Saturday, August 17, 2013

Zest Air, sinuspinde dahil sa hindi pagsunod sa regulasyon ng CAAP

Ni Jay-ar M. Arante, YES FM Boracay

Sinuspendi umano ng Civil Aviation Authority of the Philippines (CAAP) ang operasyon ng Zest air dahil sa hindi pagsunod sa ipinatupad na regulasyon nito.

Base sa impormasyon, ilan umano sa nakitang paglabag ng CAAP ay ang kabiguang i-check ang aircraft logs, flight manifest at weather.

Gayon din ang hindi pagprisinta ng airman license habang nag-iinspeksyon ng rampa, sunod-sunod na kanseladong flights dahil sa kakarag-karag na eroplano, nagre-refuel kahit may nakasakay na mga pasahero, sobra-sobrang flight duty time at kawalan ng accountable manager ng airlines.

Kaugnay nito, inalmahan naman umano ng naturang pamunuan ng eroplano ang ipinataw na suspensiyon ng CAAP.

Ayon sa mga ito, sana umano ay binigyan sila ng sapat na panahon para sagutin ang mga inaakusa laban sa kanila.

Samantala, tiniyak naman ng tanggapan ng naturang company airline sa bayan ng Kalibo na aasikasuhin nila ang pangangailangan ng mga apektado nilang pasahero.

Hahanapan umano nila ang kanilang mga nagpa-book na pasahero ng ibang flight para hindi maantala sa kanilang mga biyahe.

Sa kasalukuyan ay patuloy namang kinukuha ng himpilang ito ang pahayag ng pamunuan ng Civil Aviation Authority of the Philippines ukol sa nasabing usapin.

Pagdagsa ng mga basura sa Boracay, hindi dapat pabayaan ayon sa DOT

Ni Jay-ar M. Arante, YES FM Boracay

Hindi dapat umano pabayaan ang mga basurang dumadagsa sa isla ng Boracay ayon sa Department of Tourism.

Ito ay kaugnay sa nangyaring pagdagsa ng mga basura sa buong dalampasigan ng isla kahapon ng hapon.

Ayon kay DOT Boracay Officer In-Charge Tim Ticar, ang turismo ay isang napaka-sinsitibong industriya at ang kalinisan ay isa sa mga bahagi na dapat hindi pabayaan ang mga basura.

Dahil ang Boracay umano ay kilala para sa kanyang kalinisan at kristal na tubig gayon din ang malapulbos na buhangin nito.
Dagdag pa ni Ticar, hindi naman mula sa Boracay ang mga basurang ito dahil ito ay mula pa umano sa ibang isla at mainland Panay na dinagsa lamang dulot na malakas hanging habagat.

Ilan nga sa mga inanod na basura ay ang mga sanga ng punong kahoy at kawayan bunga ng niyog pati na ang mga plastik na bagay.

Una ng ikinadismaya ng DOT ang mga basurang dumadagsa na plastik dahil hindi anila itp maganda tingnan lalo na sa mata ng mga turista.

Pero ayon kay Ticar, may mga nilagay naman ang lokal na pamahalaan ng Malay para kolektahin ang mga basura sa dalampasigan.

Samantala, kasabay ng pagdagsa ng mga basura kahapon ay kasabay din ang buhos ng napakaraming turista sa isla ng Boracay.

Friday, August 16, 2013

Mga residente at turista, pinagpiyestahan ang mga dumagsang talangka sa dalampasigan ng Boracay

Ni Bert Dalida, YES FM Boracay

Pinagpiyestahan ng mga residente at turista ang mga dumagsang talangka sa dalampasigan ng Boracay.

Pasado alas diyes kaninang umaga nang mapansin ng mga residente ang mga nasabing talangka kasabay ng mga inanod na halamang dagat, sanga ng kawayan at kahoy.

Si “Otip”, isang residente sa isla, ay halos mapuno ang dalang plastic bag ng mga nakuhang talangka, na ayon sa kaniya’y kanyang gagataan.

Mayroon ding nagdala pa ng balde at pinutol na plastic drum, lamang may mapaglagyan.

Maging ang mga Pilipinong turista ay hindi nagpaawat, at nakisali rin sa mga nangunguha ng mga talangka.

Paniwala ng mga lokal na residente, galing sa mga ilog ng karatig-bayan ang mga talangkang ito at dinala ng alon sa dalampasigan ng Boracay.

