Friday, February 24, 2012

Akelco, pinagpaliwanag na ng LGU Malay

Ni Edzel Mainit, Senior Field Reporter, YES FM Boracay

Pinagpaliwanag na umano ng lokal na pamahalaan ng Malay ang Aklan Electric Cooperative (Akelco) kamakalwa kaugnay sa sunud-sunod na insidente ng pagkaka-kuryente sa isla ng Boracay.

Ito ang nabatid mula kay Island Administrator Glenn Sacapaño sa isang panayam.

Ayon sa administrador, ang Akleco naman aniya ay nangakong aayusin ang mga kawad ng kuryente para hindi na maka-disgrasya pa.

Katunayan, may mga naka-iskedyul na rin silang paglilipat sa mga kawad ng kuryente sa mas mataas na poste.

Sa paghaharap ng Akelco at ni Sacapaño ay pinuna ng administrador ang mga matagal nang naka-laylay na kable ng kuryente ng nasabing kumpanya.

Subalit nang matanong kung ano ang maitutulong ng LGU Malay sa problema ng Akelco gayong ang dahilan ng kooperatiba kung bakit hindi nailipat lahat ng kable sa mataas na poste ay dahil sa walang road right of way o ligtas para paglagyan ng mga poste na hindi makakaapekto sa publiko at maiwasan na ang sakuna.

Ngunit sagot dito ni Sacapaño, papaano matutulungan ng LGU o barangay ang Akelco gayong hindi naman sila humihingi ng tulong.

Kaugnay nito, kinuwestiyon din ni Sacapaño kung bakit pinapahintulutan ng kooperatiba na ikunekta ang linya ng mga business establishments na nakitaan ng problema, lalo na ang mga malalapit nang umabot sa linya ng Akleco.

Bilang tugon, inihayag ni Engr. Arnaldo Arboleda ng Akelco Boracay, na may mga pagkakataon na mas nauna pa aniya ang posteng maitayo bago ang gusali.

Subalit, kahit alam naman aniya na dapat ay may dalawang metrong gap ang gusali mula sa main line ng Akelco, ay tila hinahabol din ng taas ng gusali ang taas ng poste nila.

Dahil dito, umaasa ang Arboleda na ang mga usapin katulad nito ay maupuan na ng Akelco at LGU Malay partikular ng Municipal Engineers Office.

Streetlight sa Boracay, ayos na bago ang Mahal na Araw

Ni Edzel Mainit, Senior Field Reporter, YES FM Boracay

Ikinukonsidera na rin ngayon ng lokal na pamahalaan ng Malay ang pagkakaroon ng streetlights sa Sitio Lapus-lapus, Brgy. Balabag dahil sa kalimitang may mga kasong naitatala sa lugar na ito dahil madilim dito at walang pamamahay.

Ito ay kasunod na rin ng rekomendasyon ng Boracay Police na lagyan ng ilaw ang liblib na lugar na ito.

Subalit hindi pa masabi ni Island Administrator Glenn Sacapaño kung kailan ito maisasagawa.
Gayon pa man, ayon sa administrador, may isang miyembro ng Municipal Auxiliary Police o MAP na rin silang na-asign dito na malapit lang din ang bahay sa lugar para mamonitor ang nasabing area.

Matatandaang noong isang taon lang ay sa isang kuweba sa nasabing area itinago ang bangkay ng isang dalaga, at tinambangan at binaril naman kamakailan lang ang isang empleyado ng isang sea sports establishment sa isla sa area din na ito.

May mga insidente din ng hold-up sa ilang tricycle driver at ilang turistang nangyari dito.

Samantala, aminado din si Sacapaño na may problema talaga ang streetlights sa main road kaya hindi na naman ito umiilaw.

Pero ang pagsasaayos sa mga streetlights ay minamadali na rin umano nila dahil target na matapos itong ayusin bago ang Mahal na Araw.

Magugunitang nitong Disyembre bago ang unang araw ng Misa de Gallo ay pina-ilaw na ang streetlights sa main road, ngunit halos isang linggo pa lamang ang nakakalipas ay hindi na naman ito gumagana.

Taiwanese national sa Boracay, na-ligtas sa pagka-lunod

Ni Edzel Mainit, Senior Field Reporter, YES FM Boracay

Ligtas at kasalukuyang ginagamot na rin ngayon sa isang pagamutan sa bayan ng Kalibo ang isang Taiwanese National makaraang mabiktima ito ng pagka-lunod sa Boracay kaninang tanghali.

