Stakeholders may malaking papel sa pagkakakilala sa Boracay bilang “2013 BEST BEACH in Asia”

Ni Edzel Mainit, Senior Field Reporter, YES FM Boracay

“Collective effort” umano ng lahat ng sector sa  Boracay kung bakit muling kinilala ang islang ito bilang “2013 Traveler's Choice Best Beach in Asia”.

Kung saan malaki umano ang naging papel at naitulong dito sa paraan ng kooperasyon ng mga stakeholders at mga pribadong sector upang mapanatili ang yaman na mayroon ang Boracay, ayon kay Malay Administrator Godofredo Sadiasa.

Hindi naman aniya nila tinuturing na “pressure” sa bahagi ng LGU Malay ang pamamayagpag ngayon ng isla lalo na nang makuha nito ang titulong “2012 Best Beach in the World”.

Sa halip aniya ay kinokunsidera nila ito bilang “challenge” o hamon upang mapanatili ang titulo na tinatamsa ngayon ng Boracay.

Naging inspirasyon din umano nila ito upang pagbuhihan ang lahat para sa islang ito.

Kung maaalala una ng hinayag ng Department of Tourism na naging “2013 Traveler's Choice best beach in Asia” ng online travel guide na TripAdvisor.

Ito ay dahil sa malapulburon na buhangin at mala-kristal na tubig sa baybayin ng Boracay.

Kontraktor ng Municipal Land Fill ng Malay hindi pa nababayaran

Ni Edzel Mainit, Senior Field Reporter, YES FM Boracay

“Kawawa naman ang kontraktor ng Municipal Land Fill ng Malay kapag hindi nabayaran, gayong may kapital na silang nailabas dito.”

Ito ang inihayag ni Engr. Arnold Solano, Special Project Officer ng Malay, kaugnay sa balak na pangu-ngutang ng LGU para pambayad sa balanse ng bayan sa kontraktor.

Ayon kay Solano, bagamat naka-loan na dati ang LGU, pero hindi umano sapat ang nauna ng na grant kaya muli ay bibigyan ng Sangguniang Bayan ng Malay ng awtorisasyon si Mayor John Yap na makipagnegosasyon para sa panibagong loan na mahigit P25-milyon.

Ayon kay Solano, ang Proyektong Land Fill ng Malay ay nagkakahalaga ng tatlumput walong milyong piso, pero ang nautang lang nila dati at mahigit labin limang milyong piso lamang.

Nilinaw din nito na sa ngayon ay maayos namang nagagamit ang Land fill, makaraang nitong nagdaang taon ng 2012 ay sinasabing hindi kinayang imbakan ng mga residual na basura mula sa Boracay. 

Lineman ng Akelco, nakuryente!

Ni Edzel Mainit, Senior Field Reporter, YES FM Boracay

Nagpapagaling na ngayon sa ospital sa bayan ng Kalibo ang isang lineman ng Aklan Electric Cooperative dahil nakuryente kagabi sa Boracay.

Inabot naman ng mahigit dalawampung oras na nakabitin ang biktimang kinilalang si Leonardo Alejandro sa poste ng Akleco bago maibaba.

Nabatid mula sa kapwa nito lineman na si Rey Villanueva, na natagalan ang pagkuha nila sa biktima.

Pero hindi naman umano nagtagal talaga sa pagkakakuryente si Alejandro, dahil agad din itong kumawala at naka-recover habang nasa taas pa.

Subalit, dahil sa nakasuot umano ng safety belt si Alejadro, nagtagal itong nakabitin sa poste, kaya hinimatay muna ito at sa kabutihang palad ay naibaba naman  at agad na isinugod sa Boracay Hospital.

Matapos umanong magtamo ng bukol sa ulo, wala nang iba pang pinsala sa katawan ang biktima sa kabutihan palad, at ligtas na sa ngayon.

Nakuryente umano si Alejandro habang kinukumpuni nito ang isang transformer ng Akelco sa Main Road Manggayad Barangay Manoc-manoc kagabi, ika-8 ng Marso. 

Umano’y madalas na pag-absent ni Malay Mayor Yap, ipinaliwanag

Ni Edzel Mainit, Senior Field Reporter, YES FM Boracay

Positibong tinanggap ng kampo ni Malay Mayor John Yap ang pagbatikos sa umano'y madalas nitong paglabas ng bansa at pagpapabandying-bandying.

Ayon kay Malay Administrator Godofredo Sadiasa, kung mag-travel man ang Punong Ehekutibo, ito ay bahagi pa rin umano ito ng kaniyang trabaho, at kung magbakasyon o lumabas man aniya ito ng bansa, karapatan din naman ito Alkalde.

Paliwanag pa nito, kabilang umano sa mga travel ng Punong Ehekutibo ay kapag may mga imbitasyon dito sa mga pagtitipon na tatayo siya bilang representante ng bayan ng Malay at Boracay.