Payo naman ng iba, dahan-dahan sa pagkain ng mga talangka dahil maaari umanong ma-high blood nito.

Panibagong International flights sa Aklan, tuloy na sa 2014

Ni Jay-ar M. Arante,YES FM Boracay

Tuloy na sa 2014 ang panibagong International flights mula Singapore na maghahatid ng mga turista sa probinsya ng Aklan.

Ito ang kinumpirma ni DOT Boracay Officer In-Charge Tim Ticar, matapos ang pagpupulong kagabi kasama ang mismong Philippine Manager ng nasabing Airline company na si Chandran Menon at iba pang opisyales ng Department of Tourism.

Ayon kay Ticar, ngayong alam na ni Menon ang isla ng Boracay at ang probinsya ng Aklan sa kanilang pag-iinspeksyon.

Nangako naman umano itong magdadagdag ng dalawang flights na dalawang beses sa isang linggo, na magsisimula sa buwan ng Hulyo taong 2014.

Nauna nang sinabi ni Ticar, na iinaasahan nila ang panibagong international flights na ito na mula sa bansang Singapore.

Sa ngayon, pinaghahandaan na rin ito ng Department of Tourism dahil mas dadami pa ang mga turistang pupunta sa Boracay.

Mga batang hamog sa Boracay, nangingikil na, nanghaharass pa!

Ni Bert Dalida, YES FM Boracay


"Dapat maaksyunan na ng pamahalan, lalo na ng lokal na pamahalaan at DSWD."

Ito ang sinabi ng isang concerned citizen sa Boracay tungkol sa mga “batang hamog” sa isla.

Maliban umano kasi sa pamamalimos, ay nangingikil at nagha-harass pa ang mga ito.

Ikinuwento ni “Harold”, hindi totoong pangalan, at pitong taon nang nagtatrabaho sa Boracay, na pagsapit ng alas-10:00 ng gabi hanggang madaling araw, ay makikita ang mga batang hamog na pagala-gala at namamalimos sa beach front.

Ang masaklap, nangha-harass na rin umano ang mga ito ng mga turista at maging ng mga lady boy.

Samantala, ayon pa kay “Harold”, ang mga batang hamog na ito na nasa 15-anyos pababa ay mistulang hinahayaan at ginagamit lang ng kanilang mga magulang.

Kaya naman ang bagay na ito ay dapat bigyang pansin ng mga kinauukulan upang hindi lumala sa Boracay na kilala sa buong mundo bilang number one tourist destination.

BIWC sewer line expansion, pinamamadali na ng mga residente sa Bolabog

Ni Christy Dela Torre, YES FM Boracay

Pinamamadali na ng mga residente sa Sitio Bolabog ang sewer line extension ng BIWC o Boracay Island Water Company.

Bagama’t may ilang bahagi ng naturang area ang natapos na, ay nakakapag-dulot pa rin ito ng hindi magandang epekto sa ilang mga negosyante, partikular na sa mga kainan ang patuloy na trabaho doon.

Katunayan, ayon sa isang residente na may-ari ng isang kainan sa naturang area, naging matumal na umano ang kanilang benta, dahil may mga costumer sila na hindi na nakakabili dahil hindi makadaan ang mga ito.

Bukod dito, nagdudulot din umano ito ng alikabok at ingay.

Panawagan nito na sana’y matapos na ang nasabing expansion upang hindi na umano sila maabala lalo na sa kanilang negosyo.

Matatandaang sinabi ng BIWC na kanilang tatapusin ang kanilang sewer expansion sa Bolabog sa buwan ng Hulyo.

BFI, nag-aantay nalang kung kailan sila ipapatawag ng LGU Malay --- RE: 25+5 meter easement

Ni Jay-ar Arante, YES FM Boracay

Nag-aantay nalang ngayon ang Boracay Foundation Inc. (BFI) kung kailan sila ipapatawag ng LGU Malay kaugnay sa meeting ng 25+5 meter easement.

Ayon kay BFI Executive Director Pia Miraflores, nag-hihintay na umano ang mga stakeholders sa Boracay kung kailan sila magpupulong ng lokal na pamahalaan tungkol dito.

Una na umanong sinabi ng LGU Malay na ipapatawag sila para sa tatlong araw na meeting na magsisimula noong Agosto 14 hanggang Agosto 16.

Nagpaabot naman ang ilang mga stakeholders sa Boracay na tanggap na nila ang pagtanggal sa mga ilegal na istraktura o gusali sa isla.

