YES THE BEST 911 BORACAY

Friday, December 21, 2012

X-ray examination sa mga empleyado sa Boracay, kailangan na sa Business Permit


Umpisa ngayong Enero ng 2013, lahat ng empleyado sa Boracay, partikular ang mga frontliners ay idadaan na sa x-ray examination.

Ito ang nilinaw ni Malay Administrator Godofredo Sadiasa, para sa pagkakaroon umano ng Health Card at kailangan ng mga empleyado para makapag-renew ng business permit ang kani-kanilang pinagtatrabahuhang establishimiyento.

Kung saan simula ngayong 2013 ay ipapatupad na ang pag-require sa mga empleyado sa isla na sumailalim sa x-ray examination.

Bagamat dagdag pabigat umano ito para sa mga empleyado, ang mga ito pa rin aniya ang makikinabang para sa kanilang kalusugan.

Aniya, ngayong taon pa lang nila ito ipapatupad, gayong sa ginawang nilang pagrebyu sa Sanitation Ordinance, nakita nila na nakasaad ito sa listahan ng mga requirement para sa pag-renew ng mga business permit bawat taon.

Layunin umano nito ay masigurong maaayos ang kalusugan ng mga empleyado at walang nakakahawang sakit ang mga ito lalo na ang mga food handler, gayong ang Boracay ay isang tourist destination.

Una rito, nitong nagdaang Martes ika-18 ng Disyembre, inihayag sa sesyon ng Sangguniang Bayan ng Malay ni SB Esel Flores na mandatory sa mga frontliners lalo na sa mga food handlers ang nasabing examination. #ecm122012

Thursday, December 20, 2012

P24M na PEI ng mga provincial employee at opisyales ng Aklan, ipapamumudbod bukas


Bukas nakatakdang ibigay sa mga empleyado ng Provincial Capitol ng Aklan ang kanilang PEI o maituturing na kanilang pinaka-bonus.

Ito ay matapos aprubahan kahapon ng Sangguniang Panlalawigan ng Appropriation Ordinance para mai-release ang halagang mahigit P24-milyong pondo para sa Productivity Enhancement Incentive ng mga empleyado at opisyal ng probinsiya.

Nabatid mula kay SP Secretary Odon Bandiola na ang halagang P24,040,000.00 ay hahatiin sa mahigit 2,800 na opisyal, rank in file na empleyado, casual at job order men.

Inaasahang makakatanggap aniya ang mga elected Officials, Department Heads at rank in file ng tag-P20,000.00.

Habang ang mahigit 1,300 mga casual at job order na mga empleyado ay pinag-iisipan umano ngayon ni Aklan Governor Carlito Marquez kung magkano ang ibibigay.

Pero ayon dito, inaasahan na mataas pa sa tinanggap na PEI ng casual at job order noong 2011 ang matatanggap ngayon kung saan dati ay tumanggap lamang ng ang mga ito ng P3,000.00. #ecm122012

X-ray machine sa Boracay Hospital, 20 lang ang kaya sa isang araw


Hanggang 20 lamang sa isang araw ang kaya ng x-ray machine sa Boracay Hospital.

Kaya kung ganito ang siste, mistulang mahaba-habang pila ito para sa mga empleyado lalo na ang mga front liners sa Boracay.

Ito ay kapag ipatupad na sa Enero ang pagpapa-xray sa lahat ng empleyado bilang isa sa requirement upang makapag-renew ng Business Permit ang kani-kanilang mga establishementong pinag-tatrabahuhan.

Sa panayam kay Dra. Michelle Depakakibo, Administrator ng Don Ciriaco Tirol Hospital o mas kilala sa tawag na Boracay Hospital, sinabi nito na may ideya na siya kaugnay dito kaya balak nilang hilingin sa lokal na pamahalaan ng Malay ang posibleng bilang ng mga empleyado na ito sa Boracay.

Kaya siya na ang gagawa aniya ng hakbang para malaman ng LGU kung ano lamang ang kakayanin ng x-ray mayroon sa ospital.

Aasahan din aniyang aabutin ng isang linggo pa ang resulta bago maibigay, dahil sa bayan pa ng Kalibo ang taga-basa.

Kapag ganito aniya, maaaring i-iskedyul na lang ang mga empleyado, para hindi na pumila pa.

