China, nagsagawa ng feasibility study para sa itatayong Iloilo – Guimaras - Negros bridge

Posted September 30, 2017

Ni Inna Carol L. Zambrona, YES THE BEST Boracay

Nagsagawa ng inspeksyon at pag-aaral ang mga opisyal ng isang Chinese corporation para sa isang feasibility study sa itatayong tulay na magdudugtong sa Iloilo, Guimaras at Negros Island.

Nag-courtesy call ang China Communications Construction Company (CCCC) Highway Consultants Co. Ltd. na nakabase sa Beijing kasama ang mga opisyal ng Department of Public Works and Highways (DPWH) sa Governors Office ng Guimaras.

Ang layunin ng mga ito ay para tingnan at pagplanuhan ang gagawing construction na magkokonekta sa itatayong Iloilo, Guimaras at Negros bridge sa lugar kung ito ba ay posibleng gawin.

Kasama ng mga kinatawan mula sa nabanggit na Chinese builders ay sinamahan ni Buenavista Guimaras Mayor Eugene Reyes ay tiningan nila ang site na posibleng pagtayuan nito.

Nasasabik na ang mga residente ng Guimaras na masimulan at matapos ang itatayong tulay dahil isa itong malaking tulong sa turismo na mapadali sa kanilang byahe lalo na kung malakas ang alon o masama ang panahon.

Ang tulay na magkokonekta sa Iloilo papuntang Guimaras ay may haba ng 2.6 kilometro ay balak simulan sa last quarter ng susunod na taon.

Samantala, kinakailangan umano ang P27 Billion budget para sa proyektong ito ayon sa National Economic Development Authority Region 6.

Mga magpapakasal inimbitahan sa Kasalang Bayan ng HRP Boracay

Posted September 29, 2017

Ni Inna Carol L. Zambrona, YES THE BEST Boracay

Nakatakdang magsagawa ng “Kasalang Bayan” ang Our Lady of the Most Holy Rosary Parish Boracay sa susunod na taon.

Hinikayat ni Mylin Escultor, Parish Secretary ng HRP Boracay ang mga hindi pa kasal at balak mag-pakasal na magpa-rehistro at maging bahagi sa aktibidad na magbubukod sa kanilang pagsasama.

Ani Escultor, magdala lang ng Birth Certificate, Baptismal at Confirmation Certificate at palista na sa kanilang opisina sa simbahan para mapasama sa Kasalang Bayan  na mangyayari sa ika-10 ng Enero ng susunod na taon.

Bukas daw ito sa lahat ng mga wala pang-gatos sa kasal dahil wala na umanong bayarin at sagot na ang kanilang pagkuha ng Marriage License at Cenomar.

Dagdag pa nito, pati ang reception at pagkain ay sagot na ng magso-sponsor ng Kasalang Bayan kung saan patuloy ang registration hanggang Oktubre 16.

Pina-alalahan din ni Escultor sa mga magpapa-rehistro na magdala agad ng photo copy ng kanilang mga requirements para ito ay kanilang makompirma at hindi mahirapan sa pagkontak kung sila ba ay matutuloy sa pagpapakasal.

Isa patay, apat sugatan sa nangyaring vehicular accident kagabi sa Ambulong

Posted September 29, 2017

Ni Inna Carol L. Zambrona, YES THE BEST Boracay

Dead on Arrival o DOA ang 67-anyos na si Tony Sultan, isang muslim ng ito ay aksidenteng nabangga ng Solar E-trike ng Star 8 na minamaneho ni Lazaro Daguno, 47-anyos na umano’y nawalan ito ng preno habang binabagtas ang pababang porsyon ng Sitio Ambulong, ManocManoc kagabi.

Kinilala naman ang apat na sugatan na sina Norbero Villamor, 48-anyos, Eric Roberto, 39-anyos, Abdani Balangue, 16-anyos at Shailyn Ninto, 14-anyos.

Duguan naman dinala ang mga biktima sa iba’t-ibang klinika sa isla subalit ini-refer din ang ilan sa mga ito sa bayan ng Kalibo dahil sa natamong sugat sa ibat-ibang bahagi ng katawan.

Sa salaysay ng driver na si Daguno sa Yes The Best, pababa na ang kanyang minamanehong trike sa bahagi ng Mandala Spa ng bigla umanong nawalan ng break kung saan nasagi nito ang mga biktima habang pilit nitong kontrolin ang kanyang manibela.