Matatandaang ipinag-utos ng DENR na tanggalin ang mga gusaling pasok sa 25 meters mula sa beach line at 5 meters ang layo mula sa kalsada na tinatawag na 25+5 meter easement.

Sa ngayon hindi pa umano makakapagbigay si Miraflores ng pahayag kung kailan mauumpisahan ang pagtanggal ng mga etablisemyentong matatamaan ng 25+5 meter easement hanggat hindi pa sila naipapatawag ng lokal na pamahalaan ng Malay.

Thursday, August 15, 2013

APPO, aminadong kulang ang mga pulis sa Aklan

Ni Jay-ar Arante, YES FM Boracay

Aminado ang Aklan Provincial Police Office (APPO) na kulang ang mga kapulisan sa probinsya ng Aklan.

Ayon kay APPO Public Information Officer P03 Nida Gregas, kailangan nila ngayon na magdagdag ng mga PNP personnel dahil ang ratio umano ng isang pulis sa Aklan 1:1,500.

Ibig sabihin, may isang pulis lang para sa isanlibo at limandaang mamamayan.

Mas kailangan din umano nila ang mga kapulisan ngayon dahil na rin sa nalalapit na ang  barangay at SK elections.

Samantala, sa usaping naman ng illegal gambling sa nakawan sa Boracay ay wala pa umano silang ideya kung kinakailangan na ring magdagdag ng mga kapulisan dito para lalong mas mabantayan ang ganitong iligal na gawain sa isla.

Mga motorsiklong hinuli ng MAP tambak dahil sa mga paglabag sa ordinansa

Ni Alan Palma Sr., YES FM Boracay


Tumaas pa ang bilang ng mga motorsiklong hinuhuli at ini-impound ng MAP sa Boracay.

Katunayan, naka-hilera ang mga motorsiklong ito na naka-impound sa Boracay Action Center dahil sa iba’t-ibang violation o paglabag sa ordinansa.

Sa listahan ng mga nahuli nitong buwan ng Hulyo ay umabot sa mahigit apat na raan ang mga na-tiketan dahil sa walang ma-ipresentang Permit to Transport (PTT), walang driver’s license at hindi nagsusuot ng helmet.

Ang mas impresibo ay nitong unang linggo ng buwan ng Agosto kung saan 235 ang mga hinuli sa kahalintulad na paglabag.

Ito’y dahil mas pinaigting ng Malay Auxiliary Police (MAP) ang kanilang mandato, dahil na rin sa pagsikip ng trapiko at ang paghiling ng BLTMPC na hulihin ang mga kulorom at habal-habal sa isla.

Bagamat walang quota ang hulihan, tinatayang aabot sa 900 ang posibleng mahuhuli sa buong buwan ng Agosto.

Aminado naman ang pamunuan ng MAP na kulang pa rin sila sa tao para sa pang-gabing operasyon, subalit kampante umano sila na liliit ang bilang ng mga lumalabag.

Naging maganda raw ang resulta ng kanilang operasyon dahil na rin sa mga isinagawang workshop at operational development training noong nakalipas na buwan ng Hulyo.

Wednesday, August 14, 2013

Gusto mo ng premyo, sali na sa promo!

SALI NA SA ACS MILYONES PARA MAGKAROON NG TIYANSANG MANALO NG P1-MILYON SA GRAND DRAW! IPADALA ANG INYONG MGA ENTRIES SA

C/O YES FM 91.1 BORACAY
MAIN ROAD BALABAG, BORACAY ISLAND,
MALAY, AKLAN


SALI NA MGA KAPWA!


Check n'yo na rin ang http://yesfm911boracay.blogspot.com/p/promos.html para sa marami pang promos! Abangan!

PCOS Machine, hindi gagamitin para sa barangay at SK elections --- Comelec

Ni Jay-ar Arante, YES FM Boracay

Dahil umano sa kakulangan ng oras at budget ay hindi na muna gagamitin ng Comelec ang precinct count optical scan (PCOS) machine para sa darating na barangay at SK elections sa Oktobre.

Ayon kay Malay COMELEC Election Officer II Elma Cahilig, magiging manual ang kanilang gagawing eleksyon ngayon base na rin sa inilabas na kautusan ng Comelec sa Manila.

Masyado aniyang maikli ang preperasyon nila kasabay na rin ng mahirap ang pag-imprinta ng mga balota dahil sa Oktubre pa magsisimula ang filing ng candidacy ng mga tatakbong kandidato.

