YES THE BEST 911 BORACAY

Thursday, May 23, 2013

Seminar para sa Employees Compensation Program ng DOLE dinaluhan ng mahigit 100 partisipante sa Boracay

Ni Jay-ar Arante, YES FM Boracay

Dinaluhan ng mahigit 100 partisipante kaninang umaga ang programa ng Department of Labor and Employement (DOLE).

Ilan sa mga dumalo sa nasabing programa ay ang lokal na gobyerno ng Malay, Human Resource (HR) mula sa ibat-ibang hotels sa isla ng Boracay, gayon din ang iba’t-ibang empleyado ng gobyerno sa probinsiya ng Aklan.

Ayon kay Employees Compensation Commission Chief Information and Public Assistance Division Ma. Cecilia Maulion, ang programa umanong ito ay para matulungan ang mga empleyadong nagtratrabaho saanmang sektor sa ating bansa.

Ang nasabing Employees Compensation Commission ay isang gabay sa pribado at pampublikong sektor para sa mga empleyadong umaasa na matulungan kung sila ay ma-aksidente sa trabaho o kaya magkasakit habang sila mismo ay nag tratarabaho sa kumpanyang pinapasukan nila.

Dapat umanong bigyang tugon ito ng kanilang HR department o maging ng kanilang mga managers.

Dagdag pa dito, ang programang ito ay inilunsad para magkaroon ng awareness ang mga empleyado at magkaroon din umano sila ng sapat na benipisyo kung sakaling may mangyaring hindi maganda sa mga ito.

Oath taking ng mga bagong halal na kandidato sa Malay, sa susunod na buwan pa

Ni Bert Dalida, YES FM Boracay

Sa susunod na buwan pa ang schedule ng oath taking ng mga bagong halal na kandidato sa bayan ng Malay.

Ayon kay SB secretary Concordia Alcantara, may mga session pang kailangang matapos ang mga kasalukuyang miyembro ng konseho bago ang panunumpa naman ng mga nanalong kandidato.

Ang mga petsa ng mga session na ito ay sa May 28, June 11, 18 at 25 na siya namang pinaka-huli nilang session.

Ang petsa naman umano ng oath taking ay hindi pa nito nakukumpirma dahil pag-uusapan pa ito sa SB kasama ang alkalde.

Sakaling mapagkasunduan na ang tamang petsa, ay isang programa ang gaganapin para dito, sa mismong plaza ng Malay.

Nitong Martes ay ginanap naman ang unang SB Session sa Malay matapos ang 2013 midterm election.

Traysikel sa Boracay, sumemplang matapos maatrasan ng dump truck ng Manoc-manoc MRF; isang pasahero, patay!

Ni Bert Dalida, YES FM Boracay

Hindi na nakahabol pa sa biyahe ng barko ang 16-anyos na dalagita matapos maaksidente ang sinasakyang traysikel kaninang umaga.

Pauwi na sana ng Mindoro ang biktimang si Gabrielle Salgado mula sa pagbabakasyon dito sa Boracay nang mangyari ang insidente.

Ayon kay PO1 R.C Magpusao ng Boracay PNP Station, parehong paakyat sa mataas na bahagi ng Sitio Ambulong, Manoc-manoc ang sinasakyang traysikel ng biktima at ang dump truck.

Nawalan umano ng kontrol ang drayber ng dump truck, dahilan upang dumausdos ito at bumangga sa nasabing traysikel.

Sinasabing sumusunod lang din ang dump truck sa isa pang traysikel nang mangyari ang insidente.

Samantala, ayon naman sa ilang residente doon, sinubukan pa sanang umiwas ng sinasakyang traysikel ng biktima sa dump truck, subalit tuluyan na itong nabangga at sumemplang, dahilan upang ang biktimang nakasakay sa likurang bahagi ng traysikel ay malubhang nasugatan sa ulo.

Naisugod pa sana sa ospital ang biktima subalit ideneklara naman itong “dead on arrival” (DOA) ni Dr. Emy Joy Grejaldo.

Patuloy namang iniimbistigahan ng mga otoridad ang mga nasangkot na mga drayber, na ngayon ay nasa kustodiya ng Boracay PNP.

Samantala, ayon pa sa mga kamag-anak ng biktima, nakatakda ding bumalik sa Maynila ang nasawing si Gabrielle upang ipagpatuloy ang kanyang pag-aaral doon.(

LGU Malay hiniling na taasan ang Terminal fee sa Caticlan Jetty Port

Ni Jay-ar Arante, YES FM Boracay

Hiniling ng LGU Malay sa Aklan provincial government na taasan ang singil sa environmental fee ng mga turistang pumupunta sa isla ng Boracay.

