Bagong Snorkeling Ticket, ipapatupad ng LGU Malay

Posted March 11, 2017

Ni Danita Jean A. Pelayo, YES FM Boracay

Uumpisahan na ang bagong pag- isyu ng snorkeling ticket ayon sa ibinabang memorandum ni Mayor Ceciron Cawaling.

Sa nakaraang 8th Regular Session ng SB Malay nabuksan ang usapin tungkol sa pag- isyu ng bagong imprinta na snorkeling ticket.

Mula sa dating P 20.00 na halaga ng bawat ticket ay magiging P 40.00 na umpisa Marso 15 ng taong kasalukuyan.

Nabatid na ito ay ayon sa Memorandum Order  na inilabas ni Mayor Cawaling sa Treasurer’s Office para sa implementasyon.

Magugunitang maka-ilang ulit ng pinag-usapan ang isyu tungkol sa mga snorkeling tickets sa Sangguniang Bayan kung saan may mga dapat ayusin sa sistema ng pagsingil.

Boracay hinirang bilang isa sa top 10 Destination ng CTRIP Travel ng China

Posted March 11, 2017

Ni Danita Jean A. Pelayo, YES FM Boracay

Hinirang ang Boracay bilang isa sa awardee ng CTRIP Travel para sa taong 2016.

Napabilang ang isla ng Boracay sa mga kinilala kasama ang ilan pang destinasyon tulad ng  Phuket, Malaysia, Maldives, Tahiti, Mauritius , Guam, Bali, Saipan at Okinawa.

Ang magandang balita ay inilabas ng Department of Foreign Affairs nitong ika-pito ng Marso ng ganapin ang CTrip Travel Awards Ceremony sa kakabukas lang na 7-Star Wanda Reign Hotel at Bund sa Shanghai.

Tinanggap naman ang naturang award ni Vice Consul André Peter C. Estanislao ng Philippine Consulate General sa Shanghai.

Samantala, magugunitang isa din ang isla sa kinilala ng Tripadvisor bilang isa sa best beaches in the world sa unang bugso ng 2017.

Ang CTRIP ay isang Chinese travel service provider na nakabase sa Shanghai kung saan ito ang ikalawang pagkakataon na sila ay nagbigay ng parangal para makilala ang mga top destinations at travel service providers sa buong mundo.

Chinese National, nangunguna sa Tourist Arrival ng Boracay

Posted March 11, 2017

Ni Danita Jean A. Pelayo, YES FM Boracay

Nanguna ang mga Chinese National na bumisita sa isla ng Boracay sa inilabas na datos ng Malay Tourism Office o MTOUR.

Base sa datos, umabot sa 40, 036 ang bilang ng mga Chinese ang dumadagsa sa isla sa buwan ng Pebrero.

Kaugnay nito, pumapangalawa ang mga Koreans na nagtala ng 37, 511 tourist arrival habang pumangatlo naman sa listahan ang mga Taiwanese na umabot sa 5, 126.

Para sa kabuuang bilang ng mga turista ngayon buwan ng Marso, umabot na ito sa 174, 183 kung saan nakapagtala ng 4,615 para sa mga OFW’s na bisita.

Samantala, sa nakaraang report magugunitang nasabi ni DOT Boracay Sub-Office Tourism Assistant Kristoffer Leo Velete na nasa state of warming- up ang bansang China at Pilipinas kung kaya’t dagsa na ngayon ang mga tsino sa isla.

Negosyo Center sa Makato, binuksan na

Posted March 10, 2017

Ni Inna Carol L. Zambrona, YES FM Boracay

Sa pakikipagtulungan ng Department of Trade and Industry – Aklan at lokal na pamahalaan ng Makato, pormal ng binuksan ang Negosyo Center sa Makato Tourist Convenience and Pasalubong Center nitong Miyerkules.

Layunin ng Negosyo Center na mailapit ang serbisyo ng iba’t-ibang ahensya ng gobyerno sa pamamagitan ng skills trainings, entrepreneurship seminars, marketing and promotion, financing forum at product development.

Ang proyektong ito ay batay sa Go Negosyo Act kung saan inaatasan ang DTI na magtayo ng mga Negosyo Centers sa iba’t-ibang lugar sa buong bansa.

Ito na ang pang-anim na negosyo center sa probinsya na kinabibilangan ng mga bayan ng Kalibo, Ibajay, Altavas, Numancia at Lezo.