Maliban dito, hindi rin umano nangangahulugang pinabayaan na umano nito ang kaniyang trabaho, sapagkat may mga tao din umano itong iniwan na siyang taga-asikaso at tutugon sa oras na kailangan ang kaniyang serbisyo, gaya ng mga department heads, na handang umaksiyon.

Sinabi pa ng administrador na nagpapasalamat pa nga sila sa mga taong nakapuna at nagbabantay sa aktibidad ng Alkalde dahil nanga-ngahulugan lamang umano ito na nagmamalasakit sila sa bayan.

Matatandaang nitong nagdaang mga araw at nitong buong linggo ay wala ang Alkalde sa Malay, at pansamantala ay pinaupuan muna nito ang posisyon niya kay Vice Mayor Ceceron Cawaling.

Kung maaalala din, ilan sa mga kritiko na rin nito ang nagsabi na tila kampante na si Yap sa posisyon nito dahil sa wala itong katunggali ngayong May 2013 Mid Term Elections.

Pitong lalaking nahuling naglalaro ng poker sa Boracay, sasampahan ng kaso

Ni Edzel Mainit, Senior Field Reporter, YES FM Boracay

Pursigido ang Boracay Pulis na sampahan ng asunto ang pitong kalalakihan na ginawang Casino ang Cagban kahapon ng gabi.

Ngayong araw ng Sabado ay inaasahang sampahan ng kaso sa mga ito makaraang nahuli sa aktong naglalaro ng poker sa Barangay Manoc-manoc noong a-7 ng Marso bandang alas-7:30 ng gabi.

Kahapon ng hapon ay inihanda ng Pulis Boracay ang mga ebidwnsiya laban kina Bryan Tornea ng Brgy. Caticlan,  Julius Villas ng Ambulong Manoc-manoc, John Jay Relojas ng Balabag, Raphael Villagante ng  Ajuy, Iloilo,  Jeffrey Agravante ng Davao City, Jonathan Parba ng  Koronadal City at Ryan Ronquillo ng Brgy. Balabag sa Boracay.

Nahuli ang mga nabangit na persona sa akto naglalaro ng poker sa isinagawang entrapment operation na pinangunahan ni S/Insp. Joeffer Cabural, hepe ng Pulis Boracay makaraang imonitor ito ng Intelligence operative.

Nakuha din sa mga ito ang poker chips at baraha na gigamit ng mga nahuli.

Kasong paglabag sa Republic Act (RA) 9287 o Illegal Gambling ang isasampa laban sa mga ito.

Caticlan Elementary School, wala pa ring paglilipatan

Ni Edzel Mainit, Senior Field Reporter, YES FM Boracay

Lugar na lamang talaga ang kulang para paglipatan ng Caticlan Elementary School, upang hindi na maistorbo ang mga mag-aaral.

Ito ang pahayag ni Malay Administrator Godofredo Sadiasa sa panayam dito kaugnay pa rin sa patuloy na ginagawang pagpapalapad sa Caticlan/Boracay Airport.

Kung saan sa ngayon ay sinisimulan ng alisin ang ilang pamamahay na nasa loob ng perimeter ng nabiling lupa ng developer na bahagi ng gagawing pagpapa-unlad sa paliparan.

Bagamat may katagalan na ang usaping ito, nilinaw ni Sadiasa na naumpisahan na rin ang negosasyon sa gitna nila at ng developer kung saang area ilalagay ang paaralan, subalit sa ngayon wala pa umanong natukoy na paglalagyan.

Sa bahagi naman umano ng lokal na pamahalaan ng Malay, ninamadali na rin nila ang bagay na ito upang hindi na maapektuhansana  ang mga mag-aaral sa development na nangyayari sa lugar.

Paglilinaw pa nito, ang nabili umanong lupa ng LGU Malay sa area ng Tabon ay hindi para sa eskwelahan, kundi para pagsasa-ayos ng pantalan doon at  balak na patayuan ng ospital.

Kung maalala, ilang beses na ring nanghingi ng tulong ang mga Barangay Officials ng Caticlan gayon din ang mga guro sa pamahalaang nasyonal at maging sa dating Pangulo ng bansa at sa ilang departamento.

Subalit hanggang sa ngayon ay nananatili parin ang problema at nagtitiis parin sa kanilang klase ang mga estudyante dahil malapit lang ang paaralang ito sa runway ng paliparan.

Mga kawayang idinadaan sa main road ng Boracay, ire-regulate na

Ni Edzel Mainit, Senior Field Reporter, YES FM Boracay

Delikado at perwesyo sa daan.

Ganito ilarawan ng ilang local na mambabatas sa bayan ng Malay ang mga kawayan at iba pang construction materials na mahahaba kapag idinadaan na ito sa kalye lalo na sa main road.

Bunsod nito, nasa proseso na rin ng pagpasa ng ordinansa ang Sangguniang Bayan ng Malay, upang i-regulate ang pag-deliver, lalo na at masyadong makitid o maliit umano ang kalsada sa Boracay.

