dapat itama ay maaaring hindi na magtatagal at maaaprubahan na rin ito.

Ang CLUP ng Boracay ay ilang taon nang naka-pending sa probinsiya, kung saan ito sana ang magsisilbing gabay para isla, kung saan bahagi  ng Boracay ang hindi pwede at pwede pang paglagyan ng development.  

BIWC at Boracay Tubi, hindi maiiwasan maikumpara

Ni Edzel Mainit, Senior Field Reporter, YES FM Boracay

Binanggit ni Sangguniang Bayan Member Esel Flores sa session ng konseho na iwasan ang pagbanggit sa pangalang ng Boracay Island Water Company (BIWC) sa pagdinig sa kahilingan ng Boracay Tubi na pag-endorso para sa proyekto nila, gayong magkaiba naman ang kanilang policy, lalo pa at kakumpensiya ang dalawang ito.

Pero tila hindi pa rin napanindigan ng Sanggunian ang bagay na iyon nang tangungin ng ilang miyembro, kung handa rin ba ang Boracay Tubi na gawin ang ginawa ng BIWC.

Ang tinutukoy dito ay ang piso (P1) na ibinibigay ng BIWC sa lokal na pamahalaan ng Malay sa bawat per cubic meter na kimukuha nilang tubig sa likas na yamang sakop ng Malay.

Ganoon pa man, nilinaw ni Flores na ang pera ay hindi ibibigay sa LGU kundi direkta ang  bawat pisong ibinibigay ng BIWC na mapupunta sa pinagmumulan ng ilog, katulad sa programa para sa mga tao doon sa pinagkukunan nila ng tubig o kaya proyekto para sa bayan para mapakinabangan ng publiko.

Bilang tugon, nangako naman Jojo Tagpis, Operation Manager ng Boracay Tubi, na ipapaabot nila ito sa kanilang pamunuan at kung kinakailangang gagawin nila ito ay walang problema.

Pagpapatayo ng tulay sa Boracay, itinanggi ni Governor Marquez

Ni Edzel Mainit, Senior Field Reporter, YES FM Boracay

Mariing tinanggi ni Aklan Governor Carlito Marquez na may plano din ang pamahalaang probinsiya na magpagawa ng tulay na magkokonekta sa Caticlan at Boracay.

Sa panayam kahapon kay Marquez, nilinaw nito na walang katotohanan ang usaping ito, dahil hindi naman aniya ito kailangan sa Boracay kahit na binalak ng probinsya na maglagay ng tulay.

Maliban dito, ayon pa sa gobernador, kapag magkaroon umano ng tulay ay posibleng masira ang exotic na ganda ng isla, kung saan ang pagbiyahe sakay ng bangka ay isa sa nagbibigay ng atraksiyon sa mga turista.

Dagdag pa nito, kung may tulay umano ay hindi na aniya makokontrol pa ang mga sasakyang papasok sa isla, gayong kung titingnan sa ngayon ay isinusulong nga ng pamahalaang probinsiya ang pagsasa-ayos sa mga pasilidad at inprastraktura sa mga pantalan papunta at palabas ng Boracay, para hindi na kakailanganin pa ang tulay.

Ang pahayag na ito ni Marquez ay kasunod ng napapabalitang inihayag ng gobernador ang nasabing plano sa kaniyang mensahe sa pagdiriwang ng Aklan Day at sa pagpapasinaya sa tulay na nagdudugtong sa mga bayan ng Madalag at Banga na naganap noong Abril 25, kung saan isa sa mga dumalo ay ang alkalde ng Malay.

Matatandaang ang lokal na pamahalaan ng Malay ay balak din magpalagay ng tulay sa Boracay na magdudugtong sa Caticlan. 

Overpricing sa mga school supplies, pinaghahandaan na ng DTI Aklan

Ni Edzel Mainit, Senior Field Reporter, YES FM Boracay

Nakahanda na ang counter measure ng Department of Trade and Industry (DTI) Aklan upang maiwasan ang pananamantala at overpricing sa mga school supplies ng mga merkado ngayong season na naman sa pamimili ng mga magagamit sa pagbubukas ng klase.

Dahil dito, mayroon na umanong mga suggested retail price (SRP) na ihinanda ang DTI Aklan, ayon kay DTI Aklan Provincial Director Diosdado Cadena.

Ang aprubadong SRP ng DTI ay ipapamigay na aniya sa mga pamilihan upang anumang oras na gustong silipin ng mamimili ang aktuwal na presyo ng isang item ay may ipapakita ang mga establisimiyentong ito.

