Planong paglalagay ng SWAT para sa Boracay, naging paulit-ulit lang pero walang nangyari

Paulit-ulit ng pinag-uusapan ang balak at pangarap na pagkakaroon sana ng Special Weapons and Tactics Team o SWAT sa Boracay pero wala paring nangyayari.

Kaya nagsuhestiyon na si Vice Mayor Ceceron Cawaling sa mga miyembro ng Sangguniang Bayan ng Malay na kung maaari ay idiretso na sa National Head Quarters ng Pambansang Pulisya ang pagtugon usaping ito.

Ang pahayag na ito ni Cawaling ay kasunod ng balak ng SB na ipatawag ang hepe ng Boracay Tourist Assistance Center (BTAC).

Para tanungin sana kung may kakayahan ba ang pulis sa isla na protektahan ang mga turista at komunidad laban sa krimen gaya ng pag-aamok o pangho-hostage.

Sapagkat kung babalikan umano ang mga pangyayari, ilang ulit na ring binalak na bumuo ng SWAT na para sa Boracay, pero walang nangyayari dahil mahal ang mga gamit.

Ganoon pa man, umaaasa ang SB na kapag sineryoso umano siguro ang balak na pagkakaroon ng SWAT sa Boracay ay tutulong naman ang mga stakeholder.

Ayon sa mga konsehal, marami na kasi ang pangyayari sa bansa at maging sa ibang lugar ang naitala na walang habas na pinagpapatay lang ang mga inosenteng tao ng mga indibidwal na may problema sa pag-iisip o stress.

Gaya ng pangyayari kamakailan lamang sa Kawit, Cavite at ganon din ang nangyaring Hostage Crisis sa Quirino Grand Stand noong taong 2010.

Bunsod nito, inatasan ng Sanggunian si SB Member Jupiter Gallenero, Committee Chairman ng Public Safety, na pag-aralan ang mga bagay-bagay hinggil dito. #ecm012013

Mga may-ari ng gasoline station sa Boracay ipapatawag ng LGU Malay

Sa file photo na ito naobserbahan ang
pagdagsa ng mga "oil nuggets" sa dalampasigan
ng Boracay White Beach.

Nakaramdam ngayon ng pagkabahala ang Sangguniang Bayan ng Malay sa oil spill na pwedeng maidulot ng mga truck na nag-dadala ng petrolyo sa Boracay.

Dahil dito, plano ng mga konseho na ipatawag sa paraan ng Committee Hearing ang mga may-ari at operator ng mga gasoline station sa Boracay.

Ito ay upang mapag-usapan kung ano ang mabuting gawin para maiwasan ang oil spill, lalo na sa transportasyon ng petroleum products na pinapasok sa isla.

Ito ay kasunod ng inihayag ni SB Member Jupiter Gallenero na noong ika-26 ng Oktubre habang halos abala ang lahat sa pagdating ng Caribbean Cruise ship  kina-umagahan, isang aksidente ang nangyari ng araw na iyon sa mismong pantalan ng bangka at barge ng cargoes area.

Sapagkat ayon sa konsehal, aksidenteng nahulog ang tanker truck na may kargang petrolyo dahil sa nagkaroon ng aberya sa rampahan ng barge.

Mabuti nalang umano at walang tumagas na krudo o gasolina sa pangyayaring iyon.

Dahil dito naalarma ang mga konsehal.

Kaya ipapatawag nila ang operator at may-ari ng mga gasoline station para mailatag at mapag-usapan ang mga dapat at magkaroon ng sapat na paghahanda sa katulad na pangyayari na pwedeng ikasira ng Boracay, partikular na sa white beach ng isla.

Legislative Body ng Malay, hindi na nagustuhan ang sitwasyon ng front beach ngayon

Tila naiinis na ang legislative body ng lokal na pamahalaan ng Malay sa sitwasyon ng front beach sa ngayon.

Sapagkat sa dami umano ng batas na naipasa nila sa Sangguniang Bayan para i-regualate ang mga sagabal sa mga turista doon.

Mistulang wala naman halos nangyayari dahil sa hindi naman naipapatupad ng maaayos.

Unang pinuna ng mga konsehal ang hindi parin pagtanggal sa mga tent sa vegetation area, na araw at gabi ay naririyan.

Kung saan ayon kay Vice Mayor Ceceron Cawaling, hinahayaan din ng mga resort owner na siraiin ang view nila.

Dahil may mga naglatag ng kung anong paninda, pwesto na may mga mesa at bangko sa dampa nila ngunit pinapayagan pa kahit pangit di umano sa mata ng mga turista.

