YES THE BEST 911 BORACAY

Saturday, March 23, 2013

Philippine Coastguard, naka heighten alert na para sa Semana Santa


Ni Bert Dalida, News Director, YES FM Boracay

Naka highten alert na ang Philippine Coastguard para sa pagdagsa ng mga bakasyunista sa Semana Santa.

Ayon kay Lieutenant Senior Grade Jimmy Oliver Vingno ng Philippine Coastguard, simula pa nitong nagdaang linggo ay nagpalagay na sila ng mga passenger assistance center sa lahat ng mga pantalan sa Caticlan at Boracay.

May mga ipinakalat na rin umanong mga nakaunipormeng coastguard sa beach front na maaaring tawagin o malapitan sakaling may mga insidente.

Dagdag pa ni Vingno na mahigpit nilang ipinapatupad ang pagpapasuot ng life jacket sa mga biyahero ng bangka, kasabay ng paalala na ilagay ang kanilang mga pangalan sa manipesto.

Hinikayat din nila ang mga may-ari ng mga bangka na palitan na ang mga lumang life jacket para maganda namang tingnan.

Samantala, bahagi din umano ng kanilang paghahanda ay ang pagbigay ng limang araw na Water Search and Rescue and Rubber Boat Operations and Maintenance Training sa isla na nilahukan ng mga volunteers mula sa ibat-ibang ahensya.

Ito’y upang marami ang makapagresponde sakaling may mga maritime incident ngayong panahon ng bakasyon at kuwaresma.

Kampanteng idinagdag pa ni Vingno na sa ngayon ay walang anumang problema sa biyahe ng RoRo.

Mga aktibidad ng Holy Rosary Parish Boracay para sa Semana Santa, naka iskedyul na


Ni Bert Dalida, News Director, YES FM Boracay

Naka-iskedyul na ang mga aktibidad ng Boracay Holy Rosary Parish para sa Semana Santa.

Ayon kay Holy Rosary Parish Team Ministry Mediator Rev. Fr Nonoy Crisostomo, the same schedule o walang anumang gaanong pagbabago sa mga aktibidad ng simbahan ngayong Semana Santa.

Kaya naman ang gaganaping Blessing of the Palms o palaspas sa mismong Balabag plaza bukas ng umaga ay itinakda bago ang misa sa alas otso.

Samantala isang open recollection naman ang gaganapin sa mismong simbahan sa darating na Marso bente sais, dakung alas sais ng gabi.

Kumpisalang bayan naman ang susunod na gawain kinabukasan na magsisimula sa alas otso ng umaga.

Sa darating na Marso bente otso o Huwebes Santo, sa alas kuwatro ng hapon ay ang selebrasyon para sa tinatawag na The Lord’s Last Supper, na susundan naman ng prosesyon sa loob ng simbahan.

Inaasahang dadagsa naman ang mga deboto sa beach front mula sa barangay Manoc-manoc para sa Via Crusis sa darating na Biyernes Santo na magsisimula sa alas sais ng umaga.

Alas tres kinahapunan nito ay ang Liturgy of the Word, Veneration of the Cross at Holy Communion na susundan din ng prosesyon sa labas ng simbahan.

Matatandaang sinabi naman Crisostomo na dapat ding bigyan ng mga bisita sa isla ang kahalagahan ng pagninilay-nilay sa mga nasabing banal na araw.

Philippine Red Cross, maglalagay ng mga first aid stations sa Boracay ngayong Semana Santa


Ni Bert Dalida, News Director, YES FM Boracay

Magpapalagay ng mga first aid stations ang Philippine Red Cross sa isla ng Boracay sa darating na Holy Week.

Ayon kay Red Cross Malay-Boracay Chapter staff nurse John Patrick Moreno, upang matugunan ang mga pangangailangan sa pangunang lunas o first aid ng mga bakasyunista.

Ilang mga first aid stations ang ilalagay nila sa beach front ng Boracay, maliban pa sa ipapakalat nilang mga Red Cross life guard.

Maging ang numero unong shopping destination sa isla na D’Mall of Boracay ay palalagyan din umano nila ng dalawang first aid stations na may dalawa o tatlong nurses.

Kung saan nakahanda umano ang mga ito mula alas otso ng umaga hanggang alas singko ng hapon, simula sa araw ng Miyerkules Santo, hanggang sa Linggo ng pagkabuhay o Easter Sunday.

Hinikayat naman ng kanilang Red Cross youth in charge na si Janna Marasigan ang mga bakasyunista na lumapit sa kanilang mga first aid stations.

Nakahanda umano kasi ang mga ito para sa mga magpapatingin ng kanilang blood pressure, at magbigay lunas sa mga posibleng makaranas ng pagkahilo, sakit ng katawan at heat stroke sanhi ng mainit na panahon.

