Panukalang “Boracay Management Authority” nais isulong ng House Committee On Natural Resources

Posted June 4, 2018

Ang pagbuo ng “Boracay Management Authority” ang nakikitang direksyon ng House Committee on Natural Resources kapag natapos na ang ginagawang congressional inquiry patungkol sa Boracay closure.

“Hindi ito pwedeng ipamahala sa mga kapitan o kaya sa local government unit, kailangan may nagma-manage ng Boracay” ito ang paliwanag ni Rep. Arnel Ty kung saan  ihahalintulad umano sa Subic Bay Development Authority ang istilo  pamamahala.

Sa ibabalangkas na panukala, bubuo sila ng mangangasiwa na magmumula sa iba’t-ibang sangay ng gobyerno katuwang ang pribadong sektor.

Hindi pa binabanggit ng kongresista kung ano ang magiging papel ng  Lokal na Pamahalaan ng Malay sa hakbangin na ito dahil dedepende ang lahat sa resulta ng imbestigasyon.

Sa pag-iikot at site inspection ng komite, hindi kumbinsido ang mga ito na kakayin ng dalawang water utility provider ang volume ng wastewater na umaabot sa 19,000 cubic liter dahil sa ngayon ay nasa 11,000 cubic liter lang ang kayang linisin.

Kahit na may inilabas na memorandum ang DENR na kailangang magkaroon ng sariling STP ang mga resort na may 50 rooms pataas, pangamba ng mambabatas, wala itong garantiya na ma-monitor kaya mas mainam na komunekta pa rin sa sewerline.

Sa kabuuan, ang panukala na “Boracay Management Authority” ay long-term na hakbang para mapangalagaan ang Boracay at para hindi na maulit ang mga nangyaring pang-aabuso sa kalikasan.

Road Rehabilitation ng DPWh, nagsisimula na

Posted June 2, 2018

Ni Inna Carol L. Zambrona, YES THE BEST Boracay

Kagaya ng ipinangako, full blast na ngayon ang trabaho ng DPWH sa patuloy na road rehabilitation alinsunod sa anim na buwang rehabilitasyon ng Boracay.

Ayon kay Aklan DPWH OIC Engr. Noel Fuentebella, puspusan na ang ginagawa nilang pagsasa-ayos sa mga kalsadahin na lalagyan ng pipe bago ito latagan ng bagong kalsada na daanan ng mga sasakyan.

Aniya, labing anim hanggang labing walong oras ang igugugol nila upang madaling matapos ang 490million na inilaan sa rehabilitasyon ng kalsada.

Sambit pa ni Fuentebella, nakikipag-ugnayan na sila ngayon sa Transportation Office ng Malay dahil naman sa gagawing re-routing sa Boracay.

Samantala, naglagay narin umano sila ng mga warning signs upang maiwasan ang disgrasya sa kalsada.

Sa ngayon, patuloy ang koordinasyon ng DPWH sa mga AKLECO at PANTELCO para ma-relocate ang mga poste at utility lines para hindi maabala ang kanilang operasyon.

#YesTheBestBoracayNEWS

#BoracayRehabilitation

#DPWH

Kambal, arestado sa pagnanakaw

Posted June 2, 2018

Inna Carol L. Zambrona, YES THE BEST Boracay

(c) Boracay PNP

Himas rehas ngayon sa Boracay Police Community Precinct ang babaeng kambal sa kasong pagnanakaw.

Kinilala ang dalawa na sina Lorene at Loraine Catindig y Masaganda nasa legal na edad, tubong Toledo, Nabas, Aklan at temporaryong nakatira sa Sitio Angol Brgy. ManocManoc.

Sa imbestigasyon ng Boracay PNP, nito umanong araw ng Sabado June 30 ay nagbulontaryo ang dalawang magkapatid sa biktima na si Rea Mae Anecito 27-anyos na tumulong sa gawaing bahay kapalit ng kanilang pagkain.

