Pangulong Aquino III, tiwalang bubuti ang buhay ng Aklanon sa turismo

Ni Edzel Mainit, Senior Field Reporter, YES FM Boracay

Tiwalang-tiwala si Pangulong Benigno Aquino III na may magandang uportunidad na naghihintay sa mga Aklanon upang kumita, makapag-trabaho at para mapabuti ang kundisyon ng kanilang buhay.

Para sa kanya, mapalad ang Aklan dahil sa malaking tulong ng turismo sa mga ito kung ikukumpara sa ibang lalawigan na kailangang tulongan ng pamahalaan sa paraan ng mga programa at proyekto ng gobyerno.

Pero nasa sa Aklanon na umano kung papano nila ito palalaguin.

Kaugnay nito, pinayuhan niya ang mga Aklanon na asikasuhin ang mga turistang pumunta sa Boracay, na inaasahang aabot pa sa tatlong milyong turista bawat taon.

Ito ay kapag maging internasyonal na ang paliparan at matapos ang Caticlan/Boracay Airport.

Kaya tiwala si Aquino na  marami sa Aklanon ang mgakakaroon ng trabaho.

PNoy, muling bumisita sa Aklan; Agenda, pagpapasalamat at pagsisiguradong naipapatupad ng maayos ang mga programa

Ni Edzel Mainit, Senior Field Reporter, YES FM Boracay

Target ni Pangulong Benigno Aquino III na maisakatuparan ang kanyang mga pangako nang nangangampanya pa lang ito noong nagdaang eleksyon.

Ito ang rason kung bakit muli itong bumisita sa lalawigan ng Aklan kahapon para masigurong naipapatupad ng tama ang mga programa ng kanyang administrasyon tulad ng naipangako niya lalo na sa mga mahihrap.

Ang pangulo na mismo ang namahagi ng tulong sa mga kapus-palad na Aklanon sa pagbisita nito sa bayan ng Kalibo, tulad ng programang Pantawid Pamilya Pilipino Program (4Ps) na pinangungunahan ng Department of Social Welfare and Development (DSWD) at Department of Health (DOH).

Maliban sa pormal na pagbibigay nila ng pondo para sa Feeding Program ng mga batang may edad na tatlo hanggang apat na taong gulang sa pitong bayan ng Aklan, namahagi din ito ng libreng PhilHealth Cards sa piling mga matatanda.

Namigay naman ng mga titulo ng lupa ang Department Agrarian Reform (DAR) at ng pondo ng Department of Agriculture (DA) para sa mga binhi, imprastraktura at pangkabuhayan ng mga Aklanon.

Sa kabilang banda, ikinatuwa naman ng mga dumalo ang mga linya ng Punong Ehekutibo kung saan gumamit ito ng mga salitang Aklanon, pati na rin ang pagpaparinig nito patungkol sa kanyang lovelife kung saan pinapahiwatig nito na dapat ay makasal na daw siya.

Samantala, matapos ang labingwalong minutong talumpati nito na nagsasaad ng kanyang pasasalamat sa suportang nakuha noong eleksyon at isang oras na pamamalagi nito sa Kalibo, agad din itong umalis patungo ng Roxas, Capiz kasama si Sen. Franklin Drilon, DSWD Sec. Dinky Soliman, DOTC Sec. Mar Roxas at Presidential Spokesperson Abigail Valte.

Mga bagong opisyal ng BFI, nakatuon pa rin sa yamang dagat

Ni Edzel Mainit, Senior Field Reporter, YES FM Boracay

Pormal nang nailuklok bilang pangulo si Jony Salme kasama ang bagong halal na mga opisyal ng Boracay Foundation Incorporated o BFI matapos manumpa ang mga ito nitong nagdaan sabado ika-siyam ng Hulyo.

Ayon kay Salme, pagtutuunan pa rin ng atensyon at prayoridad ng kasalukuyang administrasyon ng nasabing organisasyon ang pag-preserba ng mga korales at pagsasalba sa mga nasisirang yamang dagat.

Sinabi din nito na ipagpapatuloy pa rin ng mga bagong luklok na opisyal ng BFI ang mga nasimulan na ng dating administrasyon nito.