Samantala, hinimok din ng mga taga-Red Cross ang lahat ng kanilang mga trained volunteers na tumulong sa nasabing gawain sa isla, sakaling gusto at bakante ang mga ito sa Semana Santa.

DOT, nakikipag-ugnayan na sa iba’t-ibang ahensya para sa kaligtasan ng publiko sa Boracay sa Semana Santa


Ni Bert Dalida, News Director, YES FM Boracay

Nakikipag-ugnayan na sa iba’t-ibang ahensya ang DOT o Department of Tourism para sa seguridad ng mga bakasyunista at turista sa Boracay.

Ito’y may kaugnayan parin sa inaasahang tourist influx o pagdagsa ng mga turista sa Boracay sa nalalapit na Semana Santa.

Sa panayam ng himpilang ito kay Boracay DOT Officer in charge Tim Ticar, sinabi nito na nakipag-coordinate na sila sa mga taga Boracay PNP, life guard, at Red Cross bilang bahagi naman ng kanilang paghahanda.

Maliban dito, nagpalagay na rin umano sila ng mga lisensiyadong tour guide sa beach front ng Boracay, para makatulong sa pagbibigay ng impormasyon at assistance sa mga turista.

Samantala, hiniling naman ni Ticar na mag-double time ang mga garbage collector sa pag-aasikaso ng mga basura, lalo pa’t inaasahang mado-doble din ang mga bisita sa isla.

At dahil maging ang nasabing officer in charge ay aminadong problema pa rin ang mga street lights dito.

Nanawagan si Ticar sa mga taga Malay Muncipal Engineers Office na gawan ng paraan upang gumana ang mga street lights sa Boracay para na rin sa kaligtasan ng mga turista.

Ilan kasi sa mga street lights na ito ay kinakalawang na ang mga lamp post, nakatabingi at halatang walang maintenance. (By Bert Dalida)

Aksiyon ng pamahalaan sa mga katutubong Ati ng Boracay, hiniling ni Fr. Crisostomo

Ni Peach Ledesma, YES FM Boracay


Sana ay aksiyon at hindi lamang resolusyon ang ipaabot ng Sangguniang Bayan ng Malay.

Ito ang naging panawagan ni Fr. Nonoy Crisostomo sa lokal na pamahalaan ng Malay kaugnay sa pagkamatay ng Ati Community spokesperson Dexter Condez.

Sa kanyang mensahe sa ginanap na programa kahapon pagkatapos ng prayer rally para kay Condez, sinabi ni Fr. Crisostomo na nakatanggap sila ng resolusyon mula sa SB Malay na kumukondena sa pagpaslang sa nasabing Ati spokesperson.

Ngunit para kasi kay Fr. Crisostomo, hindi sapat ang resolusyon lang kundi aksiyon sa mga pangangailangan ng mga Ati sa Boracay.

Anya, sana ay may aksiyon din umano ang lokal na pamahalaan, dahil ito na lang umano ang kulang upang mabigyan ng katarungan ang pagkamatay ni Condez.

Sinabi din ng pari na sana ay huwag nang magtulug-tulugan pa ang mga ito.

Samantala, nanawagan naman si BFI President Dionesio Salme na sana pag-ibayuhin ang peace and order sa isla dahil sa pagiging tourist destination ng Boracay.

Ani Salme, sana ay gawin din ng bawat isa ang kanyang parte upang hindi mahirapan sa huli.

Sa kabilang dako, ilan pa sa mga nagbigay ng mensahe kahapon sa nasabing programa bukod pa kina Salme at Fr Crisostomo ay ang iba pang miyembro ng simbahan tulad nina Gng. Rufina Villaroman, youth coordinators, at mga taga-suporta ng Ati Community kung saan pawang nagpahayag ang mga ito na sana’y mabigyang hustisya ang pagkamatay ni Condez, na nagsilbing inspirasyon hindi lamang sa kanyang mga ka-tribu kundi sa lahat.

Friday, March 22, 2013

Isang buwang pagkamatay ng pinaslang na Ati Community spokesperson, ginunita sa paraan ng prayer rally

Ni Peach Ledesma, YES FM Boracay


Isang prayer rally ang inilarga kaninang hapon upang gunitain ang unang buwan ng pagkamatay ni Ati Community Spokesperson na si Dexter Condez.

Bandang alas-4:30 ay nasilayan na sa area ng Ambulong, Manoc-manoc ang mga nakiisa sa prayer rally na inorganisa ng Boracay Parish Pastoral Council.

Ilang karatula at tarpaulin ang tangan ng mga sumama sa prayer rally na nakalagay ang kanilang pag-suporta sa Ati Community at pag-hingi ng katarungan para kay Condez.

