Metro Boracay Police Task Force, maglulunsad ng “Battle Of The Front Beach”

Posted February 1, 2019

Inna Carol L. Zambrona, YES THE BEST BORACAY NEWS DEPARTMENT

Gamit ang mga ordinansang ipapatupad, ilulunsad ng Metro Boracay Police Task Force sa Pebrero 21 ang “Battle of the Front Beach” laban sa mga violators sa baybayin ng Boracay.

Sa pamamagitan ng Project BESST o Boracay Enhanced Security Strategy and Tactics katuwang ang Inter-Agency Task Force ay pagsasamahin sa isang team ang mga enforcers ng MAP, TREU, Beach Guard, at mga pulis.

Ilan sa mga pakatutukan ay ang anti-littering, smoking, ambulant vendors, sex workers, illegal tour guides at mga nangunguntrata sa turista.

Ayon kay PSUPT Ryan Manongdo ng MBPTF, nasa kabuuang 130 enforcers meron ang front beach ng Boracay subalit meron paring lumalabag sa ordinansang ipinapatupad.

Aniya, nangangahulugang hindi pa unified o may kaniya-kaniyang diskarte ang bawat grupo kaya’t naisipan nila ang stratehiyang ito.

Dagdag pa ng opisyal na hindi na magkakaroon ng anumang issue at mas maging transparent na ang implementasyon dahil magkakasama na sila sa isang team kasama ang mga pulis na may suot na “action camera” at lahat na gagawing hakbang ay dokumentado na.

Bago nito, pinulong muna nila ang MAP, TREU, at Beach Guards para ma organise ng maayos at dadaan sa mga pagsasanay bago ang manning at deployment.

Magkakaroon din sila ng weekly evaluation at accomplishment report para malaman kung bumaba na ang numero ng mga lumabag sa pamamagitan ng citation tickets monitoring.

Samantala, kung mag-tagumpay ang Phase 1 (front beach) ay isusunod na nilang disiplinahin ang mga pasaway sa main road.

Layunin ng proyektong ito na maging “ Discipline Zoned Boracay “ ang isla kagaya ng ibang mga tourist destination.

Ani Manongdo, sumasalamin sa buong bansa ang lahat ng gawain at pag-uugali ng bawat isa kaya dapat suportahan ito dahil nag-sakripisyo na ang lahat ng tao sa isla sa anim na buwang closure.

ASU-Malay Campus target mabuksan ngayong taon

Posted January 30, 2019

Inna Carol L. Zambrona, YES THE BEST BORACAY NEWS DEPARTMENT

Magandang balita, pino-proseso na ng Technical Working Group sa ilalim ng lokal na pamahalaan ang pagkaroon ng Aklan State University sa Malay.

Ito ang masayang ibinalita ni Hope Pagsuguiron, Malay SK Federation President nitong Sabado sa Boracay Good News.

Target na ma-establisa ang ASU Malay-Campus sa Barangay Balusbos ngayong taon.

Sa panayam naman kay Felix Delos Santos ng Malay Municipal Torusim Office at Vice Chairman ng Technical Working Group, kursong BS in Tourism at BS in Hospitality Management ang balak na i-alok sa mga magsisipagtapos sa senior high school.

Dagdag pa nito, mas madaling makahanap ng trabaho at hindi na mapapalayo oras na makapag-graduate dahil sa masiglang industriya ng turismo sa Boracay.

Kung maaayos na ang lahat ng mga permits, buwan ng Agosto ay pwede ng tumanggap ng enrollees ang ASU-Malay kung saan maglalaan ng slots sa tatlumpo hanggang apatnapung estudyante sa bawat kurso na may tig-tatlong section.

Sa ngayon, ayon kay Delos Santos pino-proseso na nila ang mga dokumentong isusumite ng sa gayun oras na maaproban ito ng CHED ay handa na ang kanilang building na papasukan ng mga estudyanteng mag-e-enroll.

LGU Malay magbibigay ng Financial Assistance sa mga biktima ng sunog sa Angol

Posted January 30, 2019

Magbibigay ng tulong pinasyal ang Lokal na Pamahalaan ng Malay sa mga biktima ng sunog na tumupok ng mahigit apatnapu’t anim na bahay sa Sitio Angol, ManocManoc nitong nakaraang araw ng Linggo.

Sa pinakahuling tala ng Malay Social Welfare Development Office o MSWDO, umabot na sa 74 na pamilya o katumbas na 276 na indibidwal ang na-validate ng kanilang opisina maliban pa sa 73 na boarders na nangungupahan din sa lugar.

Sa ginawang pulong ng MDRRMC, napagkasunduan na magbibigay ang LGU Malay ng P 6,000 sa pamilyang nasunugan ng bahay, P 3,000 sa pamilyang naninirahan lang, at P 1,000 naman sa mga boarders.

