Tuesday, January 24, 2012

Pagre-refund ng P200.00 Individual Garbage Fee, pinag-usapan ng SB

Ni Edzel Mainit, Senior Field Reporter, YES FM Boracay

Muling naungkat sa sesyon ng Sangguniang Bayan ng Malay nitong umaga ang tungkol sa kinokolektang P200.00 individual garbage fee sa mga boarders sa isla na sinisingil ng Barangay sa Boracay.

Ito ay makaraang matanong ni SB Member Wilbec Gelito kung  ano ang mangyayari sa mga nakapag-bayad na ng Garbage Fee at kung pwede pa bang maibalik ang perang naibayad na, ngayong klaro na na hindi naman pala dapat singilin ang mga boarders ng ganitong bayarin.

Sapagkat sa ngayon, nababahala si Gelito na baka balikan di umano ang lokal na pamahalaan ng Malay ng mga nagbayad na ito dahil ang resibo di umano na ibinigay ng barangay ay resibo ng LGU at hindi sa mismong barangay.

Subalit, ayon kay SB Member Esel Flores, tila malayo nang maibalik pa ang mga perang ito sa mga nagbayad na.

Dahil dito, nagmungkahi si Flores sa kapwa nito konsehal na kung pwede ay tulungan na lamang ang barangay sa pagpaliwanag sa publiko ukol dito, at ipangako na sa susunod na taon ay hindi na ito mauulit at hindi na sila sisingil pa.

Pero, ang halagang naibigay na nila ay ipakikiusap na lang aniya na kung maaari gawin na lang din nila ito donasyon gayong nakabayad na dahil mahirap umano ang magre-fund. 

Brgy. Manoc-manoc, tuloy pa rin ang paniningil sa bawat bangkang dumadaong sa Cargoes Area

Ni Edzel Mainit, Senior Field Reporter, YES FM Boracay

Aminado si Brgy. Manoc-manoc Punong Barangay Abram Sualog na naniningil nga sila ng P50.00 sa bawat bangka na dumadaong sa Cargoes Area.

Ito ay sa kabila ng pagpuna ng Sangguniang Bayan ng Malay sa ginagawa nilang paniningil, dahil sa di umano ay hindi ito aprubado sa konseho, at katunayan ay ibinasura pa ito noon, kaya wala itong legal na basehan, pero ipinapatupad pa rin ng nasabing Barangay.

Sa panayam kay Sualog, sinabi nito na hanggang sa ngayon ay naniningil o pa rin sila, ngunit ang usapin aniya ukol sa legalidad ay ipapasilip niya sa konseho at aalamin nito, lalo pa at walang pormal na komunikasyon o rekomendasyon ang SB Malay para ipatigil na ang paniningil nila ng P50.00.

Samantala, pinanindigan naman ng Punong Barangay na may basehan ang kanilang paniningil, sapagkat nakasaad aniya ito sa Barangay Tax Ordinance nila.

Maliban dito, hindi paman aniya siya ang naka-upo na Punong Barangay ng Manoc-manoc ay pinapatupad na ang paniningil na ito kaya sinunod lang din nila ngayon.

X-ray machine sa Caticlan Jetty Port, dadagdagan na

Ni Edzel Mainit, Senior Field Reporter, YES FM Boracay

Dahil sa ramdam naman di umano ng mga opisyal ng probinsiya ang hindi kagandahang sitwasyon at kabit-kabit na problema may kinalaman sa turismo, lalo na pagdating sa serbisyo at pasilidad, naiisip na rin umano ng pamahalaang probinsiya ang bagay na ito, kung papaano mapa-unlad ang turismo ng sa ganon ay ma-angat ang industriya ng turismo ng Aklan at Boracay ngayon taon.

Kaugnay nito, sa ngayon ay masuri na umanong pinag-aaralan ng pamahalaan ng Aklan kung papano nila ito malulutas.

Pero sa kasalukuyan, ayon kay Aklan Governor Carlito Marquez, sila ni Congressman Joeben Miraflores ay walang humpay ang pakikipag-ugnayan sa ahensiya at departamento ng pamahaalan para magkaroon ng karagdagang proyekto para sa ikakaganda ng turismo ng probinsiyang ito.

Katunayan, nakikipag-ugnayan umano sila sa Civil Aviation Authority of the Philippines (CAAP) para sa mga kulang na gamit o pasilidad ng Kalbo International Airport.