Ganoon pa man, sinabi ng doktor na may dalawang klinika pa sa Boracay na mayroon ding x-ray.
Ang pahayag na ito ni Depakakibo ay sagot kaugnay sa napipintong pagdagsa ng mga magpapa-xray gayong sa susunod na buwang ng Enero ng 2013 ay magsisimula na ang pagproseso sa business permit. #ecm122012

Wednesday, December 19, 2012

SP session nitong umaga, naging mainit!


May nagtitimpi, may malakas na boses, may ayaw naman magpaawat, may tila namimersonal din at mayroong tahimik lang.

Ganito ang naging eksina sa huling sesyon ng mga Board Member sa Aklan para sa taong 2012, kasabay ng deleberasyon sa  2013 Annual Budget ng buong probinsiya at ng SP Session nitong umaga.

Imbes na pag-apruba sa P1.19 billion 2013 Annual Budget ng probinsiyang ito kasama na ang pondo ng Sangguniang Panlalawigan ng Aklan na siyang pinagdidebatihan ay napunta sa komprontasyon ang usapan.

Sapagkat, bago magbakasyon ang mga miyembro ng SP para sa Pasko at Bagong Taon, hindi naiwasang makalkal ang kanilang mga nagdaan, lalo na ang mga mainit na usapin at tampuhan.

Una rito, hiniling ni SP Member Rodson Mayor na amiyendahan o baguhin at bawasan ang halagang nakasaad sa proposed 2013 budget ng SP lalo na ang alokasyon para sa seminar at trainings.

Bagay na hindi naman sinang-ayunan ng ibang mga miyembro ng SP na humangtong pa kanina sa botohan.

Pero lumabas sa botohan na si Mayor ang solo lamang palang tutol at may nais na bawasan ang pondo ng SP.

Ipinunto kasi ng nasabing board member na hindi tama at makatwiran na maglaan ng pondong malaki na hindi naman nagagamit ng maayos.

Kung saan ang pinatutungkulan nito ay si Vice Governor at Presiding Officer Gabrielle Calizo-Quimpo, na siyang madalas nitong nakakahidwaan sa loob ng session hall. #ecm122012

Vice Governor Calizo-Quimpo, tinira ni SP Mayor sa huling session ng SP sa taong ito


Mistulang naimbyerna na naman si Vice Governor at Presiding Officer Gabrielle Calizo-Quimpo kay Aklan Board Member Rodson Mayor.

Nangyari ito bago mag-adjourn upang magbakasyon ang buong Sangguniang Panlalawigan ng Aklan para sa pagdiriwang ng Pasko at Bagong Taon na aasahang magbabalik sa ika-9 ng Enero sa susunod na taon.

Sapagkat, tinira ni Mayor ang Bise Gobernador sa di umano’y maling pag-gamit sa pondo ng kaniyang tanggapan, na hinayaan na lamang na pati ang staff ni Calizo ay nakakagamit ng pondo na ito na hindi naman dapat kasama sa budget.

Una rito, hiniling ni Mayor na baguhin ang mga halagang nakasaad sa proposed 2013 budget ng SP lalo na ang alokasyon para sa seminar and trainings, dahil hindi ito makatwiran.

Pinunana din ng Board Member ang sobra-sobrang budget umano para sa gasoline allowance gayong may tatatlong sasakyan lamang ang SP.

Kaya hiniling nito na magpaliwanag si Calizo sa gitna ng session.

Dahil dito, nagpaliwanag naman ang Bise Gobernador kung ano ang pinag-gamitan niya sa pondo.

Sa gitna noon ay hindi rin naiwasang banggitin ni Calizo ang tungkol sa mga naging lakad nila sa Laoag City kamakailan lamang na siyang pinagmulan ng “word war” ni Calizo at Mayor na di umano ay hindi isinama ang Board Member na si Mayor sa kabila na inimbetahan ang lahat ng miyembro ng SP.

Isiniwalat din ng Bise Gobernador na hindi tama ang mag inilahad at inihayag na halaga ni Mayor kaugnay sa mga nagastos ng tanggapan ni Calizo.

Sinang-ayunan naman ng ibang board member si Calizo at nagpaliwanag din kaugnay sa kanikanilang mga seminar at training na dinaluhan, sa pagsasabing ang lahat ng kanilang travel ay mahalaga at may kinalaman sa kanilang trabaho.