Ang tulong pinansyal na ito ay i-rirekomenda pa sa opisina ni Acting Mayor Abram Sualog bago ipamahagi sa mga biktima na dadaan naman sa validation.

Katuwang sa gagawing validation ang Barangay ManocManoc Council na siya namang magbibigay ng certification kung ang mga benipesyaryo ay taga doon.

Samantala, hindi pa sa ngayon papayagan na muling magtayo ng anumang istraktura sa pinangyarihan ng sunog dahil may 45-day investigation period pang gagawin ang BFP.

Dahil dito, babantayan muna ng PNP at BFP ang area para mapanatili ang kaayusan at seguridad sa lugar.

#YesTheBestBoracayNEWS

SB Malay nadiskubreng may mga turistang nagmamay-ari ng Etrike sa Boracay

Posted January 24, 2019

Inna Carol L. Zambrona, YES THE BEST BORACAY NEWS DEPARTMENT

Malaking katanungan sa mga miyembro ng Sangguniang Bayan ng Malay ang pagka-diskubre na marami palang turista ang nagmamay-ari ng e-trike na pumapasada sa isla ng Boracay.

Sa record ng Sangguniang Bayan, may anim na units ng TOJO E-trike ang nakapangalan sa isang Korean National maliban sa iba pang units na Koreans din ang may-ari.

Sa pagtatanong ni SB Member Frolibar Bautista, bakit nangyayari ang ganito samantalang malinaw sa ordinansa na dapat ay hindi lalagpas sa dalawang unit ang naka-pangalan sa isang franchise.

Napag-alaman na ang mga units na nakapangalan sa turista ay naibenta na ng mga franchise holder sa Boracay.

Nauna ng ipinatawag ang anim na E-trike provider dahil may mga balita silang narinig na may sobra sa dalawa ang nakapangalan sa listahan nila.

Paglilinaw pa ni SB Bautista, na ang franchise ay hindi pwedeng ilipat sa ibang tao.

Kaya naman tinatanong ngayon nito sa mga E-trike Provider kung sino itong mga nagmamay-ari na sobra sa dalawa at mayroon pa umanong umabot sa dalawampu ang units.

Samantala, nilinaw din mismo ni Cesar Oczon, Head ng Malay Transportation Office na hanggang dalawa unit lang ang pwedeng bilhin at i-operate.

Sinabi ni Oczon na narinig din umano nila ang naturang alegasyon sa dalampung E-trike na gustong i-operate sa isla pero minominitor na nila ito ngayon.

Aniya, sa kanilang record nahihirapan umano ang bumuli ng franchise at sa ngayon nga ay hindi pa umano ito napro-proseso.

Sa kasalukuyan, mayroong anim na E-trike o Electronic Tricycle supplier ang isla kung saan ito ang GerWeiss Motors, Tojo Motors, Prozza, KOR E-trike, Modello Global Solutions, BEMAC, at Motor Ace.

COMELEC pinayuhan ang mga politiko sa Malay na huwag bigyan ng rason na muling magluksa ang Boracay

Posted January 23, 2019

Malay, Aklan - Sumentro sa pagbibigay ng paalala at kahalagahan ng serbisyo sa tao ang ginawang “Peace Covenant Signing” ng PNP at COMELEC sa mga tumatakbong kandidato sa Malay para sa nalalapit na 2019 Midterm Election.

Sa isang mensahe, ayon kay COMELEC Aklan Election Supervisor Atty. Elizabeth Doronila, magsilbi sanang leksyon as lahat ang nangyaring pagpasara sa Boracay para pagbutihin ang pamamahala sa Malay.

“Huwag niyo ng bigyan ng rason na muling magluksa ang mga tao sa Boracay”,ito ang pahayag ni Doronila sabay paalala na gamitin ng wasto ang biyayang bigay ng isla.

Alam din dapat ng bawat isa kung ano ang layunin nila sa pagtakbo at nararapat na unahing pagsilbihan ang taumbayan bago ang personal na interes.

Bago nito ay nagkaroon muna ng unity walk bago nagsagawa ng misa si Rev. Fr. Harvey Fojas sa kabuuang 30 kandidato ng Malay.

Samantala, pinayuhan naman ni Malay PNP OIC PSupt. Antonio Dizon ang mga politiko na kumuha ng Certificate of Authority sa COMELEC bago armasan ang mga bodyguard para hindi hulihin ang mga ito dahil sa nagpapatuloy na gun ban.

Ang “Peace Covenant Signing” ay aktibidad bago ang eleksyon na inisyatibo ng PNP katuwang ang COMELEC, PPCRV, Media, at ilang civil society group para maatim ang malinis, payapa, at patas na halalan.

#YesTheBestBoracayNEWS