Mga mag-aaral ng bayan ng Malay sumailalim sa simultaneous Earthquake Drill

Posted July 22, 2015

Ni Jay-ar M. Arante, YES FM Boracay

Sumailalim sa simultaneous Earthquake Drill ang mga mag-aaral sa ibat-ibang paaralan sa bayan ng Malay kaninang umaga.

Ito ay inorganisa ng Municipal Disaster Risk Reduction and Management Office (MDRRMO) Malay para sa obserbasyon ng National Disaster Consciousness Month ngayong buwan ng Hulyo.

Ayon kay Catherine Ong ng MDDRMO, nagsimula ang nasabing drill bandang alas-9 ng umaga na pinanguhan ng kanilang evaluators.

Maliban sa mga estudyante sumali rin umano rito ang ilang National Government Agencies sa bayan ng Malay na kinabibilangan ng Philippine Coastguard (PCG) at Bureau of Fire Protection Unit sa isla ng Boracay.

 Layunin naman ng nasabing drill ay para mabatid ang antas ng kahandaan at kakayahan ng mga rescue teams kapag nagkaroon ng aktuwal na kalamidad.

Pansamantalang paglilipatan ng Boracay hospital tila malabo na

Posted July 22, 2015

Ni Jay-ar M. Arante, YES FM Boracay

Tila malabo na umanong mailipat pansamantala ang operasyon ng Don Ciriaco S. Tirol Memorial Hospital o Boracay Hospital.

Ito ang sinabi ni Aklan Provincial Health Officer II Dr. Victor Sta. Maria sa reaksyon ng mga residente sa Boracay na sana ay ilipat muna ito temporaryo habang hindi pa natatapos ang construction at expansion project ng naturang pagamutan.

Dagdag pa ni Sta. Maria napagkasunduan umano nila na ilipat muna pansamantala ang mga health personnel ng Boracay hospital sa Malay District Hospital sa mainland.

Sinabi pa nito na may tatlong phase project ang hospital kung saan ang phase 1 ay may pondo na mula sa Department of Health Region 6 na kung saan sila ang nagpapagawa habang ang phase 2 at phase 3 ay may pondo naman sa ilalim ng Department of Public Works and Hi-Ways (DPWH) na nakatakdang simulan ngayong buwan ng Agosto.

Samantala, matatandaang ipinag-utos ni Governor Joeben Miraflores noong nakaraang linggo na pansamantalang itigil ang operasyon ng naturang hospital upang mabigyang daan ang construction ng DPWH.

18 wind mill ng Petro Wind Energy sa Nabas at Malay halos kumpleto na

Posted July 22, 2015

Ni Jay-ar M. Arante, YES FM Boracay

Photo credit: Lowelly Yabut Rogan

Halos kumpleto na umano ang 18 wind mill project ng PetroWind Energy na itinayo sa brgy. Pawa, Nabas, Aklan at sa porsyon ng brgy. Napaan sa bayan ng Malay.

Ito ang sinabi ni Administrative Officer Benedict Vega ng PetroWind Energy Incorporated sa pagdalo nito sa 25^th Regular SB Session ng Malay nitong Martes.

Ayon kay Vega handa ng makapagsuplay ng kuryente o makapag-generate ng malinis na power ng kuryente ang 18 wind mill sa lalawigan ng Aklan lalo na sa isla ng Boracay at sa mga kalapit na lalawigan.

Layunin umano ng wind mill project na ito ay ang pag-generate ng environmental friendly clean energy.

Dagdag pa ni Vega na patuloy ngayon ang kanilang ginagawang coco fiber at Erosion Mat Installation sa area ng wind mill para hindi mabuwal ang kanilang mga hinukay na lupa kasabay ang pagtatanim ng ibat-ibang klase ng puno sa lugar.

Samantala, sakaling maging polido na ang proyekto ng PetroWind sa Nabas at Malay ay posibleng bubuksan ito sa publiko bilang isang tourist attraction.

Malay PNP patuloy ang ginagawang munhunt operation sa suspek na tumangay ng P1.3 M halaga ng pera at alahas sa Caticlan

Posted July 21, 2015

Ni Jay-ar M. Arante, YES FM Boracay

Patuloy ngayon ang ginagawang manhunt operation ng Malay PNP sa suspek na tumangay ng sinasabing P1.3 M halaga ng pera at alahas sa Brgy. Caticlan ng nasabing bayan.

Bagamat tumangging pangalan ng embestigador ng Malay PNP ang suspek mayroon naman umano silang nakalap na impormasyo na nagtatago lang ito ngayon sa mismong bayan na kanila na ring minomonitor.

Biktima umano rito ang mag-asawa at may-ari ng bahay na sina Ernesto at Edina Sitjar na sinasabing mga negosyante.

Sa embestigasyon ng Malay PNP, madaling araw pa ng umalis ng bahay ang mag-asawa para sa isang business transaction kung saan naiwan rito ang kanilang anak na natutulog.

Sinasabing minamanman ang mag-asawag umalis kung kayat dito nakakuha ng pagkakataon ang suspek na pasukin ang naturang bahay at magnakaw.

Nabatid pa na ang naiwang anak ng mga ito ay iginapos at saka ikinulong sa banyo ng suspek kung saan malaya nitong natangay ang mga sinasabing alahas at pera ng mga biktima sa kwarto.

Ilang Paraw sailing sa Boracay lumalabag umano sa One Entry One Exit Policy

Posted July 21, 2015

Ni Jay-ar M. Arante, YES FM Boracay

Ikinadismaya ngayon ni Jetty Port Administrator Niven Maquirang ang operasyon ng ilang Paraw sailing boat sa isla ng Boracay.

Ito ay dahil sa nakita nito mismo ang mga Paraw na lumalabag sa violation ng One Entry-One Exit Policy sa Boracay na siyang mahigpit na ipinapatupad ng probinsya ng Aklan.

Ayon kay Maquirang ipinagbabawal nila ang mga Paraw pati na ang mga bangka sa beach area na walang 200 metro ang layo mula sa dalampasigan para maiwasan ang reklamo ng mga guest sa front beach na hindi nakakaligo sa dagat dahil sa mga nakadaong na bangka.

Aniya, dapat nasa back beach ngayon ang mga ito dahil sa inililipat sila sa tuwing panahon ng Habagat kasama na ang lahat ng mga island activities sa isla.

Mahaharap umano ang mga ito sa penalidad sakaling mahuli sila ng Philippine Coastguard, MARICOM o Boracay PNP.

Panawagan naman nito sa mga nag-ooperate ng Paraw sa Boracay na sumunod nalang sa umiiral na ordinansa upang maiwasan ang maharap sa ibat-ibang violation.