Ayon kay PO 2nd Condrito Alvares ng Philippine Coast Guard Boracay, naliligo at mayroong swimming activity kasama ang mga kaibigan ng biktimang kinilalang si Waug Yai Meng sa Area ng Station 2.

Hindi alintana umano ng mga kaibigan nito na malayo na pala ang nilangoy at nasa malalim na bahagi na ng dagat si Yai Meng mula sa dalampasigan kaya kamuntik na itong nalunod.

Napag-alama ding may sakit di umano sa puso ang biktima.

Nilapatan naman ng lunas ang nasabing Taiwanese sa isang pribadong klinika sa isla, bago nilipat at dinala sa bayan ng Kalibo para sa karampatang pag-gamot.

Pinal na desisyon ukol pag-i-endorso sa proyektong reklamasyon, nasa SB pa rin

Ni Edzel Mainit, Senior Field Reporter, YES FM Boracay

Naniniwala si Boracay Foundation Incorporated (BFI) Board of Trustees Member Loubel Cann na hindi naman siguro lumambot ang Sangguninag Bayan ng Malay sa hinihinging pag-endorso ng pamahalaang probinsiya para sa proyektong reklamasyon sa Caticlan.

Ito ay dahil noong una pa man aniya, ang nais lamang ng BFI na mangyari ay ang masunod at sumunod sana sa tamang proseso ang probinsiya sa ganitong uri ng proyekto.

Nirerespeto at at kinikilala na rin ng probinsiya ang karapatan ng konseho at ilang indibidwal na sana ay bahagi sa pagbabalangkas ng desisyon at mga bagay na dapat malaman ng publiko sa paraan ng public hearing, ngunit ipinagkait pa ito ng may proposisyon ng proyekto.

Subalit sa ngayon ay nakita naman umano nila na mistulang tanggap na rin ng probinsiya ang kanilang pagkakamali kaya sinusubukan na rin ng mga ito na sumunod sa tamang proseso kahit pa sabihing babalik na naman umpisa ang lahat.

Sa ngayon ay nakita naman umano ng BFI na nagkaroon nang saysay ang ipinaglalaban nila.

Pero ang sa kanila lamang aniya, kung noong una ay nanindigan ang konseho na wag bigyan ng pag-endorso ang proyekto, subalit bakit ngayon ay i-i-endorso na rin nila.

Gayon pa man, nilinaw ni Cann na kung ano man ang maging pasya ng konseho kaugnay sa usaping ito ay nasa SB parin aniya ang pinal na desisyon.

Matatandaang, nitong Martes ay tinalakay ng konseho sa sesyon ang bagay na ito at nais na rin ng SB na bumuo ng desisyon gayong matagal na ring ang isyung ito, makaraang mabatid sa isinagawa nilang committee meeting na handa na rin pala ang probinsiyang ibigay ang lahat ng demand ng lokal na pamahalaan ng Malay partikular ang konseho. 

Thursday, February 23, 2012

Lokal na mangingisdang Boracaynon, gagawin na lang taga bantay ng Marine Park


Ni Edzel Mainit, Senior Field Reporter, YES FM Boracay

Hindi na kailangang mangisda pa ang mga lokal na mangingisda ng Boracay, sakaling matuloy ang binabalak ng Sangguniang Bayan ng Malay at Sangkalikasan Cooperative.

Ito ay dahil gayong proteksiyon para sa mga isda partikular sa Marine Park Area, ang nais isulong ng konseho para maprotektahan ang mga isda sa lugar kung saan inihulog ang mga Coral Reef Buds ng Sangkalikasan lalo pa at nakita na umano nilang dumadami na ang isda sa area na ito.

Subalit sa kabila ng magandang resulta ng programang Sangkalikasan, nababahala ngayon ang mga ito sa nakikitang sitwasyon.

Gayong may ilang dayuhang turista at dayung mangisngisda na pumaparoon, na dapat ay ipinagbabawal sana ang ganitong gawain lalo pa at ang layunin ng programang ito para sa panturismong atraksiyon.

Ngunit para mabantayan ang dapat protektahang area. Nasa plano na ngayon ng konseho na ang mga lokal na mangingisda sa Barangay Balabag ang ilalagay na taga bantay at taga singil sa mga nagkakaroon ng aktibidad sa naturang  Marine Park Area.

Dahil  naniniwala si SB Member Esel Flores, na mas pa ang kikitain ng mga lokal na mangingisda kung sila ang ilalagay na taga bantay sa bahaging ito kaysa mangisda pa sa laot.