Nasa palano na rin umano ngayon ani ng gobernador na bumili ng karagdagang x-ray machine at metal detector para sa Caticlan Jetty Port na inaasahang maisakatuparan ngayong buwan ng Pebrero.

Ito ay dahil sa nakita umano nila, na sobrang haba ng pila ng mga turista sa Jetty Port sa pagpapasiyasat palang nga mga bagahe lalo na kung magsabay-sabay magsidatingan ang mga dayuhang ito.

Ayon pa kay Marquez, nasa palano na rin nila ngayon ang pagdagdag ng mga daungan ng bangka, para pwede na sumampa sa bangka ang mga pasahero kahit sabay-sabay kung may sapat na bilang  ng hagdan o daungan ang mga sasakyang pandagat na ito.

P100.00 Terminal Fee, kasado sa Marso

Ni Edzel Mainit, Senior Field Reporter, YES FM Boracay

Sa kasagsagan ng “peak season” sa Boracay, ipapatupad ang bagong rate ng Terminal Fee sa Caticlan Jetty Port.

Ito ang inihayag ni Aklan Governor Carlito Marquez sa panyam dito, kaugnay sa pagtaas ng singil ng terminal fee sa Jetty Port, kung saan sinabi nito na sa buwan ng Marso ipapatupad ang bagong aprubadong batas kaugnay dito.

Matatandaang nitong nagdaang buwan ng Disyembre ay inaaprubahan ng Sangguniang Panlalawigan ang bagong revenue code ng Aklan, at nakasaad doon na magiging P100.00 na ang babayarang terminal Fee sa Jetty Port, mula sa kasalukuyang bayarin na P75.00.

Ayon pa sa gobernador, ipapatupad nito ang bagong bayarin kasabay sa pormal na pagbubukas ng bagong waiting o holding area na kasalukuyang inaayos pa ang ilang detalye para magamit na ito sa araw-araw na operasyon ng pantalan.

Sa ngayon ay hinihintay pa umano nila na mai-turn over na sa pamunuan ng pantalan ang waiting area na ito para mapasinayaan na.

Sa oras umano na mabuksan na ito, doon ay isasabay na rin aniya ng pagpapatupad sa bagong bayarin sa terminal fee na P100.00.

Sunday, January 22, 2012

MSWDO ng Malay, hirap sa pagpalabas ng pondo; tulong, delayed din!

Ni Edzel Mainit, Senior Field Reporter, YES FM Boracay

Dahil sa mahigpit ang Commission on Audit o COA, hindi ganon kadali ang pagrelease ng pundo para sa mga naghihikahos sa buahay na nanga-ngailang ng tulong pinansiyal mula sa Municipal Social Welfare Development Office o MSWDO para gamitin sa pagpapagamot o pambayad sa ospital, food assistance o burial assistance man.

Sa paliwanag ni Magdalena Prado, MSWD Officer ng Malay, sa konseho ng ipatawag ito kaugnay sa delayed di umanong pagbibigay ng tulong, sinabi nito na nagpapahirap at naa-antala ang pagbibigay nila ng tulong, dahil sa wala namang pera mula sa pondo na ano mang oras o panahon ay maaari nila nakuha kapag may manghingi.

Aniya, bago mailabas ang pondo sa paraan ng tseke, kailangan makumpleto muna nila ang mga kaukulang dukomento katulad ng resibo at iba pa.

Kaya minsan ay nahihirapan din umano sila sa pagpaliwanag sa kabila ng pagnanais sana nilang makatulong.

Pero bilang sulosyon nagbibigay nalang umano ang tanggapan ng MSWDO sa mga pasiyente ng “guarantee letter” na may lagda ni Prado para mabigyang serbisyo ang mga nang-nagilangan, at para may ipikita sa pagamutan at malapatan ng kaukulang serbisyo na kailangan nila.

Samantala, nasubukan na rin aniya ni Prado na humiling ng “Cash bond” ng sa ganoon, kung may mangailangan ng tulong, ay may mahuhugot sila sa kaha ng Municipal Treasurer, pero hindi ito pinahihintulutan ng batas.

Inihayag din ng huli na  ang pinakamataas na tulong na ibinibigay nila sa nangangailangan ay limang libong piso lamang dahil limitado lang din ang pondo.

Nitong nagdaan taon ng 2011 ay may alokasyong isang milyong piso, pero kinulang pa umano ito.

Nilinaw din ni Prado na proyoridad nila ang pagbibigay ng suporta sa mga Malaynon, kahit pa nagbibigay din sila ng tulong sa mga na-stranded sa Malay at Boracay, kung saan nagpapa-abot din ang MSWDO ng transportation assistance ang mga ito.

