Pag-file sa aplikasyon ng Mayor’s Permit hiniling na pahabain

Posted January 21, 2016

Ni Jay-ar M. Arante, YES FM Boracay

Panahon na naman ng renewal ng mga business permit para sa taong 2016.

Dahil dito nagkaroon ng request ang Municipal Mayor ng Malay para sa urgent passage ng resolusyon na nagsasabing e-extend ang period para sa pag-file ng aplikasyon ng Mayor’s Permit na mula Enero 20, 2016 hanggang February 20, 2016.

Ito ay nakapaloob sa Incoming and Referral ng Order of Business sa isinagawang SB Session ng Malay nitong araw ng Martes.

Nabatid na madami ngayon ang nag-proproseso ng kanilang permit kung saan inaasahang hindi agad ito matatapos sa itinakdang petsa ng LGU Malay.

Samantala, ang resolusyon ito ay ini-refer naman ng Konseho sa Committee on Laws para sa masusing pag-aaral at nakatakdang pag-usapan sa susunod na Session ng Malay.

MDRRMO nagsagawa ng ICS Training bilang paghahanda sa ibat-ibang insidente

Posted January 20, 2016

Ni Inna Carol L. Zambrona, YES FM Boracay

Nagsagawa ng tatlong araw na Basic Incident Command System (ICS) Training ang Municipal Risk Reduction Management Office (MDRRMO) para sa paghahanda sa mga ibat-ibang insidente partikular sa kalamidad.

Ayon kay Head Officer Marlo Schonenberger ng Municipal Disaster Risk Reduction Management Office (MDRRMO) Malay, layun umano ng kanilang programa ay para matulungan at mabigyan ng kaalaman ang mga tao sakaling magkaroon ng mga sakuna at maging handa ang mga ito na maprotektahan ang kanilang buhay.

Naging parti naman umano sa kanilang ginawang training ang ibat-ibang Head ng Municipal Government Offices sa Malay na kinabibilangan ng PNP, Philippine Army, Philippine Coast Guard, Philippine Navy, Philippine Maritime, Consultant  ng ibat-ibang grupo katulad ng Boracay Action Group, Boracay Fire Rescue Ambulance Volunteers, Transportation group at iba pang mga kooperatiba.

Ang nasabing training ay nagsimula nitong Enero 18 at nagtapos ngayong hapon Enero 20 na ginanap sa Eurotel, Balabag, Boracay Station 2.

Army officer na nag-post sa Facebook ng reklamo ng umano'y diskriminasyon sa VIP lounge ng KIA sinampahan ng kaso

Posted January 20, 2016

Ni Jay-ar M. Arante, YES FM Boracay

Photo Credit: Ryan Layug

Nakatakdang sampahan ng kasong Libel in relation to Cybercrime Act si Lt. Ryan Layug na isang Army Officer mula Mindanao.

Ito’y kaugnay sa kanyang post sa Facebook ng reklamo ng umano'y diskriminasyon sa VIP lounge ng Kalibo International Airport nitong Enero 1, 2016 na umani ng ibat-ibang reaksyon mula sa nitezens.

Sa Presscon na ipinatawag ng Domabem Corporation ipinahayag ni Atty. Rowena Mae Mencias na hindi umano nila itutuloy ang pagsasampa ng kaso kay Layug kung ito ay magpapa-Public apology sa Media.

Itinanggi naman ng pamunuan ng Domabem Corporation na may nangyaring diskriminasyon sa kanilang Lounge laban kay Layug.

Magugunitang inihayag ni Layug sa social media ang kanyang pagkaiinis matapos umano siyang tanggihan na makapag-avail sa nasabing Lounge sa loob ng Discover Boracay kung saan sinasabi niting para lang umano ito sa mga Korean tourist.

Si Layug ay sasampahan ng nasabing kaso ng manager ng naturang kumpanya na si Gun See Lee na kanya ring nakaharap noong mangyari ang insidente.

Pagkuha ng Police Clearance ng mga taga Boracay sa Malay PNP hiniling na ibalik isla

Posted January 20, 2016

Ni Jay-ar M. Arante, YES FM Boracay

Hiniling kahapon ni SB Member Leal Gelito sa ginanap na SB Session ng Malay na kung maaari ay ilipat muna pansamantala ang pagkuha ng Police Clearance sa isla ng Boracay.

Ito’y matapos silang makatanggap ng reklamo sa mga manggagawa na nahihirapang tumawid mula sa Boracay para lamang kumuha ng nasabing clearance na hindi agad na-proproseso ng isang araw.

Dahil dito, nagkasundo naman ang Konseho na magpadala ng sulat sa Malay PNP kung saan nakasaad umano rito na kung maaari ay maglagay sila pansamantala ng Satellite Office sa Boracay ng sa gayon ay hindi na mahirap sa mga kukuha nito ang tumawid pa sa mainland.

Nabatid na ang pagkuha ng Police Clearance ay kasabay ng mga renewal ng mga business permit ngayong bagong taon.

Samantala napag-alaman na dating nasa Boracay PNP kumukuha ng police clearance ang mga empleyado sa isla ngunit inilipat na ito ngayong 2016 sa Malay PNP matapos magpalabas ng kautusan ang Philippine National Police Headquarters na ang Boracay PNP ay hindi under sa Municipal Police at ito ay isang mobile station na nakatuun lamang sa mga turista.

Tricycle driver sa Boracay inireklamo ng turista dahil sa paniningil ng mahal

Posted January 20, 2016

Ni Inna Carol L. Zambrona, YES FM Boracay

Inireklamo ng isang turistang British national ang isang driver ng tricycle na kanilang sinakyan dahil sa over pricing kaninang madaling araw sa Station 2 Brgy. Balabag, Boracay.

Sumbong ng biktimang si David Jeremy Deveruex-Hickman 47-anyos sa Boracay PNP, sumakay umano sila ng nasabing sasakyan kasama ang dalawang kaibigan at asawa nito papunta sa restaurant sa station 2 kung saan sa pagbaba nila ay sinigil umano sila ng driver ng P 70,00 kung saan sa pagkakaalam nito ay P10, 00 lang ang regular na pamasahe sa tricycle bawat isa.

Ayon pa sa nag-rereklamo, nagpumilit pa umano ang nasabing driver na bayaran siya ng nasabing halaga.

Dahil dito niyaya niya ang naturang driver na dumiritso nalang sila sa Police Station para doon ayusin ang problema ngunit bago umano sila makarating sa himpilan ng pulis ay huminto umano ang driver sa isang supermarket at nakipag-usap pa sa kaparehong driver tungkol sa nangyaring insidente.

Maliban dito inikot-ikot pa umano sila kung saan-saan bago makarating sa tanggapan ng Boracay PNP.