Kaya kung abala ang kalye o main road at idaan pa umano itong mga kawayan, tubo at iba pang mahahabang bakal na ginagamit sa konstraksiyon, maaaring makapagdala umano ito ng abala at sakuna ayon sa mga konsehal.

Dahil dito, bahagi narin ng kanilang panukala ngayon na gawing alas kwatro o alas singko ng umaga ang pag-deliver upang hindi makapagdala ng mabigat ng trapiko sa mga sasakyang dumadaan lalo na kapag abala na rin ang kalye sa Boracay.

Coverage ng Life Guard Boracay palalawakin na

Ni Edzel Mainit, Senior Field Reporter, YES FM Boracay

Simula ngayong araw ay balak nang palawakin ng Life Guard Boracay ang kanilang pagpatrolya upang mabantayan ang beach ng isla.

Ito ay upang masigurong ligtas ang mga naliligo lalo pa ngayong malapit na ang summer season.

Ayon kay Boracay Life Guard Supervisor Miguel “Mike” Labatiao, batid na rin nila ang pangyayari noong ika-6 ng Marso sa Sitio Diniwid kung saan isang Chinese na turistang babae ang nalunod.

Dahil dito, isasama na rin umano nila ang Sitio Diniwid sa babantayan ng mga Life Saver.

Habang ang Puka Beach, ayon dito, may mga Barangay Tanod na rin aniya na nagbabantay para  maging ligtas din ang paliligo doon.

Sinabi din ni Labatiao na malaki rin umano ang maitutulong ng mga security guard upang mabantayan din ang kanilang area lalo na ang kaligtasan ng mga naliligo.

Suspek na nanluko at nagpakikilalang taga-bangko sa Boracay, pinalaya na lang

Ni Edzel Mainit, Senior Field Reporter, YES FM Boracay

Dahil sa wala namang intresadong magsampa ng kaso mula sa mga biktima ng panloloko, kahapon ng tanghali ay pinakawalan na lamang ng Pulis Boracay ang suspek na si Clint Benedict Ricamonte na taga-Kalibo.

Ito ay makaraang ireklamo ng panloloko ng mga nabiktima nito na umano ay nagpapakilala na empleyado ng isang bangko at nanghingi ng halaga o pera para sa pag-opened ng ATM account.

Subalit ng iberipika sa bangko ay hindi pala ito konektado.

Maliban dito, may isang nagreklamo din nitong umaga na nakunan din umano ng pera ng suspek.

Maging ang bangko na ginamit ng suspek sa panloloko ay nagpa-abot din ng reklamo.

Subalit dahil sa wala namang nag-sampa ng kaso sa mga nagreklamo, wala na umanong magagawa ang Pulisya kundi ang pakawalan na lamang.

Sapagkat na-abot na ang regulamentary period sa pagkaka-detine sa suspek.

LGU Malay muling mangungutang para sa Land Fill ng Malay

Ni Edzel Mainit, Senior Field Reporter, YES FM Boracay

Mahigit P25-milyon ang balak ngayong utangin ng lokal na pamahalaan ng Malay para sa Municipal Land Fill ng bayan.

Dahil dito, sinisimulan nang isabatas ng Sangguniang Bayan ng Malay ngayon ang panukala kaugnay dito.

Gayon din ang pagbibigay ng awtorisasyon nila kay Malay Mayor John Yap na makipag-negosayon sa isang banking institution.

Layunin ng pag-utang ng LGU umano ay upang ipambayad balanse ng bayan sa kontraktor ng Land Fill.

Kung maaalala, nitong nagdaang taon ay naka-utang na ang LGU sa isang bangko sa bayan ng Kalibo na siyang ginamit naman sa kontraksiyon ng Land Fill.

Subalit, ang proyekto ay nagkakahalaga umano ng P40-M, kaya kulang ito pambayad sa kontraktor.

Ambulance Fee sa mga private clinic sa Boracay, pinapasilip

Ni Edzel Mainit, Senior Field Reporter, YES FM Boracay

Pinaalalahanan ngayon ang Red Cross Boracay na silipin din ang mga private clinic sa isla.

Ito ay kasunod sa napababalitang, di umano ay mahal maningil ng Ambulance Fee ang mga pribadong klinika sa isla kapag gagamit ng ambulansiya ang isang pasyente.

Dahil dito, nausisa ng Sangguniang Bayan ng Malay si Malay-Boracay Red Cross Administrator Marlo Shoenenberger nang magpresenta ito ng kanilang Accomplishment sa taong 2012, kamakalawa sa ginanap na 8th Regular Session.

Bilang tagapamahala ng isang ambulansiya sa Boracay, nilinaw ni Shoenenberger na naniningil talaga ng Ambulance Fee ang mga pribadong klinika.

Pero kung ambulansiya umano ng Red Cross ang ginagamit, fix na sa isang libo at limang daang piso ang charges nila sa pasyenteng turista lamang na may mga travel insurance.