Base sa panukalang inihain ni SB member Wilbec Gelito sa nakaraang session nitong Martes sa bayan ng Malay.

Nais umano niya na ang dating 12% environmental fee ay magiging 20% na sinang-ayunan naman ng mga kasamahang konsehal.

Nais din umano ng barangay Caticlan na madagdagan din ang kanilang parte kayat gusto din umano nilang mapataas ang pagsingil ng terminal fee.

Ayon naman kay Sb Rowen Aguirre, kung sakaling matuloy ang nasabing panukala ay mapupunta din umano ang magiging parte ng LGU Malay sa ilang mga proyekto ng lokal na gobyerno partikular na sa isla ng Boracay.

Samantala, ang nasabing panukala ay dadaan pa sa deliberasyon ng Aklan provincial government.

Mga Aklanon, exempted sa pagbabayad ng terminal fee

Ni Kate Panaligan at Bert Dalida, YES FM and Easy Rock Boracay

Exempted sa pagbabayad ng terminal fee sa RoRo ang mga Aklanon.

Ito ang kinumpirma ni Jetty Port Administrator Nieven Maquirang sa isang panayam ng himpilang ito.

Sinabi nito na basta’t may ipapakita lamang na valid ID bilang patunay na ikaw ay residente ng Aklan o nagtatrabaho sa Boracay ay hindi ka obligadong magbayad ng terminal fee.

Kapag dalubhasa naman sa pagsasalita ng Aklanon ang mga ito ay hindi na rin nila sinisingil pa.

May mga Aklanon naman kasi na sa ibang lugar na rin nagtatrabaho at nakatira, pero sa Aklan talaga ipinanganak.

Samantala, pinayuhan naman ni Maquirang ang publiko lalo na ang mga landowners or business owner ng mga establisemyento sa Boracay na kumuha na ng terminal pass lalo na kung labas-pasok ang mga ito sa isla.

Ang terminal pass umanong ito na nagkakahalaga ng isang daang piso ay sapat na upang hindi na kailangang magbayad ng terminal fee sa buong taon.

Ang kailangan lamang umano ay ang mag-fill up ng ibibigay nilang form, mag-presinta ng barangay clearance o police clearance na nagpapatunay na ikaw ay madalas pumunta ng Boracay.

Planong “guarantee deposit” para sa Hospital Bill ng mga indigent na Malaynon hindi libre --- SB

Ni Jay-ar Arante, YES FM Boracay

Hindi libre ang planong “guarantee deposit” para sa hospital bill ng mga indigent na Malaynon.

Ito ang nilinaw sa katatapos lang na session ni SB member Rowen Aguirre tungkol sa panukalang pagtulong sa mga mahihirap na mga Malaynon na walang sapat na pambayad sa provincial hospital.

Sinang-ayunan naman ito ni SB member Esel Flores, sa pagsasabing kailangan pa ring bayaran ng pasyente ang perang ginamit o iginarantiya ng LGU Malay para sa kanilang hospital bill.

Ito’y upang maka-avail o makabenipisyo naman ang iba pang indigent na Malaynon.

Papaano nga naman umano kasi ang ibang Malaynon na mga nangangailangan din ng financial assistance kung hindi nila ito babayaran?

Nilinaw din ni Vice Mayor Ceceron Cawaling na ang nasabing guarantee deposit ay garantiya lamang upang makalabas mula sa provincial hospital ang mga Malaynong pasyente na ma-a-admit doon na walang sapat na pambayad.

At hindi umano ito nangangahulugan na libre na ang kanilang hospital bill.

Samantala, nasa pag-uusap pa rin ng konseho kung magkano ang magiging “guarantee deposit” para dito.

Wednesday, May 22, 2013

Mga kaso ng pag-abandona sa mga kabataan sa isla, ikinalungkot ng Simbahang Katolika ng Boracay

Ni Peach Ledesma, YES FM Boracay

Lungkot ang naramdaman ng Simbahang Katoliko sa Boracay dahil sa magkakasunod na mga kaso ng pang-aabandona ng mga sanggol sa isla.

Ayon kay Fr. Joel Zambrona ng Our Lady of Holy Rosary Parish Church sa isla ng Boracay, nakakalungkot umano ang mga pangyayaring ito lalo na at alam naman ng lahat na ang buhay ay isang mahalaga at sagradong bagay na hindi basta-basta lang sinisira.