Nasagi muna nito ang dalawang motorsiklo at nasagasaan ang dalawang estudyante bago tinumbok ang kanang bahagi ng kalsada kung saan doon nakatayo ang biktimang si Sultan bago sinadya niyang ibangga sa poste.

Dagdag pa ni Daguno, binagga niya ang poste para hindi na makadamay ng mga nakakasalubong na mga sasakyan at mga tao sa lugar.

Labis naman ang pagdadalamhati ng naiwang pamilya ni Sultan dahil sa kanyang sinapit.

Samantala, bulontaryong sumuko si Daguno sa himpilan ng pulisya at ngayo’y naka-kulong sa lock-up cell ng Boracay PNP.

Habang sinusulat itong balita wala pa kaming nakukuhang update kung kamusta na ang kalagayan ng apat na biktima pagkatapos ng kanilang sinapit na disgrasya kagabi.

German National, natagpuang patay sa kanyang kwarto

Posted September 28, 2018

Ni Inna Carol L. Zambrona, YES THE BEST Boracay

Wala nang buhay ng madatnan ang isang German National sa kanyang tinutuluyang resort dito sa isla ng Boracay.

Base sa report ng live-in partner ng biktima sa Boracay PNP, galing umano siya sa kanyang Therapy Class at sa pag-uwi niya ay nakita nalang nito na wala ng buhay ang 48-anyos na kinakasamang German national na si Kondrad Lothar Beckman.

Dali-dali naman itong humingi ng tulong sa mga tao sa lugar upang maidala sa pinakamalapit na pagamutan para ma revive si Beckman.

Subalit, ayon sa doktor na sumuri ay atake sa puso ang dahilan ng pagkamatay ng biktima.

Ang bangkay nito ay dinala na sa Prado Funeral sa bayan ng Malay.

Mga natirang Residual Waste sa MRF Balabag, hindi pa nahahakot

Posted September 28, 2017

Ni Inna Carol L. Zambrona, YES THE BEST Boracay

Idinulog ni Balabag Punong Barangay Lilibeth Sacapaño sa Sangguniang Bayan ng Malay ang kanyang pagkabahala sa natitirang residual waste sa kanyang lugar na hindi pa nahahakot.

Sa pamamagitan ng sulat, idinaan ng kapitana kay Sangguniang Bayan Member Dante Pagsuguiron ang kanyang suliranin para matalakay sa plenaryo ng SB at mabigyang linaw kung ano ang mga dahilan kung bakit ito nangyari.

Sa pagtatanong ng mga konsehal, ayon kay Bids and Award Committee Chairman at MPDC Head Alma Belejerdo, dumaan sa bidding at na-aprobahan ang budget na mahigit P 8 Million para sa dalawang lote na may estimated 11,000 cubic meter na residual waste.

Nahinto raw ang paghahakot ng nanalong bidder na JCV Lines ni Vidal Villaruz dahil umano sa nahakot na nila ang volume na dapat hakutin.

Ani Belejerdo, hindi pa nababayaran ang contractor dahil sa problemang ito na hindi tinapos ang paghakot kahit na lumalabas na namali ng estimate si Engr. Solano sa kabuuang volume ng basura kaya humantong sa paghinto ng paghahakot.

Apela ngayon ni Sacapaño, dapat ubusin na ang paghakot ng basura dahil may inaprobahang kontrata.

Sa opinyon naman ni SB Pagsuguiron, nagkaroon daw ng double budgeting dahil ang mga hinakot ay sa ManocManoc lang dinala at iba naman ang humakot mula ManocManoc papuntang landfill.

Sa paglilinaw ni Solid Waste Manager Otic Macavinta, wala pa siya sa solid waste ng mangyari ang kontrata at kung sa paghahakot naman ng basura mula Balabag papuntang ManocManoc, dinahilan nito na hindi kayang pumasok ng malalaking truck sa naturang lugar kaya magkahiwalay ang ginagawang trip ng mga haulers.

Samantala, dahil sa pera ng bayan ang ginamit sa mga kontrata at ibinayad sa mga contractor, suhestyon ni SB Gallenero na mag usap-usap na lang ang mga involve na contractor kung sa papaanong paraan mahakot ang natirang basura sa MRF Balabag.

Boracay, nananatiling Rabies Free

Posted September 27, 2017

Ni Danita Jean A. Pelayo, YES THE BEST Boracay

Nananatili pa ring Rabies Free ang isla ng Boracay sa kasalukuyan.

Sa panayam ng himpilang ito kay Nurse II Madel Joy Tayco ng Municipal Health Office ,sa taong ito ay wala umanong nakumpirma na kaso ng rabies sa isla katulad sa nakalipas na taon.