Ayon kay Dominique Ofong, volunteer ng Our Lady of Holy Rosary Parish Church Ati Mission, ilan sa mga sumama sa prayer rally ay mga miyembro ng Simbahang Katolika sa Boracay, Daughters of Charity, ilang mga indibidwal, mga kaibigan, kamag-anak at mga kakilala ng pinaslang na Ati spokesperson.

“Station of the Cross” ang tema ng naturang prayer rally na nagtapos sa Our Lady of Holy Rosary Parish Church sa Brgy. Balabag.

Dito ay magkakaroon ng closing prayer na susundan naman ng maikling programa kung saan mayroon ding mga magbibigay ng kanilang mga mensahe.

Sinabi din ni Ofong na ang isinagawang prayer rally ay paraan na rin ng pagpapakita ng Simbahan ng kanilang simpatya at pakiki-isa sa layunin ng mga katutubong Ati sa isla ng Boracay na pag-hingi ng katarungan para sa pinaslang na si Condez.

Matatandaang ang 26-anyos na si Condez ay pinagbabaril noong Pebrero a-22 taong kasalukuyan, isang buwan na ang nakakaraan, malapit sa kanilang village sa Sitio Lugutan, Manoc-manoc habang siya ay papauwi mula sa isang pulong.

BIWC, muling ipapatawag ng SB

Ni Peach Ledesma, YES FM Boracay

Kailangang muling pag-usapan ang disenyo ng gutter, estado ng paghuhukay at pipe laying ng Boracay Island Water Company Inc. (BIWC).

Ito ang usaping binuksan ni SB Member Dante Pagsuguiron sa sesyon nitong Martes kaugnay sa tila hindi pa umano natutugunang pagpapatawag ng SB sa representative at contractor ng ginagawang paghuhukay ng BIWC.

Ito’y upang linawin ang estado ng ginagawang paghuhukay ng water company sa Boracay at kung ano ang magiging disenyo ng mga gutter.

Kung kaya’t nag-suhestiyon si Pagsuguiron na imbitahang muli ang mga ito sa sesyon ng SB.

Ngunit ayon kay SB Rowen Aguirre, mas maganda umanong sa isang committee hearing na lang pag-usapan ang bagay na ito.

Mas mapag-uusapan umano ito kapag idinaan sa isang komitiba upang mas magiging malapit sa negosasyon kaysa sa question hour ng lingguhang SB session.

Dahil dito, ibinigay sa Committee on Infrastructure ang nasabing bagay upang mapag-usapan, na nakatakda naman ngayong hapon sa Boracay Action Center.

Nag-mungkahi din si Aguirre na dahil pag-uusapan din ang tungkol sa disenyo ng gutter, ay mas magandang imbitahan na rin ang kinatawan ng Malay Transportation Office at upang matanong tungkol sa loading bay project.

Napag-alamang isinuhestiyon na dati ng SB sa BIWC na magkaroon ng portion sa gutter na maaaring sampahan ng mga sasakyan lalo na sa pagpapasakay at pagpapa-baba ng mga pasahero.

“No Permit to Party” ng munisipyo sa Biyernes Santo sa Boracay, pinasalamatan ng Simbahang Katoliko

Ni Malbert Dalida, News Director, YES FM Boracay

Nagpasalamat ngayon ang Simbahang Katoliko sa Boracay kaugnay sa “No Permit To Party” sa darating na Biyernes Santo sa isla.

Sa panayam ng himpilang ito kay Holy Rosary Parish Boracay team ministry mediator Fr. Nonoy Crisostomo, sinabi nitong dapat ngang maramdaman ng lahat pati na ng mga turista sa isla ang tunay na diwa ng Semana Santa at Biyernes Santo, na siyang araw ng pagmumuni-muni.

Kaya naman nagpapasalamat umano ito dahil ang lokal na pamahalaan ng Malay ay patuloy na tumutulong upang maging tahimik ang pagdiriwang ng Semana Santa.

Matatandaang nitong araw ng Martes ay nagpadala ng sulat ang munisipyo sa lahat ng mga establisemyento sa isla na hindi sila magbibigay ng permit para sa mga party o event na maiingay at malalakas na tugtugan.

Nabatid na istriktong ipapatupad at babantayan ng munisipyo ang katahimikan, mula alas sais ng umaga ng Biyernes Santo, hanggang alas sais ng umaga ng Sabado de Gloria.

Thursday, March 21, 2013

Signature campaign para kay Ati community spokesman Dexter Condez, ipapadala umano kay pangulong PNoy

Ni Bert Dalida, News Director, YES FM Boracay

Ipapadala umano ng Simbahang Katoliko kay Pangulong Benigno Aquino III ang mga nalikom na pirma sa kanilang signature campaign.