Anya, kahit ang mga parokyano ng nasabing parokya ay nagpahayag din ng kani-kanilang mga saloobin, at ang iba umano ay nakaramdam ng inis at galit sa kung sinumang gumawa ng bagay na ito.

Dagdag pa nito, hindi naman kasi umano lahat ay nabibigyan ng pagkakataon na maging isang magulang at mabiyayaan ng anak, ngunit bakit may mga tao pang nagagawang sayangin ang pagkakataon kapag sa kanila ito ibinibigay.

Dahil dito, sinabi ni Fr. Zambrona na hindi solusyon ang pagpapalaglag, lalo na sa mga kasong pagbubuntis ng wala sa oras o na hindi napapanagutan, dahil hindi kayang maayos ng isa pang problema ang nauna nang kamalian.

Sa kabilang banda, nanawagan din siya sa mga naiinis o nagalit sa gumawa ng bagay na ito na sana ay maawa din umano sa taong ito dahil hindi niya siguro alam ang kanyang ginagawa.

Ipagdasal na lang din sana ang taong gumawa nito na sa susunod na mabigyan siya ulit ng pagkakataon na maging isang magulang ay panindigan na niya ang kanyang responsibilidad.

Ipinaaabot niya rin sa mga indibidwal na may ganitong klaseng problema na sana ay ituloy na lang ang pagbubuntis at ipanganak ng maayos ang bata.

At kung hindi na kaya, naniniwala naman ang pari na may mga tutulong sa mga ito.

Nanawagan din siya sa mga magulang na sana ay gabayan nila ng maayos ang kanilang mga anak dahil responsibilidad nilang turuan ang mga kabataan, at kung magagabayan lang ay hindi naman umano mapapariwara ang mga ito.

Sa mga kabataan naman, sana ay makinig sa mga magulang dahil hindi naman nawawala ang pagmamahal ng mga magulang sa kanilang mga anak.

Ihinayag niya rin ang kanyang hamon sa bagong henerasyon na magsilbing halimbawa sa kanilang kapwa kabataan sa pamamagitan ng pag-iwas sa mga masasamang gawain, bisyo, at huwag makalimot sa mga “Christian values” para hindi mapariwara.

Ang nasabing mga reaksyon ay may kaugnayan sa natagpuang labi ng fetus na pinag-hihinalaang nasa anim na buwang gulang at itinapon sa loob ng material recovery facility (MRF) ng Brgy. Manoc-manoc, Boracay.

Matatandaang nitong buwan lang din ay may natagpuang bata sa nasabi ding barangay na sa kabutihang palad ay nabuhay at sa kasalukuyan ay nagre-recover na. #pnl052013



Ordinansang nagbabawal sa mga establishemento sa Boracay na maglagay ng basement, mainit na tinalakay sa SB session

Ni Jay-ar Arante, YES FM Boracay

Mainit na tinalakay sa Sb session kaninang umaga ang tungkol sa ordinansang nagbabawal sa paglagay ng mga basement ng mga establishemento sa Boracay.

Base sa ordinansang ito na inisponsoran ni SB member Rowen Aguirre, kailangan umanong protektahan ang water level ng Boracay lalo pa’t may ilang mga resort sa isla ang nagpa-pump ng tubig galing sa mga hinukay na basement at pinapadaloy papuntang dagat.

Bagay na sinang-ayunan naman ni SB member Esel Flores, lalo pa’t malubha umanong mapanganib kung magpapatuloy ang nasabing aktibidad ng mga nasabing establisemyento.

Ayon pa kay Aguirre, kailangan ang mga basement umanong ito ay para lamang paglagyan ng mga generators, laundry, parking area at mga hotel amenities.

Samantala, dahil may pagkamabusisi pa ang nilalaman ng nasabing ordinansa, ang ganitong usapin ay kailangan ding ikunsulta muna sa municipal engineer ng Malay.

Katawan ng patay na bata, natagpuan sa MRF Manoc-manoc, Boracay

Ni Bert Dalida, YES FM Boracay

Isang patay na katawan ng bata ang natagpuan sa MRF o Material Recovery Facilities sa Manoc-manoc kahapon ng hapon.

Nakalagay na umano sa plastic bag ang nasabing bata nang matagpuan ng isa sa mga nagtatrabaho doon.

Ayon kay Abraham Maming ng MRF Manoc-manoc, tatlong plastic bag umano ang pinagsidlan ng nasabing bata, na noong una’y inakala niyang bituka lamang ng malaking isda.

