YES THE BEST 911 BORACAY

Thursday, April 14, 2011

Paglunsad ng Red Cross Boracay-Malay Chapter, naging matagumpay

(Ni Edzel Mainit, YES FM Boracay Field Reporter)

Bagamat, hindi dumating si Philippine National Red Cross (PNRC) Chairman Richard Gordon sa okasyon kahapon, ika-labintatlo ng Marso, sa paglulunsad ng 99th PNRC Boracay-Malay Chapter ay  naging matagumpay pa rin ang nasabing okasyon.

Ito ay dinaluhan ni PNRC Secretary General Ms.Gwendolyn Pang, PNRC Governor Ramon Locsin, Mayor John Yap, mga opisyal ng nasabing organisasyon, mga volunteers, at mga personalidad mula sa iba’t-ibang sector.

Kasama sa okasyon kahapon ay ang pagbabasbas ng bagong ambulansya ng Red Cross para sa Boracay na pinangunahan ni Fr. Adlay Placer.

Tatlong oras matapos ang pagbasbas sa ambulansya ay binasbasan din ang bagong gusali na magsisilbing tanggapan ng Red Cross 99th Boracay-Malay Chapter sa Sitio Ambulong, Brgy. Manoc-Manoc.

Maliban dito, isinama na rin sa okasyon ang paglatag ng mga beach tower para sa mga rescuers na inilagay sa baybayin ng Boracay.

Kasabay din ng nasabing okasyon ang pormal na pag-tanggap nila ang donasyong dalawang jet ski at hand-held radio na gagamitin ng mga volunteer sa operasyon na ikinalugod naman ng mga dumalo, lalo na ng mga opisyal ng nasabing organisasyon.

Ngayon may ambulansya na, mga drivers, hiniling na magbigay daan

(Ni Edzel Mainit, YES FM Boracay Field Reporter)

Ngayong may ambulansya na sa Boracay mula sa donasyon ni Philippine National Red Cross PNRC Chairman Richard Gordon, hiling ni Secretary General Gwendolyn Pang na sana ay ma-educate na rin ang mga tao lalo na pagdating sa kalsada na nawa ay maki-ayon na rin ang mga may sasakyan sa kalye na  kapag may dumaang ambulansya na may sirena o wang-wang ay magbigay daan muna sapagkat alam at nangangahuluga itong mayroong emergency.

Nilinaw din nito na may mga tao nang sinanay para magamit ng wasto ang mga kagamitan o aparato sa loob ng ibinigay na ambulansya bago pa man dalhin sa islang ito.

Blood Bank, asahan sa Boracay ngayonng may Red Cross na

(Ni Edzel Mainit, YES FM Boracay Field Reporter)

Ngayon may Red Cross na sa Boracay, nilinaw ni Secretary General Ms.Gwendolyn Pang sa panayam ng himpilang ito na hindi lamang pagliligtas ng buhay sa paraan ng pagsagip sa mga hindi inaasahang pagkakataon katulad sa aksidente ang gagawin nila.

Katunayan, kasama sa plano sa pagkakaroon ng Red Cross sa isla ay ang paglalagay ng Blood Bank upang mag-hanap ng dugo dahil sa naiintindihan naman nila na mahirap para sa mga Boracaynon na tumawid pa sa mainland para maghagilap ng dugo.

Maliban dito, sinabi din nito na upang mamentina ng mga volunteers sa kanilang commitment, aasahan aniya ang madalas na pagkakaroon nila ng aktibidad.

Tattoo artist, timbog sa buy-bust operation

(Ni Malbert Dalida, YES FM Boracay Senior Field Reporter)

Nahaharap ngayon sa pag-labag sa R.A. 9165 ang isang bente nuebe anyos na tattoo artist makaraang masakote ng mga otoridad sa isang buy-bust operation sa Brgy. Balabag, Boracay na isinagawa ng ika-labindalawa ng Abril.

