Malaysian National, nabiktima ng magnanakaw sa dalampasigan ng Boracay

Posted November 2, 2017

Ni Inna Carol L. Zambrona, YES THE BEST Boracay

Labis ang pagkadismaya ng isang babaeng Malaysian National na dumulog sa Boracay PNP matapos itong pagnakawan habang siya ay naka-upo sa buhangin sa harap ng kanyang tinutuluyang hotel sa Brgy. Balabag, Boracay.

Ayon sa biktimang si Nor Asikin Binti Ghazali, 30-anyos, alas- dyes kagabi habang naka-upo siya sa dalampasigan inilagay niya ang kanyang bag na naglalaman ng Passport, ID, at cash na P 4, 000 sa buhangin.

Subalit makalipas ng ilang minuto napansin ng biktima na nawawala na ang kanyang bag na inilagay niya sa kanyang gilid.

Sa pagsisiyasat ng mga kapulisan isang witness na 15-anyos ang nakakita sa pangyayari at sinabi nito na nakita niya ang isang lalaki na may edad 14-anyos hanggang 15-anyos na kumuha sa bag ng biktima kung saan sinubukan niya itong sundan papuntang E’mall subalit hindi niya naabutan ang nasabing magnanakaw.

Samantala, patuloy ang isinasagawang follow – up operation ng Boracay PNP sa naturang kaso.

Boracay Generally Peaceful ang pagdiriwang ng Undas 2017- Gesulga

Posted November 2, 2017

Ni Teresa A. Iguid, YES THE BEST Boracay

Naging generally peaceful ang selebrasyon ng undas sa Isla ng Boracay ngayong taong 2017 ayon kay Acting Chief PSI Jose Mark Anthony Gesulga.

Pahayag ni  Gesulga, may nakawan umanong nangyari sa beach front kung saan isang turista na kasalukuyang  sa Isla ang naging biktima nito.

Ngunit maliban umano dito ay naging maayos naman at matiwasay ang sitwasyon partikular sa dalawang sementeryo sa Sinagpa at ManocManoc.

Bago nito, nailatag na ang plano sa seguridad katuwang ang Boracay Joint Task Force at mga force multipliers para tumulong sa trapiko at pagbabantay sa paligid ng mga sementeryo.

Samantala magpapatuloy naman ang operasyon ng mga myembro ng kapulisan at iba pang mga law enforcers hanggang bukas, November 3 ng taong kasalukuyan.

Mga residente ini-rereklamo ang masangsang na amoy sa Sitio Lugutan Drainage Outfall

Posted November 2, 2017

Ni Inna Carol L. Zambrona, YES THE BEST Boracay

Labis ang pagkadismaya ng mga residente sa area ng Sitio Lugutan Brgy, ManocManoc dahil sa masangsang na amoy na kanilang nalalanghap na dumadaloy sa outfall sa lugar.

Ayon sa isang residente, gusto niyang ipaalam sa Lokal na Pamahalaan ng Malay na sila ay napeperwesyo na dahil sa hindi magandang amoy na kanilalang nararanasan.

Nais nitong  sa mga kinauukulang ahensya na may koneksyon sa drainage system na kung maari ay bigyan nila ito ng pansin at aksyon ang problemang kanilang kinakaharap.

Nabatid kasi na hindi lang mabahong amoy ang kanilang nalalanghap, kundi may maruming tubig nang lumalabas sa drainage ang nakikita.

Ayon sa isang residente malapit doon, pagtuunan dapat ito ng pansin lalo at kalusugan ng mga naninirahan malapit sa lugar ang maaring ma-apektuhan.

Kaugnay nito, nakikipagtulungan ang ibat-ibang ahensya sa Lokal na Pamahalaan ng Malay para maresolba ang problema sa drainage system ng isla.

Kung maalala, matagal ng suliranin ang drainage sa nabanggit na lugar kung saan dito lumalabas ang maruming tubig dulot ng iresponsableng pagtatapon ng waste water at hindi pag-konekta sa sewer line.

MDRRMO-Malay, ikinasa ang blood letting activity sa Nov. 6

Posted November 2, 2017

Ni Inna Carol L. Zambrona, YES THE BEST Boracay

Ikinasa ng Municipal Disaster Risk Reduction Management Office (MDRRMO) Malay ang kanilang blood letting activity sa darating na Nobyembre 6 taong kasalukuyan.

Hinikayat ng MDRRMO Malay ang mga residente at empleyado ng ibat-ibang establisyemento sa Boracay na maki-isa at maging bahagi sa kanilang gagawing aktibidad.

Nabatid na bago isagawa ang blood letting activity kinakailangan munang suriin ang mga mag-dodonate kung sila ba ay pasado o hindi.

Kaugnay nito pinaalalahanan ang mga magdo-donate na bawal mag donate ng dugo ang mga intake sa puso, nakainom ng alak, walang sapat na tulog, may maintenance na gamot, at may sipon o ubo.

Samantala, katuwang sa nasabing aktibidad ang Philippine Red Cross (PRC) Kalibo Chapter sa pakikipagtulungan din ng iba pang Government Agency sa Boracay.

Ang bloodletting activity ay magsisimula ng alas-nuebe ng umaga hanggang alas-dos ng hapon sa City Mall Boracay.

Layunin ng aktibidad na makalikom ng dugo para sa mga pasyenteng nangagailangan nito.

Boracay hospital, sasailalim sa Disaster Risk Reduction at Earthquake Drill ng MDRRMO

Posted November 2, 2017

Ni Inna Carol L. Zambrona, YES THE BEST Boracay

Isasailalim sa Disaster Risk Reduction DRR at Earthquake drill ang mga nurse at iba pang empleyado ng Ciriaco S. Tirol Memorial Hospital Boracay sa tulong ng Municipal Disaster Risk Reduction and Management Office (MDRRMO) ng Malay.

Layunin ng programang ito na gagawin bukas na isulong ang kahandaan ng publiko laban sa anumang kalamidad na pwedeng mangyari lalo na sa mga pampublikong-gusali.

Ayon sa opisina ng MDRRMO, mahalaga ang awareness campaign na ito sa publiko dahil makapagbibigay ito ng  kaalaman sa kanila kung ano ang mga dapat gawin at matiyak ang kanilang kahandaan kapag tumama ang malakas na lindol.

Hinikayat din ng MDRRMO kung sinuman ang gustong sumali ay pumunta bukas at makiisa sa drill na ito kung saan sasanayin ang mga ito ng “duck, cover, and hold” sa sandaling magsimula na ang earthquake drill.