Konseho, diskumpiyando pa rin sa pangako ni Gov. Marquez


Ni Edzel Mainit, Senior Field Reporter, YES FM Boracay

Kahit na may binitiwan nang pangako si Aklan Governor Carlito Marquez sa paraan ng isang sulat na ipinaabot ni sa LGU Malay, nais parin ng Sangguniang Bayan na makasiguro na tutupad nga ang pamahalaang probinsiya sa pangakong ito.

Bunsod nito, humirit si Sangguniang Bayan Member Wilbec Gelito sa kapwa nito konsehal na kung maaari, para maging opisyal at mapipilitang tumalima ang probinsiya sa pangako nila, ipa-notaryo muna ang mga dokumentong ito.

Subalit, tiwala naman si SB Member Esel Flores na hindi ganon sa inaakala nila ang pamahalaang probinsiya, gayong ang lahat umano ng demand na ito ay nakasaad naman sa resolusyon ng pag-endorso nila sa proyekto kung saka-sakali.

Sa oras umano na hindi tumalima ang probinsiya sa pangakong ito, maaari nilang e-revoke o kanselahin ang pag-endorso na ibinigay nila.

Samantala, ayon naman kay Flores, dahil sa katagalan na rin ang isyung ito, kailangan na rin umano siguro nilang makabuo ng disisyon, ukol sa kontrobersiyal na reklamasyong ito sa Caticlan.

Gov. Carlito Marquez, nangakong ibibigay ang demand ng SB Malay


Ni Edzel Mainit, Senior Field Reporter, YES FM Boracay

Ipinangako ni Aklan Governor Carlito Marquez sa paraan ng isang sulat na ipinaabot ni sa LGU Malay, ang kanilang commitment bilang tugon sa demand ng LGU Malay kapalit ng peg-endurso sa proyektong reklamasyon sa Caticlan ng Sangguniang Bayan.

Sa sulat ng gobernador na binasa ni SB Member Esel Flores sa SB Session kahapon, ipinangako ng gobernador na handa na silang ibigay ang mga kahilingang inilatag ng konseho sa pamahalaang probinsya.

Lamang maibigay ang pang-endorsong kailangan ng probinsya at para maka-usad na rin ang naantalang proyekto pagtatambak sa Caticlan o 2.6 hectar na reklamasyon doon, kung saan, lahat nang nabanggit na limang demand ng SB, ay isa-isang idinetalye at sinagot sa sulat ni Marquez kasama ang pagpatupad sa nakasaad sa Environmental Compliance Certificate ECC.

Magugunitang ang probinsya, kahit may kaso pang kinakarap ngayon sa Supreme Court ukol sa proyektong ito ay, umapela parin sa SB Malay ng pag-endorso kung saan sa kasalukuyan ay nasa pangalawang pagbasa na ng konseho makaraang i-adopt ng SB ang Committee Report ni Flores.

Gayon paman inaasahang may mga nakatakda pang pagdinig ang SB kaugnay dito para sa pormal na pagdidisisyon sa usaping ito.

SB Malay, lumambot na sa pamahalaang probinsya sa usaping reklamasyon?


Ni Edzel Mainit, Senior Field Reporter, YES FM Boracay

Mistulang lumambot na rin ang lokal na pamahalaan ng Malay, partikular ang Sangguniang Bayan, ukol sa hinihinging pag-endurso sa proyektong reklamasyon sa Caticlan ng pamahalaang probinsiya.

Sapagkat nitong nagdaang Biyernes, ika labing pito ng Pebrero, tila mayroong na nang napipisil na pasya ang konseho nang magsagawa ng Committee Meeting ukol sa kahilingan ni Mayor John Yap na magkaroon ng penal na pagdinig kaugnay sa request ng probinsiya na bigyan na nang pag-endurso ang proyekto ito.

Sa sesyon ng konseho kahapon, isinatinig ni SB Member Esel Flores ang kanilang katayuan ukol sa usaping ito.

Lalo pa at nakita naman umano nila na handa at interesado na rin ang pamahalaang probinsiya na ibigay ang kanilang mga demands o kahilingan ng LGU Malay, kapalit ng pag-i-endorso ng SB sa proyekto ay may limang kahilingan ang konseho sa probinsiya.

Una rito ay ang hinihingi na 1,000 sqr. meter na espasyo para sa LGU Malay mula sa na- reclaim na area. Ikalawa, pagbuo o pag-organisa sa Caticlan Jetty Port Management Board. Ikatlo, ang pagkakaroon ng manipesto na hanggang 2.6 hectar lamang ang reklamasyon, ika-apat na kahilingan na sana ay walang ma-displace sa mga lokal na transportasyon sa Jetty Port tulad ng mga bangka, at ika lima ay magkaroon parin ng komprehensibong pag-aaral sa epektong dulot sa kapaligiran ng proyektong ito kapag Habagat at Amihan Season.