Matatandaang ilang beses nang nagkaroon ng mainit na arguemento ang dalawa. #ecm122012

Proper segregation ng basura sa Boracay, problema pa rin


“May mga pasaway pa rin talaga.”

Kaya hindi rin naiwasan ni Island Administrator at Solid Waste Manager Glenn Sacapaño na pasaringan ang ibang indibidwal na patuloy pa ring hindi sinusunod ang tamang paghihiway sa tinatapong basura na iniiwan sa mga tabing kalsada para sa koleksiyon.

Aniya, mayroon pa ring pasaway dahil sa hindi sinusunod ang “proper segregation” sa kabila ng kampaniya ng LGU Malay kaugnay dito, kaya may mga basura pa rin gaya ng mga tira-tirang pagkain na naka-kalat sa daan lalo na at hindi umano tama ang pagkakatapon ng mga ito.

Ito ang sagot ng Solid Waste Manager, sa tanong dito kung bakit bumabaho ang kalsada na pangit naman para sa mga nagdi-jogging na turista maging ng mga lokal at residente tuwing umaga.

Kung saan ito ay dala ng mga katas ng mga tira-tirang pagkain na iniiwan lang sa tabing daan para sa koleksiyon sana, pero natatapon lang din doon bago mahakot.

Naniniwala naman si Sacapaño na sa tulong at pakikiisa ng lahat hindi lamang ng mga residente kundi maging ang mga turista sa isla ay nasasawalata ang problemang ito sa Boracay. #ecm122012

Problema sa basura, tututukan na sa 2013


Sinisikap umano ngayon ng Material Recovery Facilities o MRF na matugunan ang problema sa basura sa Boracay.

Katunayan, ayon kay Island Administrator Glenn Sacapaño at kasalukuyan Solid Waste Management Manager, nagdagdag na rin sila ng mga iskedyul sa hating gabi para sa pangungulekta ng basura, para hindi na abutan pa ng pagsikat ng araw na nakatambak pa rin sa tabing daan ang mga basurang ito.

Ayon kay Sacapaño, alas-12 pa lang ng madaling araw ay may mga area ng naka-iskedyul para sa koleksiyon at sinisimulan na rin pag-iikot ng mga garbage truck sa oras na alas-4 ng umaga.

Pero may mga pagkakataon pa rin ayon dito na hindi talaga maiiwasan na ang ibang basura sa tabing daan ay inaabot pa ng alas siyete, dahil sa dami ng mga ito.

Ganoon paman, ginagawa naman umano nila ang lahat, sa pangamba na kapag hinayaan lang ang mga basurang ito, baka ito pa ang sisira sa Boracay.

Aminado din ito na mahirap talaga ang trabaho nila ngayon, lalo na at hindi bumabawas ang tao sa Boracay, kundi lalo pang dumarami.

Itinuturo nito sa biglaang paglaki ng populasyon at pagdami ng turista sa isla ang suliranin sa basura, gayong 2017 pa umano inaasahang maaabot ang isang milyong turista, pero ngayong 2012 pa lang ay nalampasan na ang target na ito.

Dahil dito, inihayag ng nasabing opisyal na sa susunod na taon ng 2013 ay tututukan na nila ang problema ukol dito.

Kaya pipilitin nilang mahabol ang koleksiyon ng basura batay na rin sa pagdagsa ng tao dito ang pagtugon sa problema sa basura.

Nabatid na bawat araw ay umaabot ng 18 truck ng basura ang nahahakot ng mga collector. #ecm122012

LGU Malay, magbibigay donasyon sa mga biktima ng bagyong Pablo


“Huli man daw at magaling nakakahabol din”.

Ganito ang nangyari ngayon sa lokal pamahalaan ng Malay partikular sa Sangguniang Bayan ng Malay.

Ito ay kaugnay sa pagpasa ng resolusyon sa pagpapaabot ng tulong sa mga biktima ng Bagyong Pablo sa Davao Oriental at Compostela Valley sa Mindanao.

Sapagkat sa huling sesyon ng SB ngayong taon ng 2012, muntikan nang makalimutan ang resolusyon na nagbibigay pahintulot na ma-release ang halaga ng tulong na nais ibigay ng LGU Malay para sa mga biktima ng bagyo.

