Boracay, pasok sa “Reader’s Choice Award 2016” ng Condé Nast Traveler

Posted March 15, 2017

Ni Danita Jean A. Pelayo, YES FM Boracay

Namayagpag ang isla ng Boracay bilang Top 1 sa Condé Nast Traveler Reader’s Choice Award 2016.

Sa nakaraang Sabado ang Condé Nast Traveler ay naglabas ng isang video kung saan makikita dito ang labin-limang pinakamamahal na isla ng mga readers.

Batay sa boto at survey, nangingibabaw pa rin ang katagang “It’s More Fun in the Philippines” kung saan nga napasama ang Boracay bilang top 1 sa Reader’s Choice Award 2016, pumapangalawa naman ang Palawan at nasa ikalimang ranko ang Cebu.

Pinuri ang Boracay dahil sa kaaya-aya nitong baybayin at ang ganda at takaw-pansin na sunset maliban pa sa “nightlife” ng isla.

Nabatid na sunod- sunod ang paghirang sa isla ng Boracay bilang isa sa mga magagandang destinasyon ng mga bakasyonista at mga turista.

Magugunitang noong 2015, ang isla ng Boracay ay nasa sa labin- limang pwesto sa Readers' Choice Award.

Ang Condé Nast Traveler ay isang luxury at lifestyle travel magazine na nakabase sa New York City.

PRC Boracay-Malay Chapter tumanggap ng donasyon mula sa Rotary Club of Jindo

Posted March 14, 2017

Ni Alan Palma, YES FM Boracay

Masaya at may galak na tinaggap ng Philippine Red Cross Boracay-Malay Chapter ang unang batch ng mga gamit mula sa Rotary Club of Jindo- Korea.

Sa ginawang turn-over ceremony ng proyektong Global Grant 1640616, dinaluhan ito ng mga Rotarians mula Korea sa pangunguna ni IPP Jung at ilang Past District Governors.

Sa seremonya ng ginawa, pormal na tinaggap ni PRC Boracay-Malay Chapter Chairman Jojo Medina at mga Board of Directors ang mga gamit tulad ng laptops, printers, sterilizer, at mga beds and chairs para sa Local Blood Collecting Unit o Blood Station ng chapter.

Ayon kay Chapter OIC John Patrick Moreno, may darating pa na mga gamit sa susunod na mga araw kung saan inaasahan nila na ito ay makakatulong sa mga nangangailangan ng dugo sa isla lalo na sa panahong ng emerhensya.

Dagdag pa ni Moreno, sakaling operational na ang Blood Station sa Boracay ay pagsuri na lamang ng mga dugo ng mga donors ang prosesong gagawin bago ito gamitin ng mga pasyenteng nangangailangan sa isla at kalapit na lugar.

Anya, sa ganitong development ay may kapasidad na ang Boracay na magkolekta at mag-ipon ng dugo na hindi na aasa o tatakbo pa sa ibang Blood Bank o Blood Station sa kalapit na lugar tulad ng Roxas at Iloilo City.

Sa kasalukuyan ay inaayos nang Philippine Red Cross ang silid para paglalagakan ng gamit ng Boracay Blood Collecting Unit o Blood Station.

Lumot sa Boracay, pangkaraniwan sa mga Boracaynon

Posted March 14, 2017

Ni Inna Carol L. Zambrona, YES FM Boracay

Naging maiinit na usapin sa social media ang tungkol sa lumot sa Boracay pagkatapos itong ibalita sa National TV.

Nitong nakaraang Sabado sa programang Boracay Good News,isinalaysay ng mga matagal ng naninirahan sa isla na ang lumot ay normal tuwing papasok ang panahon ng tag-init.

Ayon kay Vicky Aguirre-Salem, simula noong bata pa ito, ang lumot umano ay isa sa mga pangkaraniwang tanawin sa isla kung saan ay pinaglalaruan pa nila ito noon.

Pagdepensa ni Salem, hindi ito dulot ng anumang dumi dahil hindi pa ganoon ka develop ang Boracay kumpara sa panahon ngayon.

Kahalintulad din ang naging obserbasyon ni BFI President Dionisio Salme na matagal ng naninirahan at nag-nenegosyo sa isla.

Sa mga nangyari at epekto ng balita sa TV, isa lang ang nakikita na mali ni Salme at iyo ay ang hindi nabigyan ng magandang paglatag ng balita dahil hindi umano kumuha sa kanila ng panig ng impormasyon ang reporter.

Samantala, paalala naman ni Salem sa mga residente dito na magtulungan para sa isla ng Boracay at kung meron man umanong concern sa isla ay dapat may isang representante ang LGU na magsasalita at magpapaliwanag ukol dito.

Inirekomenda pa nito na dapat magbigay ng mga flyers at maglagay ng signage na may impormasyon tungkol sa isla ito’y para maging aware ang mga bumibisitang turista.

Dagdag pa ni Salme at Salem, dapat umanong magkaroon ng Environmental Forum para mapag-usapan hindi lang ang isyu patungkol sa lumot kundi pati na sa ibang problemang kinakaharap ng isla.

MS Europa, nasilayan sa isla sa ikaapat na pagkakataon

Posted March 13, 2017

Ni Danita Jean A. Pelayo, YES FM Boracay

Nasilayan na ang barkong MS Europa ngayong araw sa isla ng Boracay.

Ito’y matapos na dumaong ang cruise ship kaninang alas-onse y medya ng tanghali lulan nito ang apatnadaang katao kasama ang tatlongdaang mga crew na magtatagal hanggang mamayang alas-syete ng gabi.

Nabatid na dumaan muna ang barko sa Tagbilaran bago tumungo ng Boracay at maglalakbay patungong Malcapuya Island sa Coron Palawan.

Kaugnay nito, darating din bukas ang MS Celebrity Constellation na isang maiden call na una nang naudlot ang pagdaong dahil sa malakas na alon.

Samantala, ito na ang ikaapat na pagkakataon ng nasabing barko at aasahan pa ang pagdating ng iba pang mga luxury cruise ship para sa taong ito.

Mga Artista, bakasyon grande na sa isla ng Boracay

Posted March 13, 2017

Ni Inna Carol L. Zambrona, YES FM Boracay

Gaya ng karamihan, timeout din muna sa trabaho ang maraming celebrities.

Wala pa ang summer vacation pero buhos na ang ibang mga artista na piniling magbakasyon  sa isla ng Boracay kasama ang kanilang mga mahal sa buhay at kaibigan.

Sinasamantala ngayon ng mga local celebrities ang kanilang vacation dito sa isla katulad na lamang ng bagong engaged na si Maxene Magalona na ini-rampa ang kanyang sexy body kasama ang kanyang magiging asawa.

Kabilang rin na nagbabakasyon dito ay sina Daiana Menezes, Bettina Carlos, Ina Raymundo kasama ang kanyang asawa at mga anak at marami pang iba.

Nabatid na ang kilalang tourist distenation na isla ng Boracay ang dinadayo ng maraming celebreties tuwing summer.