Nabatid na ang mga nabangit na demand ay inilatag na rin umano sa committee hearing.

Matatandaang noong una ay deadma lang sa probinsiya ang pag-endurso ng konseho sa paniniwalang hindi na ito kailangan sa proyekto.

Subalit nang magsampa ng kaso ang Boracay Foundation Incorporated (BFI) at konseho ukol sa Invironmental isyu, laban sa probinsiya na siyang may proposisyon ng reklamasyon, ang probinsiya naman ngayon ang namimiliit na i-endurso ang proyekto.

Ito ay sa paniniwala ng pamahalaang probinsiya na makakatulong ito para bawiin na ng Supreme Court ang Temporary Environmental Protection Order o TEPO na ibinababa laban sa proyektong ito at maituloy na rin ang reklamasyon.

P100K reward, patong sa ulo ng suspek sa pagpatay kay Crisanta Vicente


Ni Malbert Dalida, News Director, YES FM Boracay

Isandaang libong pisong reward ang nakapatong ngayon sa ulo ng suspek sa pagpatay sa empleyadong si Crisanta Vicente sa Boracay.

Ito ang kinumpirma ni Psupt. Julio Gustilo Jr., dating hepe ng Boracay Tourist Assistance Center (BTAC), at ngayo’y hepe ng Aklan Police Provincial Tourist Police Unit.

Sinabi nito na ang isandaang libong pisong reward ay ibinigay ng mismong employer ni Crisanta, na sinasabing ninakawan at pinatay sa Boracay kamakailan lang.

Dahil dito, nanawagan ngayon si Gustilo sa lahat ng mga nakakaalam sa pagkakakilanlan at kinaroroonan ng suspek, upang ito’y madakip.

Samantala, idinagdag pa ni Gustilo na nakahanda rin ang mga otoridad sa mga Boracay na magpakalat ng litrato ng suspek, maging sa mga istasyon ng telebisyon sa mabilis na ikadarakip ng salarin.

Matatandaang ang bente otso anyos na empleyadong si Crisanta ay pinagbabaril matapos nakawan ng malaking halaga ng pera habang nagmamaneho ng kanyang motorsiklo, nitong nagdaang Pebrero a dos, sa Sitio Lapus-lapus, Balabag, isla ng Boracay.

Tuesday, February 21, 2012

BTAC, may bagong hepe na


Ni Edzel Mainit, Senior Field Reporter, YES FM Boracay

Dahil sa bago na ang pangalan ng Boracay Police para sa layuning pang-turismo, bago na rin ang hepe ngayon.

Kung noon ay Boracay Special Tourist Police Office (BSTPO) ang pangalan nito na pinamumunuan ni Supt. Julio Gustilo Jr., kasabay ng ilang pagbabago sa pangalan ng himpilan ay ang pagpapalit nito sa pangalang Boracay Tourist Assistance Center (BTAC), at kasabay nito ay pinalitan na rin si Gustillo bilang hepe.

Sa kasalukuyan ay si P/Insp. Christopher Prangan na ang iniluklok na kauna-unahang hepe ng BTAC.

Ito ang nabatid mula kay Gustilo dahil ang dating hepe ay siya nang mamumuno sa Aklan Provincial Tourist Police Unit kung saan saklaw nito ang lahat ng bayan na may tourist assistance center, kasama na ang BTAC.

Samantala, dahil sa panturismo ang layunin ng BTAC, nilinaw ni Gustilo na anumang kaso, pangyayari, o krimen na walang kaugnayan sa turista ay bahagi pa rin ng kanilang trabaho na kailangang aksyunan kabilang na ang mga ordinansa ng bayan at probinsya.

Dagdag pa nito, kahit na ang Department of Tourism ang nais ding na gawin itong BTAC batay sa National Police Commission Resolution No. 2012-001, at ihinayag ng huli na nasa ilalim pa rin sila ng Aklan Police Provincial Office (APPO) sa kasalukuyan.

Tour guides sa Boracay, kinausap ni Gustillo para sa pagbibigay-paalala sa mga turista


Ni Edzel Mainit, Senior Field Reporter, YES FM Boracay

Pakikipag-usap sa mga tourist guide sa Boracay para sa seguridad ng mga turista ay nasimulan nang ipalaganap.