Sa pinag-sanib puwersa ng PPO-PAIDSO TG at CIDG bangang ala-onse y media ng tanghali ng ma-tiklo ang suspek na si Enrique Casidsid y Autor ng Pinagbuhatan, Pasig City.

Ilan sa positibong narekober mula sa suspek ang dalawang transparent plastic sachet ng suspected shabu na mariin namang itinanggi ng suspek.

Babae, pinalakol sa bayan ng Makato, Aklan, patay

(Ni Malbert Dalida, YES FM Boracay Senior Field Reporter)

Sa isang punerarya na lamang minarapat dalhin ng mga otoridad ng Makato PNP ang wala nang buhay na katawan ng isang babae, makaraang pagtatagain ng nakakatandang kapatid nito, gamit ang palakol sa Sitio Awis, Libang , Makato, Aklan.

Kinumpirma ni PO2 Rogelio Tiongson ng Makato PNP ang nasabing insidente at kinilala ang biktimang so Marivic Tayco, sa legal na edad, at ang kwarenta’y tres anyos na suspek na si alyas “Obet” Tayco, pawing residente ng nasabing lugar.

Sinasabing noong Abril a-onse, mag-aalas onse ng tanghali, habang nasa impluwensiya umano ng alak ang suspek nang pagtatagain nito ang kapatid.

Ikinasawi naman ng biktima ang pinsala at sugat sa iba’t-ibang parte ng katawan dulot ng nasabing insidente.

Nasa kustodiya naman ng Makato PNP ang suspek para sa karampatang disposisyon.

Wednesday, April 13, 2011

Resolusyon ni Cabrera, kinuwestiyon ng kapwa konsehal


(Ni Edzel Mainit, YES FM Boracay Field Reporter)

Tila hindi pumasa sa panlasa ng ilang miyembro ng konseho ang resolusyon ni SB Jonathan Cabrera na naglalayong hihiling kay Pangulong Benigno “PNoy” Aquino III na bigyan na ang awtoridad ang PAGCOR sa Boracay na magkaroon ng operasyon ng junket o casino pero eklusibo lamang para sa mga dayuhan.

Paliwanag ni Cabrera, ang rason nito sa pagsusulong sa nasabing resolusyon ay upang mahikayat ang mga  nasa oposisyon o tutol sa pagkakaroon ng casino sa Boracay na hindi mangyayari ang iniisip at inaasahan nilang epekto nito sa komunidad.

Dahil dito, umaasa si Cabrera na kapag mabigyan na ng awtoridad ng Pangulo ang PAGCOR ay malaking punto ito para makumbinsi na ang mga tutol para pumayag sa operasyon ng casino.

Pero, hindi ito sinang-ayuanan ng kapwa nito konsehal sapagkat ayon kay SB Rowen Aguirre lalabas aniya na parang pinangungunahan na ng resolusyon ang kanilang desisyon sa konseho.

Ito ay dahil hindi pa nai-e-endorso ang Crown Regency bilang veneue ng operasyon nito sa Boacay ay mauna pang magpapasa ng resulosyon sa pangulo para bigyan ng awtoridad ang PAGCOR na payagan ang nasabing hotel na mag-operate ng junket sa kondisyon na tanging dayuhan lamang ang pahihintulutan na makapag-laro dito.

Sinabi din ni Aguirre na mistualng wala ding silbi ang pagkumbinsi ni Cabrera sa mga tumututol sa casino sapagkat nakapinid na ang mga tenga ng mga ito at ayaw nang makinig pa sa anumang paliwanag dahil sa paniniwalang ang casino ay masama.

Kinuwestiyon din ni SB Jupiter Gallenero si Cabrera kung bakit kailangan pa ang resolusyon at bakit kailangang sa Pangulo talaga ito ideretso.

Kaugnay nito, nagmungkahi si Gallenero na mag-takda na lang muna sila ng mga alituntunin kung sino talaga ang maaaring makapaglaro bago mag-endorso at kung layunin ni Cabrera na kumbinsihin pa rin ang lahat ay dapat munang maging klaro ito.