Dahilan din umano ang kakaunting pera lang ang allocated allotment sa mga ka-barangayan sa bansa kaya kinakailangan nilang magtipid.

Dagdag pa nito, dahil sa manual na ang eleksyon ay mas kinakailangan nilang maging strekto sa siguridad lalo na sa mga boboto.

Samantala, nakipag pulong naman si Cahilig kahapon sa PNP Malay para sa isasagawang deployment ng mga kapulisan na magbantay sa mga balota at ballot boxes sa lahat ng barangay sa bayan ng Malay.

Relokasyon ng Boracay Hospital, mabusising pinag-aaralan ng SB Malay

Ni Jay-ar Arante, YES FM Boracay

Mabusising pinag-aaralan ng SB Malay ang relokasyon ng Don Ciriaco S. Tirol Memorial Hospital sa Boracay.

Sa session kahapon sa bayan ng Malay, tinalakay ang nasabing usapin kung saan may mga inimbitahan silang bisita mula sa Provincial Health Office na kinabibilangan ni Dr. Victor Sta. Maria provincial Health Officer at si Mrs. Zuela Calizo DOH Representative.

Ditoay  may mga ipinakita silang larawan at sketch plan ng ipapatayong bagong hospital na may sukat na 1,300 square kilometer at may taas na tatlong palapag kabilang na ang paglalagay ng elevator.

Ang nasabing hospital ay balak na ipatayo ng DOH sa May Mt. Luho base na rin sa iprinisinta sa kanila ng gobyerno.

Ayon naman kay Dr. Sta Maria ang bagong hospital ay inaasahan nilang magiging International standard dahil sa pagbubutihin nila ang kanilang gagawing serbisyo.

Dulot na rin umano ito ng mga bagong facilities, equipments at ilang pang pangunahing mga gamit sa hospital na higit na kailangan.

Aniya, maglalagay naman sila ng mga karagdagang staff para dito.

Ikinatuwan naman ng SB Malay ang ibinalitang ito ng Department of Health dahil sa unti-unti na anilang matutupad ang hiling ng mga mamayan sa isla, lalo na ng mga turistang nangangailangan ng tulong ng mga doktor.

Sa ngayon, minamadali narin ang pagproproseso nito ng LGU Malay para agad ng maupisahan kung saan mang lugar ito ipapagawa sa isla ng Boracay.

PS/Insp. Cabural, iimbitahan ng SB Malay --- RE: illegal gambling sa Boracay

Ni Jay-ar Arante, YES FM Boracay

Iimbitahan ng SB Malay si Boracay PNP Chief PS/Insp. Joeffer Cabural, hinggil sa illegal gambling sa isla ng Boracay.

Napatanong si Malay SB Member Floribar Bautista, kung bakit umano hindi mapatigil ng mga kapulisan sa isla ang aktibidad na ito, at ang PNP Regional Office pa umano ang nakapag-raid sa nasabing illegal poker.

Kaya agad namang iminungkahi ni Bautista sa kaniyang mga kasamahan sa konseho na imbitahin si Cabural sa session para ipaliwanag kung bakit nakakapasok na sa isla ang ganitong uri ng aktibidad.

Dagdag naman ni Bautista, magpapasa siya ng resolusyon para matigil na ang ganitong talamak na world class activity sa Boracay.

Matatandaang nitong mga nakaraang linggo lang ay nahuli ang mga Chinese National habang nagsusugal sa isang restaurant at ang pagkakaaresto sa isang Koreano na umano’y operator ng illegal gambling sa isla.

Samantala, sa darating na Agosto 20 ay inaasahang ipapatawag ng SB Malay si PS/Insp. Cabural para dito.

Bagong international flights na Silk Air, inaasahan ng DOT Boracay

Ni Jay-ar Arante, YES FM Boracay

Inaasahan ng Department of Tourism Boracay ang panibagong international flights mula sa bansang Singapore o Hong Kong.

Ayon kay DOT Boracat Officer In-Charge Tim Ticar, ngayong linggo ay may inaasahan silang darating na representatives ng Silk Air sa probinsya ng Aklan at Boracay para mag-inspeksyon sa mga lugar dito na maaaring puntahan ng mga turista na mula  nasabing bansa.

Ilan sa mga iinspeksyunin nila ay ang pasilidad at kapasidad ng Kalibo International Airports, souvenir shops, shopping mall, mga bangka at maging ang traffic sa mga nasabing lugar.