Ngunit paglilinaw nito, kapag Boracaynon ang mangailagan, wala o hindi umano naniningil ang Red Cross sa mga ito.

Ganon paman, inatasan ni SB Member Jonathan Cabrera si Shoenenberger na i-monitor ang mga klinika sa isla kung tama ba ang kanilang singil sa bawat serbisyo ng ambulansiya ng Red Cross.

Una rito nagpahayag din ng pagkadismaya si SB Member Rowen Aguirre kung bakit may mga klinika at pagamutan sa Malay at Boracay na hanggang sa ngayon ay walang sariling ambulansiya.

Dalawang turista, nalunod sa Boracay!

Ni Edzel Mainit, Senior Field Reporter, YES FM Boracay

Dalawang kaso ng pagkalunod ang naitala sa Boracay kahapon ng hapon ika-6 ng Marso.

Una rito, ideniklarang dead on arrival o DOA ni Dra. Michelle Depakakibo ng Boracay Hospital ang isang 21-anyos na Chinese National na si Ye Win.

Ito ay makaraang nakitang nakalutang na sa tubig sa Diniwid Beach sa Boracay na pinaniniwalang nag-snorkeling.

Nang i-ahon na umano ito sa tubig ng dalawang turista naligo sa lugar bandang ala-una ng hapon ay wala na umanong malay ang biktima.

Bagamat naisugod pa ito sa pagamutan ng Boracay First Responder, pero hindi na na-revive pa ang bikitima.

Apat na oras din ang nakalipas matapos ang insidente, isang 21-anyos din na Canadian National ang nasagip ng mga Life Guards area ng Station 2 sa Boracay.

Sinasabing nasa impluwensiya ng alak biktimang si Emily Janairan nang lapatan ito ng paunang lunas ng Life Saver.

Agad ding naka-recover ang biktima matapos itong isugod sa Boracay Hospital.

Mga nabigyan ng violation order ng Task Force Moratorium sa Boracay, umabot sa 30 establishments

Ni Edzel Mainit, Senior Field Reporter, YES FM Boracay

Umabot ng halos 30 establishemento sa Boracay ang nabigyang ng violation order simula ng ikasa ang Task Force Moratorium noong Marso ng taong 2012.

Ayon kay Malay Municipal Engineer Elezer Casidsid, sa loob ng isang taong pagpapatupad ng Moratorium on Building Construction sa isla, karamihan sa mga nabigyan nila ng violation order ay mga boarding houses.

Sinabi pa nito na kalimitan umano sa mga lumabag na establisemento ay mga bago pa lamang at walang permit para sa konstraksiyon mula sa LGU, makaraang nagsagawa ng inventory ang mga Building Officials ng Bayan at Task Force.

Habang ang iba naman ay may problema lamang ang mga gusali, pero mga minor lang ito na agad din umano ay inayos ng may-ari, gayon din ang mga walang permit umano ay kumuha na ngayon.

Kung matatandaan, Marso noong 2012 ay inilunsad ang Task Force Moratorium na nitong a-uno ng buwan  batay sa Executive Order # 2012-003 na binaba ni Malay Mayor John Yapay nagtapos na.

Layuni ng EO o pagbuo sa Task Force ay upang ma-monitor ang mga illegal na gusali o istraktura sa Boracay at maitama umano. 

Boracay Pulis, magsasampa na ng kaso laban sa mga guwardiyang nagpaputok sa Land dispute nitong Lunes

Ni Edzel Mainit, Senior Field Reporter, YES FM Boracay

Nakatakda nang kasuhan ang mga security guards na sangkot sa walang habas na pagpapaputok sa pinag-agawang lupa sa Sitio Balinghai, Barangay Yapak nitong Lunes.

Sa 14 na guwardiya mula sa tatlong security agencies na sangkot at inimbitahan para imbestihan kaugnay sa nangyaring tensiyon sa isang lupain doon, dalawa sa mga ito ang nasa kustodiya ngayon ng Boracay Pulis na siyang itinuturo ng mga guwardiya na nagpaputok noong Lunes ika-4 ng Marso.

Siyam na mga baril na kinabibilangan ng 0.9mm pistol at shotgun naman ang nasa panga-ngalaga ngayon ng awtoridad mula sa mga guwardiyang ito gayun din 6 na gulok na siyang ipipresenta nila ngayong araw sa prosekyusyon.

Ayon kay PO2 Aven Dela Cruz ng Boracay Police, bagamat ngayong araw ay nakatakda nilang isampa ang kaso sa prosecutors office.

Nasa prosecution pa rin umano ang pag-determina kung anong nararapat na i-kaso sa mga ito.

Sa ngayon ay “illegal discharge” o walang habas na pagpapaputok ng baril ang reklamo sa mga guwardiyang ito na hindi muna pinapangalan sa ngayon.