Sa kasalukuyan ay hindi pa nila napag-uusapan ang mga proyektong plano nilang ipapatupad.

Ang magalaga umano sa ngayon ay ang kanilang kooperasyon sa lokal na pamahalaan ng Malay at ang pagpaplano kung anong mga ordinansa ang kanilang hihilingin na dapat higpitan ang pagpapatupad.

Sa kabilang banda, mariin din nitong sinabi na itutuloy pa rin ng BFI ang kanilang laban ukol sa reklamasyon.

BFI, wala pang “say” sa rally laban sa Casino

Ni Edzel Mainit, Senior Field Reporter, YES FM Boracay

Walang pang opisyal na pahayag ang Boracay Foundation Incorporated kung makikilahok sila sa gaganaping malawakang kilos protesta laban sa casino na pangungunahan ng Simbahang Katoliko na gaganapin sa darating na ika-tatlumpu ng Hulyo.

Sa panayam kay Jony Salme, pangulo ng BFI, sinabi nitong malinaw naman ang katayuan nila ukol sa isyu na ayaw ng mga stakeholders na magkaroon ng casino sa Boracay base na rin sa board of directors ng naturang organisasyon.

Subalit pagdating sa gagawing rally, hindi pa umano ito makapagbibigay ng katayuan ng buong BFI dahil hindi pa nila napag-uusapan ang ganitong isyu.

Gayun pa man, naniniwala si Salme na bilang stakeholder at mga indibidwal ay posible umanong makilahok ang ilang miyembro nila sa gagawing kilos protesta.

Rally laban sa Casino, isinulong ng Simbahang Katoliko sa Boracay

Ni Malbert Dalida, News Director, YES FM Boracay

Sinimulan na kahapon ng simbahang Katoliko sa isla ng Boracay ang isang panawagan kontra sa Casino dito.

Ayon kay Reverend Father Adlai Placer, kura paroko ng nabanggit na simbahan, isang prayer rally ang ilulunsad dito bilang pagpapakita ng pagtutol sa pagpasok o pag-iistablisa ng sugal sa isla.

Ang nasabing rally ay matagal na rin umanong gustong ilunsad ng kumunidad, kasama ang iba pang sektor na tumututol dito.

Naninindigan umano ang simbahan na ang mga ganitong uri ng gawain ay nakakasira sa imahe ng Boracay, bilang isang family tourist destination.

Iginiit pa nitong ang sugal ay hindi para sa pamilya at hindi na umano ito kailangan ng Boracay upang magkaroon ng maraming turista.

Kasama ang ilan pang simbahang protestante, stakeholders at mga Boracaynon, gaganapin ang nasabing rally sa a trenta ng Hulyo, taong kasalukuyan.

Samantala, nanindigan naman ang Sangguniang Bayan ng Malay, na bagamat nirerespeto ng mga ito ang karapatan ng mga nasa oposisyon, ay hindi nagbabago ang kanilang disposisyon na ituloy ang pag indorso sa nasabing sugal sa isla.

Kauna-unahang SOMA ni Mayor Yap, kanselado

Ni Edzel Mainit, Senior Field Reporter

Ngayong araw sana nakatakda ang kauna-unahang State of the Municipality Address o SOMA ni Mayor John Yap.

Sa mismong regular na sesyon ng Sangguniang Bayan ng Malay, inaasahang ipapaabot ng alkalde ang kanyang mga nagawa sa loob ng isang taong panunungkulan nito bilang Punong Ehikutibo ng Bayan.

Maririnig na sana ng taumbayan ang kanyang mga plano para sa kanyang nasasakupan.

Subalit kinumpirma ni Malay Administrator na hindi muna ito matutuloy ngayong araw.

Sapagkat  dadalo aniya ang alkalde sa okasyon ng muling pagbisita ni Pangulong Noynoy Aquino III sa Aklan partikular sa bayan ng Kalibo.

Maliban sa pagdalo ng Alkalde, inaasahan ding makikibahagi ang buong Sangguniang Bayan ng Malay makaraang imbitahan din ang mga ito sa nasabing pagtitipon.

Dahil dito,ideneklara nalang din ng konseho na kanselado ang sesyon upang bigyang daan ang pagdating ni pangulo sa Aklan.