Samantala, nabatid mula sa Director na wala namang itinaas ngayon ang presyo ng mga school supplies.

Siniguro na din umano ng DTI na hindi kukulangin ang mga items na in demand ngayon.

Dahil dito, humiling sila sa mga manufacturers na magkaroon ng sapat ng supply at silipin din ang presyo ng kanilang mga produkto para maiwasan ang over pricing.

Samantala, sa mensahe nito para sa publiko, bagamat wala pa namang naiu-ulat na may produktong nakakapasok sa Aklan na komtaminado ng lead at iba pang mga kemikal na delikado sa mga bata.

Mariing pinaalalahanan ni Cadena ang mga mamimili na suriing mabuti ang mga bibilhing produkto, lalo na ang manufacturer ng produkto na maaaring mapanagot kung saka-sakali.

Kaya tingnan na lang umano ng mabuti kung sertipikado ito ng Bureau of Food and Drugs (BFAD).

Dapat din umanong maging maingat sa pamimili at piliin ang may kalidad at suriin maging ang mga pahina ng mga notebooks o bibilhing papel kung tama ang bilang nito, gayon din ang laman ng mga pangkulay at iba pang items. 

“Balik Eskwela Diskwento Sale”, ikakasa sa Aklan

Ni Edzel Mainit, Senior Field Reporter, YES FM Boracay

Ngayong magbubukas na ang pasukan at para hindi mabiktima ng over pricing sa pamimili ng mga school supplies lalo na ang mga magulang.

Mas mainam na mamili ayon kay Department of Trade and Industry DTI-Aklan Director Diosdado Cadena sa petsa simula ika labin lima ng hanggang ika dalawangpu ng buwang ito o sa susunod na linggo.

Sapagkat ang DTI sa buong bansa ayon dito ay may inilunsad na programa sa petsang ito kung saan ang ilang mga pangunahing  retail Outlet at establishemento sa Aklan kasama na ang sa Caticlan at isla ng Boracay ay magkakaron ng promo na tinatawag na “Balik Eskwela Diskwento Sale”.

Kung kaya’t puspusan na ayon kay Cadena ang kanilang pag-imbita sa mga retail outlet at estalishemeto sa buong bayan sa Aklan para sumali sa “Balik Eskwela Diskwento Sale”.

Dagdag pa ng Director, malalanam naman aniya ng mga mamimili kung kasali nga ang isang estalishemento ito sa promo, dahil mayroong tarpaulin na ilalagay ang DTI.

Kayo payo ni Cadena sa mga mamimili ng School Supplies para sa darating na pasukan na e-avail ang nasabing promo para makatipid. 

Pamahalaang probinsiyal ng Aklan, hindi kuntento sa “position letter” na BFI

Ni Edzel Mainit, Senior Field Reporter, YES FM Boracay

Hindi pa rin umano ngayon makuntento ang pamahalaang probinsyal kahit na may “position letter” na ang Boracay Foundation Incorporated (BFI) sa 2.6-hec. na reklamasyon sa Caticlan nagsasabing hindi na sila tutol sa proyektong ito.

Ayon kay Aklan Governor Carlito Marquez sa panayam dito nitong umaga, humirit sila ngayon sa BFI na kung maaari ay gawing Board Resolution ang nasabing position letter.

Ito ay dahil mas makapangyarihan aniya ang resolusyon kumpara sa unang nataggap nila mula sa BFI.

Kaya naman aminado si Marquez na hanggang sa ngayon ay humihingi pa sila ng saklolo mula sa BFI para sa ganitong request.

Kung matatandaan, ang probinsya ay ilang beses nang humingi ng pag-endorso sa BFI para sa proyekto at humiling na bawiin ang kasong naisampa ng grupo ng mga stakeholder na ito sa Boracay, ngunit position letter lamang ang nataggap ng probinsiya mula sa mga ito.

Dahil dito ay patuloy silang nananalig at nananalangin para maibigay na aniya ang maayos na serbisyo sa lumulobong bilang ng mga turista sa Boracay.

Resolusyon sa pag-i-endorso ng SB Malay sa reklamasyon, nasa Supreme Court na

Ni Edzel Mainit, Senior Field Reporter, YES FM Boracay

Nababahala na rin si Aklan Governor Carlito Marquez sa sitwasyon ng reklamasyon sa Caticlan, lalo pa ngayong papasok na ang Habagat Season.