Subali’t nang ibuhos na umano ang plastic, ay ikinagulat nito nang makita ang katawan ng bata.

Dahilan upang ipinagbigay alam niya ito sa kanilang supervisor.

Samantala, kaagad namang inimbistigahan ng mga taga Boracay PNP at Scene of the Crime Operatives ang nasabing pangyayari.

Kung saan, minarapat muna nilang dinala sa ospital ang katawan ng bata upang ipasuri, bago pinabendisyunan sa simbahan at inilibing.

At habang ginagawa ang balitang ito, ay hindi pa nakukumpirma ng mga otoridad ang edad ng bata.

Mga Ati sa Boracay, pinagbawalang magtayo ng mga istraktura sa lupang ipinagkaloob ng NCIP

Ni Bert Dalida, YES FM Boracay

Bawal nang magpatayo ng bahay o anumang istraktura sa Manoc-manoc ang mga Ati sa Boracay.

Ito’y matapos magbaba ng cease and desist order ang Regional Trial Court RTC Branch 5 sa Kalibo, Aklan para sa mga taga-BATO o Boracay Ati Tribal Organization kamakailan.

Ang order o mandato ay ibinaba ni Judge Elmo del Rosario na nagsasabing bawal magtayo ng anumang permanenteng istraktura ang mga taga Ati community sa lupang ipinagkaloob sa kanila ng National Commission on Indigenous People o NCIP.

Nabatid na ang ibinabang order ay base sa isinampang motion ni Ulysses Rudi Banico, na isa sa mga claimants ng nasabing lupain.

Iginiit umano sa korte ni Banico na i-nullify o ipawalang bisa ang titulong ipinagkaloob sa mga Ati.

Ang pagpapatayo umano kasi ng mga Ati ng istraktura doon ay paglabag sa kautusang ibinaba noong Enero 20, 2011 na nagsasabing hindi muna dapat galawin ang lupang iyon dahil sa status quo order nito.

Matatandaang ang taga Ati Community ay pinagkalooban ng CADT o Certificate of Ancestral Domain Title ng gobyerno noong Enero 21, 2011.

Tuesday, May 21, 2013

Seminar para sa Employees Compensation Programs ng DOLE, raratsada sa Boracay sa Huwebes

Ni Bert Dalida, YES FM Boracay

Isang seminar para sa Employees Compensation Programs ng Department of Labor and Employment (DOLE) ang gaganapin sa Boracay sa Huwebes.

Base sa imbitasyong pinadala ng DOLE Aklan field office kahapon, nabatid na ang nasabing seminar ay naglalayong mabigyan ng ibayong kaalaman ang mga empleyado at mga employer tungkol sa mga mahahalagang programa ng DOLE.

Tatalakayin dito ang mga benepisyong nararapat sa kanila at ang iba pang aktibidad, na pangungunahan mismo ng DOLE 6 Regional Office at ng ECC o Employees' Compensation Commission.

Gaganapin naman sa isang resort sa station 2 Balabag ang nasabing seminar sa buong araw ng Huwebes.

Mga magulang at estudyante sa Boracay National High School, nagtulungan sa unang araw ng Brigada Eskwela 2013

Ni Jay-ar Arante, YES FM Boracay

Dinaluhan ng mga estudyante at mga magulang ang unang araw ng Brigada-Eskwela sa Boracay National High School.

Ito ay sa layuning magkaroon ng malinis at maayos na mga silid aralan para sa pagbubukas ng eskwela ngayong taon.

Ayon kay Boracay National High School Principal II Almarie Vallejo, naging smooth umano at maayos ang unang pagbubukas ng Brigada Eskwela sa kanilang paaralan.

Sa aktibidad na ito, nagsama-sama at nagtutulungan sa paglilinis ang mga magulang at mag-aaral, bilang paghahanda ng paaralan para sa pasukan.

Dagdag pa nito ang mga nakiisa sa naturang brigada ay naging matulungin sa taunang proyrekto ng Deped para sa mag-aaral.

Ang Brigada Eskwela 2013 o ang National Schools Maintenance Week ay taunang aktibidad alinsunod sa direktiba ng Department of Education.

Nabatid na nagsimula kahapon ang Brigada-Eskwela na magtatapos naman sa darating na Sabado.

Mga illegal structures sa isla ng Boracay, patuloy na minomonitor ng LGU Malay

Ni Jay-ar Arante, YES FM Boracay

Patuloy pa rin umanong minomonitor ng LGU Malay ang mga illegal structures sa isla ng Boracay.