Kasama naman sa nasabing iinspeksyon ay si Department of Tourism Regional Director Atty. Helen J. Catalbas.

Kaugnay nito, ikinatuwa naman ni Ticar ang patuloy na pagdagdag ng mga international flights sa Aklan na nagdadala ng maraming turista sa Boracay.

Kumpiyansiya naman ang DOT na malalagpasan nila ang kanilang target na 1.5 million tourist ngayon taon.

Samantala, pinaghahandaan na rin nila ang darating na peak season sa Oktubre kung saan dadagsain na naman ang Boracay ng napakaraming mga turista.

Boracay, planong lagyan ng air ambulance

Ni Peach Ledesma, YES FM Boracay

Pinaplano na sa ngayon ng provincial government ng Aklan ang pagkakaroon ng air ambulance para sa Boracay.

Ito ang kinumpirma ni Department of Tourism Boracay officer in charge Tim Ticar.

Ayon kay Ticar, ang pagkakaroon ng air ambulance para sa isla ng Boracay ay upang mabigyan ng mas mabilis na transport service ang mga bisita at mga lokal na residente sa panahon na magkakaroon ng mga disgrasya o hindi inaasahang pangyayari sa mga ito.

Anya, kapag nagkaroon ng air ambulance ang isla ay maaari nang i-air lift ang mga pasyente papuntang Kalibo o Iloilo, o maging sa Maynila o Cebu, para sa mas mabilis na pagbibigay lunas sa mga ito.

Sinabi din ng opisyal ng DOT Boracay na ito ay ayon sa pangakong ibinigay ng pamahalaang probinsyal na may kaugnayan din sa binuksang paksa ni Aklan Cong. Teodorico Haresco Jr.

Sa ngayon ay hindi pa napag-uusapan kung anong klaseng sasakyang panghimpapawid ang planong gawing air ambulance, ngunit iginiit ni Ticar na dapat ay mayroon itong tamang pasilidad at sapat na kakayahan para sa mabisang pagdadala ng pasyente.

Samantala, sa kasalukuyan ay ang isla muna ng Boracay ang prayoridad ng proyektong ito, ngunit hindi din naman isinasang-tabi na magkaroon din ng air ambulance ang Kalibo.

Tuesday, August 13, 2013

Pagdagdag ng mga pasilidad sa ospital ng Boracay, kinumpirma ng DOT

Ni Bert Dalida, YES FM Boracay

Hindi lang ospital kung hindi talagang magandang ospital na may mga pang-world class na pasilidad.

Ito ang kinumpirma ni Department of Tourism (DOT) Boracay Officer in Charge Tim Ticar kaugnay sa plano ng pamahalaang probinsya ng Aklan para sa ospital sa Boracay.

Sa ginanap na pagpupulong ng mga regional director ng iba’t-ibang national agencies nitong Sabado sa bayan ng Kalibo ay napag-usapan ang mga programa para sa Kalibo, Boracay at buong probinsya ng Aklan.
Kung saan sinabi ni Ticar ang tungkol sa planong dagdagan ang mga kuwarto sa ospital ng Boracay, pati na ang mga pasilidad nito upang matugunan ang pangangailangan ng mga turista.

Ang bagay din umanong ito ang isa sa mga tinitingnan ng DOT.

Samantala, iginiit naman ni Ticar na dapat lamang na paunlarin ang ospital dito, bilang paghahanda na rin sa APEC Asia-Pacific Economic Cooperation 2014-2015.

Turistang nabiktima ng pagkalunod sa Boracay kahapon, inilipat sa Kalibo

Ni Bert Dalida, YES FM Boracay

Dinala na sa isang pagamutan sa bayan ng Kalibo ang turistang nabiktima ng pagkalunod kahapon ng hapon.

Ito’y matapos mabatid mula kay Dr. Emy Joy Grijaldo ng Don Ciriaco Hospital na nasa kritikal na kondisyon pa rin ang biktima na nakilalang si Dan Alfred Mancenido, 23 anyos ng 89 NP Cruz, Taguig City.

Ayon sa rumespondeng Life Guard, nangyari ang insidente dakong alas-3:40 kahapon ng hapon, habang naglalaro ng frisbee ang mga kasama ng biktima sa beach front ng Station 1 Balabag.

