Mga resort sa Boracay na lalahok sa fireworks display, wala pang permit

Inaasahang ngayon araw pa lang kukuha ng mga permit ang mga establishemento sa Boracay na lalahok sa taunang fireworks display sa isla.

Ito ang inihayag ni Island Administrator Glenn Sacapaño kahapon kung saan sa panayam sa kaniya ay sinabi nito na wala pang may kumuha ng mayors permit hanggang sa mga oras na iyon.

Pero inaasahang susugod umano ang mga ito sa tanggapan ng Alkalde ngayong araw, Biyernes at huling araw ng opisina para sa taong ito.

Ang firework display sa Boracay ay isa na rin sa dinadayo ng mga turista sa isla at taunang ginagawa, sa tulong at kooperasyon ng bawat resort at mga establishimiyento dito.

Dito ay sabay-sabay na sinisindihan ang mga fireworks na ito sa front beach pagsapit ng alas-dose ng ika-31 ng Disyembre.

Nabatid naman mula kay Sacapaño na sa tubig o isasakay sa mga bangka ang paputok at doon ito sisindihan para hindi maiwan ang mga basura at pulbura sa mapuputing buhangin ng Boracay.

Layunin umano nito ay upang maprotektahan ang beach at gayon din ang publiko na nanunuod ay maging ligtas. #ecm122012

DTI Aklan, nagpa-alala sa deadline ng pag-iinspeksyon ng helmet ngayong araw

Hanggang ngayong araw na lamang, araw ng Biyernes, ika-28 ng Disyembre, ang deadline sa gagawing pag-inspeksiyon at paglalagay ng ICC stickers sa mga helmet ng motorsiklo.

Kaya sa mga nais humabol, mariing pina-alalahanan ng Department of Trade and Industry (DTI) ang mga motorista sa Aklan na may huling araw pa sila ngayon para magpa-inspeksiyon ng kani-kanilang helmet.

Ito ay sa kabila ng pagiging abala umano ng DTI sa panahong ito dahil sa price monitoring na gagawin nila sa mga Noche Buena products at kapag magpatupad ng price freeze sa bayan ng Kalibo.

Sinabi ni DTI-Aklan Director Diosdado Cadena na malugod pa rin nilang tatanggapin sa opisina ng DTI ang mga nais magpainspeksiyon ng helmet para magkaroon ng tatak at ICC Stickers.

Dahil sa mga panahon ito, wala umanong  abiso sa kanila ang DTI national office na magkakaroon pa ng extension sa muling pagbabalik mula sa bakasyon ng mga empleyado sa Enero sa susunod na taon.

Muling ipina-alala nito na hanggang ngayong alas singko na lamang ng hapon ang kanilang tanggapan dahil ang susunod na mga araw ay New Years break na. #ecm122012

DTI, posibleng magpatupad ng price freeze sa Kalibo

May posibilidad na magpatupad ng price freeze ang DTI Aklan sa bayan ng Kalibo dahil sa pagbaha na naranasaan doon kamakailan lang.

Ito ang nabatid mula kay Department of Trade and Industry (DTI) Aklan Director Diosdado Cadena sa panayam dito.

Aniya, sa ngayon ay naghihintay sila ng opisyal na deklarasyon na “under the state of calamity” ang Kalibo mula sa lokal na pamahalaan ng nasabing bayan, para maipatupad na rin ang price freeze sa mga pangunahing pangangailan.

Ayon kay Cadena kapag nai-deklarang nasa state of calamity ang Kalibo.

Mananatili ang presyo ng mga basic commodities at ito ang kanilang babantayan, gaya sa presyo ng mga instant noodles, gatas, kandila, sardinas, asin at ilan pang de latang pagkain.

Aasahan aniyang magtatagal ito ng 60 araw, o hanggat hindi pa binabawi ng LGU ang kanila deklarasyon.

Kaya aasahang wala umanong tataas na presyo sa mga nabanggit ng commodities kapag ipatupad na ito.

Samantala, gaya ng ibang establishment at tanggapan na pinasok ng tubig baha sa Kalibo, maging ang empleyado ng DTI ay abala na rin sa paglilinis sa mga putik na dinala ng baha. #ecm122012

Bagyong Quinta, nagdala ng baha sa ilang bayan sa Aklan

Walang tulog ang mga taga-bayan ng Kalibo at Libacao dahil sa hagupit ng bagyong Quinta kagabi.

Bagamat walang gaanong hangin, malakas na ulan naman ang bumuhos na nagresulta doon ng pagbaha.

Kaya limang araw bago sumapit ang Bagong Taon ay nag-iwan pa ng pinasala ang baha na nanalasa sa nabanggit na mga lugar at sa ilan pang mga bayan sa Aklan.

Kung saan, 600 katao ang naghakot ng kanilang mga gamit sa dalawang evacuation center sa bayan ng Kalibo dala ng baha kagabi bandang alas-8 ng gabi.

Sa kasalukuyan ay hanggang baywang parin ang tubig baha sa ilang kalye sa bayan ng Kalibo, partikular sa Mabini Street sa area ng Provincial Hospital at D. Maagma at Osmeña Street sa isang Bus Terminal doon.

