DOT 6 Regional Director Catalbas, nanguna sa pag-welcome sa MS Millennium sa Boracay

Posted January 28, 2016

Ni Jay-ar M. Arante, YES FM Boracay

Pinangunahan mismo ni Department of Tourism Regional Director Helen Catalbas ang pag-welcome sa pagdating ng MS Celebrity Millennium sa Boracay kahapon ng umaga.

Ito’y matapos isang maiden call ang isinagawa ng Aklan Government, DOT at LGU Malay sa pagitan ng Celebrity Cruises na kumpanyang may hawak ng naturang cruise ship.

Sakay ng barko ang turista mula sa mahigit tatlumpung bansa sa Europa kung saan tinatayang umabot ito sa dalawang libong pasahero.

Karamihan naman sa mga staff at crew nito ay mga Pinoy kung saan nagkaroon naman ng tiyansa ang kanilang mga mahal sa buhay na umakyat ng barko para makita ang kanilang kaaanak na nagtratrabaho sa napakaling cruise ship.

Pinasalamatan din ni Catalbas ang pagbisita ng naturang barko sa isla na nagdala ng maraming pasahero upang maranasan ang kagandahan ng isla ng Boracay.

Sa kabilang banda dadaong din ngayong alas-10 ng umaga ang MS Nautica sa Boracay sakay ang tinatayang anim na raang pasahero kung saan isang plaque exchange din ang magaganap sa loob ng naturang barko.

Bangka nagtamo ng kasiraan matapos hampasin ng malakas na alon

Posted January 27, 2016

Ni Jay-ar M. Arante, YES FM Boracay

Nagtamo ng butas ang isang bangkang de-pampasahero sa Caticlan Jetty Port matapos itong hampasin ng malakas na alon alas-7 kagabi.

Ayon kay Petty Officer Pablito Dela Cruz ng Philippine Coastguard Caticlan, nakadikit umano ang bangka sa reclamation ng bigla itong hampasin ng malakas na alon at hangin kung saan nabunggo ito sa bato.

Nabatid na wala naman umanong sakay na pasahero at crew ang naturang bangka kung saan nakadaong na rin umano ito.

Samantala, nasa ayos na rin ngayon ang bangka matapos itong hilain ng iba pang mga bangka papunta sa ligtas na lugar upang hindi mapasukan ng tubig ang nabutas na bahagi nito.

Paraw tumaob dahil sa sobrang lakas ng hangin at alon sa Boracay

Posted January 27, 2016

Ni Jay-ar M. Arante, YES FM Boracay

Masuwerting nakaligtas ang tatlong crew ng isang Paraw sa Boracay matapos itong tumaob dahil sa sobrang lakas ng alon at hangin kaninang alas 9:30 ng umaga.

Ayon kay PO1st Condrito Alvarez galing sa karagatang sakop ng Brgy. Argao sa Malay ang naturang Paraw at papunta sanang Station 3 Boracay para sana sa isang aktibidad.

Ngunit dahil umano sa lakas ng hangin ay hindi ito nakayanang mainubrahin ng tatlong crew na siyang naging dahilan para agad itong lumubog.

Nasagip naman umano agad ang mga ito ng Maritime Police na malapit lamang sa lugar dahil sa ginagawang seguridad sa dumaong na cruise ship sa Boracay.

Ang tatlong biktima na sakay ng Paraw ay nasa maaayos namang kalagayan habang ang naturang sasakyan ay dinala naman sa ligtas na lugar sa area ng Bangkiruhan sa Manoc-Manoc.

Samantala, sinabi naman ni Alvarez na kung sobra talagang masama ang lagay ng panahon sa  karagatan ay inaabisuhan nila ang mga water sports association na itigil muna pansamantala ang aktibidad lalo na ang maliliit na bangka.

Private helicopters sa Boracay pinagbawalan ng mag-operate

Posted January 27, 2016

Ni Jay-ar M. Arante, YES FM Boracay

Wala na ngayong kapangyarihan ang dalawang private helicopters na lumipad sa isla ng Boracay matapos pagbawalang mag-operate.

Ito’y makaraang magkaroon ng resolusyon ang Sangguniang Bayan ng Malay na nirerekomenda sa opisina ng alkalde na ihinto o ipatigil ang operasyon ng Asean Aerospace at Lion Air sa isla ng Boracay.

Sa pangunguna ni SB Member Rowen Aguirre bilang Chairman ng Committee on Laws ay napag-desisyonan nitong i-draft ang naturang resolusyon kung saan bawal ng mag-operate ang dalawang helicopter matapos ang ilang pag-aaral.

Samantala, ang pagpapatigil na mag-operate sa dalawang kumpanya sa isla ay sinang-ayunan naman ng konseho sa ginanap na 4^th Regular SB Session kahapon.

Maalalang umani ng ibat-ibang reaksyon mula sa mga residente at stakeholders sa Boracay ang operasyon ng dalawang helicopter sa isla dahil sa nililikha nitong ingay kung saan sinasabing mababa umano ang lipad nito at paikot-ikot sa loob lamang ng Boracay.

Ang private helicopters ay inuupahan ng mga turista patungo sa ibang lugar kagaya ng Palawan at Manila gayon din bilang pang-emergency transport.

Tindahan ng Cellphone sa Boracay pinasok ng mga hold-upper

Posted January 27, 2016

Ni Inna Carol L. Zambrona, YES FM Boracay

Kulong na ngayon ang dalawang suspek na nanghold-up sa isang tindahan ng cellphone sa station 1 Boracay kagabi matapos na mahuli sa isinagawang manhunt operation ng mga pulis.

Sumbong ng biktimang si Almar Tupas 35-anyos sa Boracay PNP, bigla na lamang umano silang pinasok ng dalawang lalaki na armado ng baril at sabay tutok at diklara ng hold-up sa kanya at sa mga kasamang staff.

Dito, kinuha umano ng mga suspek ang pera sa kahera at binasag ang crystal cell phone stand at pinagkukuha ang mga ibinibintang cellphone sabay takas papuntang Bolabog area.

Mabilis namang nagsagawa ng manhunt operation ang mga pulis matapos matanggap ang report kung saan agad namang nahuli ang dalawang suspek na sina Ruel Zonio 40-anyos residente ng Purok-1 C Lazerna St. Kalibo, Aklan at Randy Ventura 22-anyos ng Brgy. Guanco, Balete, Aklan.

Nakuha naman sa dalawa ang limang unit ng cellphone isang charger at isang headset at perang nagkakahalaga ng P16, 000 at mga baril na kinabibilangan ng isang caliber 380 na may chamber loaded, dalawang magazine na may tatlong ammunitions at isang 10 inches na kutsilyo.

Ang dalawa ay nakakulong na ngayon sa Boracay PNP habang inaantay kung magsasampa ng kaukulang kaso ang may-ari ng tindahan na kanilang nilooban.