Ito ay dahil baka gumuho na lang aniya ang mga tinambak na bato at buhangin sa proyektong ito.

Bagamat nais umano nilang ayusin na ito sa kasalukuyan, pero wala silang nagagawa sa bagay na ito dahil nasa Supreme Court pa ang desisyon sa kasong ito.

Sa panayam ng himpilang ito kay Marquez nitong umaga, inihayag nito na isang “urgent motion” na ang ginawa ng probinsiya para sa Korte Suprema  at ang pag-endorsong ibinigay ng Sangguniang Bayan ng Malay sa 2.6-hec. na reklamasyon sa Caticlan ay isinama na umano doon isang buwan na ang nakakalipas.

Samantala, sa ngayon, lalo pa at alam na aniya ng lahat na abala na ang Supreme Court sa impeachment case ni SC Chief Justice Renato Corona, tiwala ang gobernador na  matatapos din ang lahat ng ito.

Dahil dito ay patuloy silang nananalig at nananalangin para maibigay na aniya ang maayos na serbisyo sa lumulobong bilang ng mga turista sa Boracay.

Dahil sa ECC, CENRO Officer ng Boracay, natahimik sa sesyon

Ni Edzel Mainit, Senior Field Reporter, YES FM Boracay

Bagamat kinumpirma kahapon ni Mersa Samillano, bagong Community Environmental and Natural Resources Officer ng Boracay, na may Environmental Compliance Certificate (ECC) na ang isang kumpaniya ng tubig sa Boracay para sa gagawing paghuhukay upang paglatagan ng tubo, hindi pa rin ito nakalusot mula kina SB Members Esel Flores at Rowen Aguirre.

Pagkarinig pa lamang ni Flores sa pahayag ni Samillano, binalikan agad nito ng tanong ang CENRO Officer, kung bakit nauna pang magbigay ng ECC ang DENR gayong wala pang pag-endorso mula sa konseho, lalo pa at ang lokal na pamahalaan sana umano ang nakakaalam kung kritikal o hindi ang lugar na tinutukoy na paglalagyan o paglalatagan ng straktura o proyekto.

Sinegundahan din ito ni Aguirre ng pagpuna na may pagkakataon umanong nau-una at mabilis pa umanong magbigay ng ECC ang DENR kahit na hindi pa ito naiad-daan sa namamahala sa isang lokalidad.

Mula doon ay ihinalimbawa ni Aguirre ang sitwasyon ng reklamasyon sa Caticlan na kontrobersiyal pa rin hanggang sa ngayon dahil din sa katulad na pangyayari.

Dahil sa mga katanungang ito, hindi na nakasagot pa si Samillano makaraang siya ang balingan ng ganoong mga pagkuwestiyon at pahayag. 

Trapik sa Boracay, pinangangambahan ng Konseho kapag muling hinukay ang kalsada para sa mga tubo ng Boracay Tubi

Ni Edzel Mainit, Senior Field Reporter, YES FM Boracay

Kung magkaroon man ng Mayor’s Permit ang Boracay Tubi at pahihintulutan na makapaglatag ng kanilang mga tubo ng tubig, ang reklamo umano sa traffic ay hindi na naman maiiwasan, ayon kay Sanggunaing Bayan Member Rowen Aguirre.

Dahil dito ay tinanong ni Agguire ang kumpaniyang ito kung dadaan ba sa kalsada o huhukayin na naman ba ang kalsada para lamang sa kanilang mga tubo.  

Kasabay nito ay hiniling din ni Aguirre na kung maaari lang ay iwasan nang hukayin ang main road at kung puwede ay ibaon na lang sa gilid ng kalsada ang mga tubo para hindi na maapektuhan ang trapiko sa Boracay.

Prangka naman ang tugon ni Jojo Tagpis, Operations Manager ng Boracay Tubi, na hindi talaga maaaring hindi mahukay ang kalsada, dahil ito lang ang tanging daan para maglatag ng tubo ang katulad nilang kumpaniya ng utilities.

Ganoon pa man, nangako naman si Tagpis na maglalagay sila ng maraming traffic aid at lahat ng paraan ay gagawin nila para lamang hindi sila makapagdala ng mabigat na traffic sa isla.

Maliban dito, kapag nahukay aniya nila ang kalsada, gagawin nila ang lahat para maibalik nila ito ng maayos sa pinakamadaling panahon, gayong may naisip na silang istratehiya para hindi talaga maging ganoon kabigat ang madadalang istorbo sa trapiko.