Kaugnay nito ang ahensya naman ng MHO ay may isinasagawang information, education and communication (IEC) campaigns para mabigayan ng kaukulang impormasyon ang publiko.

Nabatid naman na mayroong animal bite center sa Bayan ng Ibajay at Kalibo na maaaring agad na puntahan ng mga nabiktima ng kagat ng aso.

Magugunitang taong 2013 tanging ang isla ng Guimaras at Boracay lamang ang kauna-unahang lugar sa Western Visayas ang idineklarang rabies free.

Ang World Rabies Day ay taunang selebrasyon sa buong mundo tuwing ika-28 sa buwan ng Setyembre.

DPWH, ipapatawag sa susunod na sesyon ng SB Malay

Posted September 27, 2017

Ni Inna Carol L. Zambrona, YES THE BEST Boracay

Dahil sa lubak at hindi parin naaayos na kalsada sa area ng Caticlan sa bayan ng Malay, nais ngayon pagpaliwanagin ng Sangguniang  ang pamunuan ng DPWH.

Dismayado si LIGA President Julieta Aron sa kasalukuyang sitwasyon nila sa Caticlan partikular ang national road malapit sa palengke ito’y dahil nitong nakalipas na araw ay mayroon umanong nadisgrasya habang dumadaan sa lugar.

Ayon kay Aron, may request na sa Office of the Mayor para ma-construct na ang kalsadang lubak-lubak na labis na pahirap sa mga dumadaan lalo na sa turistang pumupunta sa isla ng Boracay subalit wala pa ring development mula sa DPWH.

Para malinawan ang mga miyembro ng SB, napagdesisyunan ng mga ito na imbitahan ang DPWH sa susunod na sesyon upang pag-usapan itong isyu.

Kung matatandaan, nagpadala na ng sulat si DPWH Aklan District Engr. Noel Fuentebella sa Lokal na Pamahalaan ng Malay sa kahilingan ni Mayor Ceciron Cawaling para sa pagsasa-ayos ng lubak na kalsada at pag-paganda ng kalsada pati na ang drainage system at mga signages na ilalagay sa lugar.

Sinasabing naglaan na ng P8 Million budget ang DPWH na direktang nasa control ng provincial government ng Aklan.

Mga Boarding House paboritong target ngayon ng mga magnanakaw

Posted September 27, 2017

Ni Inna Carol L. Zambrona, YES THE BEST Boracay

Dalawang magkahiwalay na kaso ng pagnanakaw ang naitala sa Boracay PNP kung saan ang mga nilooban at ninakawan ay mga boarding houses.

Kahapon ng hapon, humingi ng tulong ang isang lalaki sa Boracay Tourist Assistance Center (BTAC) matapos na pagnakawan ang kanyang Boarding House sa Sitio Bolabog isla ng Boracay.

Ayon sa biktima na si Ramil Quiseo, natangay umano ang mahigit P 45, 000 na halaga ng mga gamit gaya ng cellphone, laptop, at cash na P 2,000.

Sa pag-imbestiga ng pulis, posibleng dumaan ang magnanakaw sa  pader ng inuupahang boarding house.

Sa isa pang blotter entry, tatlong kababaihan ang dumulog sa pulisya para isumbong na nilooban din ang kanilang boarding house sa Brgy. ManocManoc, Boracay.

Ang tatlong nagre-reklamo ay kinilalang sina Cynthia Torres, 24-anyos, Carla Mae Dabalos, 25-anyos at Tamarah Glenn Baskerville, 22-anyos kapwa nagta-trabaho sa isang hotel sa lugar.

Sa salaysay ng mga biktima, nagulat si Dabalos na bukas ang pinto ng likurang bahagi ng kanilang inuupahang kwarto kung saan nakita niya dito ang suspek na gumagapang patungo sa kanilang higaan.

Dali-dali namang ginising ni Dabalos ang mga kasamahan nito na na-aktuhan din ang suspek at mabilis itong kumaripas palabas.

Sa kasamaang palad nakuha na pala ang ilang kagamitan ng tatlong biktima, isa na rito ang Power Bank, wallet, IDs, Passport at cash na P 1, 900.

Ang mga kaso na ito ay ini-refer na sa Intelligence Officer ng BTAC  para matukoy ang pagkakilanlan ng mga kawatan.

