Wednesday, September 07, 2011

Dahil sa land dispute sa Boracay, PD Defensor, handang magpaliwanag sa SP

Ni Edzel Mainit, Senior Field Reporter, YES FM Boracay

Nakahandang humarap sa Sangguniang Panlalawigan o SP si P/Supt. Cornillo Defensor, Provincial Director ng Aklan Police Provincial Office o APPO, para malinaw na ang isyu at akusasyon  na umano ay huli o delay sa  pagresponsde ang kapulisan sa Boracay sa mga agawan ng lupang nangyayari sa isla.

Subalit ayon sa opisyal ng kapanayamin ng himpilang ito, sa ngayon ay wala pa naman umano itong natatanggap ng imbitasyon mula sa SP.

Kaugnay nito, idenipensa naman ni Defensor ang Boracay Pulis, dahil ang obligasyon lamang aniya nila sa isyu ng land dispute ay panatilihing mapayapa at walang away na mangyayari, dahil ito ay matatawag na bilang isang sibil na kaso.

Pero pagdating sa pagdidisiyong kung sino ang nagmamay-ari ng lupaing pinag-aawayan ay wala na ito sa saklaw nila, kaya hindi pwedeng makaladkad ng pulis ang mga Blue Guard o representante ng mga kampong nag-aagawan, lalo na at may mga dokomento namang ipinapakita ang mga ito.

Ngunit kapag umabot na sa away at sakitan, doon na sila manghihimasok at dadalhin ang mga ito sa himpilan ng pulisya dahil mapupunta na ito sa kasong kriminal.

Ang pahayag na ito ni Dir. Defensor ay nag-ugat nang magmunkahi si SP Member Nemesio Neron na ipapatawag siya kasama ang hepe ng Boracay Police sa sesyon kaugnay sa mainit na isyung land dispute sa isla kamakailan lang. 

Fiscal’s Office sa Boracay, hiniling ng SB Malay sa DoJ

Ni Edzel Mainit, Senior Field Reporter, YES FM Boracay

Isang mosyon ang napagkasunduan ng mga miyembro ng Sangguniang Bayan ng Malay para magpasa ng isang resolusyon sa Departement of Justice o DoJ na humihiling na kahit isang araw sa isang linggo ay magkaroon ng opisina sa Boracay sa Fiscal’s Office.

Ito ang napagkasunduan ng konseho sa sesyon nila kahapon, dahil batid ng mga ito na mahirap at magastos sa bahagi ng pulis sa Boracay na magbiyahe dala ang suspek lamang makasampa ng kaso.

Maliban dito, peligroso at isang pakikipagsapalaran sa bahagi ng mga pulis ang ganitong sitwasyon.

Kaya mas mainam kung posible lamang ayon sa mga ito na ang taga prosekyuson na lamang ang pumunta dito.

Subalit hindi lamang ang fiscal  ang target nilang  magkaroon ng opisina sa isla, sapagkat maging ang Public Attorney’s Office o PAO ay gusto din nilang magkaroon ng opisina dito, para ang mga suspek ay maipagtanggol din ang kanilang sarili.