Patay na katawan ng isang ginang nakitang palutang-lutang sa dagat

Posted August 12, 2015
Ni Jay-ar M. Arante, YES FM Boracay

Wala ng buhay ng makita ang katawan ng isang ginang na palutang-lutang sa dagat sa Brgy. Gibon bayan ng Nabas, Aklan.

Ang biktimang si Carmen Rada, 57-anyos at residente ng nasabing lugar ay nakitang palutang-lutang sa ilog ng mga residente ng Gibon base sa blotter report ng Nabas PNP Station.

Lumilitaw naman sa embistigasyon ng Nabas PNP na laging naglalasing ang biktima kung saan palagi rin umano itong umaalis tuwing gabi at kung saan-saan pumupunta ngunit hindi naman nila matukoy kung may pinagdadaaan itong problema dahil kadalasan ay tahimik lang din ito.

Lumalabas pa sa report ng mga pulis na ito ay nakipag-inuman muna sa kanyang live-in partner bago nagtungo sa baybayin kung saan ang posibleng kalasingan ang siyang dahilan ng kanyang pagkamatay.

Napag-alaman na ang biktima ay hiwalay na sa kanyang asawa tatlong taon na ang nakakaraan habang mayroon din silang mga anak.

NSA-Aklan, hinimok ang publiko na seryosohin ang Population survey

Posted August 12, 2015

Ni Jay-ar M. Arante, YES FM Boracay

Hinimok ng National Statistics Authority (NSA) Aklan ang publiko na seryosohin ang mid-decade nationwide population survey 2015 na nagsimula kahapon.

Ayon sa NSA Aklan, kapag hindi sineryoso ang mga tanong sa survey ay maaaring mabigyan ng penalidad ang mapatunayang hindi accurate sa pagbibigay ng tamang impormasyon.

Nabatid namang nahihirapan ang NSA na isa­gawa ang mga survey sa mga pangunahing lungsod dahil hindi nagiging cooperative ang mga tinatanong lalo na ang mga nasa executive villages.

Ngunit hindi naman umano katulad sa lower class na lipunan na mas mataas ang cooperation rates kumpara sa mga nasa class A at B dahil kadalasang wala ang mga ito dahil nasa opisina sa tuwing isinasagawa ang mga surveys.

Samantala, pinayuhan naman ang lahat na makilahok sa 2015 Census of Population ng Philippine Statistics Authority para malaman ang kabuuang bilang ng populasyon sa bansa.

“MS Legend of the Seas” magdadala ng mahigit dalawang libong turista sa Boracay

Posted August 11, 2015

Ni Jay-ar M. Arante, YES FM Boracay

Tinatayang nasa dalawang libo at pitumpung mga turista ang sakay ng “MS Legend of the Seas” na bibisita sa Boracay ngayong Agosto 21, 2015.

Ito ang kinumpirma ni Maricel Laxamana ng Wallem Philippines na siyang may hawak ng tour ng nasabing barko sa Pilipinas.

Ang MS Legend of the Seas ay pagmamay-ari ng Royal Caribbean na may gross tonnage na 70, 000, decks na 11, length na 376 ft, maximum beam na 105 ft, draft na 24.5 ft at crushing speed na 22-24 knots habang mayroon naman itong crew na 741 kung saan dalawang daan at anim naput anim rito ay mga Pinoy.

Kaugnay nito ang MS Legend of the Seas ay magmumula sa Maynila bago dumirtso ng Boracay alas-7 ng umaga at matapos ang departure nito ng alas-4 ng hapon ay tutungo naman itong Puerto Princesa Palawan bago dumirtsong Singapore.

Samantala, nangunguna sa mga sakay nito ay ang mga pasaherong Australian sinundan ng British at USA kung saan inaasahan namang may mga pasaherong Pinoy na kasama sa tour ng nasabing barko magmula sa Boracay hanggang sa Singapore.

Nabatid naman na bibisitahin ng mga ito ang mga pangunahing tourist spot sa Boracay kasama na ang pagkakaroon ng island hopping at ibat-ibang island activities.

Aklan Province, nakipagpulong sa mga Law Enforcers para sa pagdating ng “MS Legend of the Seas” sa Boracay

Posted August 11, 2015

Ni Jay-ar M. Arante, YES FM Boracay

Nakipagpulong na ngayong hapon ang Aklan Province sa pamamagitan ng Jetty Port Administration sa mga law enforcers sa Boracay para sa pagdating ng “MS Legend of the Seas sa Biyernes.

Ito ay sa pangunguna ni Jetty Port Administrator Niven Maquirang kung saan napag-usapan rito ang paghahanda sa pagdating ng nasabing barko ngayong Agosto 21, 2015 sa Boracay.

Kabilang sa mga dumalo sa isinagawang meeting ay ang Philippine Coastguard, Boracay PNP, Philippine Navy at MAP kung saan kasama rin dito ang mga concern agencies kagaya ng Red-Cross, Philippine Ports Authority, MARINA, BIHA at Malay Municipal Tourism Office.

Dito napag-usapan ang seguridad na ilalatag para sa mga sakay na pasahero ng barko, mga gagamiting bangka para sa island hopping at area kung saan dadaong ang naturang cruship.

Dahil ito ang pangalawang pagbisita ng “MS Legend of the Seas” sa Boracay kung saan nauna itong bumisita sa isla noong Oktobre 2012 tinitiyak naman ng Probinsya ng Aklan na magiging maganda parin ang pagsalubong nito sa mahigit dalawang libong pasahero ng nasabing barko.

Malay mayor John Yap, pinangunahan ang Synchronize scouting sa Boracay

Posted August 11, 2015

Ni Jay-ar M. Arante, YES FM Boracay

Ang kahalagahan sa paghahanda sa ibat-ibang kalamidad ang siyang naging mensahe ni mayor John Yap sa pagdalo nito sa Synchronize scouting sa Manoc-manoc Boracay nitong Sabado.

Sa daan-daang mag-aaral ng Manoc-manoc Elementary School at Boracay National High School na kasama sa Synchronize scouting sinabi ni mayor Yap na sa tama umanong paghahanda sa kaalaman ay mapapangalaan ang sariling kaligtasan.

Sinabi din nito na kailangan ay sama-samang maging responsible sa sariling kaligtasan kung saan dapat na din umano nila itong simulan habang sila ay bata pa.

Kaugnay nito, sumailalim naman ang mga scouting students sa orientation sa pangunguna ng Municipal Disaster Risk Reduction and Management Council ng Malay kung saan isang drill din ang isinagawa ng MDRRMC bilang paghahanda sa kalamidad katulad ng lindol.

Maliban dito dinaluhan din ng BFP Boracay ang naturang programa kasama ang Philippine Coastguard at Philippine National Police na nagbigay naman ng kanilang mga useful information sa mga kabataan.

Ang Synchronize scouting ay isang programa ng Department of Education (DepEd) sa pamamagitan ng pagsasagawa ng makabuluhang aktibidad para sa mga kabataan na kinabibibilangan ng Girl Scout, Boys Scout at Cabs scout of the Philippines.