Bilang ng mga lugar sa Aklan na wala pang suplay ng kuryente, nasa 10 nalang - AKELCO

Ni Jay-ar M. Arante, YES FM Boracay

Sampung mga Barangay nalang umano sa probinsya ng Aklan ang walang suplay ng kuryente makaraang manalasa ang super typhoon Yolanda.

Base sa datus ng Aklan Electric Cooperative (AKELCO) nasa 358 mula sa 368 na mga barangay sa Aklan na ang naibalik ang suplay ng kuryente.

Ayon kay AKELCO Assistant General Manager for engineering Engr. Joel Martinez, ang nasabing sampung lugar ay kinabibilangan lahat ng mga barangay sa bayan ng Libacao.

Samantala, kabilang sa mga pinagsusuplayan ngayon ng kuryente ng AKELCO ang 17 na munisipalidad sa probinsya gayundin ang bayan ng Pandan at Libertad sa probinsya ng Antique.

Dagdag pa ni Martinez ang Department of Energy at ang National Electrification Administration (NEA) ay nagbigay narin umano ng deadline na dapat sa pagtatapos ng buwan ng Marso ay mailawan na ang mga nasabing kabarangayan.

Napag-alaman na ang AKELCO ay nagsagawa ng rotational brownouts at power interruptions dahil sa mga sirang transmission lines kung saan patuloy na inaayos.

Nabatid na bago paman naitakda ang ibinigay na deadline sa AKELCO ay napailawan na ng nasabing kooperatiba ang mga lugar na naapektuhan ng bagyo maliban na lamang sa sampung barangay.

Matatandaang halos lahat ng poste ng AKELCO ay pinadapa ng bagyong Yolanda na higit na nakaapekto sa mga Aklanon dahil sa dalawang buwan na kawalan ng power supply.

Samantala, taos puso ring pinasasalamatan ng kooperatiba ang Task Force Kapatid ng NEA sa suporta at pagtulong nito upang maibalik sa normal ang suplay ng kuryente sa probinsya.

Pagsunod sa Loading at Unloading Area, muling ipinaalala ng MTO

Ni Gloria Villas, YES FM Boracay

Muli ngayong ipinaalala ng Malay Transportation Office (MTO) sa mga motorista sa isla ng Boracay ang pagsunod sa mga Loading at Unloading Areas.

Ito’y kaugnay sa reklamo ng ilang drayber na natitikitan kahit nasa tamang parking area naman, kaya’t marami na rin umano sa mga ito ang tila nalalabuan sa ordinansa kaugnay sa mga loading at unloading areas sa isla.

Subalit, paglilinaw naman ni Transport Regulation Officer II, Niño Sacapaño ng Malay Transportation Office.

Sa kanilang isinagawang inspection kamakailan hinggil sa estado ng traffic sa isla, nalaman ditong dahil sa maliit lamang umano ang kalsada ay may iilan din kasing mga pasaway na motirista na doon nagpaparking sa daanan ng publiko.

Kaya’t humingi din ito ng pag-unawa sa mga motorista na kahit na walang nakalagay na signages at makikitang maliit lamang ang area at karaniwan pang dinadaan ng publiko.

Magbigay na lamang umano ng konsiderasyon dahil minsan ang ilan sa mga ito’y dumadaan nalang kahit sa gitna na ng kalsada.

Samantala, nilinaw naman ng MTO na bago payagang mag-isyu ng ticket ang mga MAP members ay kinakailangan munang warningan o bigyang alam ang mga motorista para sa tamang pagpaparking.

Sa kabilang dako, tumanggi namang magbigay ng pahayag ang MAP Boracay hinggil sa hinaing ng mga motorista sa isla.

30-meter easement, hindi lang para sa beach front ng Boracay ayon sa DOT

Ni Jay-ar M. Arante, YES FM Boracay

Hindi lamang umano para sa beach front ng Boracay ipinapatupad ang 30-meter easement rule kundi maging sa lahat na establisyemento sa buong isla.

Ayon kay DOT Boracay Officer In-charge Tim Ticar, bibigyan pansin din umano ng Boracay Redevelopment Task Force ang iba pang mga imprastraktura sa Boracay kabilang na ang mga residential area na lumabag rin sa 30-meter easement rule matapos ang kanilang clearing ngayong buwan ng Marso sa beach front.