Taong idineklarang missing sa Napaan, natagpuang bangkay sa Sambiray

Posted September 25, 2017

Ni Inna Carol L. Zambrona, YES THE BEST Boracay

Isa nang malamig na bangkay ng matagpuan ang isang lalaki matapos itong mawala sa kasagsagan ng malakas na ulan sa Barangay Napaan.

Halos inabot ng 24-oras bago matagpuan ang bangkay ni Jemuel Montoya y Laba, 32- anyos at residente ng Nagustan, Nabas pagkatapos mawala nitong Biyernes at matagpuang nakalutang ang kanyang katawan sa karagatan ng Barangay Sambiray sa bayan ng Malay.

Naunang nabalitang nawawala ito matapos kumpirmahin ng opisina ng Municipal Disaster Risk Reduction and Management Office (MDRRMO) pagkatapos magsumbong ang kasamahan nitong nawawala ang kanyang kaibigan habang sila ay papatawid sa ilog.

Sa panayam kay PO2 Gerald Ilig ng Malay PNP na sa kanila umanong imbestigasyon, nagpahayag ang katrabaho ng biktima na magpapakain sana sila ng inaalagaang baboy ng naabutan rumaragasang tubig ulan sa ilog dahilan para sila ay bumalik ng kanilang barracks.

Ayon pa sa kaibigan ng biktima, nilangoy nila patawid habang malakas ang agos ng tubig subalit sa kaniyang pag-ahon ay hindi na niya nakita si Montoya.

Noong una inakala ng kaibigan ni Montoya na gumawa ito ng ibang paraan para makabalik subalit lumipas ang oras ay walang indikasyon na ito ay bumalik sa pangpang.

Dahil dito, nagpursige na ito na i-report ang insidente sa Barangay at Municipal Disaster Risk Reduction and Management Office (MDRRMO) ng Malay para mahanap si Montoya.

Kinaumagahan, matapos ang isang araw na paghahanap sa biktima nakita ng mga tanod ang katawan nito na palutang-lutang na sa karagatan ng Sambiray Port.

Agad nila itong ini-report sa mga kina-uukulan at ipinaalam sa mga kaanak ang sinapit ng biktima.

Water Rate ng BIWC, pinag-usapan sa SB-Malay

Posted September 25, 2017

Ni Inna Carol L. Zambrona, YES THE BEST Boracay

Balak ngayong ipatawag ng Sangguniang Bayan ng Malay ang Boracay Island Water Company pagkatapos na napansin ng karamihan ang pagtaas ng kani-kanilang bayarin sa tubig.

Sa 32nd regular session ng Sangguniang Bayan ng Malay nitong Martes, laman ng privilege speech ni Sangguniang Bayan Member Jupiter Gallenero ang tungkol sa pagtaas ng presyo ng tubig ng Boracay Water Company (BIWC).

Binuksan ni Gallenero ang usapin ng tanungin umano ang konsehal kung nagkaroon ba ng Public Hearing na isinagawa ang BIWC at kung inimbita ba ang huli.

Nais din malaman ng konsehal kung alam ba ng mga residente bago ginawang  adjustment ng BIWC.

Ayon naman kay Committee Chairman on Tourism at Sangguniang Bayan Member Dante Pagsuguiron, kaya umano nagtaas ng singil ang BIWC ay dahil siguro sa kanilang expansion at mga bagong proyekto.

Subalit sa paglilinaw nito, hindi umano ito pwedeng gawing dahilan para taasan agad ang water rate dahil kahit siya mismo ay nagtatanong kung bakit tumaas din ang kanyang bayarin sa tubig.

Dagdag pa ni Pagsuguiron, marahil wala itong  problema sa mga big investors pero paano naman raw ang mga residene kung saan nagtanong pa ito kung bakit palagi umano nila itong tinataasan.

Dahil dito, nakatakdang ipatawag sa susunod na buwan ang pamunuan ng Boracay Island Water Company para pagpaliwanagin.

Sa panayam sa pamunuan ng BIWC, nagpatawag na umano sila ng meeting noong buwan ng Hulyo kung saan napag-usapan ang usapin sa drainage system project ng BIWC sa Boracay at nakatakdang rate adjustment sa presyo ng tubig.

Samantala sa pahayag kay BIWC Business Operations Head Acs Aldaba, pupunta sila sa imbitasyon ng SB-Malay para ipagpaliwanang ang tungkol sa water increase ng kompanya.

Sa ganito umanong  paraang ay mailalatag nilang mabuti sa publiko kung ano ang dahilan at bakit tumaas ang water rate nila sa isla ng Boracay.