Ito ay ihinayag ni Supt. Julio Gustilo, hepe ng Aklan Provincial Tourist Police Unit, kung saan ang Chinese at Korean tour guides ay naka-usap na umano nito upang mag-bigay paalala sa ilang mga batas na mayroon ang isla at sa pag-iingat sa kanilang mga kagamitan.

Para magkaintindihan, kasabay ng pag-uusap umanong ito ay sana ihayag ang paalala sa iba’t-ibang salita.

Samantala, gayong tapos na aniya ito sa mga singkit na tour guides, target naman ng tanggapan nila na kausapin ang mga tour guides ng Russian nationals.

Inaasahang magkakaroon na rin anya ng mga stickers na ididikit sa iba’t-ibang pampublikong sasakyan at lugar, kung saan nakalagay ang mga nabanggit na paalala.

Sa bahagi naman ng Tourist Police sa isla, ang pagpapakalat din ng stickers ay ginawa na rin umano nila para malaman ng publiko, turista man at lokal na residente, ang hotlines na dapat tawagan na oras na kailangan ang mga otoridad.

Matatandaang ang nasabing hakbang ay ginawa kasunod ng ilang insidente ng pagnanakaw sa isla kung saan ang kalimitang target ay ang mga turista.

Lalaking hindi nagsuot ng life jacket, kalaboso


Ni Malbert Dalida, News Director, YES FM Boracay

Kalaboso  ang inabot kahapon ng bente dos anyos na residente ng Boracay, matapos umano’y hindi magsuot ng life jacket.

Sa police report ng Boracay PNP, nabatid na pinayuhan ng municipal ordinance officer ang binata na magsuot ng life jacket, habang sakay ng bangka papuntang Boracay.

Sa halip na sumunod, ay sinita pa umano nito ang ordinance officer na kapwa pasahero nito sa bangka at sinabihang pasahero ka lang.

Nagpakita pa umano ng kawalang respeto ang inirereklamong lalaki at nagsimulang mag name drop o magbanggit ng pangalan ng mga pulis na kilala nito.

Dahil sa nasabing iskandalo sa bangka, ay nabahala ang mga pasahero doon.

Minarapat namang pagpahingahin sa presento ng pulis ang binata, na sinasabing nasa impluwensya ng nakalalangong inumin. 

Mga nakumpiskang meat products sa Kalibo International Airport, sinunog


Ni Edzel Mainit, Senior Field Reporter, YES FM Boracay

Sinunog na lamang ang labindalawang pakete ng meat products na nakumpiska mula sa isang Koreano sa Kalibo International Airport nitong nagdaang Biyernes.

Napag-alamang mula sa South Korea lulan ng eroplanong may direct flight mula sa bansang ito si Kim Ho Yeon, ang nasabing meat products.

Kung saan sampung pakete ng sausage at dalawang balot ng laman-loob ng baboy ang nakuha sa nasabing Koreano.

Subali’t ayon kay Gelisele de Pedro ng Kalibo Municipal Agricultures Office at Quarantine and Livestock Section.

Dahil sa ipinagbabawal ang pagpasok ng ganitong uri ng produkto sa Pilipinas lalo na kung wala itong kaukulang permiso at dokumento ay kinukumpiska ito ng mga awtoridad.

Sapagka’t pinangangambahan aniya na baka may dalang sakit at mahawa ng Foot and Mouth Disease at Mad Cow disease ang mga alagang hayop sa bayan at boung probinsyang ito, ang mga nasabing meat products, kaya sinunog na lamang.

BSTPO, may bagong pangalan na


Ni Edzel Mainit, Senior Field Reporter, YES FM Boracay

Mula Boracay Special Tourist Police Office o BSTPO ay pormal nang pinalitan ang pangalan ng himpilan ng Boracay Pulis, at sa ngayon ay Boracay Tourist Assistance Center na o BTAC.

Batay na rin sa inilabas na resulosyon # 2012-001 ng National Police Commission kung saan, sa buong Pilipinas, isa ang Aklan sa dalawampu’t limang probinsiya na mayroong Tourist Police Assistance Center na itinalaga ng Department of Tourism para sa siguridad ng mga turista sa mga lugar na ito.

Ito ang nabatid mula kay P/Supt. Julio Gustilo Jr., ang kauna-unahang Hepe ng Aklan Provincial Office Tourist Police Unit.

Kung saan si Gustilo ang mamumuno ng unit na ito sa buong probinsiya at saklaw nito ang ibang Tourist Assistance Center sa ibang bayan gayon din ng mga tourist Pulis sa Airport at mga pantalan.

Dahil bagamat sa Boracay ang Sentro ng turismo, pati ang mga bayan din na dinadaanan patungong Boracay mula sa bayan ng Kalibo ay dapat magkaroon na rin aniya ng sariling nilang Tourist Assistance Center. 

