Tatlong Negosyo Center sa Aklan nakatakdang ipatayo ngayong taon

Posted March 29, 2016

Ni Jay-ar M. Arante, YES FM Boracay

Tatlo pang Negosyo Center sa probinsya ng Aklan ang nakatakdang ipatayo ng Department of Trade and Industry (DTI) ngayong taong 2016.

Ayon kay DTI-Aklan OIC Provincial Director Ma. Carmen Iturralde, ang target date launching umano nito ay bago magtapos ang buwan ng Mayo.

Magiging apat na rin umano ang Negosyo Centers sa probinsya kung saan ang kauna-unahan ay naitayo mismo sa loob ng (DTI) Provincial Office na nagbukas nitong nakaraang taon.

Samantala itatayo naman ang tatlong Negosyo Center sa mga bayan ng Altavas, Ibajay at bayan ng Malay.

Nabatid na ang Negosyo Center ay isang one-stop shop kung saan ang layunin nito ay makapagbigay ng serbisyo sa mga negosyante sa pamamagitan ng pag-proseso ng kanilang requirements para sa pagpapatayo ng negosyo.