Task Force Moratorium on Building Construction sa Boracay, paso na

Ni Edzel Mainit, Senior Field Reporter, YES FM Boracay

Simula nitong a-uno ng Marso ay tapos o paso na ang Executive Order # 2012-003 kaugnay sa Task Force Moratorium on Building Construction sa Boracay.

Ganoon pa man, sinabi ni Malay Municipal Planning Officer Alma Beliherdo na wala pang inilalabas na kautusan si Mayor John Yap kung palalawigin o i-extend pa nito ang EO.

Pero ayon kay Beliherdo, nakasaad naman umano sa Executive Order na ang Task Force Moratorium na ito ay na maaaring ma-i-extend hangga’t hindi pa naaayos ang mga problema sa isla.

Lalo na at hindi pa maitatama ang mga mali-maling gusali o illegal na istaktura sa Boracay.

Kung maaalala, buwan din ng Marso noong 2012, ay inilunsad ng LGU na pingungunahan ng mga Building Official sa Malay ang Task Force sa Boracay.

Ito ay sa pakikipagtulungan na rin ng iba’t ibang sector gaya ng ang mga opisyal at Volunteers ng Barangay sa isla, awtoridad, Non-Government Organization o NGOs at mga stakeholders.

Ang Task Force ay naglalayung mabantayan o ma-monitor ang bagong establishemento sa isla, at ma-inventory ang mga gusali upang makita kung sino at ano ang lumabag sa Building Code at Ordinansang ipinapatupad sa Boracay, makaraang maging isyu ang isla sa national TV dahil sa mga nagsulputang iligal na mga gusali at istraktura.

BFI, kinondena ang pagpaslang sa Ati Youth Leader at Spokesman Dexter Condez

Ni Malbert Dalida, News Director, YES FM Boracay

Kinondena ngayon ng BFI o Boracay Foundation Incorporated ang pagpaslang sa Ati Youth Leader at Spokesman Dexter Condez.

Ang nasabing pagkondena ay nakasaad sa kanilang inilabas na official statement, na may kasamang panawagan ng hustisya.

Naniniwala umano kasi ang BFI na ang anumang uri ng karahasan at paglabag sa karapatang pantao ng isang indibidwal ay apektado din ang buong komunidad.

Kung saan ang pagpaslang umano kay Condez nitong nagdaang Pebrero 22 ay nagpayanig sa buong Boracay at dumungis sa reputasyon nito bilang international tourist destination.

Kaugnay nito, nanawagan ang BFI kay mismong Pangulong Benigno Aquino III, sa Aklan provincial government, Boracay PNP, LGU Malay, NBI o National Bureau of Investigation na malutas ang kaso at mabigyang katarungan ang pagpaslang kay Condez.

Nanawagan din ang mga ito para sa isang masusing imbistigasyon para sa ikadarakip ng mga sangkot sa nasabing krimen.

Beach ng Boracay, binabantayan ng dalawang grupo ng Life Guard

Ni Edzel Mainit, Senior Field Reporter, YES FM Boracay

Dalawang grupo na ng Life Guard ang nagbabantay sa Beach ng Boracay.

Ito nilinaw ni Philippine National Red Cross Malay-Boracay Chapter Administrator Marlo Shoenenberger sa ginawang ulat nito sa Sangguniang Bayan ng Malay kahapon ng umaga.

Aniya, sa pagbabantay sa mga maliligo, lalo na sa Swimming area, hinati-hati na umano ang skedyul sa dalawang grupo ng Life Saver sa Boracay.

Ito ay sa Life Guard ng LGU Malay na pinapangunahan ni Miguel “Mike” Labatiao at Life Guard ng Red Cross.

Ayon kay Shoenenberger, simula alas-sais hanggang alas-9 ng umaga at alas-4 ng hapon hanggang alas-7 ng gabi, ay Life Guard ng Red Cross na umano ang naka-tukang magbantay.

At ang mga wala na umano sa iskeyul ng Red Cross ay LGU Savers naman ang magbabantay sa Beach.

Kaya 12-oras na umano ngayon na nababantayan ang Swimming area, para maging ligtas ang mga naliligo.

AKELCO, may panibagong dagdag-singil ngayong Marso

Ni Malbert Dalida, News Director, YES FM Boracay

Sigurado ka bang kasya na ang budget mo sa anumang bayarin ngayong buwan?

Kung tamang-tama lang, maoobliga kang ito’y dagdagan.

May panibagong dagdag-singil kasi na P0.19 per kilowatt hour na ipapatupad ngayong Marso.

Base sa Akelco o Aklan Electric Cooperative advisory kahapon, inotorisa ng ERC o Energy Regulatory Commission ang PSALM o Power Sector Assets and Liabilities Management Group na kolektahin mula sa mga electric consumers ang nasabing dagdag-singil.

Ang P0.19 na ito ay makikita sa mga power bill ng AKELCO ngayong Marso, bilang bago at hiwalay na taripa.

Tatawagin naman itong UC-SCC o Universal Charge-Stranded Contract Cost na ipambabayad umano ng PSALM sa P53.58-billion na Cost of Stranded Contracts ng NPC o National Power Corporation.