Ito ang kinumpirma ni Rev. Fr. Arnaldo "Nonoy” Crisostomo, mediator ng Holy Rosary Parish Ministry sa panayam ng himpilang ito nitong umaga.

Kung saan kinumpirma nito na umabot na rin sa libong mga pirma ang kanilang nalikom nitong mga nagdaang araw.

Layunin umano ng nasabing signature campaign na ipabatid ang pagdaramdam at paghahanap ng katarungan ng buong kumunidad, sa nangyaring pagpaslang kay Ati spokesman Dexter Condez nitong nagdaang Pebrero bente dos.

Ang pangyayaring ito ayon pa kay father Nonoy ay hindi rin dapat ipag-pikit mata ng lahat at ng mga kinauukulan.

Patuloy din nitong hinikayat ang mga gustong makibahagi sa nasabing signature campaign, na magtungo lamang sa Holy Rosary Parish.

Samantala maliban kay Pangulong Benigno Aquino III, ay padadalhan din umano ng kopya ng mga pirma ang iba’t-ibang ahensya ng pamahalaan.

Prayer rally bukas para sa Ati spokesman na si Dexter Condez, all set na

Ni Malbert Dalida, News Director, YES FM Boracay

All set na ang gaganaping prayer rally bukas para sa pinaslang na Ati spokesman na si Dexter Condez.

Ayon kay Rev.Fr. Nonoy Crisostomo, mediator ng Holy Rosary Parish Team Ministry sa Boracay, inaayos na lang ang maikling programa para kay Dexter bukas, kung saan inaasahan umanong may mga grupong darating na magsasalita katulad ng taga BFI o Boracay Foundation Incorporated.

Sinabi pa nito na hindi lamang para kay Dexter ang gagawing prayer rally kungdi para din sa kapayapaan ng buong isla.

Ang prayer rally din umanong ito ay pareho lang din halos sa regular na station of the cross tuwing araw ng Biyernes, dahil ito’y nakatuon sa pagninilay-nilay sa mga pinagdaanan ng Panginoong Hesus.

Ang ipinagkaiba lamang ayon pa kay Fr. Nonoy ay ang konteksto, lalo pa’t ito’y nakatuon naman sa pagninilay-nilay kung bakit may mga nagaganap na kahalintulad na krimen sa isla.

Nabatid na sisimulan ang station of the cross o prayer rally bukas ng alas tres y medya ng hapon sa Lupaing Ninuno sa Sitio Lugutan, Manoc-manoc at magtatapos sa mismong Holy Rosary Parish Church.

Sa panayam naman nitong umaga kay Fr.Nonoy ay kanyang ipinaabot ang kanyang paanyaya sa lahat ng mga gustong sumama bukas sa nasabing aktibidad.

Simbahang Katoliko sa Boracay, maglulunsad ng prayer rally para sa pinaslang na Ati spokesman na si Dexter Condez bukas

Ni Malbert Dalida, News Director, YES FM Boracay

Nakatakdang maglunsad ng prayer rally bukas ang Simbahang Katoliko para sa pinaslang na Ati spokesman na si Dexter Condez.

Gaganapin ang nasabing prayer rally bukas ng hapon, sa pamamagitan ng tinatawag na Station of the cross na magsisimula sa Lupaing Ninuno sa Sitio Lugutan, Manoc-manoc.

Kaugnay nito, nagpaikot na ng imbitasyon sa pamamagitan ng sulat ang simbahan, na nilagdaan ni Parish Pastroral Council Coordinator Dionisio ‘Jony’ Salme at Holy Rosary Parish Team Ministry Moderator Fr. Nonoy Crisostomo.

Layunin umano ng nasabing aktibidad ay upang himukin ang publiko lalo na ang lahat ng mga Boracaynon na makibahagi sa pagdarasal upang mabigyang hustisya ang pagkakapaslang kay Condez.

Ang nasabing prayer rally at station of the cross ay magtatapos sa loob mismo ng nasabing simbahan.

Kaugnay nito, nananawagan naman ang pastoral council sa lahat ng mga lalahok na magdala ng mga streamer at banner na may nakalagay na Justice for Dexter.

Matatandaang si Condez ay ang Ati spokesman ng mga taga Boracay Ati Community na mag-iisang buwan nang pinaslang dahil sa umano’y agawan sa lupa.

Malay at Boracay PNP, tiniyak na ang seguridad ng publiko sa darating na Semana Santa


Tiniyak ngayon ng Malay PNP ang seguridad ng publiko lalo na ang mga turista at bakasyonistang dadagsa sa darating na Semana Santa.

Sa panayam ng himpilang ito kay Malay PNP Chief PSInspector Reynante Jomocan, sinabi nito na may mga security plan na sila para sa Caticlan port, lalo na ngayong bakasyon.