Bagamat patapos na ang sesyon ng SB kahapon ng tanghali, inihabol talaga ang resolusyon na ito.

Nabatid mula kay SB Member Rowen Aguirre na P500.00 ang ipapaabot na donasyon ng LGU mula sa cavan ng Malay. #ecm122012

PEI ng LGU Malay ngayong 2012, umabot ng mahigit P19M


Hidi nakakahiya, kundi nakakalula pala ang halaga Productivity Enhancement Incentives o PEI ng mga empleyado ng LGU Malay.

Sapagkat mahigit P19-milyon ang PEI ngayon taon na siyang hahati-hatiin sa mga opisyal, regular na empleyado at mga nasa plantilya ng LGU Malay.

Medyo nahihiya pa sana ang konseho ng Sangguniang Bayan ng Malay na ibunyag ang halaga ng PEI ngayon taon ng 2012, na maituturing na pinaka-bonus na din ng mga nanunungkulan at nagtatrabaho sa gobyerno.

Pero napilitang ihayag ito makaraang magtanong ang ilan sa miyembro ng SB.

Kung saan ang mahigit P19-milyon na ito ay kahapon ng umaga lamang sa sesyon ng SB inaprubahan sa ikalawang pag-basa, upang mai-release na at maipamahagi na rin.

Samantala, nabatid mula kay SB Member Rowen Aguirre na ang pundo para sa PEI na ito ay magmumula sa savings ng Personal Services o PS. #ecm122012

BFI, tinututulan ang paglalagay ng mga basement sa mga gusali sa isla


Natutuwa ngayon ang Sangguniang Bayan ng Malay sa aksiyon ng Boracay Foundation Inc. o BFI.

Ito ay dahil katulad sa nais mangyari ng SB, hiniling din ngayon ng grupong ito sa SB na sana ay bigyang aksiyon na rin ng local na pamahalaan ng Malay ang nakakatakot na paglalagay ng mga bagong tayong gusali ng basement na sadyang nakakabahala para sa kapiligiran ng Boracay.

Una dito, ang Board of Director ng BFI ay nagpasa ng resolusyon para ipakita ang kanilang hindi pagsang-ayon sa ganitong gawain ng mga establishment owners sa isla.

Isinumite naman ng BFI ang kupya ng kanilang resolution no. 5 na ito sa konseho para mapakinggan din ang kanilang hinanaing.

Subalit dahil sa noong nagdaang sesyon ng SB ay tinalakay na ang kaugnay dito lalo na sa pag-amiyenda sa Building Ordinance na sinusunod sa Boracay para ipagbawal na ang paglalagay ng basement sa mga gusali.

Ganoon pa man, dapat pa rin aniyang pasalamatan ng konseho ang BFI sa pagmamalasakit nilang ito sa kapaligiran. #ecm122012

Amerikano, natagpuang patay sa kwarto ng resort


Isang malamig na bangkay na ng makita sa kwarto ng resort na nirentahan ang isang American National bandang ng 7:30, gabi ng Lunes.

Ito ay makaraang magulantang ang mga staff ng nasabing reorts gayon din ang may-ari ng nasabing establishimiyento sa Sitio Diniwid, Brgy. Balabag.

Agad namang kinordon ng mga taga-Boracay Crime Laboratory at Boracay Tourist Assistance Center o BTAC ang area para sa kanilang imbestigasyon.

Sa pang-uungusisa ng awtoridad, kinilala ang nasabing American National na si Fred Harvey Lubin, 60-anyos na may address na New Jersey, USA.

Nang datnan umano ito ng mga staff, may-ari ng resort at pulisya, naka-tihaya o nakahiga sa kama ang Kano.

Sa imbestigasyon ng pulisya, tila wala din silang palatandaang nilooban ang kwarto ng nasabing foreigner, dahil ang wala ding palatandaang pinuwersang buksan ang kwarto o kaya ay bintana ng kwarto nito.

Maging ang mga gamit umano gaya ng mga alahas, pera, gamot at ilan nitong dokumento at maaayos at naroroon naman.

Bagamat dinala sa Boracay hospital si Lubin, dineklara pa rin itong dead on arrival o DOA ni Dra. Mishelle Depakakibo.