Ayon kay Municipal Engineer Elizer Casidsid, may mga nagpapatayo ng illegal structures na walang sapat na permit galing sa munisipyo ng Malay.

Dagdag pa nito, noong nakaraang linggo umano ay may nahuli silang lumabag sa batas at patuloy na gumagawa ng mga illegal structural buildings na mahigpit nilang ipinagbabawal dito sa isla ng Boracay.

Aniya, ang pagkakaroon ng sapat nga mga papeles ay mahalagang bagay noon paman upang hindi sila masita ng mga kinauukulan.

Samantala, patuloy umano nilang minomonitor ang kung sino mang lalabag sa nasabing batas at handa umano sila sa mga pagsaway sa mga ito.

Mayor John Yap, pinasalamatan ang mga sumoporta sa BBMP at Boracay Day

Ni Bert Dalida, YES FM Boracay

Pinasalamatan ni Malay Mayor John Yap ang mga sumuporta sa BBMP at Boracay Day nitong Sabado.

Sa ginanap na fellowship night ng anibersaryo ng BBMP o Boracay Beach Management Program at launching ng Boracay Day nitong Sabado ng gabi, kinilala ng alkade ang naging partisipasyon ng mga stakeholders at mga indibidwal sa isla upang magtagumpay ang mga nasabing aktibidad.

Ilan sa mga pinasalamatan ni Yap ay ang mga lumahok sa mahigit-kumulang dalawang linggong aktibidad ng Boracay Day, katulad ng beach clean-up at tree planting.

Maging ang mga taga-pribadong sektor na nag-commit o nangako ng suporta sa mga programa ng BBMP ay kanya ring kinilala at pinuri.

Bagama’t aminado ito na marami pang mga bagay na dapat ding tutukan sa isla, iginiit din nito na dapat ang diwa ng voluntarism at pagmamalasakit para sa isla ay magpapatuloy para sa kapakanan ng lahat.

Ang BBMP at Boracay Day ay ang mga aktibidad na isinulong ng LGU Malay na tumutok sa pangangalaga ng kalikasan, partikular ng Boracay.

Pangatlong taong selebrasyon ng Boracay Beach Management Program at paglulunsad ng Boracay Day, matagumpay na idinaos

Ni Mackie Pajarillo, YES FM Boracay

Matagumpay na ipinagdiwang ang paglulunsad ng “Boracay Day” at ang pangatlong taong selebrasyon ng Boracay Beach Management Program (BBMP) nitong Sabado ng gabi.

Kung saan, ito’y pinangunahan ng mga taga lokal na pamahalaan ng Malay ni mismong Malay Mayor John Yap.

Kasama ang mga taga Department of Environment and Natural Resources (DENR), Department of Science and Technology (DOST), Boracay Foundation Inc. (BFI), Boracay Tourist Assistance Office (BTAC), ilang LGOs at NGOs, at ng mga stakeholders.

Tampok sa nasabing selebrasyon ang magarang salu-salo bago nagsimula ang programa at ang natatanging pagganap ng sikat na artist na si Joey Ayala.

Kasama sa kanyang performance ang mga aral tungkol sa kalikasan.

Anya, ang lahat ng bagay ay magkaugnay, may patutunguhan.

Dagdag pa nito na likas umano ang pinakamainam at walang libre dito sa mundo; mga paalaala mula sa kanyang awitin na talaga namang may katotohanan at katuturan sa ating buhay.

Kasunod noon ang pormal na pagsisimula ng programa na ini-host ni Acs Aldaba, BIWC Customer Service Officer at ang pagbibigay ng talumpati ni Miguel “Mike” Labatiao tungkol sa mga programa at proyekto ng mga taga Boracay Association of Scuba Diving Schools (BASS).

Hindi rin nagpahuli ang mga taga-DOST dahil sa nasabing selebrasyon kung saan nagbigay ng kanyang salaysay si Department of Science and Technology (DOST) Mike Montejo, patungkol naman sa mga plano at proyekto para sa Boracay Coral Restoration dito sa isla.

Dagdag ng huli nasa labing-apat na libo na mga fragments ang kanilang naitanim na, sa kailaliman ng baybayin ng Boracay at nasa limang milyong piso ang naka-atang na budget para sa isang taong proyekto at rehabilitasyon ng mga korales.

Kasabay noon ang pag turn over ng mga taga DOST sa nasabing proyekto kay Mayor Yap at ang pagbibigay ng mga certificate of appreciation sa lahat ng mga lumahok sa nasabing programa.