Samantala, sakaling pahintulitan ng punong ehekutibo ang ang kanilang plano na makapaglatag ng tubo, aasahang dalawang buwan umano ang aabutin bago matapos ang nasabing proyekto.

Hinihiling na Mayor’s Permit ng Boracay Tubi, tila nakitaan na ng pag-asa

Ni Edzel Mainit, Senior Field Reporter, YES FM Boracay

Matapos ang halos 12 taon, ngayon pa lang nakakakita ng pag-asa ang Boracay Tubi kaugnay sa hinihingi nilang Mayor’s Permit para makapaglatag ng kanilang tubo upang ma-upgrade ang kanilang serbisyo.

Nitong umaga, sa ginanap na weekly session ng SB Malay ay dininig na ng konseho ang problema ng kumpaniyang ito makaraang humiling ng tulong sa Sangguniang Bayan para mabigyan ng permit.

Di umano ay kumpleto naman sila sa dokumento katulad ng Environmental Compliance Certificate (ECC), pero tila hindi umuusad ang kanilang aplikasyon noon pa man, kaya ang pag-i-endorso ng konseho ang isa sa mga nakikita nilang paaraan upang sila ay makakuha ng permit.

Nabatid mula kay Jojo Tagpis, Operations Manager ng Boracay Tubi, na taong 2000 pa nila isinumite ang kanilang aplikasyon pero hanggang sa nagyon ay wala pa silang nakukuhang tugon mula sa punong ehekutibo ng Malay.

Bunsod nito, nitong umaga lang din ay ipinresinta at ipinaliwanag ni Tagpis ang nilalaman ng plano.

Sa nasabing presentasyon ay inimbitahan ang mga representante ng Boracay Foundation Incorporated (BFI), opisyal ng tatlong Barangay sa Boracay, Municipal Health Office at  Environmental Officer, Department of Environment and Natural Resources (DENR) at iba upang makapag-komento sa aplikasyon ng Boracay Tubi, lalo na ngayon at isinusulong ng kompanyang ito na pasukin ang serbisyo ng Waste Water Treatment.

Gayon pa man, bagamat halos lahat ng mga katanungan ng konseho at ng mga dumalo ay nasagot naman ni Tagpis, ang pag-i-endorsong inaasahan ng Boracay Tubi ay hindi pa napagpapasyahan ng SB na siyang susuporta sa punong ehekutibo sa pagbibigay ng Mayor’s Permit.

BIWC, mananagot sa SB Malay

Ni Edzel Mainit, Senior Field Reporter, YES FM Boracay

Kung hindi na mabaho ngayon ang Lugutan Area, problema naman ngayon ng Sangguniang Bayan ng Malay ang main road sa Boracay, dahil sa pagbaho ng kalye kasabay ng pag-apaw ng mga manhole ng sewerage system sa Manoc-manoc, partikular na sa Station 3.

Dahil dito, sa privilege speech nitong umaga sa SB session ni SB Member Jupiter Gallenero, humingi ito ng tulong sa kapwa konsehal kung ano ang maaaring gawin at kung kinakailangan nang papanagutin sa pangyayaring ito ang Boracay Island Water Company (BIWC) na siyang namamahala sa sewerage system ng isla.

Maliban umano sa pag-apaw ng drainage, nakita din umano mismo ni Gallenero na nagta-transport ang BIWC ng sludge o dumi kapag gabi at dumadaan sa main road.

Ngunit ang masaklap aniya ay ang truck na ginagamit ng BIWC ay bukas kaya umaalingasaw din ang amoy habang dumadaan ito sa kalsada, gayong marami pang turista sa mga oras na nagta-transport ng dumi ang kumpaniyang ito at nagkakataon na may mga taong kumakain pa na nakakalanghap ng masangsang na amoy mula sa dumadaang trak na may lamang dumi.

Dagdag pa nito, masakit din sa ilong ang amoy na dala ng trak ng BIWC at matagal pa itong matanggal sa hangin kaya hindi din ito maganda para sa mga bisita at mga dumadaan sa kalye.

Bunsod nito, nagsuhestiyon si SB Member Rowen Aguirre na i-refer ito sa Municipal Health Office at Municipal Environmental Office para maimbestigahan ang nasabing problema, at upang malaman kung saang bahagi ng ordinansa ng bayan o circular sa Department of Environment and Natural Resources (DENR) ang nalabag para papanagutin ang BIWC sa bagay na ito. 

Lugutan Area, hindi na mabaho!