Ang Stranded Contract Cost ay tumutukoy sa sobrang halaga ng kuryente na nakakontrata sa National Power Corporation at Independent Power Producers sa aktuwal nitong selling price.

Ang nasabing paniningil ay sa ilalim ng EPIRA o Electric Power Industry Reform Act of 2001 at pag-aapruba ng Energy Regulatory Board.

Boracay, muling ginulantang ng land dispute

Ni Edzel Mainit, Senior Field Reporter, YES FM Boracay

Kung gaano katensiyunado ngayon sa Sabah, Malaysia, ganoon din ka-tensiyunado ngayon sa isla ng Boracay.

Mula sa pagkakapatay kay Boracay Ati Community Spokesperson Dexter Condez, dahil umano sa agawan ng lupa, na hindi pa natapos sa ngayon dahil heto pa at dalawang lupain din ngayon sa Boracay ang nabalot ng tensiyon, dahil din sa kahalintulad na pag-aagawan.

Una ditto, Lunes ng umaga ay nagkaroon ng tensiyon sa area ng Balinghai, Brgy Yapak sa ginta ng pamilya ni Yapak Punong Barangay Hector Casidsid at negosyanteng si Elena Brugger makaraang magpa-ulan umano ng bala ang mga guwardiya na tumagal ng halos tatlumpong minuto Lunes ng gabi.

Kahapon ng umaga naman, isang land dispute din ang pumukaw sa ilang residente lalo na sa naka-posisyon sa isang resort sa Mouth Luho Barangay Balabag, dahil sa sinugod din ang mga ito ng sherriff para magsilbi ng order, kaya nagkaroon din ng tensiyon.

Kasabay nito ay ang mahigit 30 pulisya naman mula sa Aklan Police Provincial Office (APPO) para bantayan at panatilihin ang seguridad ng lahat na nasa area, ngunit kahapon ng hapon ay agad din itong naayos.

Ganoon pa man, ayon kay S/Insp. Fidel Gentallan, Deputy ng Boracay Tourist Assistance Center o BTAC, ay nahirapan din silang sa sabay-sabay na pangyayaring ito, lalo na at kulang pa rin sila sa tao.

Subalit lahat naman umanong ito ay ginagawan nila ng paraan upang matugunan.

Pagpatay sa Ati Spokesperson, kinondena ng SB Malay

Ni Edzel Mainit, Senior Field Reporter, YES FM Boracay

Bagama’t nailibing na nitong Sabado, Marso a-dos taong kasalukuyan, kahapon ng umaga ay nagpahabol ng resolusyon ang Sangguniang Bayan ng Malay na nagkokondena sa pagpatay sa spokesperson ng Ati Community sa isla na si Dexter Condez.

Sa resolusyong ipinasa nitong umaga, walang gatol at pagtutol mula sa mga miyembro ng Konseho nang ipasa ng SB ang pagpapahayag nila ng simpatiya sa mga katutubong Ati dala ng pangyayari.

Ayon sa may akda ng resolusyon na si SB Member Rowen Aguirre, labis nilang ikinalulungkot ang pangyayari na kailangan pa umanong magbuwis ng buhay dahil lang sa lupa.

Kalakip din ng resolusyon, inaprubahan ng SB ang kanilang rekomendasyon sa Kapulisan na magkaroon ang otoridad ng masusing imbestigasyon upang mapanagot ang salarin.

Kung maalala, si Condez ay binaril nitong nagdaang Pebrero a bente-dos, na ikinamatay ng biktima kung saan ang tinututukang motibo ay ang agawan di-umano sa lupa sa Boracay.

Larawan ni Birheng Maria sa Aklan, lumuha ng dugo?

Ni Edzel Mainit, Senior Field Reporter, YES FM Boracay

Nagtataka ngayon  ang pamliya Alvares sa New Buswang, Kalibo, Aklan bakit namumugto ang mga mata ni Birheng Maria at pinapaniwalaang lumuha umano ito ng dugo.

Bagay na nais nila ngayon araw ika-5 ng Marso na ipakita ito sa Simbahang Katolika para maipasuri at malaman kung ano ang eksplinasyon kaugnay dito.

Sa impormasyong na nakalap, kahapon ng tanghali, isang 14-anyos na binatang si Samuel Alvares di umano ang nakapansin sa nagdurugong imahe na ito na nakalagay sa kanila altar.

Pag-aari umano ito ng kaniyang tatay at nanay na si Ofelia Alvares na nakuha pa nila noong Disyembre sa Capiz Divine Mercy.

Ayon sa bata, habang nagpapahinga ito bago bumalik sa paaralan pagkatapos ng pananghalian, nakaramdam ito ang malamig na ihip ng hangin rason para mabuklat ang anumang nakaipit sa laminated na papel na ito na kasing-laki ng 1/4 na bond paper.