Sa sobrang lakas ng baha, pati ang Sports Complex sa Provincial Capitol na nagsisilbing isa sa nga evacuation center ay pinasok na rin ng tubig baha.

Pero ayon kay Provincial Disaster Risk Reduction Management Council o PDRRMC-Aklan Executive Officer Galo Ibardolaza, hindi naman umabot sa bleacher ng Sports Complex ang baha kaya kahit papaano ay hindi na-apektuhan mga nagsilikas.

Maliban sa bayan ng Kalibo, apektado rin ng baha ang ilang bayan gaya ng Libacao, Banga, Malinao, Numancia at Lezo.  #ecm122012

Presyo ng gulay, prutas at karne sa Aklan, hindi pa gumagalaw

Walang anumang pagbabago o pagtaas sa presyo ng gulay, karne at prutas hanggang ngayon araw na ito.

Ito ang nabatid mula kay Moises Inamac, Administrator Aid ng Provincial Agricultures Office, kasabay ng ginagawa nilang pababantay sa presyo ng mga gulay, karne prutas at isda sa Aklan ngayon nalalapit na ang Bagong Taon.

Ayon dito, wala pa naman silang nakita o napansing pagtaas sa presyo ng mga nabanggit na produkto sa ngayon.

Dahil nananatili ang presyo ng mga bilihing ito kahit pa sabihing dumaan na umano ang Pasko.

Ganoon pa man, inaasahan na, lalo pa at dadagsa ang mga mamimili sa susunod na mga araw para sa selebrasyon ng Bagong Taon.

Ang pagtaas sa presyo ay depende sa lugar o kinalalagyan ng tindahan o pamilihan, pero hindi naman umano ito magmamahal ng ganoon talaga kalaki.

Subalit nilinaw nito na mangyayari ang inaasahan pagtaas kapag kinulang sa suplay ng mga produktong ito ang Aklan.

Ngunit sa ngayon aniya ay sapat pa ang suplay mga pamilihan, kaya tila wala pang rason para tumaas ang presyo kahit pa imported ang mga produktong ito. #ecm122012

Bilang ng Tourist Arrival sa Boracay, malapit nang umabot ng 1.2 milyon

Malapit na umanong maabot ang 1.2 milyong tourist arrival sa Boracay ngayong 2012.

Kung saan isang linggo pa bago magtapos ang taong ito ay tila umaapaw na umano ang mga pasaherong turista, lokal at dayuhan man na dumarating sa Caticlan Jetty Port.

Nabatid mula sa Malay Municipal Tourism Office o MTO sa Caticlan na dagsa talaga ang turista nitong mga nagdaang araw.

Kung saan bago mag-Pasko at mismo araw ng Pasko ay hindi bumababa sa tatlong libong turista araw-araw ang pumapasok sa Boracay.

Bagamat ang 1.2 milyong tourist arrival na ito ay sobra na sa isang milyong target tourist arrival target ngayong taong.

Kampante ang MTO na maaabot ang 1.2 milyon na bilang na ito ng tourist arrival sa Boracay ngayong 2012.

Pero malalaman pa umano ito sa darating na Enero, dahil hindi pa nila nabibilang lahat gayong ang datus ay makakalap pa nila hanggang sa ika-31 ng Disyembre.

Samantala, sa trend o takbo naman ng tourist arrival sa kasalukuyan, parami ng parami na umano ang pumupuntang turista sa Boracay. #ecm122012

Tourist arrivals sa Boracay ngayong Kapaskuhan, tumaas

Naging mas mataas ang bilang ng mga turistang dumayo sa isla ng Boracay ngayong taon upang dito na mag-Pasko.

Ayon sa Malay Municipal Tourism Office, kung ikukumpara ang tourist arrivals ngayong taon ay mas mataas ito ng mahigit dalawampung libo kumpara noong nagdaang taon.

Sa kanilang datos mula Disyembre a-uno hanggang bente kwatro ng taong kasalukuyan ay umabot na ang tourist arrivals sa mahigit animnapung libo.

Mas mataas ito kung ikukumpara sa naitalang datos sa parehong petsa ng nagdaang taon na umabot lamang sa mahigit apatnapung libong tourist arrivals.

Ngunit sa kabila ng malaking bilang ng mga turista ngayon taon ay nagagawa namang i-accommodate ang lahat ng mga ito.

Samantala, inaasahan pa rin ng Malay MTO na tataas pa ang bilang ng mga turistang pupunta sa Boracay pagsapit ng Bagong Taon. #pnl122012

Pasko sa Boracay ngayong taon, naging “generally peaceful”

“Generally peaceful.”

Ito ang mga salitang maaaring makapag-larawan sa pagdiriwang ng Pasko ngayong taon dito sa isla ng Boracay.

Ayon sa Boracay Tourist Assistance Center o BTAC, wala naman umanong malalaking krimen na naganap sa isla ilang araw bago mag-Pasko.

Karamihan lamang umano ng mga naitatala ay mga petty crimes tulad ng panggugulo dahil sa kalasingan at maliliit na kaso ng pagnanakaw.