Samantala, nakatakda namang buksan ang tatlo pang negosyo center sa bayan ng Libacao sa March 16, Malinao sa April 20, at Malay sa May 18.

Sunog na sumiklab sa Manoc-Manoc kanina, nagpapatuloy ang imbestigasyon

Posted March 10, 2017

Ni Inna Carol L. Zambrona, YES FM Boracay

Nagpapatuloy ngayon ang imbestigasyon ng Bureau of Fire Protection (BFP) Boracay hinggil sa nangyaring sunog kaninang alas-tres y medya ng madaling araw.

Ayon kay FO3 Franklin Arubang ng BFP-Boracay, isang lalaki ang pumunta sa kanilang opisina at nag-report na meron umanong nasusunog na bahay sa Sitio Bung-aw, Brgy. Manoc-manoc, Boracay.

Agad naman aniya nilang ni-respondihan ang lugar katuwang ang ibang mga responder’s kagaya ng BFRAV, Boracay Water Company o (BIWC) at mga opisyales ng Brgy. para maapula ang sunog.

At base sa inisyal na imbestigasyon ng BFP, totally burnt na nagsimula umano sa ikalawang palapag ng bahay ni Rony Panagsagan ang sunog na gawa ito sa light materials.

Nabatid na wala si Panagsagan ng mangyari ang sunog kung saan ang pamangkin nitong lalaki ang pinatulog niya sa kanyang bahay.

Umabot sa kalahating oras ang sunog at tinatayang nasa P50k ang halaga ng mga ari-arian ang naabo.

Sa kasalukuyan, patuloy pang inaalam ng BFP-Boracay ang sanhi ng nangyaring sunog.

Ginugunita ng BFP ang buwan ng Marso bilang Fire Prevention Month.

Lalaki naaresto sa kasong carnapping

Posted March 9, 2017

Ni Danita Jean A. Pelayo, YES FM Boracay

Naaresto ang isang lalaki na may kasong carnapping kahapon ng alas-singko y medya sa Brgy. Nagustan, Nabas.

Sa pinagsamang pwersa ng APPO tracker team sa pangunguna ni PI Angelito De Jose katuwang ang Nabas MPS, Ibajay MPS, Aklan PIB at Aklan Provincial Public Safety Company o APPSC, nadakip ang suspek na kinilalang si Carmelo Delfin y Tumbokon, 28- anyos na residente ng Brgy. Agbago, Ibajay sa bisa ng Warrant of Arrest na may Criminal Case No. 13472 para sa kasong carnapping.

Ang nasabing kautusan ay inisyu ni Hon. Ronald H. Exmundo, Presiding Judge ng RTC 6th Judicial Regional Branch 7, Kalibo, Aklan noong ika - 31 ng Enero taong kasalukuyan.

Samantala, wala namang nakalaang pyansa para sa pansamantalang kalayaan ng nasabing akusado.

Pagdeklara ng economic zone sa isla pinag- usapan sa SB Malay

Posted March 9, 2017

Ni Danita Jean A. Pelayo, YES FM Boracay

Naging usapin sa ginanap na 8th Regular Session nitong Martes ang tungkol sa pagdeklara ng tatlong area sa isla ng Boracay bilang economic zone.

Sa naging Priviledge Speech ni Sangguniang Bayan Dante Pagsuguiron, nabanggit nito ang tungkol sa pagdeklara ng economic zone matapos itong dumalo sa seminar ng Visayas Economic Summit sa Cebu dalawang linggo na ang nakakalipas sa pangunguna ng PEZA.

Ayon sa kanya, ang proyektong ito ay magiging maganda sapagkat magiging mas madali ang pag-iimbita ng mga turista at mga investors na pumasok sa isla kung saan madadagdagan din ang mga job opportunities lalo na sa mga Aklanon.

Aniya, oras na ma-ideklara na isang economic zone ang lugar ang Presidente ng PEZA ang may otoridad na mag- apruba nito.

Nabatid na magbibigay ang PEZA ng 5% galing sa gross sales nito kung saan ang 3% nito ay mapupunta sa national government habang ang natitirang 2% ay ilalaan sa Lokal ng Pamahalaan ng Malay.

Samantala, ang usaping ito ay ire-refer sa Committee on Tourism, Committee on Land Use at Committee on Environment para mapag-usapan ng mabuti.