Gayun paman, dahil sa ang personnel lamang ng Boracay Assistance Center ang dumaan sa pagsasanay mula sa DOT.

Inaasahang maging ang mga Pulis sa mga bayan na mayroong Tourist Assistance Center na ito ay isasailalim din pagsasanay ukol sa tamang pagharap sa mga turistang nanga-ngailangan ng tulong.

Bagamat sana ay nasa Provincial Office ng Aklan Police sa bayan ng Kalibo ang tanggapan ni Gustilo, bilang himpilan din ng Aklan Provincial Office Tourist Police Unit.

Subali’t dahil sa wala pang itinakdang opisina para sa kanila, pansamantala ay dito umano muna sila maghihimpil sa Boracay Tourist Assistance Center. 

Bagong CENRO ng Boracay, nangangapa pa


Ni Edzel Mainit, Senior Field Reporter, YES FM Boracay

Aminado ang bagong Community Environment and Natural Resources Officer (CENRO) ng Nabas at Boracay na si Merza Familiano, na nanga-ngapa parin ito sa kaniyang bagong trabaho at kasalukuyang pina- familiarized ang kaniyang bagong posisyon bilang CENRO.

Bagamat noong ika-dalawa ng Pebrero pa aniya ito pormal na nailuklok sa posisyon, halos dalawang araw pa lang din itong nakapasok sa kaniyang tanggapan.

Sapagkat matapos ng dalawang araw na pamamalagi bilang CENRO, isinalang din agad umano ito sa isang seminar sa Metro Manila.

Subali’t magkaganon man, sinabi ni Familiano na may mga inisyal na rin silang pag-uusap ng alkalde ng Malay kaugnay sa development plan sa Boracay.

Kasama umano sa napag-usapan nila ay ang pagtatanim ng mangroves sa isla, gayon din ang tungkol sa mga wet lands at sa balak ng alkalde na nagawing Eco Tourism  ang Boracay.

Samantala, ngayong hapon ay nakatakda ding aniya silang mag-usap sa paraan ng isang pulong para ma-penal na ang development plan ng Boracay.

Ordinansa sa mga kasiyahan sa Boracay tuwing Biyernes Santo, hindi pa aprubado


Ni Edzel Mainit, Senior Field Reporter, YES FM Boracay

Mahigit isang buwan na lamang at ipagdiriwang na ng mga Katoliko ang Mahal na Araw bilang paggunita sa pagkamatay at muling pagkabuhay ni Kristo Jesus.

Kung saan, sa Boracay, ay nanga-ngahulugan na naman ito ng pagdagsa ng mga turista lalo pa at Summer Season na rin.

Gayon pa man para mabigyang panahon ang mga nagninilay-nilay na Katoliko sa pagdiriwang ng Araw na ito.

Walang pag-alin langang isinusulong parin ngayon sa Sangguniang Bayan ng Malay ang Municipal Ordinance kaugnay sa pag-regulate sa mga mga party o ano mang kasiyahan kapag araw ng Biyernes Santo bilang paghahanda sa papalapit na Mahal na Araw ngayon taon.

Bagama’t papalapit na ang Mahal na araw, sa kasalukuyan ay hindi pa ito aprobado ng konseho at nakatakda parin pag-usapan sa susunod na sisyon, makaraang ding-gin ito sa deliberasyon.

Samantala, kaugnay sa usaping ito, pinaalalahanan naman kahapon sa misa ni Rev. Fr. Magloire Adlay Placer ang mga Katoliko ukol sa pagdiriwang ng “Ash Wednesday” sa darating na Miyerkules, ika dalawampu’t dalawa ng Pebrero, bilang unang araw sa pagdiriwang ng Mahal na Araw.

MOA kontra-ingay sa Boracay, papasukin ng LGU at stakeholders


Ni Edzel Mainit, Senior Field Reporter, YES FM Boracay

Inaasahang mababawasan na ang Noise Pollution sa Boracay, sa susunod na mga buwan.

Sapagka’t batay umano sa isinagawang mga pulong sa gitna ng lokal na pamahalaan ng Malay at mga stakeholders sa Boracay, bar at disco, operators at may-ari ng establishementong ito.

Nakabuo na ng Memorandum of Agreement (MOA) ang tanggapan ng Punong Ehikutibo para sa mahigpit na pagpapatupad sa umiiral na batas laban sa ingay na dala ng mga establishementong ito lalo na ng mga bar sa isla, batay na rin sa nakasaad sa Municipal Ordinance 144 na inaprobahan ng Sangguniang Bayan noong taong 2001.