Kasunod umano nito, at tila may nauutos sa isip ng bata na lapitan ang altar, at doon tumambad sa mata nito ang may dugo nang larawan ng Birheng Maria.

Tinangka pa umano nitong punasan, subalit nasa loob ng laminated na larawan ang pulang likido.

Labis din silang nagtataka, kung saan nagmula ang pula na likido gayong kulay puti naman ang larawan na may itim.

Doon na umano ito kinabahan at ipinakita sa ina ang larawan.

Mula naman umano sa matingkad na kulay, ilang oras ang nakalipas at natuyo na rin ang nasabing dugo.

Sa impormasyon, gabi-gabi umanong dinadasalan ang pamilya Alvares ang litratong itong, subalit dahil sa naging abala sila, kaya may tatlong araw na umano nilang hindi nakapagdasal.

“Aging” para sa mga lumang tricycle sa Boracay, final na

Ni Edzel Mainit, Senior Field Reporter, YES FM Boracay

Mayroong hanggang anim na buwan lamang ang mga lumang tricycle sa Boracay kapag pumasok na ang mga e-trike sa isla.

Ito ang final na napagkasunduan ng e-trike adhoc committee, kaugnay sa mga lumang unit sa Boracay lalo na ang hindi pasok sa “aging policy” na ginawa ng LGU Malay.

Kung saan ang lahat ng motor tricycle na nabili bago ang taong 2008 ay pahihintulutan pang ipasada, pero limitado lamang umano at hanggang anim na buwan ang itatagal sa isla.

Napag-alaman ito mula kay Malay Transportation Officer Cezar Oczon, na mayroong mahigit 100 unit ng tricycle sa isla ang hindi na umabot sa “aging” na ito batay sa record ng LGU.

Agad din umanong ipapatapon sa mainland ang mga lumang unit at isusubasta ng financer o dealer ng tricycle depende sa halaga ng unit para mapakinabangan pa ng operator.

Samantala, gayong sa ngayon ay pino-proseso na ang pagdating at pagpasok ng e-trike sa Boracay, aasahang baka buwan umano ng Hunyo ay pwede nang umpisahan ang implementasyon nito sa isla.

Nagpakilalang “health director”, tiklo matapos tangkaing mang-shoplift sa isang pamilihan sa Boracay

Ni Peach Ledesma, YES FM Boracay

Pagpapakilala bilang isang “health director” ang ipinang-pain ng isang babae para makapang-biktima at makapang-gancho sa isang pamilihan sa Boracay.

Kinilala ang suspek na si Eden Bersaba, singkwenta’y siyete anyos, at residente ng Sitio Mangayad, Brgy. Manoc-manoc.

Sa reklamong ipinarating ng complainant na may-ari ng isang tindahan sa Brgy. Balabag, namataan na naman umano nila kaninang bandang alas-tres kwarenta’y-singko ang suspek na may hawak na bote ng mayonnaise.

Una na kasi silang nabiktima ni Bersaba noong ika-dalawampu’t-pito ng Pebrero kung saan nakapag-“take out” siya ng mga grocery items na nagkakahalaga ng tatlondaang piso matapos na magpakilala bilang “health director” ng grocery store.

Upang hindi na maulit ang nasabing insidente, inunahan na ng may-ari ng tindahan ang suspek na tawagin ang pansin ng isang pulis na nasa nasabing area na upang mag-report.

Nang damputin ng mga pulis, pinanindigan ng suspek na siya ay isang medical staff.

Kinuwestiyon pa nito ang kapulisan kung bakit siya inaresto.

Sa ginawang pagbi-beripika ng mga kapulisan ay lumalabas na wala siyang record bilang isang medical practitioner.

Sa ngayon ay dinala ang suspek sa Don Ciriaco S. Tirol Hospital o Boracay Hospital para sumailalim sa medical assessment at mental check up.

Baho sa Boracay National High School, sa sariling drainage nagmumula --- Brgy. Balabag

Ni Edzel Mainit, Senior Field Reporter, YES FM Boracay

Sariling drainage ng Boracay National High School sa Balabag ang problema.

Ito ang inihayag ni Emily Jinky Alecante, Administrator ng Brgy. Balabag, bilang sagot nito sa problema ngayon ng mga mag-aaral at mga guro sa nasabing paaralan.

Ito ay dahil sa umano ay sumasakit na ang ulo ng mga ito sa baho na dala ng tubig na pumapasok ng eskwelahan, galing sa hindi malamang pinagmulan.

Pero, minsan na rin umano itong pinasilip upang malaman kung ano ang suliranin at nakita na mismong nagmula aniya sa baradong drainage ng paaralan ang problema.

Kung maaalala, dati na umano itong tinanggalan na ng bara pero ang hindi nila alam ay kung bakit nagka-problema ulit.

Ayon kay Alecante, naaksiyunan na ng barangay ang problemang ito at bawat reklamo umano ng mga guro kaugnay dito ay agad nilang tinutugunan katuwang ang Boracay Island Water Company o BIWC para sa siphoning.