Hindi umano kasi dapat na isawalang bahala ang bagay na ito, kahit sabihin pang tahimik na lugar ang bayan ng Malay.

Kampante ding sinabi ni Jomocan na kahit malabo pang mapagbigyan ni Police Provincial Director Escarilla ang hinihingi nilang dagdag na mga pulis.

Mapapalawak parin umano ng mga ito ang kanilang puwersa sa tulong mismo ng barangay Caticlan, LGU Malay, at iba pang mga force multiplyers.

Nakatakda na rin umano silang magkaroon ng mga public assistance center sa mga matataong lugar katulad ng mga bus terminal.

Samantala, maliban umano sa puwersa ng Philippine Coastguard, Navy at mga force multiplyers sa isla, police visibility naman ang tiniyak ni Boracay PNP Chief PSInspector Joeffer Cabural, para sa mga turista sa Boracay.

Gagawin din umano nito ang lahat para sa kaligtasan ng publiko para sa Semana Santa.(

Bagong Malay PNP Chief, mainit na tinanggap ng SB Malay

Ni Peach Ledesma, YES FM Boracay

Mainit na tinanggap ng Sangguniang Bayan ng Malay ang bagong Malay PNP chief sa katauhan ni PSInsp. Renante R. Jomocan.

Sa ginawang courtesy call ni Jomocan sa SB Malay ay agad siyang winelcome ng mga miyembro ng Sanggunian.

Nagbigay din ng konting impormasyon ang SB sa bagong hepe ng Malay PNP na makakatulong sa kanyang pamamalagi dito.

Ilan sa mga napag-usapan sa paghaharap nina Jomocan at ng SB ay ang pagpapatupad ng “one-entry-one-exit” policy sa Boracay at mga bagay na may kinalaman sa nalalapit na 2013 Midterm Elections.

Kasabay ng kanyang pangakong ibibigay din ang serbisyong ibinigay ni dating Malay PNP chief P/Insp. Mark Cordero, hiningi din ni Jomocan ang kooperasyon at tulong ng SB Malay dahil hindi din naman umano nila makakaya na wala ang tulong ng lokal na pamahalaan.

Bilang kapalit ay nangako din naman ang Sanggunian na hindi magbabago ang suporta nila sa pulisya lalo na sa kanilang mga programa lalo na sa pangangalaga ng kaayusan ng kanilang nasasakupan.

Si PSInsp. Jomocan ang uupo bilang officer-in-charge sa Malay PNP kapalit ni P/Insp. Cordero na inilipat ng assignment dahil sa mga hindi pa malamang kadahilanan.

Ang nasabing pagpapalit ng hepe ay may kaugnayan pa rin sa eleksyon sa darating na Mayo.

Serbisyo ng dating Malay PNP chief, kikilalanin ng SB Malay

Ni Peach Ledesma, YES FM Boracay

Planong bigyan ng pagkilala ng Sangguniang Bayan si P/Insp. Mark Cordero dahil sa magandang serbisyong ibinigay nito sa bayan ng Malay.

Sa mosyon na binuksan ni SB Member Rowen Aguirre sa privilege hour sa sesyon kahapon, sinabi nitong “excellent” ang naging serbisyo ni Cordero bilang hepe ng Malay PNP sa loob ng mahigit kumulang dalawang taon.

Wala din umanong isyu na kinasangkutan si Cordero at naging isang masikap at masigasig na alagad ng batas.

Dahil dito, isang resolusyon ang ipinasa ni Aguirre upang purihin ang mga nagawa ng dating Malay PNP chief.

Agad naman itong sinang-ayunan ng mga kapwa miyembro ng Sanggunian at ipinasa ang resolusyon.

Maaalalang noong isang linggo ay nilisan na ni Cordero ang bayan ng Malay at binigyan ng ibang assignment ng provincial office.

Dalawang lalaki sa Boracay, sugatan matapos pagtatagain ng lasing

Ni Bert Dalida, News Director, YES FM Boracay

Dalawang lalaki sa Boracay ang sugatan matapos pagtatagain ng isang lasing sa barangay Balabag.

Nangyari ang insidente dakung alas dos madaling araw ng Martes, habang naglalakad ang mga biktimang sina Ernes Jawali, bente dos anyos ng Posew Numancia, Aklan at Gerald Arroyo, trenta anyos ng Goding Ramos, Kalibo, Aklan.

Base sa imbestigasyon ng Boracay PNP, sinasabing huminto sa pagmamaneho ng kanyang motorsiklo ang suspek na si Joven Ledesma, bente nuwebe anyos ng Anilao, Iloilo, sa mismong likuran ng mga naglalakad na biktima, at nagtanong kung bakit umano siya tinitingnan ng mga ito.

