Natural na kagandahan ng Boracay hinangaan ng mga APEC Delagates

Posted May 27, 2015

Ni Bert Dalida YES FM Boracay

Tapos na ang Second Senior officials’ meeting ng APEC o Asia-Pacific Economic Cooperation 2015 sa isla ng Boracay.

Subali’t maliban sa naging mapayapa at matagumpay ang pagpupulong, nabatid na napahanga pala ang mga APEC Delegates sa natural na kagandahan ng isla.

Dahil dito, napag-alaman din na may mga delegates na nagpaiwan upang magliwaliw at tuklasin pa ang kabuuang ganda ng Boracay.

Samantala, ilang opisyal mula sa LGU Malay at mga stakeholders ang nagpahayag ng kanilang paghanga sa kooperasyon ng lahat sa kakatapos na APEC Ministerial meeting.

Magugunita namang kaliwa’t-kanan ang ginawang paghahanda ng National at Aklan Provincial Government, LGU Malay, at ilan pang ahensya upang maging matagumpay ang nasabing aktibidad na inaasahang magpapalago lalo ng turismo ng isla.

May-ari ng lumabag na construction sa gilid ng laketown kinalampag ni SB Bautista

Posted May 27, 2015

Ni Jay-ar M. Arante, YES FM Boracay      

Muling kinalampag ni Malay Sangguniang Bayan Member Floribar Bautista ang mga kinauukulan at may-ari ng ipinatigil na construction sa gilid ng Lake Town sa Boracay.

Ito’y matapos na hindi parin umano ngayon na de-demolish ang nasabing construction na sinasabing isang waiting area na pag mamay-ari ng isang kilalang resort sa Boracay.

Sa 18^th regular SB Session ng Malay nitong Martes sinabi ni Bautista na tila walang naging aksyon rito ang kinauukulan matapos na ipinatigil dalawang linggo na ang nakararaan.

Nabatid na nakitaan ng ilang paglabag ang nasabing waiting area dahil sa kawalan ng building permit at kaukulang dokumento mula sa LGU Malay.

Kaugnay nito nauna ng sinabi ni Bautista kung sino ang nagbigay ng permiso mula sa LGU na makapagpatayo ang kilalang resort ng kanilang waiting area sa gilid ng laketown.

Samantala, ipinaabot naman ng Konseho sa kinauukulan sa LGU Malay na kung maaari ay mabigyan na ito ng agarang pansin upang agad na mai-demolish.

‘Balik-Eskwela Diskwento Sale’ ng DTI-Aklan, umarangkada na

Posted May 27, 2015

Ni Jay-ar M. Arante, YES FM Boracay

Umarangkada na kahapon ang dalawang araw na ‘Balik-Eskwela Diskwento Sale’ ng Department of Trade and Industry (DTI)-Aklan.

Ito’y para tulungan ang mga mamimili na makatipid sa pagbili ng gamit sa eskwela ngayong nalalapit na pasukan kasama na ang ilang household items.

Nabatid na ang dalawang araw na Diskwento Sale ay ginanap sa Provincial Trade Hall, Capitol Grounds sa Kalibo, Aklan na nag-umpisa kahapon at magtatapos naman ngayong araw ng  Martes.

Samantala kabilang sa mga discounted school supplies ng DTI ay ang notebooks, lapis, krayola, bag kasama na ang mga uniforme sapatos at prime commodities.

Layunin naman ng Diskwento Sale ng DTI sa pakikipagtulungan sa provincial government ng Aklan ay para makapag-bigay daan sa marginal consumers, estudyante at sa kanilang pamilya na makapag-avail ng mga nasabing diskwento.

APEC Security forces sumailalim sa Brigada Eskwela sa mainland Malay at Boracay

Posted May 26, 2015

Ni Jay-ar M. Arante, YES FM Boracay

Sumailalim ngayong araw ng Lunes sa Brigada Eskwela ang mga security forces ng Asia Pacific Economic Cooperation (APEC) 2015 Second Senior Officials’ Meeting sa mainland at Boracay.

Ito’y dahil sa nagtapos na kahapon ang dalawang linggong meeting kung saan ginamit ng mga security forces ng Site Task Group (STG) ang ilang paaralan sa mainland Malay at Boracay bilang billeting areas.

Ayon naman kay STG Boracay APEC 2015 Spokesperson P/Insp. Shella Mae Sangrines, ito umanong ginawa nilang Brigada Eskwela ay paraan ng kanilang pasasalamat sa mga school principal at local government unit ng Malay sa naging akumodasyon ng mga security forces.

Nabatid na inayos ng mga kapulisan ang mga sira-sirang upaan sa kanilang naging billeting areas kasama na rito ang pagpintura sa mga silid-aralan.

Napag-alaman na mayroong mahigit 3,700 police personnel mula sa Police Regional Office (PRO)-6 ang naka-deploy sa mainland Malay at Boracay para paigtingin ang seguridad ng kakatapos na APEC meetings.

Samantala, katuwang ng ginawang Brigada Eskwela ng security forces ay ang Department of Education (DepEd) at LGU Malay.

Ginanap na APEC Ministerial Meeting sa Boracay, naging generally peaceful

Posted May 26, 2015

Ni Bert Dalida YES FM Boracay

Naging generally peaceful umano ang kakatapos lamang na APEC o Asia-Pacific Economic Cooperation Ministerial Meeting sa Boracay.

Sa kanyang text message, sinabi ni Region 6 Public Information Officer at Official Spokesperson for APEC Police Inspector Shiela Mae Sangrines, na naitala ang ‘Zero major incident’ sa kasagsagan ng ministerial meeting.

Natiyak umano kasi ang kaligtasan ng mga delegates, kung kaya’t sinabi din nito na para sa lahat ang tagumpay ng naturang aktibidad.

Samantala, magugunitang nagpakalat ang pamahalaan ng mahigit tatlong libong pulis sa isla upang matutukan ang seguridad ng mga ministers, maliban pa sa ipinakalat na miyembro ng Philippine Army, MMDA, DOH, Fire Fighters, iba pang law enforcers at force multipliers.

Naging abala naman ang mga delegates mula sa 21 bansang miyembro ng APEC sa mga usaping pang-ekonomiya na may temang ‘’Building Inclusive Economies, Building a Better World’’.