Bagama’t may draft na ng MOA ang LGU, nabatid mula kay Concordia Alcantara, Kalihim ng konseho na humiling ng awtorisasyon ng Alkalde para narin sa pormalidad at legalidad para pumasok ito sa isang kasunduan sa ginta ng mga stakeholder ukol sa istriktong pagpapatupad ng ordinansang ito sa isla. 

Sa kasalukuyan ay nasa pangalawang pagdinig na ito ng SB.

Matatandaang umani ng mga negatibong komento at reklamo mula sa ilang resort at mga bakasyunista sa Boracay ang sobrang ingay na dulot ng mga bar, kahit hating gabi na at madaling araw.


Propesyonal na serbisyo ng Life Guard Boracay, ikinakasa ng Alklde
Kaugnay sa pagsasanay sa mga life guards sa Boracay, humiling ngayon si Malay Mayor John Yap ng awtorisasyon mula sa Sangguniang Bayan para pumasok sa isang Memorandum of Agreement (MOA) ang LGU Malay at Philippine Red Cross.

Sa pagdinig ng konseho tungkol sa kahilingang ito, nabatid na ang pagiging propesyonal ng mga mga life guard sa pagligtas sa buhay ng mga naliligo sa baybayin ng isla ang layunin ng alkalde.

Dahil dito, bagamat nasanay na ng Red Cross ang mga Life Guard na ito.

Napaloob sa MOA na nakatakdang lagdaan ng Alkalde ang  pagbibigay ng tulong o suporta ng taga Red Cross pagdating sa karagdagang pagsasanay pa sa mga life guard upang maging bihasa ang mga ito sa kanilang gawain.

Nakasaad din sa MOA na ang Red Cross na rin ang mangangasiwa sa paglalagay ng Life Guard sa tower para masiguro ang kaligtasan ng publikong naliligo sa Boracay, gayon din ang pagpapahiram ng ambulansya sa oras ng emerhenysa at iba pa.

Gayon pa man ang kahilingang ito ng alkalde na nasa kumitiba pa ng konseho ay nakatakdang dinggin sa susunod pang sesyon ng SB.

Monday, February 20, 2012

Mga mababang kuntador sa poste ng Akelco, tourist attraction na rin sa Boracay


Ni Edzel Mainit , Senior Field Reporter, YES FM Boracay

Ang mga mabababang kuntador ng kuryente sa poste ng Aklan Electric Cooperative (Akelco) ay tila nagsisilbi na ring tourist attraction sa mga dayuhan, partikular ang sa Mainroad Boracay.

Sapagka’t kahit sa mga poste ng Akelco ang mga turista ito ay mistulang natutuwa pa at magpakuha ng litrato, habang back ground ang mga nasabing kuntador.

Bagay na aminado naman ang Akelco Boracay sa ganitong sitwasyon ayon kay Engr. Arnaldo Arboleda, Area Manager ng kooperatiba sa isla.

Subali’t sa kabila nito na naging tourist atraksiyon ang mga kuntador na ito, lubhang napaka delikado naman at malapit sa sakuna ang publiko lalo na ang mga naglalakad sa path way ng main road. Ito’y dahil halos kasintaas lang din ng tao ang kinalalagyan ng mga kuntador na nakadikit sa poste.

Maliban sa problemang ito sa main road, nakita na rin umano mismo ng kooperatibang may mga kable pa rin ng kuryente na nakalaylay sa interior na bahagi ng isla sa kabila ng mga ginagawa nilang paglipat ng mga poste.

Kaugnay nito, inamin ni Arboleda na may mga hindi pa naaayos o nailipat na poste, dahil sa problema nila ngayon na walang road right of way para pagtayuan ng mga poste.

Gayon paman may mga nakahanda na rin umanong balakin at mga negosasyon ang Akelco para mabigyang sulosyon ang suliraning ito.

Matatandaang ang pagiging tourist attraction ng mga mabababang kuntador na ito ng Akelco ay minsan na rin ipinarating ng dalawang Board of Director ng Akelco na sina Julieta Aron at Hayden Bandiola sa konseho.

Dahil sa maling akala, proyekto ng Dep Ed sa Boracay, ipinatigil ng LGU Malay


Ni Edzel Mainit , Senior Field Reporter, YES FM Boracay

Dahil sa maling akala at hindi pagkakainitindihan.

Ito ang umano ang dahilan kung bakit ipinatigil ang konstraksiyon ng Practice House Project ng DepEd sa Balabag Elementary at Boracay National High School  compound.