Ni Edzel Mainit, Senior Field Reporter, YES FM Boracay

Ngayon ay buong-tiwala nang ihinayag ni Abram Sualog, Punong Barangay ng Manoc-manoc, na hindi na mabaho ang lugar na ito sa kasalukuyan, sapagkat itinigil na ang pagpapalabas ng maduming tubig sa area na ito, bilang pansamantalang solusyon at aksiyon sa mga reklamo ng ilang residente at establishimiyento doon.

Ito ay makaraang magtutulong tulong ang ilang pribadong indibidwa at LGU para isara ang nasabing drainage.

Kamakailan lang ay problema ang Lugutan Area at laman ng mga usapan sa Boracay dahil sa hindi kanais-nais na amoy sa lugar na ito dala ng maduming tubig na dumadaloy mula sa Drainage System na idinidispatsa sa lugar na ito particular sa likod na bahagi ng islang ito.

Samantala, dahil sa pansamantalang solusyon lamang ito, nagharap-harap na ang Barangay Officials ng Manoc-manoc, Boracay Island Water Company (BIWC) at lokal na pamahalaan ng Malay para pag-usapan kung ano ang posibleng gagawin para lubusan nang masolusyunan ang suliranin dito.

Ayon kay Sualog, sa nasabing paghaharap na naganap nitong nagdaang Biyernes, nangako ang BIWC na tutulong sila sa pagbibigay solusyon at gagawin nila ito sa lalong madaling panahon.

LGU Malay, naglaan ng bagong 100 slots para sa mga iskolar na Malaynon

Ni Edzel Mainit, Senior Field Reporter, YES FM Boracay

Panibagong 100 slots ang handang punuin ngayon ng lokal na pamahalaan ng Malay para sa mga iskolar ng LGU para sa papasok na school year.

Tulad noong nakaraang taon, 100 slots din ang inilaan ng LGU para ngayong taon para sa mga estudyanteng Malaynon na nais mag-aral sa mga Vocational Schools ayon kay Dennis Briones ng Municipal Public Employment Service Office (PESO) Malay.

Ayon kay Briones, ang lokal na pamahalaan ay may pondong P550,000.00 na pangtustos ng 100 estudyante.

Pero maaari pa umanong madagdagan ang nakalaang 100 slots, depende kung may sobrang pera ang LGU.

Samantala, maliban dito, sa kasalukuyan ay may 63 estudyanteng Malaynon ang LGU na may gulang na 16-25 taon na kasalukuyang nagsa-summer job simula pa noong Abril 23 hanggang Mayo 24.

Nabatid na ang mga estudyanteng ito ay nagsisilbi ngayon sa iba’t ibang departamento ng LGU, depende sa kanilang mga kurso, at tumatangap ng P250.00 bawat araw. 

Korean National sa Boracay, nalunod, patay

Ni Malbert Dalida, News Director, YES FM Boracay

Patay ang isang trenta’y kuwatro anyos na Korean National matapos malunod sa boat station 1 Balabag kahapon.

Sa report ng Boracay PNP, alas dose kuwarenta’y singko ng tanghali nang maligo sa beach front ng boat station 1 ang biktimang si Jungki Cho at isa pang kasama nito nang mangyari ang insidente.

May kalayuan na umano sa dalampasigan ang biktima nang mapansin ng kanyang kasamang ito’y nalulunod na at nagpapasaklolo.

Kaagad namang sumaklolo ang ilang nakapansin sa insidente kung kaya’t nakuha ang biktima sa ilalim ng tubig.

Samantala, sinubukan ng mga rumespondeng duktor na agawin sa bingit ng kamatayan ang biktima subali’t nabigo ang mga ito.

Kasalukuyan namang nakahimlay sa isang punerarya ang labi ng biktima, matapos ipagbigay alam ng mga otoridad ang pangyayari sa embahada nito.  

Terminal na itatayo sa Tambisaan Port, pondo na lang ang kulang

Ni Edzel Mainit, Senior Field Reporter, YES FM Boracay

Inihayag ngayon ni Manoc-manoc Punong Barangay Abram Sualog na sa bahagi ng Brgy. Manoc-manoc ay handa na lahat ng mga dokumentong kakailanganin para sa pagpapagawa at pagpapasaayos ng terminal sa Tambisaan.

Ito ay sa kabila ng plano na din ng plano ng pamahalaang lokal ng Malay na magkaroon din ng kaparehong plano.

