Mga pantalan sa Boracay, nakahanda na para sa papalapit na bagong taon

Posted December 28, 2016

Ni Inna Carol L. Zambrona, YES FM Boracay

Pahabaan na naman ng pila ngayong papalapit na bagong taon sa Caticlan Jetty Port at Cagban Port.

Kaya naman may nakalatag ng preparasyon ang Municipal Disaster Risk Reduction and Management Office (MDRRMO) ng Malay para dito upang maiwasan ang pahabaang pila sa pagkuha ng ticket, ito’y sa kabila ng bagyong nagdaan nitong mga nakaraan sa probinsya.

Sa interview ng himpilang ito kay Catherine Ong Fulgencio ng MDRRMO Malay, naka-activate na umano ang mga ahensya ng CAAP-Airport para sa mga magbabakasyon sa isla ng Boracay.

Aniya, meron na umano silang guidelines para sa mga pupunta ng isla kung saan nakapaloob umano rito na dapat maging handa sila sa anumang posibleng mangyari, isa na dito na dapat muna nilang i-check ang weather update sa PAG-ASA o makinig ng balita kung may bagyo ba o wala ng sa gayon ay hindi sila ma-stranded sa mga lugar na kanilang pupuntahan. At tingnan rin umano ng mga pasahero ang kanilang ticket na binili upang hindi na sila maabalang bumalik sa ticket booth lalo na sa mga turistang kailangang kumuha ng environmental fee.

Kaugnay nito, nakahanda na rin ang Caticlan at Cagban Port para sa mga uuwi at pupunta ng Boracay kung saan sinabi naman ni Special Operation III Jean Pontero ng Caticlan Jetty Port, na may Command Post o Assistance Desk na silang nakalagay para sa mga pasaherong may mga complaint o mga katanungan.

Naka-antabay dito ang Coast Guard, mga kapulisan at iba pang mga ahensya na malaki ang responsibilidad sa kasagsagan ng holiday season.

Samantala, okay naman umano ang kanilang operasyon sa mga pantalan sa kabila ng pagdagsa ng mga turista sa isla.