Paliwanag ni Engr. Janrey Depositario, Project Engineer ng DepEd-Aklan, kaya hindi agad nakakuha ng building permit ang proyektong ito ay dahil sa pag-aakala aniya ng Division Office ay ang end user o makikinabang sa proyekto na Boracay National  High School na ang nag-ayos ng building permit para sa konstraksiyon, bagay na ipinaubaya na nila sa paaralang ito.

Dahil dito, sa kasalukuyan ay inabisuhan na rin ayon kay Depositario ang Boracay National High School na sila na ang mag-asikaso sa building permit ng proyektong ito.

Samantala, nilinaw naman ni Depositario na ang isinusulong na proyekto ng DepEd ay isang laboratory para sa nasabing mga paaralan, hindi tulad ng pagkaka-intindi ng karamihan na gagawin itong isang “hostel”.

Sinabi din nito na ang balak umano talaga ay gawin itong practice house at laboratory ng paaralan.

Ayon pa dito, ang pondo para sa phase 1 ng proyekto ay nagkakahalaga ng P10M. Ngunit P7M lamang ang na-i-award sa nanalo sa bidding, na inaasahang matatapos sa loob ng 8 buwan.

Matatandaang ipinatigil ng lokal na pamahalaan ng Malay ang konstraksiyon ng Practice House, lingo na rin ang nakakalipas, dahil sa kawalan ng building permit.

Pag-gamit ng salitang “Bora” sa business name, haharangin agad sa pagpaparehistro


Ni Edzel Mainit , Senior Field Reporter, YES FM Boracay

Harangin agad sa registration pa lang!

Ito ang nais mangyari ng ilang miyembro ng konseho sa mga mag-aaplay ng business name at pangalan ng asosasyon sa Boracay upang maiwasang gamitin ang salitang “Bora”.

Sa proposisyong isinatinig ni Sangguniang Bayan Member Jonathan Cabrera, sinabi nito na kung maaari ay magkaroon ng resolusyon ang konseho na hilingin sa Department of Trade and Industry at Security and Exchange Commission huwag nang aprubahan ang mga nagpaparehistrong asosasyon o establishemento, maging ang mga event na gumagamit ng salitang “Bora”.

Ang mungkahi na ito ng konsehal ay naglalayon umanong palakasin at pagtibayin ang matagal nang ordinansa ng bayan na bawalan ang mga Bussiness name na may salitang “Bora”, dahil ito ay isang ding isla sa ibang bansa at iba ito sa isla ng Boracay.

Karagdagang ambulansya sa Boracay, planong hilingin ng SB Malay


Ni Edzel Mainit , Senior Field Reporter, YES FM Boracay

Karagdagang ambulansiya para sa Boracay ang planong hilingin ng Sangguniang Bayan ng Malay sa Punong Ehekutibo.

Sa proposisyon ni SB member Jupiter Gallenero sa konseho, hiniling nito sa kapwa konsehal na magpasa ng resolusyon para hilingin na magkaroon ng sariling ambulansiya ang lokal na pamahalaan ng Malay sa loob ng Boracay, bilang katuwang ng kasalukuyang ambulansiya ng red cross sa isla.

Ayon kay Gallenero, nahihirapan na rin ang awtoridad sa isla partikular ang kasama sa Boracay Action Group (BAG), na binubuo ng pulis, army, Coast Guard.

Ito’y dahil kapag may insidente, sila umano ang nahihirapan sa pagsagot sa mga turista kung bakit naniningil ng serbisyo ang ambulansya ng Red Cross, gayong sa pagkaka-alam umano ng mga nangangailangan ay pag-aari ito ng LGU.

Sa kabila nito, naiintindihan naman umano ng konseho ang paniningil ng Red Cross dahil boluntaryong organisasyon lamang at walang kaukulang pondo.

Bagama’t sang-ayon sa planong ito si SB Member Esel Flores, inihayag nito ang problema kung saka-sakali.

Ayon kay Flores, walang paglalagyan para sa ambulansiya ng LGU, sabay sabi na sana ay maunang magpadala o magkaroon ng ambulansiya ang pamahalaang probinsiya para sa Boracay gayong ang Boracay Hospital ay pag-aari ng probinsiya.

Ang kahilingang ito ni Gallenero ay nag-ugat umano sa hiling din ng mga miyembro ng BAG, kaugnay sa serbisyo ng ambulansiya ng Red Cross.

At lamang lang din na tatlo naman ang ambulansya ng LGU sa Mainland, hiniling ng konseho na dalhin nalang ang isa sa Boracay.