Bigla na lamang umanong may sumigaw at humingi ng saklolo sa ilang grupo ding naroon at naliligo kung kaya’t mabilis na sumaklolo ang mga nagrorondang Life Guard.

Kaagad umano nilang sinaklolohan ang biktima at binigyan ng pangunang lunas, at dinala sa Don Ciriaco Tirol Memorial Hospital.

Naging emosyonal naman ang mga kasama ng biktima nang malamang kritikal pa rin ang kondisyon nito.

Monday, August 12, 2013

Illegal gambling walang lugar sa Boracay --- BFI

Ni Mark Anthony Pajarillo, YES FM Boracay

Dapat na walang lugar sa Boracay ang illegal gambling.

Ito ang paninindigan ni Boracay Foundation Inc. (BFI) Jony Salme kasabay ng pasasalamat sa mga kapulisan sa pagsugpo sa mga illegal na sugal sa isla ng Boracay.

Nitong nagdaang Sabado lamang kasi ay naaresto ng mga pulis ang isang Korean National na sinasabing operator ng illegal na sugal sa isla at ang iba pang kasama nito.

Kaya naman pinuri nito ang mga kapulisan sa Boracay at iba pang law enforcers na kumilos upang masugpo ang nasabing illegal na gawain.

Sinabi pa ni Salme na sana ay maging leksiyon na rin ito upang ang mga establisemyentong nasangkot sa illegal gambling ay huwag nang gumawa pa ng mga ilegal na bagay sa isla.

Samantala, dahil maganda na umano ang takbo ng turismo sa isla, iginiit pa ni Salme na hindi na kailangan sa ating komunidad ang anumang illegal na bagay dito.

Comelec Malay, kasado na ang preperasyon para sa barangay at SK elections

Ni Jay-ar Arante, YES FM Boracay

Kasado na ang ginagawang preperasyon ng Comelec Malay para sa barangay at SK elections sa darating na Oktobre 28 ngayon taon.

Ayon kay Malay Comelec Election Officer II Elma Cahilig, pinadalhan siya ng sulat ng Malay PNP para imbitahin sa isasagawang aktibidad ng mga kapulisan bukas tungkol sa paghahanda nila sa eleksyon.

Aniya, mayroon na rin silang ginawang time table kung ano ang kanilang dapat gawin lalo na sa pagpapatupad ng seguridad sa buong bayan ng Malay, lalo na sa isla ng Boracay.

Dagdag pa ni Cahilig, ipapatupad ng Comelec ang gun ban 30 araw bago sumapit ang eleksyon.

Ito ay inaasahang magsisimula sa buwan ng Septyembre 28 at magtatapos naman sa Nobyembre 12.

Samantala, ang filing of candidacy ng mga tatakbong kandidato sa barangay at SK elections ay gaganapin mula Oktobre 15-17 ng taong kasalukuyan.

DOT Boracay, nananawagan sa mga kinauukulan hinggil sa ginagawang kalsada sa Manoc-Manoc

Ni Jay-ar Arante, YES FM Boracay

Patuloy pa ring nananawagan ang Department of Tourism Boracay sa mga kinauukulan sa ginagawang konstraksyon ng main road sa Brgy. Manoc-Manoc.

Ayon kay DOT Boracay Officer in-charge Tim Ticar, nangangamba siya dahil sa maaaring magdulot ito ng aksidente lalo na at medyo delikado ang nasabing lugar na kadalasang nagkakaroon pa ng trapiko.

Ang tinutukoy na kalsada ay ang matarik at pa-akyat at papasok sa Sitio Tulubhan kung ikaw ay galing Balabag.

Aniya, kinakailangang maglagay ng MAP na magbabantay sa ginagawang kalsada dahil baka maulit umano ang nakaraang aksidente na ikinamatay ng isang batang babae.

Sa ngayon, may mga suhestisyon siya na  mangyari habang ginagawa ang pagkukumpuni ng kalsada sa Manoc-Manoc.

Gusto naman ni Ticar na makipag-ugnayan sa apat na ahensyang bumubuo ng nasabing proyekto na kinabibilangan ng MAP, barangay kapitan ng Manoc-Manoc, ang contractor ng proyekto at ang island administrator.

Jonathan Yabut, nakipaglaban dahil sa pagiging matapang na Aklanon

Ni Jay-ar Arante, YES FM Boracay


Nakipag-laban si Jonathan Allen Yabut sa The Apprentice Asia dahil sa kanyang pagiging matapang bilang Aklanon at Malinaonon.

