West Cove, dismayado sa pagkakansela ng FLAgT

Posted April 17, 2015

Ni Gloria Villas, YES FM Boracay

Ikinadismaya ng pamunuan ng Boracay Island West Cove ang pagkakansela ng kanilang 25-year Forest Land Use Agreement for Tourism Purposes (FLAgT).

Ayon kay WESTCOVE General Manager Benhur Mobo III, nitong Setyembre ng nakaraang taon inilabas ng Department of Environment and Natural Resources (DENR) ang kautusan na nagkakansela ng FLAgT ng West Cove.

Anya, dismayado sila sa desisyong ito ng nasabing ahensya dahil sa umano’y iba’t ibang environmental violations, gayong masikap naman umano sila sa pagbibigay ng mga kaukulang dokumento para sa pagpapatakbo ng nasabing negosyo.

Paniwala umano nila, pini-personal at sini-single out lamang sila ng pamahalaan.

Gayunman, naghain na rin umano ang may-ari ng Boracay West Cove na si Crisostomo Aquino ng motion for reconsideration sa Court of Appeals (CA).

Samantala, ang FLAgT ay nagbibigay ng awtoridad sa isang trabaho, pamamahala at pagpapaunlad ng lugar para sa turismo sa loob ng 25 taon at maaari ring e-renew sa parehong taon.

Kadalasan, nalalapat ito sa mga espesyal na gumagamit ng forestland tulad ng mga bathing, camp sites, ecotourism destinations, at iba pang mga layuning pan- turismo.

Itinatayong 7 storey Building na The Lind Boracay, inimbistigahan na ng BRTF

Posted April 17, 2015

Ni Bert Dalida YES FM Boracay

Kinumpirma ngayon ng BRTF o Boracay Redevelopment Office na inimbistigahan na nila ang itinatayong 7 storey building sa isla ng Boracay.

Bagama’t tumanggi na munang magbigay ng recorded interview tungkol dito si BRTF Technical head Engr. Azur Gelito.

Sinabi nito na lumagpas sa area requirement ng Municipal Ordinance No. 328 series of 2013 ang taas ng nasabing resort.

Nabatid kasi base pa sa ordinansa na hanggang apat na palapag o 4 storey building sa area ng 1,000 sq m pataas ang pinahihintulutang itayo sa isla.

Kaugnay nito, nagpapatuloy parin umano nilang pinag-aaralan ang mga dokumentong hawak ng nasabing resort para sa kaukulang disposisyon.

Samantala, sinubukan naman naming kunan uli ng pahayag tungkol dito si SB Member Rowen Aguirre, subali’t wala pa kaming tugon na natatanggap mula sa kanya.

Bagong Uniforme ng MAP Boracay, binago para sa APEC Summit ngayong Mayo

Posted April 17, 2015

Ni Jay-ar M. Arante, YES FM Boracay

Dinagdagan ngayon ng Lokal na Pamahalaan ng Malay ang Uniforme ng Municipal Auxiliary Police (MAP) Boracay.

Ayon sa Malay Transportation Office, ang pagpapalit umano ng uniforme ng MAP members ay bahagi ng kanilang ikinakasang paghahanda sa nalalapit na APEC sa Boracay ngayong buwan ng Mayo.

Maliban umano sa MAP ilan pang departamento ng LGU Malay ang may mga bagong uniforme upang ipakita ang pagsuporta at kahandaan sa naturang meeting.

Kaugnay nito nakatakda namang palitan ang uniforme ng mga pulis sa Boracay Tourist Assistance Center (BTAC) bago ang APEC.

Nabatid na puspusan na ngayon ang ginagawang paghahanda ng LGU Malay para dito lalo na sa pagpapaigting ng seguridad kung kayat nais ng mga ito na maging presentable sa mga delagado ang mga otoridad sa Boracay.

(Update) Bangkay ng babaeng natagpuan kahapon sa station 3 Boracay, nakilala na

Posted April 17, 2015

Ni Bert Dalida, YES FM Boracay

Nakilala na ang bangkay ng babaeng natagpuan kahapon sa station 3 Boracay.

Sa pinakahuling imbestigasyon ng Boracay PNP, nakilala ang bangkay na si Katrina Valera, 43 anyos ng Solano, Nueva Viscaya, at guest ng Sheridan Villas sa Station 3 Barangay Manoc-manoc.

Kasalukuyan namang ino-autopsy ang kanyang bangkay upang malaman ang sanhi ng kanyang pagkamatay.

Magugunitang nakataob habang nakalutang sa dagat nang matagpuan ang katawan ni Katrina nitong nakaraang araw ng Miyerkules ng umaga.

Naka-damit siya ng pang-swimming at short nang makita may 15 metro ang layo mula sa dalampasigan.

Seguridad sa pagdating ng mga Hong Kong Consular bukas, nakaplotting na

Posted April 17, 2015

Ni Jay-ar M. Arante, YES FM Boracay

Darating na bukas araw ng Biyernes ang mga Hong Kong Consular sa isla ng Boracay.

Kaugnay nito tiniyak ni Boracay Tourist Assistance Center OIC PSINS. Frensy Andrade na naka-plotting na ang seguridad para sa mga nasabing opisyal

Ayon kay Andrade, 7 mga Hong Kong Consular ang darating sa Biyernes para sa tatlong araw na pag-inspeksyon kaugnay sa gaganaping APEC Ministerial Meeting sa susunod na buwan.

Samantala, kinumpirma naman ng Department of Tourism (DOT) Sub-Office Boracay na magiging katuwang sila sa gagawing inspeksyon.

Sa ngayon kaliwat-kanan na rin ang ginagawang pagpupulong ng ibat-ibang departamento ng gobyerno sa Aklan katuwang ang mga private agencies sa isla upang masiguro ang kahandaan ng Boracay na mag-host ng pinakamalaking meeting sa buong Asya.