Ang Philippine Economic Zone Authority (PEZA) ay isang ahensya na katuwang ang Department of Trade and Industry (DTI) kung saan ito ang nangangasiwa sa mga operasyon ng negosyo ng mga namumuhunan sa loob ng mga piling lugar sa buong bansa na kabilang sa PEZA Special Economic Zones at ang pagbibigay dito ng insentibo.

Blood Collecting Unit, prayoridad ng bagong PRC-Boracay Chairman

Posted March 9, 2017

Ni Inna Carol l. Zambrona, YES FM Boracay

May bago na ngayong Chairman ang Red Cross Boracay-Malay Chapter sa katauhan ni Joseph”Jojo” Medina.

Sa pagbisita nito ng Sabado sa Boracay Good News kasama si PRC OIC John Patrick Moreno, inilatag ng mga ito ang kanilang mga proyektong gagawin ngayong taon kung saan isa na dito ang paglagay ng Blood Collecting Unit.

Ayon naman kay Moreno, isa ito sa mga programa ng Red Cross Boracay-Malay Chapter na magkaroon ng Blood Collecting Unit-Blood Station para hindi na umano mahirapan ang mga nangangailangan ng dugo sa oras na may mangyaring insidente, kaso ng dengue at lalo na ang mga bagong panganak.

Kaugnay nito, hinihikayat ni Medina ang mga hotel establishments na mag- volunteer sa Red Cross para makatulong at mapadali ang pag-responde nila sa mga insedente na pwedeng mangyari.

Samantala, plano naman nila na maglagay ng sariling frequency para sa kanilang Radio Communication sa lahat ng mga responders upang mapadali ang kanilang komunikasyon sa anumang sakunang mangyari sa bayan ng Malay.

DTI-Aklan nagsagawa ng Negosyo Encounter sa bayan ng Lezo

Posted March 9, 2017

Ni Inna Carol L. Zambrona, YES FM Boracay

Matagumpay na isinagawa ng Department of Trade and Industry (DTI) ang negosyo encounter sa mga negosyante sa Covered Court ng Poblacion, Lezo, Aklan nitong katapusan ng Pebrero.

Sa pangunguna ni DTI-Aklan Officer In-Charge Ma. Carmen Iturralde, isang orientation ang kanilang i-prenesenta sa mga negosyante kaugnay sa kung ano ang kanilang programa at serbisyo na binibigay sa mga ito.

Katuwang nila dito ang mga ahensya ng National Government Agencies, Probinsya at Lokal na Pamahalaan ng LGU, Financing Institutions, Industry Groups at Business Development Service Providers.

Dito, ang mga negosyante ay isa-isang binigyan ng pagkakataon na magkunsulta patungkol sa access to finance, access to market, business enabling at productivity and efficiency.

Natapos ang aktibidad na 75 mga negosyante ang nag-benipisyo sa ginawang Negosyo Encounter habang 21 naman ang nagpakita ng interes na mag negosyo.

Samantala, naging katuwang ng nasabing proyekto ang BIR, DAR, DENR, DOLE, PhilFIDA, PIA, TESDA, Provincial Governor’s Office, Office of the Provincial Agriculturist, Provincial Planning and Development Office, Business Permits and  licensing Office – Lezo, Landbank of the Philippines, Small Business Corporation, PHILEXPORT, Hugod Aklanon Producers Association , Piña MANTRA, PCCI, TRIKE E-Solutions at Athena Business Solutions.

Tatlong cruiseship dadaong sa isla ngayong buwan ng Marso

Posted March 9, 2017

Ni Danita Jean A. Pelayo, YES FM Boracay

Aasahan ang pagdating ng tatlong cruiseship ngayong buwan ng Marso sa isla ng Boracay.

Sa pulong na ginanap sa Caticlan Jetty Port, bilang paghahanda sa papalapit na Marso 13 taong kasalukuyan,nabatid na darating ang MS Europa sa ikaapat na pagkakataon.

Inaasahan din na dadaong ang MS Celebrity Constellation sa Marso 14 na isang maiden call kung saan matatandaang hindi nakadaong ang barkong ito noong araw ng mga puso dahil sa malakas na alon.

Bukod pa rito darating din sa Marso 22  ang barkong MS Seaborne Sojourn para sa ikalimang pagbisita nito sa Boracay.

Ayon kay Jetty Port Administrator Nieven Maquirang, nauna ng nagpahiwatig na bibisita ang pitong barko ngayong buwan ngunit ang

apat sa mga ito ay nakansela.

Samantala, inaasahan na darating ang ilan sa mga cruiseship sa mga susunod pang mga buwan.