Dr. Salaver, nagpaabot din ng reklamo laban kay Punong Brgy. Casidsid


(Ni Edzel Mainit, YES FM Boracay Field Reporter)

Pormal ding nagpaabot ng sulat si Dr. Adrian Salaver, Municipal Health Officer ng Malay, kay Mayor John Yap upang ipa-abot ang reklamo nito laban kay Yapak Punong Brgy. Hector Casidsid.

Binasa na rin sa sesyon ng SB Malay kahapon, ika-labindalawa ng Abril, ang sulat ni Salaver para sa Alkalde.

Nabatid sa sulat na ito ay naglalaman ng incident report ng mga ginawa ni Casidsid, at partikular na inirereklamo ng manggamot ang pagpalit sa mga staff o Health Workers sa Health Center ng Brgy. Yapak na walang kaukulang rason o maging paliwanag man lamang at ang pagkawala ng ilang mga dokumento.

Napasama din sa inireklamo nito ay ang umano’y pagbabanta ni Casidsid na ipapa-pad lock nito ang Health Center sa nasabing barangay.

Punong Brgy.Hector Casidsid, binigyan ng labinlimang araw upang magpaliwanag

(Ni Edzel Mainit, YES FM Boracay Field Reporter)

Inabisuhan na ng Sangguniang Bayan ng Malay nitong ikawalo ng Abril, sa pamamagitan ng isang sulat, si Punong Brgy. Hector Casidsid ng Brgy Yapak kaugnay sa isinampa ditong kasong administratibo ni Boracay Administrator Glenn SacapaƱo.

Ang reklamo laban dito ay dahil umano sa pang-a-abuso sa kapangyarihan, pagiging hindi tapat sa serbisyo, pang-aapi at pagpapakita ng hindi magandang asal.

Dahil dito, binigyan na rin si Casidsid ng konseho ng labinlimang araw simula ng oras na matanggap nito ang sulat upang magbigay ng patunay at paliwanag hinggil sa kasong isinampa sa punong barangay.

Nakasaad din sa naturang sulat na kapag hindi nakapag-paliwanag ni Casidsid sa loob ng itinakdang araw ay maaari ito gamiting ebindensya laban sa kanya.

Samantala, nilinaw naman ng komitiba ng konseho na may hawak sa reklamo laban kay Casidsid na hihintayin na lamang nila ang sagot bilang paliwanag ng nasabing barangay official bago aksyunan ng naayon sa reklamo.

SB, gagawa ng sulat para sa Alkalde

(Ni Edzel Mainit, YES FM Boracay Field Reporter)

Para makasiguro at makaabot sa alkalde ng sa gayon ay maaksyonan ang problema sa helmet diving sa Boracay, napag-usapan ng  Sangguniang Bayan ng Malay ay magpadala ng sulat sa tanggapan ni Mayor John Yap, na nagrerekomenda na kung maaari , sa lalong mas madaling panahon ay pansamantalang itigil na muna ang operasyon nito sa paniniwalang hindi na ligtas ang kustumer.

Maliban dito, hiniling din ng konseho na kung pwede pati ang operasyon ng Jet Boat ay idamay narin dahil nakitaan aniya ng pagkukulang sa dukomento, may ilang nagrereklamo sa operasyon nito gayong nakakasira pa sa yamang dagat ng Boracay ayon kay SB Jonathan Cabrera.

Kaugnay sa nasabing uspain, dahil sa napagkasunduan ng halos lahat ng konseho na pa- imbestigahan ang operasyon ng helmet at jet boat, nagpasya na rin sila na imbitahan sa SB ang mga operator at may-ari ng nasabing sea sport activities para pormal na maipaabot sa mga ito ang layunin ng konseho.

Operasyon ng Helmet Diving, pansamantalang ipatitigil --- SB

(Ni Edzel Mainit, YES FM Boracay Field Reporter)

Karamihan sa mga miyembro ng Sangguniang Bayan ng Malay ay nagrekomenda na ipakansela muna ng pansalamantala kay Mayor John Yap ang operasyon ng Helmet Diving sa Boracay, sapagkat may panibagong naitalang aksidente sa nasabing sea sports activities.

