Biktima na binaril-patay ng riding in tandem sa Boracay, patuloy na ini-imbestigahan ng Boracay PNP

Posted May 11, 2017

Ni Inna Carol L. Zambrona at Danita Jean A. Pelayo, YES FM Boracay

Patuloy parin ang ginagawang imbestigasyon ng Boracay Tourist Assistance Center (BTAC) kaugnay sa pinaslang na si Ryann Raymundo alyas “Otoy” ng mga hindi pa nakikilalang suspek nito lamang Abril 30 sa Sitio Ambulong, Brgy. Manocmanoc, Boracay.

Sa panayam ng himpilang ito kay Police Inspector Jose Mark Gesulga Deputy Director ng Boracay PNP, inaalam na umano nila ang mga posibleng dahilan kung bakit walang awang pinatay ang biktima.

Ani Gesulga, sa kanilang mga nakuhang impormasyon hinggil sa pagkatao ni Raymundo, ito umano ay marami ng mga kasong na-irekord subalit hindi naman ito sinampahan ng kaso ng kanyang mga nakalaban.

Sa ngayon umano ang isang nakikitang dahilan ng mga otoridad sa likod ng pagpatay sa biktima ay ang mga na-agrabyado nitong tao.