Dagdag pa nito, binantaan din umano ng suspek ang mga biktima na kanyang babalikan.

Bumalik nga ito na may dalang itak at bigla na lamang pinagtataga ang dalawa.

Nagtamo ng sugat sa iba’t-ibang parte ng katawan ang dalawa, bago nila nadis-armahan ang lasing na si Joven.

Dalawang malalaking sugat sa mukha ang tinamo ni Gerald, habang sa kaliwang kamay naman ang tinamong sugat ni Ernes.

Kaagad namang dumating ang mga pulis kung saan naisugod sa ospital ang mga biktima.

Problema tungkol sa hindi pagsunod sa loading at unloading area sa Boracay, inilapit ng isang drayber sa YES FM Boracay

Ni Bert Dalida, News Director, YES FM Boracay

Trapik, disgrasya at kapakanan ng nakararami.

Ito umano ang layunin ng isang traysikel drayber sa Boracay, kung bakit niya inilapit sa himpilang ito ang umano’y paulit-ulit niyang problema.

Sa panayam ng himpilang ito sa drayber na tumangging ibigay ang kanyang totoong pangalan, sinabi nito na malaking problema para sa kanya ang hindi pagsunod ng mga kapwa niya drayber at mga pasahero sa tamang loading at unloading area sa isla.

Partikular na tinukoy ng itinago na lamang sa pangalang ‘Rex’ ang sakayan at babaan ng pasahero sa paakyat na bahagi ng sitio Ambolong sa barangay Manoc-manoc.

Madalas daw kasi na nagiging delikado doon, dahil sa mga pasaherong gustong bumaba sa mga alanganing lugar kahit may inilaang unloading area.

Rason naman upang maging perwisyo sa mga sasakyang bumubuwelo paakyat, na kinakailangan pang mag-overtake kahit alanganin, lalo pa’t makitid ang daan.

Dahil dito, maaari umanong mahagip ng mga rumaragasang sasakyan ang humintong traysikel, o ang mismong bumabang pasahero.

Katunayan, marami na rin umanong naaksidente doon, dahil lamang sa pag-iwas humintong sasakyan na wala sa lugar.

Bagama’t tumatanggi umano ito sa maling kagustuhan ng kanyang mga pasahero, ay siya naman ang binabalikan at binabantaang isusumbong sa opisina ng BLTMPC.

Idinagdag pa ni ‘Rex’ na minsan, ay may mga drayber ding puma-parking sa loading area doon kung kaya’t nagkakatrapik.

Kaugnay nito, minarapat namang idulog ng nasabing drayber sa himpilang ito ang nasabing sitwasyon, upang maiparating sa mga kinauukulan.

Wednesday, March 20, 2013

Istriktong pagpapatupad ng liquor ban sa darating na midterm election, iginiit ng COMELEC Malay

Ni Malbert Dalida, News Director, YES FM Boracay

Simula hatinggabi ng ika-9 ng Mayo, hanggang hatinggabi ng ikalabing tatlo ng Mayo.

Ito ngayon ang mga opisyal na araw na ipinaalala ni Malay COMELEC Officer Elma Cahilig, kaugnay sa ipapatupad na liquor ban sa darating na 2013 midterm election.

Istriktong ipapatupad umano kasi ng COMELEC ang pagbabawal sa pagtitinda, pagbili,pagbigay o pag-alok ng anumang uri ng alak sa panahong iyon, base na rin sa nakasaad sa Omnibus Election Code.

Sa panayam ng himpilang ito kay Cahilig, sinabi nitong mahaharap sa Election Offense ang sinumang lumabag dito, na ayon naman sa batas ay pagkakabilanggo ng isa hanggang anim na taon, pagkakadiskwalipika sa public office at rebokasyon ng karapatang bumoto.

Magkaganoon paman, sinabi ni Cahilig na may exemption naman umano dito ang mga establisemyentong sinertipika ng Department of Tourism.

Ayon naman kay DOT Officer in charge Tim Ticar, patuloy silang tumatanggap ng mga establisemyentong mag-aaplay para ma-inspiksyon, at mabigyan ng sertipakasyon.

Cruise ship na MS Europa, nasilayan na ang isla ng Boracay

Ni Christy Dela Torre, YES FM Boracay


Eksakto alas-siyete y medya kahapon ng umaga, Marso a-19 ng taong kasalukuyan, nang dumaong ang cruise ship na MS Europa sa isla ng Boracay.

Lulan ang nasabing cruise ship ng mahigit 400 na mga turista at crew na nagkaroon ng pagkakataong maikot at mapasyalan ang isla.

