Royal Carribean Cruisehip , aasahan ang pag- ooperate sa isla

Posted February 25, 2017

Ni Danita Jean A. Pelayo, YES FM Boracay

Aasahan ang pag- ooperate ng Cruiseship sa isla ng Boracay matapos itong kumpirmahin ng Royal Carribean Cruiseship.

Ayon sa pahayag ni Jetty Port Administrator Nieven Maquirang, ang nasabing operasyon ay dahil sa plano ng naturang barko na maging international cruise hub ang isla.

Aniya, ang Memorandum of Understanding sa pagitan ng Aklan provincial government at Royal Caribbean Cruises, Inc. ay nasa proseso na.

Dahil dito, maaaring makilala hindi lamang ang isla ng Boracay kundi ang mga karatig lugar din katulad na lamang ng Bayan ng Nabas, Tangalan, Buruangga at Kalibo.

Nabanggit din ni Maquirang ang mga benepisyong maaring makuha ng probinsya, at isa na dito ang karagdagang trabaho, kita at pagtangkilik ng mga produktong gawa dito.

Nabatid na ang cruiseship na ito ay may konseptong “cruise and fly” kung saan bibisita ang mga turista sa Boracay at mananatili dito ng isa hanggang dalawang araw pagkatapos ay lilipat din sa ibang lugar sa pamamagitan ng cruiseship.

Samantala, ang Royal Carribean ay isa sa mga pinakamalaking kontribyutor sa lokal na turismo pagdating sa cruiseship.

Lolo arestado sa kasong panggagahasa

Posted February 27, 2017

Ni Inna Carol L. Zambrona, YES FM Boracay

Kulong ang isang lolo sa kasong panggagahasa o rape sa Sitio Diniwid Brgy., Balabag, Boracay.

Kinilala ang naarestong suspek na si Carisio Seraspi y Silverio, 63-anyos at tubong ng Brgy., Canyayo, Santa Fe, Romblon.

Nahuli ang suspek sa pamamagitan ng warrant of arrest na may Criminal Case no. 2357 na inisyu ni Jose M. Madrid, Presideng Judge, RTC, 4rth Judicial Region, Branch 82, Odiongan, Romblon.

Wala namang inilaang piyansa para sa pansamantalang kalayaan ng suspek.

Si Silverio ay naaresto sa pinagsamang pwersa ng Santa Fe Municipal Police Station Romblon at Boracay Tousrist Assistance Center (BTAC).

Comelec Chairman Andres Bautista, binisita ang Aklan

Posted February 24, 2017

Ni Inna Carol L. Zambrona, YES FM Boracay

Nasa probinsya ngayon ng Aklan si Commission on Election COMELEC Chairman Andres Bautista.

Ang pagbisita ni Bautista sa Aklan ay may layuning makapag-usap sila ng mga opisyal ng COMELEC Region 6.

Kahapon ng umaga ay binisita ni Bautista ang COMELEC Offices ng Altavas, Balete, Banga, Numancia at Makato.

Bukod dito, nagkaroon din sila ng pag-uusap kasama ang empleyado ng COMELEC Aklan at Antique, kasunod nito dumiretso si Bautista sa ASU Kalibo Campus para obserbahan naman ang Voter’s Education and Satellite Registration.

Nabatid na bago dumiretso ng Aklan si Bautista kahapon, una muna nitong binisita ang probinsya ng Iloilo at Guimaras.

Kaugnay nito, naging matagumpay at napaka-produktibo ang pagbisita ni Bautista kasama sina Atty. Bartolome J. Sinocruz, Deputy Executive Director for Operations and Atty. Teopisto E. Elnas, Director of the Election and Barangay Affairs Department of the Commission at sa grupo ni Atty. Dennis L. Ausan, Regional Election Director of Region 6, Atty. Ian Lee M. Ananoria at Provincial Election Supervisors ng Aklan at Antique Atty. Roberto A. Salazar.

Atletang si Kyla Soguilon, kinilala ng SP-Aklan

Posted February 23, 2017

Ni Inna Carol L. Zamnrona, YES FM Boracay

 

Kinilala ngayon ng mga miyembro ng Sangguniang Panlalawigan (SP) Aklan ang bagong award na napanalunan ng atletang Aklanon na si Kyla Ong Soguilon.

Napabilang umano si Soguilon sa ikatlong pagkakataon bilang kauna-unahang atleta na nakasungkit ng tatlong sunod-sunod na taon bilang Junior Athlete of the Year at Milo Junior Athlete of the Year sa larangan ng paglalangoy.

Pinangunahan ni Board member Emmanuel Soviet Russia Dela Cruz at Board member Ramon Gelito sa 28th Regular Session ang pagkilala kay Soguilon at sa mga napanalunan nito sa international competition.

Tinanggap ng atleta ang parangal sa Metro Manila sa ginanap na Philippine Sportswriters Association o (PSA) nitong Pebrero 13 taong kasalukuyan.

Samantala, bukod kay Soguilon, kinilala rin ng komitiba ang coach nito na si Manuel De Leon kung saan dahil na rin sa galing ng kaniyang pagtuturo kung kaya’t nakamit nito ang tagumpay na kanyang tinatamasa ngayon.

Pagdaos ng ASEAN meeting sa Boracay naging matiwasay- Gorero

Posted February 22, 2017

Ni Danita Jean A. Pelayo, YES FM Boracay

“So far so good”

Ito ang naging pahayag ni Police Superintendent Gilbert Gorero sa naganap na Senior Officials Meeting ng Foreign Minister’s Retreat na nagtapos kahapon.

Ayon kay Gorero, sinunod nila ang International Templates na siyang standard security para sa nasabing pagpupulong.

Aniya, wala siyang narinig na negatibo tungkol sa Boracay, bagkus magagandang komento ang binitawan ng mga delegado na dumating sa isla, kung kaya’t inaasahan pa ang pagbabalik ng mga ito, hindi para umattend ng pagpupulong kundi para magbakasyon.

Sa kabilang banda, naging maganda rin ang komento ng mga turista dahil naramdaman nila ang kaligtasan sa deployment ng mga pulis.

Inihayag pa ni Gorero, na naging madali ang kanilang pag-execute ng seguridad dahil na rin sa tulong ng Lokal na Pamahalaan ng Malay at maging ng mga mamamayan kung saan naging katuwang nila ang dalawampu’t- isang mga ahensya na pinagsama- sama para sa maayos na ASEAN Summit 2017.

At sa sandaling makalabas na ng bansa ang mga delegado, inaasahan nitong maipagmamalaki ng kaniyang grupo, at ng ibang ahensiya na naging bahagi ng ASEAN SUMMIT, at maging ng lokal na pamahalaan ng Malay sa buong bansa na naging secured ang mga delegado na walang major incidents na nangyari sa kanila sa kanilang pananatili sa Boracay.

Samantala, hindi pa umano nila masasabing tapos na ang inilatag nilang seguridad dahil may ibang delegado na kasalukuyang nasa isla pa.