MHO pinaghahandaan na ang posibleng sakit ngayong tag-ulan

Posted May 18, 2016

Ni Jay-ar M. Arante, YES FM Boracay

Image by. Abante.com

Pinaghahandaan na ng Municipal Health Office (MHO) Malay ang mga sakit na posibleng maranasan ngayong pagpasok ng panahon ng tag-ulan.

Ayon kay MHO Nurse II Arbie Aspiras, ang dengue umano ang siyang pangunahin nilang binibigyan ng prayoridad kung saan ang Malay ang siyang isa sa mga bayan sa Aklan na nakakakuha ng mataas na kaso ng naturang sakit.

Maliban dito pinaalalahan din ni Aspiras ang publiko na mag-ingat sa pagbabasa o paglusong sa tubig baha para maiwasan ang mga sakit na kagaya ng sipon, ubo at lagnat lalo na ang sakit na nagmumula sa ihe ng daga.

Nabatid na mayat-maya na ang nararanasang kalat-kalat na pag-ulan na bumubuhos sa ibat-ibang lugar sa bansa hudyat na papasok na ang panahon ng tag-ulan.

Samantala, pinayuhan pa nito ang publiko na agad magpakunsulta sa Health Center o sa malalapit na pagamutan sa kanilang lugar sakaling makaramdam ng hindi kaaya-aya sa kanilang katawan.

SP Aklan, balik na sa regular session matapos ang eleksyon

Posted May 17, 2016

Ni Inna Carol L. Zambrona, YES FM Boracay

Balik na sa Regular Session ang Sangguniang Panlalawigan (SP) Aklan, bukas araw ng Miyerkules matapos ang National at Local election nitong Mayo 9.

Ayon sa SP Office, kahapon umano ay nagkaroon sila ng Committee hearing na kabilang sa mga tatalakayin sa 16th regular session bukas.

Samantala, magkakaroon naman ng Oath taking ang mga bagong halal na Sangguniang Panlalawigan sa Hulyo 1, 2016.

Nabatid na kabilang sa bagong set ng SP sa Eastern side ay sina Ampod Neron at Atty. Emmanuel Nolly Sudosta habang sa Western side naman ay si Engr. Miguel Miraflores at  Jay Tejada.

Samantala, pangungunahan ng asawa ng former Vice Governor na si Gabrielle Calizo-Quimpo na si Atty. Boy Quimpo ang SP Session sa oras na makaupo na ito sa pwesto.

Kalibo-Numancia bridge II, sinigurong magagamit na ngayong taon

Posted May 17, 2016

Ni Jay-ar M. Arante, YES FM Boracay

Hindi paman natatapos ang Kalibo-Numancia bridge ngunit tiniyak ngayon ni District Engineer Noel Fuentebella ng DPWH-Aklan na magagamit na ito ngayong taon.

Ito’y sa sandaling matapos na nila ang pakikipag-negosasyon sa mga land-owners sa nasabing area na apektado ng construction ng tulay.

Nabatid na ito ang siyang dahilan kung bakit hindi parin natatapos ang nasabing construction dahil sa mga private property na kalapit nito.

Ayon pa kay Fuentebella magtutuloy-tuloy na umano ang pagpapagawa nito kung maialis na ang ilang establisyemto na matatamaan nito.

Ang pagpapatayo ng bagong tulay ay para maibsan ang trapiko at ang pagkakaroon ng maayos na biyahe ng mga motorista lalo na ang mga turistang pumupunta sa isla ng Boracay.

Boracay nakahanda na sa panahon ng tag-ulan

Posted May 17, 2016

Ni Jay-ar M. Arante, YES FM Boracay                      

Kaliwat-kanan ngayon ang pagsasaayos ng mga drainage system sa isla ng Boracay.

Ito’y bilang paghahanda na rin sa panahon ng tag-ulan na posibleng maranasan sa mga susunod na buwan.  

Dahil dito ang Manoc-Manoc area sa station 3 Boracay ay malapit ng makumpleto ang ginagawang drainage system partikular sa mga lugar kung saan kadalasang binabaha tuwing malakas ang ulan.

Nabatid na ang proyektong ito ay pinamunuan ni Manoc-Manoc Brgy. Captain at Liga President Abram Saulog na ngayon ay isa ng Vice-mayor ng Malay matapos manalo sa kakatapos na halalan.

Napag-alaman na ang kadalasang pagbaha sa isla ay dahil sa kawalan ng drainage system sa ibang lugar na kinakainis naman ng mga motorista.

Turista ninakawan habang naliligo sa dagat sa Boracay

Posted May 16, 2016

Ni Inna Carol L. Zambrona, YES FM Boracay

Isa na namang kaso ng pagnanakaw ang naitala ng Boracay PNP sa beach area ng isla.

Ito’y makaraang isang turista ang nagsumbong sa kanilang himpilan matapos na mabiktima ng kawatan habang naliligo sa dagat sa station 1 Boracay.

Sumbong ng biktima na si Robby Ann Recla 38-anyos sa mga pulis, iniwan niya umano ang kanyang bag sa buhangin saka naligo sa dagat kasama ang kaibigan.

Ngunit ng umahon na umano ng mga ito ay hindi na nila makita ang nasabing bag kung saan nakakalat na rin sa puting buhangin ang ilan sa mga laman nito.

Nabatid na naglalaman ang naturang bag ng cellphone mga importanteng I.D at cash na nag-kakahalaga ng mahigit sa P9, 000.

Sa ngayon patuloy na nagsasagawa ng imbestigasyon ang Boracay PNP hinggil sa nasabing insidente.

Samantala, muling pinaalalahan ng mga pulis ang mga turistang maliligo sa dagat na iwasan ang pagdadala ng mamahaling gamit dahil sa mainit ito sa mata ng mga pagala-galang kawatan sa isla.