Napag-alaman na ilan pang mga business establishments sa beach front ang lumabag sa nasabing easement rule na ipinag-uutos na ring patanggalin.

Samantala, mismong ang Task Force na rin ang nag-demolished ng mga imprastraktura ng mga establisyementong hindi nag-voluntary demolish ng kanilang “illegal structures.”

Sa kabilang banda pito pang mga business establishments sa beach front ang binigyan ng deadline hanggang ngayong araw ng Sabado para tanggalin ang kanilang ilegal na straktura.

Kamakailan lang ay ininspeksyon ni Tourism Secretary Ramon Jimenez at DILG Secretary Mar Roxas ang mga business establishments sa Boracay na sumunod sa Presidential Proclamation 1064.

12 sachet at 4 na bulto ng shabu, nasabat sa dalawang magkahiwalay na buy bust operation sa Boracay

Ni Gloria Villas, YES FM Boracay

Timbog ang anim na suspek na karamihan ay kababaihan matapos mahuling nagtutulak ng illegal na droga sa isla ng Boracay.

Sa magkahiwalay na buy bust operation na isinagawa ng Boracay Tourist Assistance Center (BTAC), Philippine Drug Enforcement Agency (PDEA) at Provincial Anti-Illegal Drugs and Special Operations Task Group (PAIDSOTG).

Nasa 12 sachet at apat na bulto ng shabu ang nasabat sa magkaparehong lugar sa So. Ambulong, Manoc-manoc Boracay.

Ayon sa blotter report ng Boracay PNP Station, unang sinalakay ng mga otoridad ang isang apartment sa nasabing lugar kung saan dalawang babaeng Taiwanese national, isang pinay at isang bading na pinoy ang naaresto.

Nakilala ang mga suspek na sina Chi Ping Chou alyas “Sophia” 44-anyos, Chia Huei Ma alyas “Chia-Chia” 27-anyos, Jomar Celorico y Degala alyas “John-john” 20-anyos ng Punta Libas, Roxas City, Capiz at Vangie Inoc y Ybañez ng Lapu-lapu City Cebu.

Nakuha sa control at posisyon ni Sophia ang 12 ng shabu habang cellphone na naglalaman naman ng mga transaksyon para sa illegal na droga ang nakuha sa tatlong iba pa.

Samantala, nasundan pa ang nasabing pangyayari nang isagawa ang isa pang buy bust operation sa isang hotel sa nasabi ring lugar.

Apat na bulto ng shabu o hindi pa na-repack na shabu ang nakuha sa dalawa ring babaeng suspek na sina Rheafaye Thomas y Santigao, 23-anyos at Mariel Joyce Kiling y Roxas, 20-anyos parehong taga Pasay City Maynila.

Nakumpiska rin ang dalawang sachet ng shabu at isang libong piso galing sa poseur buyer.

Nahaharap naman ang mga suspek sa kasong paglabag sa R.A 9165 o ang Comprehensive Dangerous Drugs Act Of 2002.

Isa pang Public Hearing hinggil sa Base Market Values para sa Boracay at Malay, aprobado na sa SP Aklan

Ni Gloria Villas, YES FM Boracay

Aprobado na sa SP Aklan ang hirit ng mga stake holders mula sa isla ng Boracay at bayan ng Malay na magkaroon ulit ng Public Hearing hinggil sa Base Market Values.

Sa ginanap na 9^th Regular Session kaninang umaga ay pinag-usapan sa plenary ang nasabing isyu, kung saan ikinonsidera ang hiling ng mga stake holders mula sa Boracay at Malay.

Bagay na napagkasunduan naman ng konseho na muling magkaroon ng public hearing hinggil sa General Revision ng Schedule of Base Market Values para sa residential, industrial at commercial lands sa probinsya.

Kaugnay nito, muli namang nilinaw ni Vice Governor Gabrielle Calizo Quimpo na ang nasabing panuntunan sa bagong bayarin tungkol sa buwis ay proposal pa lamang at hindi pa naisasapinal.

Samantala, inaalam pa ngayon ang availability ng Aklan Provincial Assessor at SP Aklan para sa itatakdang schedule ng public hearing.

Matatandaang hiniling sa nakaraang pagpupulong ng mga stake holders mula sa Boracay at Malay sa SP Aklan na magkaroon ulit ng public hearing at ilipat ang venue malapit sa mga nasabing lugar para mas marami ang makakaalam.