Dagdag pa ng Bise Alkalde, dapat ay mga puno ng niyog lamang ang makikita sa beach line lalo na kung araw, upang walang sagabal.

Naniniwala naman si SB Member Rowen Agguire na kapag walang nagto-tolerate at seryusong ipinapatupad ang ordinansa na ipagbawal ang mga illegal sa front beach, ay tatalima ang lahat ng establishsmento sa kung ano ang laman ng ordinansa.

Maging si SB Member Jupiter Gallenero at Jonathan Cabrera ay nagkainitan na kung sino ang dapat maging responsible sa implementasyon, gayong paulit-ulit nalang umanong tinalakay ito sa sesyon pero walang nangyayari.

Bunsod nito, pumagitna at pinawi ni SB Member Essel Flores ang mainit na argumento at bulontaryong nag-alok ng tulong na siya na lamang ang kakausap kay Mayor John Yap.

Ito ay para matutukan na ang problema at sitwasyon sa mga illegal na straktura, at kung ano pang sagabal sa front beach.

Ipinunto kasi ng mga konsehal nitong umaga sa sisyon, na kung bakit ganito na lamang, gayong madalas nilang ipinapaabot ang problemang ito noon pa, pero wala paring aksiyon at paulit-ulit lang.

Sa panig kasi ng legislative body, lahat ng pwede nilang gawing batas upang maging maaayos at kanais-nais ang lugar na ito sa mga turista ay nagawa na umano nila, pero kulang parin sa implementasyon.

Front Beach, may dalawang pampublikong palikuran na

Kung dati ay sa mga establishemento lamang na malalapit nakikisuyo ang mga tuirsta kung saan aatakihin ng tawag ng kalikasan ang mga ito para makigamit ng palikuran, hindi na ito mangyayari ngayon, dahil may dalawang pampublikong palikuran na umano sa front beach ayon kay Island Administrator Glenn Sacapaño.

Partikular nitong tinukoy na may pampublikong palikuran na’ng pwedeng magamit sa Station 2 at Station 3.

Pero inihayag nitong dahil sa ilang problema sa station 1 ay hindi natuloy ang balak na magkaroon din sa nasabing area.

Kung maaalala, ilang konsehal na rin ng Sangguniang Bayan ng Malay na na-dismaya sa sitwasyon ito ay nagpa-abot ng kanilang hinaing ukol sa usapin may ilang buwan na ang nakakalipas, kung bakit wala man lang public comfort room sa Boracay para sa mga turista.

Samantala, nilinaw naman ngayon ni Sacapaño sadyang inilagay lang talaga ang portalet sa Material Recovery Facilities (MRF) Balabag, dahil wala namang paglalagyan sa pampulikong lugar sa Boracay.

Ito ay dahil dapat ay may koneksiyon aniya ito para sa tamang disposal ng dumi mula sa mga gumagamit.

Aniya, hindi dahil sa tambakan ng basura o MRF nakalagay ang portalet na donasyon para sa isla dalawang taon na ang nakakalipas ay pinabayaan na ito.

Ang ginagawa umano nila ay pinapahiram na lang nila ito minsan kung sino man ang nanghihiram dahil sa movable naman ito, para mapakinabangan din. | ecm092012

Pangulong Benigno Aquino III, may kahilingan sa talumpati nito para sa Boracay

(Ni Edzel Mainit, YES FM Boracay Senior Field Reporter)

Matuwid na daan, kahalagahan ng matibay na inprastraktura at proyekto,trabaho at ugnayan ng pribadong sector at gobyerno.

Ito ang naging sentro ng talumpati ni Pangulong Noynoy Aquino III nang pasinayaan nito ang bagong Caticlan/ Boracay Airport nitong araw ng Sabado.

Subalit ang labis na nakatawag pansin sa kanyang talumpati ay ang pagsinggit nito ng kanyang disposisyon tungkol sa Casino.

Tahasan nitong sinabi maging sa harap ng mga dumalong negosyante doon ang mga katagang “huwag na ninyong lagyan ng Casino dito”.

Ang nasabing pahayag ay ikinagulat at ikinamangha ng mga naroon.

Matatandaang, ang talumpati nito ang isa sa inaabangan ng tao doon,kung ano ang magiging plano nito para sa Malay at Boracay kasabay ng pagpalit ng Adminitrasyon mula kay dating PGMA. 