Ang MS Europa ang pangalawang cruise ship na dumaong sa Boracay ngayong taon matapos ang unang cruise ship na MS Columbus na dumating naman noong Pebrero a-24 ng taong kasalukuyan.

Kaugnay nito, ayon kay Department of Tourism Officer-In-Charge Tim Ticar, noong una ay naging hunting grounds lamang ang isla hanggang sa naging back packers, naging individual at group tourists at ngayon nga ay nag-evolve na bilang "cruise ship destination".


Malaking bagay umano ito para sa turismo ng isla ng Boracay, lalo pa nga’t ang target umano ng DOT ay promotional marketing.

Bukod dito, ito rin umano ang pagkakataon upang masilayan ng mga turista kung gaano ka-ganda ang Boracay.

Bagama’t ito na ang huling cruise ship na dadaong sa isla ngayong taon, ngunit ayon kay Ticar ay kasalukuyan pang nakikipag-negotiate o nanliligaw sa Provincial Government ang agency ng Legend of the Seas, ang cruise ship na unang dumating sa isla nitong nagdaang Oktubre ng taong 2012.

Inihayag pa nito na sa susunod na taong 2014 ay aasahan na ang pagdaong ng tatlo pang cruise ship, gayundin sa taong 2015.

Mga party at maiingay na aktibidad sa Boracay sa darating na Biyernes Santo, ipagbabawal ng Munisipyo ng Malay

Ni Malbert Dalida, News Director, YES FM Boracay

May event o party ka ba sa Boracay sa darating na Biyernes Santo?

Kung gano’n, huwag kang magtatampo kung hindi ka mabibigyan ng permiso.

Hindi kasi magbibigay o mag-i-issue ng permit ang munisipyo para sa mga kahalintulad na aktibidad kapag Biyernes Santo.

Ito’y base na rin sa Sangguniang Bayan Resolution No. 15, na humihiling sa Office of the Mayor na huwag pahintulutan ang mga establisemyento sa isla na maging maingay sa araw ng pagninilaynilay ng mga Kristiyano.

Kung saan simula alas-6:00 ng umaga ng Biyernes Santo hanggang alas-6:00 ng umaga ng Sabado de Gloria, ay bawal talaga ang party at pagpapatugtog ng malakas.

Kaugnay nito, ang lahat ng mga establisemyento dito ay padadalhan ngayong araw ng sulat upang ipaalala at ipaalam na magiging istrikto ang munisipyo sa pagpapatupad ng nasabing kautusan.

Ito’y isang paraan din umano ng pagpakilala ng munisipyo sa solemnidad ng nasabing banal na araw.

Umano’y paniningil ng mahal ng ambulance fee ng mga pribadong klinika sa Boracay, itinanggi ng Red Cross

Ni Malbert Dalida, News Director, YES FM Boracay

Itinanggi ng Red Cross ang umano’y mahal na paniningil ng ambulance fee ng mga pribadong klinika sa Boracay.

Sa panayam ng himpilang ito kay Red Cross Boracay-Malay Chapter Administrator Marlo Schoenenberger, sinabi nito na isyu-isyu lamang ang kuwento tungkol sa mga nasabing klinika sa isla.

Bagama’t sila umano sa Red Cross ay “neutral” at hindi namamagitan sa mga kahalintulad na usapin, nakipag-ugnayan naman umano ito sa mga klinika, bilang pagsunod sa iniutos sa kanya ng SB Malay na alamin ang katotohanan tungkol dito.

Sa ikawalong regular session kasi ng SB Malay noong isang linggo ay nausisa ang nasabing administrador kaugnay sa paniningil nila ng ambulance fee.

Kung saan matatandaang sinabi nito na ang mga turistang pasyente na may mga travel insurance ay isang libo’t limang daang piso ang singil nila.

Muli namang iginiit ni Schoenenberger na kapag pasyenteng Boracaynon ang nangailangan ng ambulansya ay hindi nila ito sinisingil.

Napag-alamang ang mga pribadong klinika dito sa isla ay walang sariling ambulansya, at may mga pagkakataong ang ambulansya ng Red Cross ang ginagamit.

Monday, March 18, 2013

Mangroove Park sa Sitio Lugutan, binuksan na para sa publiko

Ni Alan Palma Sr., YES FM Boracay


Pormal nang binuksan para sa publiko ang bagong panturismong atraksyon sa Sitio Lugutan, Manoc-manoc kahapon.

Ang boardwalk sa mangrove park na pinunduhan at proyekto ng Tan Yan Kee Foundation ay pinasinayaan mismo ni Dr. Lucio Tan at dinaluhan ng mga lokal na opisyales ng bayan Malay na pinangunahan ni Mayor John Yap.