Ito ang inihayag ni SB Rowen Aguirre sa konseho nitong umaga ika labin dalawa ng Abril.

Sang-ayon naman dito si SB Wilbec Gelito, Jupiter Gallenero, at Dante Pagsugiron, na nagsuhestiyon na dapat na rin itong ipaabot sa Alkalde, gayong dumarami na ang turista sa Boracay at upang makaiwas na rin sa sakuna kung kaligtasan ng mga turista ang pag-uusapan.

Ayon sa mga ito, ang pansamantalang pagpapatigil sa operasyon nito kung saka-sakali ay upang ma-inspeksyon ang mga kagamitan sa aktibidad, sapagkat nabatid umano na delikado ang ilang gamit para sa ganitong aktibidad.

Lalo pa’t nalaman aniya ni Pagsugiron na mismo ang operator lang ng negosyong ito ang gumagawa ng mga gamit sa helmet diving kaya kinuwestiyon ng konsehal ang kwalidad kung ligtas ba ito para sa mga kostumer.

Tuesday, April 12, 2011

BFI, tuloy pa rin ang laban kontra reklamasyon

(Ni Edzel Mainit, YES FM Boracay Field Reporter)

Sa kabila ng ihinayag ng UP Marine Science na walang gaanong epekto sa Boracay ang first phase ng proyekto ng pamahalaang probinsya ng Aklan, ang 2.6 hectares na reklamasyon sa Caticlan, ay tila hindi pa rin nagbabago ang isip ng mga taga-Boracay Foundation Inc. (BFI) tungkol dito.

Sapagka’t mas lalo pang tumibay ang kanilang paninindigan na ituloy ang ipinaglalaban gayon ang mga Board of Directors (BOD) ng BFI ay binigyan na ng awtoridad para ituloy ang pagsasampa ng kaso sa mga nasa likod ng nagbigay pahintulot sa proyekto at sa may proposisyon nito.

Ito ay makaraanng isangguni ni Lowel Talamisan sa mga stake holders ang kanilang plano na positibong sinang-ayunan ng mga negosyante na dumalo sa idinaos na General Assembly nitong ika-siyam ng Abril.

Ang naging rason ng mga ito ay dahil sa pangamba na matapos ang 2.6 hectare na reklamasyon ay may susunod pang proyektong pagtatambak na gagawin gayong apatnapung ektarya ang inaprubahan ng Philippine Reclamation Authority (PRA).

Maliban sa nabanggit, naniniwala ang mga ito na sa kinalaunan ay may dalaitong negatibo epekto sa Boracay lalo pa ngayon at ramdam na ang sand erosion sa isla.

Nadagdagan din ang lakas ng loob sa mga stake holders dahil sa suporta na ipinapakita ng Sangguniang Bayan, matapos magpoa-abot ng kanilang kopromiso na ang bawat isang SB Member ay tatayong complainant sa kaso.

Sikat at magaling na abugado, nakahandang tumulong laban sa reklamasyon ayon sa BFI

(Ni Edzel Mainit, YES FM Boracay Field Reporter)

Marahil hindi lubos maisip ng mga stakeholders na kabilang sa Boracay Foundation Incorporated (BFI) ang rason kung bakit itinutuloy pa rin ang reklamasyon sa Caticlan Jetty Port sa kabila ng pagtutol ng karamihan katulad ng isinatinig ni Dr. Orlando Sacay sa General Assembly ng BFI.

Tila ito ang rason kung bakit buo pa rin ang paninindigan ng nasabing organisasyon na ipagpatuloy ang kanilang pakikipag-laban sa reklamasyon.

Ayon kay Sacay, ang proyektong ito ay maituturing nang “done deal” batay sa kanilang mga obserbasyon. Isinulat din nito ang nakuha nitong impormasyon mula sa kanyang mapagkakatiwalaang source na umano ay umaabot sa labingsiyam na milyong piso ang binabayarang interes o tubo ng probinsya sa dalawangdaan at animnapung milyong pisong bond flotation ng Supoer Marina Project.