Ginawan ng pulisya ang pagsisisyasat na ito sa kuwarto ng Amerikano sa harap ni OIC Boracay DoT Officer Tim Ticar. #ecm122012

Tuesday, December 18, 2012

Malay Comelec Officer, kandidata sa mga ire-reshuffle ng kumisyon


Ngayon pa lang ay pinaghahandaan na ni Malay Comelec Officer Elma Cahilig ang re-shuffling na gagawin sa mga Comelec Officers.

Aniya, ang bagay na ito sa kanila ay hindi na bago, lalo na kapag papalapit na ang halalan.

Pero, bagamat nasabi na nito dati na posibleng hindi na siya kasama sa mga Comelec Officers na pansamantalang i-assign sa ibang lugar.

Sa panayam dito, sinabi ni Cahilig na kandidata siya ngayon kasama ang anim pang-election officer sa Aklan na kabilang sa ire-reshuffle kung haba ng paninilbihan sa bayan kung saang bayan sila na-assign na mag-bantay.

Maliban umano doon ay wala na siyang nakitang dahilan pa.

Kaya ngayon ay naghihintay na lang aniya sila ng resulosyon na nag-uutos ng kanilang bagong assignment sa ibang lugar para sa 2013 election.

Pero matapos aniya ng nasabing halalan ay ibabalik din naman ito sa bayan ng Malay.

Una nang sinabi ni Comelec Commissioner Sixto Brillantes ng buwan ng Enero sa susunod na taon ay sisimulan na nilang ipatupad ang re-shuffling sa mga opisyal ng kumisyon. #ecm122012

Monday, December 17, 2012

Bayan ng Malay, ikalawa na sa may pinakamaraming botante sa Aklan


Malamang ay pupunteryahin na rin ng mga politiko ang isla ng Boracay.

 Hindi upang magbakasyon, kundi upang mangampaniya na.

Sapagkat, naungusan na ngayon ng bayan ng Malay ang Ibajay, New Washington at Banga sa dami ng botante.

Kung saan, 200 na botante umano ang naging lamang ng Malay mula sa bayan ng Ibajay ayon kay Malay Comelec Officer Elma Cahilig.

Aniya ikalawa na ito ngayon, kasunod ng Kabisiera ng probinsiya na bayan ng Kalibo na siyang may pinakamaraming botante sa ngayon, na napanatili naman ang unang pwesto.

Taong 2010 kasi, ayon sa pagkakasunod-sunod, Kalibo ang nangunguna, ikalawa ang Ibajay, ika-3 ang New Washington, ika-4 ang Banga at ika-5 ang Malay.

Ngunit sa isinagawang pagpaparehistro ng mga botante ngayon taong 2012, sa kabuoan ay Kalibo parin ang nangu-nguna, sinundan ng Malay, Ibajay, Banga at ika-lima na ang New Washington.

Nabatid mula kay Cahilig ang migration sa Boracay ang rason ng biglaang paglobo ng mga registered voter ng Malay. #ecm122012

Taong 2013, pinaghahandaan na ng Red Cross Boracay


Ngayon pa lang ay pinaghahandaan na ng Philippine National Red Cross Malay-Boracay Chapter ang taong 2013.

Ito ay dahil abala na sila sa mga trainings na gagawin sa mga volunteer, Life Guard ng mga resorts at iba pa, katuwang ang Australian Life Guard na si David Field.  

Kung saan, ngayon pa lang ay marami na rin silang malalaking aktibidad at programa na inilatag para sa susunod na taon.

Kabilang na dito ang mas pinalaki pang pagdiriwang ng 2nd Festival of the Wind sa Boracay, at Fun Run na ilalahok ng bansa sa Guinness Book of World Record. 

Kung saan sa 2nd Festival of the Wind sa Boracay, plano ngayon ni Field na magdala ng Life Guard mula sa Thailand na siyang inaasahan makakatungali ng Life Guard Boracay sa  isang patimpalak pagdating sa pagliligtas sa buhay sa Beach.

Samantala, ang dalawang malalaking aktibidad na ito ang isa din sa mga rason ni Field sa pagbabalik niya sa Boracay. #ecm122012

David Field, di pa maiwan-iwan ang Boracay


Hindi lang ganoon kadali para sa isang Australian Life Guard na iwan ang Boracay.