Mga taga-LGU Malay at mga stakeholders sa Boracay, nagsama-sama sa selebrasyon ng Boracay Day

Ni Bert Dalida, YES FM Boracay

Tatlong taon na ang nakakalipas simula ng ilunsad ang Boracay Beach Management program.

Ngayong araw, muling nagsama-sama ang mga taga LGU-Malay at mga stakeholders sa isla ng Boracay.

Ito’y upang bigyang daan ang isang napakahalagang kasaysayan sa isla.

Ito ay pag lulunsad naman ng Boracay Day, na sinimulan nitong a uno ng Mayo kasabay ng Fiesta De Obreros sa bayan ng Malay.

Kung saan sa loob ng labing-walong araw, ang mga stakeholders, at pribadong sector,ibat-ibang Department ng pamahalaan at indibidwal ay lumahok sa mga aktibidad kaugnay sa pangangalaga ng isla.

Ayon nga kay DOT officer in charge Tim Ticar, maganda ang idinulot ng Boracay Beach Management sa isla, dahil pinukaw nito ang mga ahensya at indibidwal na makibahagi sa pagtataguyod ng Boracay.

Samantala, pinangunahan naman ng lokal na pamahalaan ng Malay ang selebrasyon ngayong hapon upang kilalanin at bigyang parangal ang mga taos-pusong sumusuporta sa Boracay Beach Management Program.

Programa ng PNRC Boracay, naging makabuluhan

Ni Jay-ar Arante, YES FM Boracay

Ihinayag ngayon ni Philippine National Red Cross Administrator Boracay Chapter Marlo Schoenenberger na naging makabuluhan ang isinagawang programa ng PNRC chapter sa isla ng Boracay kung saan nagkaroon sila ng ibat-ibang aktibidad gaya na lamang ng lifeguard competition na hinati sa  junior and senior division.

Dinaluhan din ito ng iba’t-ibang Red Cross teams mula sa buong Pilipinas kasama na ang Australian Red Cross.

Nabatid mula dito na sa ginawang aktibad, nanalong over all champion ang Davao at nakuha naman ng Malay Chapter ang 2nd place.

Nagkaroon din umano sila ng lantern parade noong Biyernes, ika-18 ng Mayo, na nagsimula mula sa Balabag Plaza patungo sa isang resort sa station 2.

Ang nasabing event ay pangalawang taon na nilang ginawa sa isla ng Boracay.

Ipinagmalaki din ni Schoenenberger na mas lalo pang dumami ang mga kalahok na sumali ngayong taon.

Ang nasabing event ng PNRC-Boracay ay isa sa mga bahagi ng mga programa ng Boracay Day.

Pagbawas ng bilang ng mga mga bakasyunistang Taiwanese sa Boracay, ramdam na

Ni Jay-ar Arante, YES FM Boracay

Dahil sa lalo pang umiigting ang tensyon sa pagitan ng PIlipinas at bansang Taiwan, nararamdaman na umano ngayon ang pagbawas ng mga turistang Taiwanese na pumupunta at nagbabakasyon sa isla ng Boracay.

Ayon kay Department of Tourism officer-in-charge Tim Ticar, nabawasan ang mga turistang Taiwanese dahil sa marami umanong mga nakanselang flights gayon din sa mga hotels na tutuluyan sana ng mga ito.

Pero hindi naman aniya magtatagal ang problemang ito at sa mga susunod na buwan, aasahang babalik rin sa dati ang bilang ng mga ito partikular na ang pagpunta nila sa isla.

Matatandaang nagkaroon din noon ng hidwaan ang bansa at ang China kung saan ipinagbawal din sa mga Chinese ang pagpunta dito ngunit agad din naman itong naayos.

Sa kasalukuyan, focus na muna sila sa pag-po-promote ng isla, kung saan nabatid na may mga pupunta umanong labing-apat na grupo ng mga medyang Korean national sa bansa at kabilang sa mga pupuntahan nila ay ang Boracay.

Samantala, nanawagan naman ito sa publiko na makitungo parin ng maayos sa mga Taiwanese na bisita, naniniwala kasi si Ticar na hindi naman umano lahat ng Pinoy ay masama ang loob.

Dagdag pa nito, bagama’t nabawasan ang bilang ng mga Taiwanese ngunit patuloy pa rin umanong dumadami ang mga turistang pumupunta sa isla dahil siksikan parin ang mga tao sa beach, lalo na at punuan din umano ang mga hotels sa isla ng Boracay.