Samantala, dahil sa hindi matinag na paninindigan, hinikayat ni Sacay ang mga miyembro ng BFI na suportahan ang aksyon ng mga opisyal ng kanilang organisasyon lalo na sa pagsasampa ng kaso.

Bagama’t may sponsor o sasagot sa mga gastos, sinabi ng pangulo ng BFI na si Loubell Cann at BFI BOD Member Lowel Talamisan na mas mainam pa rin ayon sa mga ito kung magtutulungan ang lahat.

Sinabi din ng mga nabanggit na mayroon na silang nakuhang magaling at sikat na manananggol na handang tumulong sa kanila.

Pero nilinaw ng mga ito na hindi gano’n kamahal ang fees na babayaran sa hindi na pinangalanang manananggol kapalit sa serbisyo nito.

Casino, idinaan sa botohan

(Ni Edzel Mainit, YES FM Boracay Field Reporter)

Dahil sa kahilingan ng mga stakeholders sa isla na kinabibilangan ng BFI, todo suporta ang mga miyembro nito sa aksyong ginagawa ng mga opisyal hindi lamang sa usaping reklamasyon kundi pati na rin sa casino.

Ito ay makaraang bigyang pahintulot ng mga miyembro na ituloy ang kanilang kampanya na “No To Casino” na idinaan pa sa botohan ng mga Board of Directors (BOD), sapagka’t binigyan din ng pagkakataon na magpahayag ng kanilang karapatan ang mga regular na miyembro ng nasabing organsisasyon nitong ika-siyam ng Abril kasabay ng assembly ng BFI.

Nabatid din kay Lowel Talamisan na batay sa isinagawa nilang desisyon ng BOD, lumabas sa isinagawa nilang botohan na isa ang pumayag na magkaroon ng casino sa Boracay, dalawa ang nag-abstain at pito sa Board ang umayaw: patunay lamang na halos karamihan sa mga ito ay ayaw sa operasyopn ng casino maging junket man ito.

Pero iba naman ang pananaw dito ni Dr. Orlando Sacay sapagka’t sumang-ayon man ito subalit hindi rin ito naka-apekto sa pagbabago ng desiyon ng organisasyon dahil sa kahilingan ng karamihan.

Magkapatid na Bebot Gelito-Gadon at SB Wilbec Gelito, hindi magkasundo sa casino

(Ni Edzel Mainit, YES FM Boracay Field Reporter)

Kung magkasundo ang Sangguniang Bayan ng Malay at BFI sa kanilang layunin laban sa reklamasyon, kalabiktaran naman ang kanilang paninindigan pagdating sa casino.

Ito ay dahil kusa nang nagbigay ang SB ng pahintulot at pag-e-endorso sa casino, habang ang BFI naman ay ayaw sa operasyon nito sa Boracay dahil sa maraming rason katulad ng isyung moralidad na umano’y makakasira sa isla at sa paniniwala na hindi kailangan ng Boracay ang casino kahit sabihing makakadagdag ito sa kita ng bayan o dagdag atraksyon, at mas naniniwala pa ang BFI na kailangan ng casino ang Boracay para kumita ang operasyon nito.

Kaugnay sa nasabing usapin, nabatid din na ang magkapatid na SB Wilbec Gelito at “Esther” Bebot Gelito-Gadon ay magkaiba rin ang paninindigan.

Ito ay matapos magkaroon ng pagpapalitan ng mga opinyon at nagpahayag ng paniniwala ang dalawa sa harap ng mga stakeholders sa assembly ng BFI nitong Sabado.

Tumayong tumatayong pabor sa casino si SB Gelito bilang pagsuporta nito sa pag-e-endorso sa operasyon nito.

Samantalang si Gadon naman ay mariin ang pagtutol sa ganitong uri ng aktibidad bilang represante ng mga Christian Church sa Boracay.