1M tourist arrival ngayong 2012, pinasiguro ni Governor Marquez

Ni Edzel Mainit, Senior Field Reporter, YES FM Boracay

Hindi man naabot ang target na isang milyong Tourist Arrival nitong nagdaang taon ng 2011, kampante naman si Aklan Governor Carlito Marquez na ngayon 2012 sinisiguro nito batay sa kaniyang pananaw ay maabot na target na ito.

Aniya, sa pakikipag-usap niya sa mga Airline Company, napag-alam umano nito na may magandang hinaharap ang industriya ng turismo lalo na ang Boracay ngayong taon ng 2012.

Dahil maging ang gobernador ay tiwala sa marketing o paraan ng pagbibinta sa turismo ng Boracay ng mga Airline Company sa bansang China at Korea, gayon ang dalawang nabangit na bansa na ito ang nakakapaghatid ng maraming turista, lalo pa ngayong may direct flight na sa mga lugar na ito.

Subalit, kung nakikita na ni Marquez ang magandang hinaharap ng Boracay sa taong ito, sinabi ng gobernador na ang lahat nang mangyayari at posibleng mangyari ay nakadepende parin, kung mapa-unlad ang antas na serbisyo sa mga dayuhang ito na punterya ay Boracay.

Ito ay dahil, nabatid aniya nila sa mga International Airline Company, na nahihintay lang din pala ang mga dayuhan na magiging maaayos ang mga pasilidad, dahil kasama ito ngayon sa pagdududa ng mga turista, kung may sapat bang kakayahan ang pamahalaan upang mabigyan sila ng kaukulang serbisyo dito.

Dahil maging ang gobernador ay aminado na masyadong maliit ang Kalibo International Airport, kung saan minsan ay inaabot pa aniya ng dalawang oras sa pagpila palang sa Immgiration.

Dagdag pa nito, ang kabit-kabit na problema, hanggang sa suliraning nararanasan sa Caticlan Jetty Port na masikip at ilang oras nakatayo para makasampa sa bangka ay maging silang namamahala sa probinsiyang ito ay ramdam ang nasabing di kagandahang sitwasyon, sa kabilang mga ng binabayarang nga bayarin ng mga turistang ito, pero kulang parin sa serbisyo at pasilidad.

Pagka-antala sa pag-release ng mga dokumento ng mga taga-Balabag, ipinaliwanag ni Sacapaño

Ni Edzel Mainit, Senior Field Reporter, YES FM Boracay

Mariing itinanggi ni Balabag Punong Barangay Lilibeth Sacapaño ang balita na nadedelay ang pagbibigay nila Barangay Clearance at sedula, dahil araw araw naman di umano silang nagrerelease nito.

Aniya, siguro mangyayari lamang ang pagka-antala sa pagbibigay nila ng mga dukomento kung kulang ang mga requirements na isinusumite sa Barangay.

Katunayan ay madali lamang ayon kay Sacapaño ang kumuha ng mga dokumento katulad nito, lalo na kung may dalang Identification Card.

Maliban dito, ang mga empleyado umano ng Barangay ay nag-i-extend na ng oras para mabigyang serbisyo ang lahat ng kumukuha ng Clearance at sedula bago paman matapos ang araw.

Itinanggi din nito ang napabalitang di umano ang ilang dukomento na isinumite sa Barangay ay nawawala na ang iba.

Sa kabila ng mga pagtanggi nito, sinabi naman ni Sacapaño na kung mangyari man na naatala ang pagbibigay nila mga dukomento sa Barangay, ito marahil ay dahil sa nagkaroon lamang ng problema katulad ng brown out, sapagkat wala silang generator o kaya ay nasira ang printer o computer ng Baranggay.

Gayun pa man, kapag may mga oras na hindi agad tinatanggap ang mga dokumentong isinusumite, ito ay dahil sa tambak na di umano at marami nang nauna pa.

Nilinaw din ng Punong Barangay ang rason kung bakit may mga pagkakataon na pini-pending nila ang dokumento ng ilang establishemento sa isla.

Paliwanag ng huli, ito ay dahil sa nagpadala ang lokal na pamahalaan ng Malay ng listahan ng mga pangalan ng establishemento na hindi pa bayaran lahat ng obligasyon nila sa munisipyo kaya, hindi nila ito binibigyan ng Permit.