Boracay, patuloy na kinakalampag ng usapin kaugnay sa itinatayong resort sa Puka Beach

Posted June 10, 2015

Ni Bert Dalida YES FM Boracay   

Ihinto na ang pagpapatayo ng mga gusali sa Boracay!

Isa lamang ito sa mga sigaw ng mga residente at mga Netizens sa isla na patuloy na kumakalampag sa natatanging tourist destination sa buong mundo.

Bunsod ito ng nagpapatuloy na construction sa Puka Beach area sa Barangay Yapak na labis na tinututulan ng mga nagmamalasakit sa isla ng Boracay.

Kaugnay nito, sinubukan ng himpilang ito na kunan ng pahayag ang iba’t-ibang personalidad at organisasyon tungkol sa usapin.

Nabatid na ‘hands off’ dito ang BFI o Boracay Foundation Inc., bagama’t ilan sa mga kasapi nito ang personal na nagpahayag ng pagtutol sa itinatayong Oceanpark o Seven Seas Resorts sa Barangay Yapak.

Napag-alaman din na patuloy na nangangalap ng suporta sa pamamagitan ng online petition ang grupong Friends of Flying Foxes upang ihinto ang sinasabing pagsira sa isla.

Samantala, aminado naman si SB Member Rowen Aguirre na pinuputakte na ngayon ng batikos sa social media ang DENR, LGU Malay at mismong si Malay Mayor John Yap tungkol sa usapin.

Magugunitang iginiit ni Aguirre sa Malay SB session nitong nakaraang taon na ipagbawal na ang pagkakaroon ng basement sa mga resort o establisemyeto dahil sa mabilis na paglabas ng tubig kahit ilang talampakan pa lamang ang hukay.

Base naman sa impormasyon, nakakaalarma ang ginagawang paghuhukay sa Puka Beach Area bagay na inalmahan ng mga concerned citezens.

#AbolishBoracayBuildingPermitNow usap-usapan ngayon sa Social Media

Posted June 10, 2015

Ni Jay-ar M. Arante, YES FM Boracay

Usap-usapan ngayon at patuloy na kumakalat sa mga social networking site katulad ng Facebook ang #AbolishBoracayBuildingPermitNow.

Ito ang panawagan ng ilang nitizens kay DENR Sec. Ramon Paje, Aklan Government, LGU Malay, Department of Tourism at kay mismong Pangulong NoyNoy Aquino.

Hiling nila na ma-protektahan ang natitirang forest land ng Boracay kung saan ikinumpara rito ang Mapa noong 2003 na halos kulay birde pa ang makikita sa isla at nitong 2014 na halos puro building na ang masisilayan sa Boracay.

Karamihan naman sa mga nitizens ang pumabor na dapat na umanong e-demolish ang pagbibigay ng permit sa pagpapatayo ng anumang instraktura sa Boracay.

Maliban dito kumakalat din ngayon ang ilang mga larawan ng mga itinatayong malalaking building sa Boracay kung saan makikita ang mga pinutol na mga punong kahoy at pagwasak ng mga bundok.

Samantala maliban sa #AbolishBoracayBuildingPermitNow trending din ngayon ang #saveboracay at #weloveboracay na nagpapabot ng pagkabahala sa kalagayan ng itinuturing na pinakasikat na isla sa buong mudo.

Mga naninirahan sa Ati Village kinalampag sa easement rule

Posted June 10, 2015

Ni Jay-ar M. Arante, YES FM Boracay

Hiniling ni Manoc-manoc Brgy. Captain at Liga President Abram Sualog sa mga taga Ati-Village na kung maaari ay sumunod na rin sila sa umiiral na easement rule sa kanilang lugar.

Ito’y matapos na dumalo kahapon sa Sanguniang Bayan Session ang ilang mga tagapagsalita ng Ati Community sa Boracay para humingi ng tulong sa mga Konsehales tungkol sa kanilang Cadte sa pangunguna ni Atty. Leilene Marie Gallardo Regional Director ng NCIP-Antique/Aklan Community Service Center.

Ayon kay Sualog kailangan na nila itong ipatupad kagaya ng mga nauna ng tumupad sa easement rule sa Manoc-Manoc ng sa gayon ay tuloy-tuloy na ang magandang reporma sa kanilang komunidad.

Tumugon naman rito ng katuparan ang mga taga-Ati Village na masaya ring ibinalita ang maayos na pamamalakad sa kanilang lugar kasabay ng pagkakaroon ng ibat-ibang programa sa tulong ng ilang mga concern agencies at ng National Commission on Indigenous Peoples (NCIP).

Nabatid na dumaan sa maraming pagsubok ang mga taga Ati-Village sa Boracay bago mai-turn over sa kanila ang kanilang lupa na siyang sinasabing unang nanirahan sa isla dahil sa pag-agaw umano ng kanilang mga nasasakupang lupain.

Ati Village sa Boracay naipatayuan na ng 30 bahay

Posted June 10, 2015

Ni Jay-ar M. Arante, YES FM Boracay

Tatlumpung bahay na umano ang naipatayo sa Ati Village sa isla ng Boracay sa tulong ng ibat-ibang concern agencies at ng gobyerno.

Ito ang ibinalita ng mga katutubong Ati sa kanilang pagdalo sa ginanap na 20^th Sangguniang Bayan (SB) Session ng Malay kaninang umaga.

Nabatid na ang pagdalo ng mga Ati sa nasabing Session ay upang ibahagi sa mga Konsehales ang kanilang mga naipagawang proyekto at programa sa tulong ng National Commission on Indigenous Peoples (NCIP).

Maliban dito humiling din ang mga Ati sa SB Malay sa pamamagitan ni Atty. Leilene Marie Gallardo-Regional Director ng NCIP-Antique/Aklan Community Service na kung maaari ay tulungan sila sa financial assistance para sa pagsasaayos ng kanilang Certificate of Ancestral Domain Title (CADT).

Samantala, tugon naman ng SB Malay gagawa sila ngayon ng mga hakbang at agarang aksyon upang maisakatuparan ang kahilingan ng mga Ati sa Boracay.

Lalaki, sugatan matapos maaksidente ang sinasakyang motorsiklo

Posted June 9, 2015

Ni Bert Dalida YES FM Boracay

Isang lalaki ang sugatan matapos maaksidente ang sinasakyang motorsiklo sa Station 3 Manoc-manoc Boracay.

Base sa report ng Boracay PNP, kaagad dinala sa pagamutan ang biktimang si Rodel Galan dahil sa tinamo nitong sugat sa tiyan.

Nabasag kasi ang dalawang bote ng beer na dala nito at tumama sa kanyang katawan matapos sumemplang ang motorsiklo niyang sinasakyan.

Napag-alamang nawalan ng kontrol sa pagmamaneho ang hindi na nakilalang driver ng motorsiklo dahilan upang mangyari ang insidente.

Samantala, sinasabing plate number na lang ng sinakyang motorsiklo ang naalala at naibigay na impormasyon ng biktima sa mga pulis tungkol sa nasabing drayber.