Kaugnay ito, nagbilin pa rin ang kapulisan sa publiko na patuloy na mag-ingat, lalo na sa mga nakawan.

Dapat umano ay ugaliing isara o huwag iwang bukas ang mga area na maaaring magsilbing “entry point” ng mga magnanakaw sa isang bahay o establishimiyento.

Importante din umanong manatiling alerto, dahil sa ngayon ay mautak na ang mga magnanakaw at minu-monitor na nila ngayon ang isang lugar bago pasukin at limasan ng pera at kagamitan. #pnl122012

Yapak, inuwi ang kauna-unahang titulo na “Malinis at Organisadong Barangay”

Inuwi ng Barangay Yapak ang titulo bilang malinis at organisadong Barangay ngayong taong 2012.

Ito ay kaugnay sa ginawang patimpalak ng lokal na pamahalaan ng Malay na pinangasiwaan ng Municipal Tourism Office (MTO) na Beautification Program sa apat na Barangay na direktang pinupuntahan ng mga turista.

Kinabibilangan ito ng Caticlan bilang entry point ng Boracay, Manoc-manoc, Balabag at Yapak.

Nasungkit ng Yapak ang titulong ito at na-take home ang premyong P20,000.00.

Naging mahigpit na katungali naman ng Yapak ang pumangalawa dito na Barangay Manoc-manoc na may premyong P15,000.00.

Sinundan naman ng Caticlan na siyang ika-tatlo ay nag-take home ng P10,000.00.

Habang ika-apat naman ang Balabag na may panalo na P5,000.00.

Naging basehan ng mga hurado sa pagpili ay ang mga preparasyon at nakitang resulta sa ginagawang paglilinis at paglagay ng mga dekorasyon sa main raod para maging kanais-nais din sa mata ng mga turista.

Samantala, nilinaw naman ng MTO na hindi kasama sa pagpili ng hurado ang patimpalak na ginawa din ng Brgy. Balabag sa bawal selda dahil nakatuon sa main raod ang pinagbasehan nila.

Inihayag ang resulta ng kau-unahang patimpalak na ito ng MTO noong Sabado ika-22 ng Disymebre kasabay ng Christmas Party ng LGU Malay. #ecm122012

Debotong Katoliko, dinagsa ang Nativity Mass sa Boracay

Ni Hensie Tumbagahan

Siksikan ang loob at labas ng simbahang Katoliko sa Boracay kagabi hindi pa man nagsisimula ang isinigawang misa para sa padiriwang ng Pasko.

Hindi na halos makapasok ang ilan sa mga huling dumating na deboto sa Holy Rosary Parish Church sa dami ng tao.

Dayuhan man o Pilipino ay nag-abang sa misa na pinangunahan Rev. Fr. Arnold Crisostomo na nagsimula bandang alas-nuwebe kagabi.

Lahat ay nagkaisa at nagkasama-sama para gunitain ang araw ng kapanganakan ng ating Poong Hesukristo.

Kasayahan at ngiti naman ang naglalarawan sa lahat ng dumalo sa pagtatapos ng misa kagabi n alas-diyes y media ng gabi.

P310-milyon annual budget ng Malay, aprubado na

Aprubado na sa Sangguniang Bayan ng Malay ang P310-milyon na 2013 Annual Budget ng bayang ito.

Bago nag-adjourn ang SB sesyon nitong ika-18 ng Disyembre na siyang huling sesyon nila sa taong ito ay nagawa nilang tapusin ang pagre-rebyu sa mga alokasyong pondo ng bawat Department ng LGU Malay sa pamamagitan ng Budget Hearing.

Kung maaalala, ang halaga ng annual budget na ito ng Malay na P305-milyon ay ginawang P310-milyon nitong huli.

Ito ay upang matustusan ang pangangailan ng Municipal Economic Enterprise Development o MEED Department at iba pang programa.

Napapa-wow at nalulula naman ang ibang miyembro ng Sanggunian sa milyon-milyong pundo ng Malay para sa susunod na taon, na nagpapakita lamang umano na mayaman na ang Malay. #ecm122012 

Mga paputok, hindi pa available sa Boracay

Hindi pa available sa Boracay ang mga paputok.

Dahil ilang araw bago ang Pasko at mahigit isang linggo bago ang Bagong taon, ay wala pa ring nakakapaglatag ng mga panindang paputok sa isla.

Ayon kay Boracay Bureau of Fire Protection Inspector Joseph Cadag, sa kasalukuyan ay inihahanda pa lamang ang mga pwesto sa nabigyan nila ng permit na maglatag ng kani-kanilang panindang paputok.

Kung saan, sa isla umano ng Boracay, tanging sa gilid o malapit sa Fire Station ang lugar na designated na pwedeng maglatag ng kanilang panindang mga paputok. 

Habang sa Main Land Malay naman, tanging sa Caticlan Market sa malawak na area doon ang inilaang lugar.

Nilinaw din nito na tanging sa mga lugar na nabanggit lamang pwedeng magbenta at bumili ng paputok lalo pa at ipinagbabawal ito sa mga sari-sari store at kung saan-saan lamang. #ecm122012