Subalit ang hindi umano malaman ngayon ng barangay kung bakit, sa halip na sa barangay humungi ng tulong para ma-aksiyunan ang problema ay sa media pa nagsumbong ang mga guro ng nasabing paaaralan.

Gayong inaaksiyunan naman nila ito, kahit pa wala manlang umanong salamat na natatanggap ang council mula sa eskuwelahan.

Ganoon paman, handa pa rin umano ang barangay na ipa-follow up sa council ang problemeng ito.

Kung maaalala, una nang sinabi ng mga guro ng paaralan na ilang beses na rin nilang naidulog sa LGU at BIWC ang problema na ito subalit wala naging tugon. 

ATV at bug cars sa mainroad ng Boracay, bawal na!

Ni Edzel Mainit, Senior Field Reporter, YES FM Boracay

Hindi na pwede ang mga ATV at bug cars sa main road sa Boracay.

Ito ang nilinaw ni Malay Transportation Officer Cezar Oczon, sa panayam dito kahapon.

Kasunod ito ng pagpapatupad nila sa Memorandum Order ni Mayor John Yap alinsunod sa implementasyon ng Ordinance No. 243 S 2012.

Sapagkat, simula umano nitong a-uno ng Marso ay pormal na nilang ipapatupad ng mahigpit na pagbabawal sa mga “all terrain vehicles” o ATV at bug cars sa mga pangunahing kalye sa Boracay.

Dahil dito, ayon kay Oczon, hangang Area ng Mount Luho lamang ang operasyon, bagay na pinaalalahanan na rin umano nila ang mga operator ng aktibidad na ito.

 Bagamat buwan pa umano ng Oktobre nitong nagdaang taon ibinaba ng Alkalde ang kautusan, subalit dahil nanghingi umano ng extension ang mga operator ay pinagbigyan nila ito.

Ngunit umpisa umano ngayon buwan hindi na pwedeng dumaan pa ang ATV at mga bug cars sa main road kahit na ang papunta sa area ng Yapak.

Samantala, dahil sa balak ng LGU Malay na ilipat sa mainland ang operation ng aktibidad na ito.

Sinabi naman ngayon ni Oczon, na hindi pa talaga handa ang mainland sa ngayon dahil may mga bagay pang dapat ayusin.

Mini truck at motorsiklo, nagbanggan sa Nabas, Aklan; dalawa, patay!

Ni Edzel Mainit, Senior Field Reporter, YES FM Boracay

Kapwa binawian ng buhay ang dalawang motorcycle rider makaraang mabangga ito ng mini truck o ELF, Lunes ng tanghali sa Brgy. Gibong, Nabas, Aklan.

Habang ang driver naman ng truck na Ruel De Jesus ng Bugtong Bato Ibajay, ay kritikal sa ngayon at nananatiling ginagamot sa Intensive Care Unit o ICU ng Provincial Hospital, ayon kay SP04 Zacharias Rose ng Nabas PNP.

Kinilala naman ang dalawang biktima na agad ding binawian ng buhay na sina Jessie Solanoy ang driver ng motorsiklo at tubo ng Baybay Nabas, na di umano ay ideniklarang “dead on arrival” habang dinadala ito sa Ibajay District Hospital.

Habang ang back rider naman nitong si William Solanoy, ay binawian din ng buhay habang dinadala sa pagamutan sa bayan ng Kalibo.

Sa imbestigayon ng pulisya, di umano ay nawalan ng control ang mini truck kaya gumewang-gewang ito at inokupahan ang lane na para na sana sa kasalubong na motorsiklo, rason para magbanggan ang mga ito.

Sa lakas ng impact, tumilapon ang biktima, at dala ng insidente ay nahati pa di umano ang motorsiklo.

Sunog sa Boracay nitong Sabado, nasa P240,000.00 ang nakain

Ni Edzel Mainit, Senior Field Reporter, YES FM Boracay

Umabot sa mahigit kumulang P240,000.00 ang danyos sa nangyaring sunog sa Boracay noong Sabado.

Ito ang napag-alaman mula kay Bureau of Fire Protection Boracay Investigator F03 Franklin Arubang, makaraang lamunin ng apoy ang siyam na pamamahay sa Sitio Tulubhan Brgy. Manoc-Manoc nitong Sabado ng hapon.

Ayon kay Arubang, sa ngayon ay patuloy pang iniimbestigahan kung ano ang pinag-mulan ng sunog.

Subalit batay umano sa mga naka-saksi, nagmula ang sunog sa staff house ng isang spa sa isla na pinagmamay-arian umano ni Verlin Dela Cruz.

Wala naman naitalang nasugatan dahil sa pangyayari.

Ang sunog na nangyari noong Sabado ika-2 ng Marso, ay siyang unang sunog na naitala sa Boracay ngayon na sa Fire Prevention Month ngayon buwan na sinimulan nitong a-uno.