Subalit kahapon ng umaga July 1 nadiskubrehan ng biktima na nawawala na ang 1, 500 Euro na nasa loob ng bag nito at nakatago sa loob ng drawer ng kanyang kwarto.

Samantala isa namang witness na menor de edad ang nagsumbong at umamin kay Anecito na siya umano ay nakipagsabwatan at binigyan ng kambal na suspek ng P24, 000 na halaga ng pera para hindi na magsumbong.

Nakuha naman sa menor de edad ang biniling cellphone gamit ang nakaw na pera at halagang P 2,680.

Ayon pa sa masusing imbestigasyon ng pulisya matagal na umano itong ginagawa ng magkambal simula pa noong Hunyo 26 hanggang 30.

Nagsagawa naman ng hot pursuit operation ang kapulisan kasama ang biktima at ang menor de edad na witness sa bahay ng suspek sa Unidos, Nabas kung saan na-recover nila dito ang perang pinambili ng dalawang cellphone, at ibat-ibang grocery items.

Pansamantala namang kulong ang kambal na suspek sa lock up cell ng Boracay PNP Sub-station.

#YesTheBestBoracayNEWS

#BoracayPNP

#TheftIncident

Department of Agriculture tumulong na rin sa Boracay Rehabilitation

Posted June 28, 2018

Maliban sa Inter-agency Task Force, nag-ambag din ngayon ang Department of Agriculture ng sarili nilang inisyatibo para makatulong sa mga apektado ng Boracay closure.

Sa pagbisita kahapon ni Secretary Emmanuel Piñol, hinandogan nila ang mga katutubong ati sa isla ng sampung bangka na  sa pangingisda at kagamitan para sa pagtatanim.

Ayon kay Evangielyn Tamboon tagapagsalita ng Ati Community, malaking tulong ang ipinagkaloob ni Sec. Piñol dahil may pagkukunan na sila ng makakain at tulong para sa kanilang pangkabuhayan.

Aniya, maraming oportunidad na ibinigay sa kanila si Sec. Piñol katulad nalang umano na pwede silang magloan ng pera para sa kanilang negosyong binabalak na siya namang imomonitor ng Department of Agriculture.

Nabatid, hindi lang ang Ati Community ang nais  ng DA dahil lahat ng organisasyon sa isla na apektado ng Boracay Closure ay isinasailalim nila sa orientation para mabigyan ng oportunidad na mabigyan ng ayuda magmula sa DA.

#YestheBestBoracayNews

17 opisyal sa Aklan , sinampahan ng kaso sa Ombudsman

Posted June 27, 2018

Inakyat na ng DILG sa Office of the Ombudsman ang kasong administratibo at paglabag sa RA 3019 o Anti-graft and Corrupt Practices Act laban sa labim-pitong public official sa Aklan at Malay.

Kabilang sa mga kinasuhan ay sina Aklan Governor Florencio Mirafores, Malay Mayor Ceciron Cawaling, Malay Vice-Mayor Abram Sualog at ang walong incumbent Sangguniang Bayan Members.

Kinasuhan din sina Licencing Officer Jen Salsona, MENRO Officer Edgardo Sancho, PENRO Officer Valentin Talabero at ang tatlong Punong Barangay ng Boracay na sina Chona Gabay , Lilibeth Sacapano, at Hector Casidsid.

Sa complaint affidavit na isinumete ni DILG Usec. Epimaco Densing, naghain ito ng mga reklamo para sa kasong graft, gross negligence, at grave misconduct.

Nang matanong ang isang mataas na opisyal ng Malay patungkol sa kaso, aantayin daw muna niya ang pormal na reklamo bago magbigay ng reaksyon.

Kung maaalala, nagsagawa muna ng imbestigasyon ang DILG hinggil sa sinapit ng Boracay at pinasiguro noon ni Densing na may mananagot na mga lokal na opisyal dahil sa kapabayaan at pag-abuso sa kapangyarihan.

#YesTheBestBoracayNEWS