SB Malay, may “secret weapon” sa negosasyon

(Ni Edzel Mainit, YES FM Boracay Field Reporter)

May planong makipag negosasyon ang Sangguniang Bayan ng Malay sa pamilya ng Tirol ukol sa pitisyon na ipinabot ng mahigit dalawang daang katao Sitio Pinaungon Brgy. Balabag  na siyang lumagda sa pangunguna ni Jesus Tapuz, na humihingi ng daan/kalsada para sa mga taong nasa likod ng pag-aari ng Tirol.

Batay sa sulat na ipina-abot ng nagpetisyon sa Konseho, umaapela sila bilang mamayan na nagpapatulong sa pangambang sa oras na magkaroon ng mag-aakupa sa property ng Tirol ay wala na silang madaanan pa.

Maliban sa konseho, hiniling din ng grupo na nagpitisyon kay  Punong Brgy Lilibeth Sacapaño, Mayor John Yap at Gov. Carlito Marquez ang katulad na tulong.

Samantala, kahit mistulang nahihirapan ang konseho sa ganitong uri ng usapin ay may panibago paraan sila ngayong naiisip na siyang gagamitin nila sa negosasyon upang ma-aksyunan ang naturang daing.

Pero sa ngayon ay hindi pa nila ito masasabi sa publiko kung ano sapagkat mahirap aniya kapag umasa ang mga ito.

Asosasyon at Kooperatiba, tatangalan na ng ngipin na mag-endorso

(Ni Edzel Mainit, YES FM Boracay Field Reporter)

Mainit na pinagdedebatehan ngayon sa Konseho ang hinggil sa pagtanggal sa ordinansang kakailanagin pa ang pag-endorso ng Kooperatiba at asosasyong para payagang makapasok ang panibagong nag-aaplay ng negosyo sa hurisdiksyon ng Malay.

Ito ay makaraang hilingin ni SB Dante Pagsugiron ang pagbasura sa ordinansang ito dahil sa nakikita nitong tila minsan ay naaabuso ang mga asosayon at kooperatiba sa naturang ordinansa.

Maliban dito, may pagkakataon din umanong hindi naman sinusunod ng mga ito ang nakasaad na kung saan bilang proteksyon sana sa mga maliliit na koopeartiba at asosasyon ang ordinansa gayon din upang hindi na dumami pa ang mga miyembro at hindi maapektuhan ang kanilang kabuhayan.

Pero tila dismayado naman ang ilang opisyal ng bayan partikular ang Punong Ehekutibo dahil sapag-aabuso na nangyayari at minsan ay naiipit pa ang LGU Malay kapag hindi nila bibigayan ng Permit ang nag-aaplay dahil iniipit din ng kooperatiba at asosasyon sa paraan ng hindi pagbigay ng pag-endorso na makapag-negosyo dito lalo na sa Boracay.

Maliban dito nakarating din sa konseho na minsan ay may mga kalakalang nagyayari sa loob ng asosasyon at kooperatiba na humahantong naman sa pagreklamo ng ilang miyembro.

Sulabit sa kabilang banda, hindi naman sang-ayon dito si SB Jupiter Gallenero na tanggaling ang ordinansa dahil wala na unamong control ang pag-pasok ng mga nangangalakal dito kung lubusan na itong maibasura.

Samanatala, sa kasalukuyan ay tila hindi parin makapag disisyon ang konseho dahil kailangan pa umanong timbaggin nila ang lahat.

Pagkakaroon ng sariling sound system ng Malay, tila imposible --- Konseho

(Ni Edzel Mainit, YES FM Boracay Field Reporter)

“Wala ngang ambulansya at fire truck, sound system pa?”

Ito ang naging tugon  ni SB Member Esel Flores sa ipinaabot na concern ni SB Jupiter Gallenero na bakit hindi nalang bumili ng sarling Sound System ang munisipyo ng Malay upang may magamit sa mga okasyon katulad ng Fiesta at Binayle sa mga Brgy ng Malay.

Gayong napansin nito na madalas itong pinoproblema kung saan maghahanap at pang bayad dito na magastos naman sa bahagi ng ilang opisyal ng Brgy kapag may aktibidad ang mga ito.

Subalit, tila natawa naman ang ilang miyembro ng konseho sa proposisyon ni Gallenero, sa rasong marami aniyang kailangan at magasatos ang pagmentina kung magkaroon ng Sound System na kumpleto sa gamit.

Sapagkat, kakailanganin aniyang kumuha ng tao para sa operasyon nito, sasakyan at ilang makabagong teknuluhiya para mapagana, kasama ang generator.

Kung iisipin, ang lokal na pamahalaan nga ay hindi maka bili ng ambulansya at fire truck, sound system pa kaya.