Pero hinihintay na lang umano nila ang pondo para sa proyekto mula sa Malacañang.

Subalit, dahil sa ang lokal na pamahalaan ng Malay ay naghahanda din upang sila na lang ang magpagawa ng terminal dito, sinabi ng Punong Barangay na wala namang problema doon kung ang LGU na ang magpapagawa nito.

Gayon pa man, may inisyal rin na aniya silang pag-uusap ng Alkalde ukol dito na pwede sila na lang sa Barangay ang gagawa at maaaring ang LGU din, depende kung sino sa mga ito ang mauuna na magkaroon ng pondo.

Samantala, dahil sa problema ng lokal na pamahalaan ng Malay at Manoc-manoc Council sa lupa na paglalatagan ng proyekto, sa kasalukyan aniya ay tuloy ang kanilang negosasyon sa dawalang claimant ng lupang ito sa Tambisaan Port na paglalagyan ng terminal.

Pero dahil isyu pa hanggang sa ngayon kung sino ang totoong may-ari ng nasabing property, hinihiling umano nila sa dalawang kampo na umaangkin dito na kung maaari ay pahintulutan  na lang nila na gawin ang proyekto doon, habang inaayos at hinihintay pang ideklara ang totoong may-ari ng nasabing lupain gayong tila handa namang ipagbili ang lupang ito para sa proyekto.

Kung maaalala, ang LGU Malay at Barangay Manoc-manoc ay parehong may proposal na mag-lagay ng terminal sa Tambisaan Port, upang pagtayuan ng pasilidad na maaayos para sa mga ito, katulad na lamang sa pagkakaroon ng palikuran at passenger holding area. 

Mga sagabal sa daan sa Manoc-manoc, tinanggal na

Ni Edzel Mainit, Senior Field Reporter, YES FM Boracay

Bago pa man lumihis ang ihip ng hangin sa Boracay mula sa Amihan papuntang Habagat, nasimulan na ngayon sa Barangay Manoc-manoc ang pagsasa-ayos sa dadaanan ng mga pasahero mula sa Tambisan Port papunta sa sentro ng isla.

Sa panayam nitong hapon kay Manoc-manoc Punong Barangay Abram Sualog, inihayag nito na sa kasalukuyan ay nilinis na nila ang daan, partikular na ang mga maaring sagabal sa daan sa main road, lalo na ang mga pwestong nakalatag at halos na usli na sa main road.

Ayon kay Saulog, inabisuhan na nito ang mga may-ari ng mga pwestong ito na tanggalin ang mga istrakturang ito, dapat ay at magkaroon ng set back na may layong 1.5 meter mula sa main road.

Maging ang mga lubak-lubak na daan papasok sa Tambisaan Port ay pansamantalang pinapatambakan na aniya nila para maging maayos naman ang biyahe ng mga pasaherong dumadaan dito lalo pa at pagpasok ng buwan ng Hunyo ay mararamdaman na ang Habagat Season at ang Tambisaan na ang magsisilbing entry at exit area ng Boracay. 

Sa pagbubukas ng klase, mga magulang, pinayuhan ng DepEd Aklan

Ni Edzel Mainit, Senior Field Reporter, YES FM Boracay

“Marahil dahil sa hindi dumadalo sa mga pulong na ipinapatawag ng paaralan ang dahilan kung bakit may mga magulang na nagrereklamo sa pamamalakad ng isang paaralan”.

Ito ang isa sa rason na kita ni Ginang Virginita Nabor, Private School Coordinator ng Department of Education DepEd Division ng Aklan sa panayam dito.

Naniniwala ito na walang lakas ang isang paaralan na magpataw ng kung anumang bayarin o magkaroon ng isang aktibidad kung wala itong pahintulot mula sa mga magulang ng mag-aaral.

Aniya, ang anumang aktibidad o desisyon na makakaapekto sa magulang at estudyante at kung hindi napapagkasunduan o napag-usapan ang pamunuan ng paaralan at mga magulang ay hindi naman mangyayari o ipapatupad.

Bunsod nito, payo ni Nabor sa mga magulang ngayong magbubukas na pasukan na bisitahin din kahit papano ang eskuwelahan ng kanilang mga anak para masigurong maayos ang kalagayan at mabatid ng mga ito ang mga kaganapan sa paaralan katulad sa pagdalo sa pulong.

Ang pahayag na ito ni Nabor ay matapos lumabas ang usapin ng pagtataas sa mga singil sa matrikula sa mga pribadong paaralan sa Aklan.