Sa panayam ng himpilang ito ka Jerry Ty, tagapamahala ng proyekto, ang pagtatanim ng bakawan sa nasabing lugar ay isa sa mga proyektong pangkalikasan na kanilang tinututukan.

Ang paglinis sa lugar at pagtanim ng bakawan ay unang isinagawa noong nakaraang taong na dinaluhan ng mga volunteers at mga Boracaynon.

Ang pagbukas ng bagong pasyalan ay para lalo pang mahatak ang ilang turista na puntahan ito maliban sa ipinagmamalaking puting buhangin ng isla na kung saan nais din nito imulat sa bagong henerasyon ang kahalagahan ng pangangalaga sa kalikasan.

Ang pasinaya sa mangrove park ay nag umpisa sa pamamagitan ng pag bendisyon na pinangunahan ni Holy Rosary Parish Rev. Father Arnold “Nonoy” Crisostomo.

Tour guide at coordinator sa Boracay, timbog sa isang buy-bust operation

Ni Malbert Dalida, News Director, YES FM Boracay

Hindi sukat akalain ng isang tour guide at isang coordinator sa Boracay na posas ang magiging kapalit ng kanilang ibinibenta.

Ito’y matapos matimbog ang mga ito sa isang buy-bust operation ng pinagsanib na puwersa ng Boracay PNP,  Aklan Police Provincial Safety Company at Police Intelligence Operatives nitong nagdaang Sabado ng gabi sa Sitio Tulubhan, Manoc-manoc.

Naging hudyat sa pagkakatimbog ng mga ito ang isang pot session sa kuwarto ng mismong police asset, matapos nilang tanggapin ang bayad para sa umano’y ibinibenta nilang droga.

Sa police report, nakilala ang mga suspek na si Erwin Martinez, trenta’y kuwatro anyos na coordinator ng New Washington, Aklan at Roberto Baculinao, bente siyete anyos na tour guide ng Dao, Capiz, at pawang mga residente ng barangay Manoc-manoc, Boracay.

Narekober mula sa mga suspek ang tatlong heat-sealed transparent plastic sachet ng hinihinalang shabu, mga marked money, wallet na naglalaman ng ID ni Erwin Martinez, kasama ang isa pang heat sealed plastic sachet na naglalaman ng hinihinalang shabu residue.

Kasama pa rito ang isang wallet na naglalaman ng Kabayan Action Group ID at Kabayan Action Group badge ni Roberto Baculinao, pera at dalawang cellphone.

Maliban dito, narekober din at nakompiska ang ilang drug paraphernalia katulad ng aluminum foil na naglalaman ng hinihinalang shabu, improvised tooter, dalawang disposable lighter at ballpen, na umano’y ginamit ng mga ito sa pot session.

Pansamantala namang ikinustodiya sa Boracay PNP ang mga suspek, na nahaharap sa kasong paglabag sa RA 9165, o paglabag sa batas laban sa ipinagbabawal na droga.

Libreng Search and Rescue Training, inilarga ng Philippine Coast Guard ngayong araw

Ni Mark Anthony Pajarillo, YES FM Boracay

Isang libreng search and rescue training ang inilaraga ng Philippine Coast Guard ngayong araw.

Kasama ang Phil. Coast Guard Auxiliary, magsasagawa umano ito ng tinatawag na Water Search & Rescue, Rubber Boat & Operation Maintenance o WASER/RBOM Training dito sa isla ng Boracay.

Ang mga sasali sa nasabing pagsasanay ay mismong mga taga Phil. Coast Guard, Phil. Army, PNP, Red Cross, Boracay Action Group at ilang mga volunteers.

Sinimulan ito ng Classroom Instruction sa Station 1 sa Club Paraw at ang Water Training ay sa mismong baybayin ng Boracay.

Ayon kay Lt. Senior Grade Jimmy Oliver Vingno ng Phil. Coast Guard, tampok sa naturang pagsasanay na ito ay ang mga basic life support training, basic water exit, tamang paggamit at paghawak ng rubber boat at First Aid.

Ang mga nagsipagsanay umanong ito ay maituturing na ring mga Life Guards sakaling magkaroon man ng mga kalamidad dito sa isla ng Boracay anumang oras.

Sinabi pa ni Vingno na maliban sa maiiwasan ang ilang insidente ng pagkalunod.

Importante ang pagsasanay na ito upang makatulong na rin sa mga lokal na residente ng Boracay sa pagsagip ng mga nadidisgrasya sa dagat nang hindi umaasa sa mga ahensyang ito.

Asahan din umano na sa susunod na buwan ng Abril ay magkakaroon ulit sila ng pagsasanay ng isang linggo dito pa rin sa Boracay.

Samantala magtatagal naman ng anim na araw ang nasabing training hanggang sa Sabado, ika 23 ng Marso taong kasalukuyan.