Ito ang inihayag ni David Field, isang propesyunal na Life Guard at instructor ng Philippine National Red Cross o PNRC sa islang ito.

Aniya, bagamat uuwi siya sa Australia para doon magdiwang ng Pasko, pero sa Pebrero ay agad naman itong babalik.

Pinasiguro naman nito na babalik siya muli sa Boracay para ipagpatuloy ang kaniyang misyon na magturo at mapalaganap ang seguridad sa beach ng Boracay para makaiwas sa sakuna.

Maliban kasi na siya ang nagtuturo sa mga Life Guard ng lokal na pamahalaan ng Malay sa isla.

Siya din ay trainer ng Life Saving sa mga estudyante ng iba’t ibang paraalan sa Boracay, ganon din sa mga empleyado ng mga resort sa isla at iba pang volunteer organizations, na handa na rin ngayong isabak sa oras ng emehensiya.

Marami na rin itong nailatag na mga plano para panatilihing ligtas ang sa Beach ng isla at walang humpay din ang suportang ipinaaabot nito sa mga programa ng Red Cross Malay-Boracay Chapter.

Kaya sa kaniyang pagbabalik sa Pebrero sa susunod na taon, itutuloy pa rin umano niya ang pagtuturo dito.

Si Field ay halos labing apat na buwan na ring katuwang ng PNRC Boracay sa pagbibigay ng kaalaman sa Life Saving. #ecm122012

Tribung kasali sa 2013 Boracay Ati-atihan, hindi pa mabilang


Hindi pa malaman sa ngayon kung ilang tribo ang lalahok sa Ati-atihan sa Boracay.

Ayon kay Rev. Fr. Arnold Crisostomo, Kura Paroko ng Holy Rosary Parish Church sa Balabag, ito marahil ay may mga planong tulong na inilatag ang lokal na pamahalaan ng Malay at hiniling na baguhin ang iskedyul ng selebrasyong ito.

Pero nilinaw ng pari na nagdesisyon silang panatilihin sa ikalawang linggo ng Enero pa rin ang o ika-13 sa susunod na buwan ng Enero taong 2013 ipagdiwang.

Dahil ito rin aniya ang nais ng mga tao lalo na ng mga kalahok na tribu.

Ito ay upang mapanatili ayon sa pari ang tradisyon na pawang “debusyonal” lamang at simpleng ipagdiwang.

Sa kasalukyan umano, ang mga tribu din mismo ang nag-uusap usap kaugnay sa aktibidad na ito at ipinapabatid lamang sa simbahan kung ano ang mga plano nila.

Kaya hindi pa aniya masasabi ngayon kung ilan talaga ang sasaling grupo para sa 2013 Boracay Ati-atihan. #ecm122012

LGU Malay, pinaghahandan na ang kalamidad


Pinaghahandaan na ng lokal na pamahalaan ng Malay ang Boracay sa anumang kalamidad.

Ito’y dahil ang Municipal Disaster Risk Reduction Management Council o MDRRMC ng Malay ay bumuo na ng sistema at grupo na siyang aaksyon sa oras ng kalamidad.

Ayon kay Municipal Disaster Reduction Officer Jose Oczon, isinailalim na nila sa pagsasanay ang mga ito sa oras ng emergency.

Nagsanib-pwersa na din at sinanay ng Red Cross ang Malay Auxiliary Police o MAP sa Boracay, Lifeguard, Boracay Action group o BAG, at iba pang mga volunteer groups.

Hindi lang ito sa pagre-rescue kundi maging sa Basic Life support bilang paghahanda na rin sa hindi hinihinging pagkakataon.

Ayon pa kay Oczon, di lang dito magtatapos ang training dahil aasahang may mga susunod pa.

Higit sa lahat, mahalaga pa rin aniya na maging aktibo ang mga rescuer sa Boracay, lalo pa nga’t ang isla ay pinarangalan bilang “best beach in the world” at masigurong ligtas ang mga turista at kumunidad ng Boracay.

Ang Basic Life Support Course ng mga volunteers ay sinimula kahapon, hanggang ngayong araw, na pinangunahan ng isang Australian Red Cross na si David Field. #ecm122012