Ito ang ipinahayag ng bente-siyete anyos na binata na tubong Malinao Aklan sa isinagawang welcome home sa kanya Biyernes, Agosto 9, sa nasabing bayan.

Anya, ang kanyang karanasan sa nasabing kompitisyon ay masasabi niyang isa umano sa mga pinakamahirap na nangyari sa kanyang buhay.

Minsan na din niya umanong naisip na mag-quit sa nasabing palabas pero sa tuwing nakikita niya ang kanyang Barong Tagalog at ang bandila ng Pilipinas ay iniisip niya na hindi para sa kanya ang laban kundi para sa bansa.

Ayon pa kay Yabut, nagpursigi pa siya na ituloy ang laban dahil sa kaniyang pagiging isang Malinaonon at Aklanon na hindi basta-basta sumusuko at matapang pagdating sa mga ganitong laban.

Dagdag pa nito, hindi siya naniniwala na ang pagiging matalinong tao ay namamana kundi ito ay natututunan habang bata pa at nagpupursiging matuto ng ibat-ibang bagay na makakatulong sa iyong sarili.

Si Jonathan, ang kauna-unahang Pilipinong nanalo sa The Apprentice Asia at inaasahang magsisimula na sa kaniyang trabaho sa darating na Agosto a-kinse bilang chief of staff ni Malaysian business tycoon Tony Fernandez sa Malaysia.

Konstraksyon ng main road sa Manoc-Manoc, pinangangambahan ng DOT Boracay

Ni Jay-ar Arante, YES FM Boracay

Pinangangambahan ng Department of Tourism Boracay ang ginagawang konstraksyon sa main road ng Brgy. Manoc-Manoc dahil sa nagdudulot ito ng trapiko at mapanganib ang nasabing daanan para sa mga motorista.

Ayon kay DOT Boracay Officer In-Charge Tim Ticar, nangangamba siya dahil may porsyon sa nasabing lugar na mataas ang bahagi ng kalsada na kadalasan ay nagkakaroon ng aksidente lalo na at walang traffic enforcer na naka deploy dito minsan.

Aniya, kung siya lang ang tatanungin ay gusto nitong gawin munang one way ang kalsada sa nasabing lugar habang ito ay under construction pa.

Tinatawagan naman ni Ticar ang contractor nito pati na ang MAP, local at barangay officials, gayon din ang LGU Malay para mabigyan agad ito ng pansin.

Dagdag pa nito, sadyang delikado ang bahagi ng kalsada na may paakyat at kung magkakaroon ng trapik ay maaaring may bumaliktad na sasakyan kung mawawalan sila ng balansi.

Samantala, nananawagan ngayon ang DOT sa lahat ng concern agencies na maaksyunan na ito agad bago pa may mangyaring aksidente.

Koreanong umano’y illegal gambling operator sa Boracay, arestado

Ni Bert Dalida, YES FM Boracay

Naudlot ang pagsusugal ng limang kalalakihan sa Boracay, matapos arestuhin ng mga pulis noong madaling araw ng Sabado, Agosto 10, sa Brgy. Balabag.

Sa bisa ng Search warrant na nilagdaan ni Vice Executive Judge Hon. Elmo del Rosario ng Aklan Regional Trial Court 6, tuluyang naaresto ng pinagsanib na puwersa ng Aklan Public Safety Company, Provincial Intelligence Branch Operatives at Boracay PNP ang mga suspek na sina Park Soon Hee alyas Bobby Park, 58-anyos, isang Korean National na sinasabing may-ari ng Boracay Shopping Center, at umano’y operator ng illegal na sugal.

Kasama pang naaresto ng mga operatiba sina Michael Brillo, 25-anyos, ng Meycauyan, Bulacan, at Steve Tan, 24-anyos, ng Occidental, Mindoro; Chinese national na si Ting Yee, 29-anyos, ng Cebu City; Korean tour guide na si Chul Ho Lee, 36-anyos, ng Manoc-manoc, Boracay at isa pang Korean National na Kyubum Choi, 36-anyos, ng Malate, Metro Manila.

Ayon sa report ng Boracay PNP, nakumpiska sa aktuwal na paglalaro ng poker ng mga suspek ang calculator, mga poker chips at baraha, at pera na nasa ibat-ibang denominasyon.

Ang mga suspek at ang mga narekober na gambling paraphernalia ay kaagad dinala sa Boracay PNP, at kinalauna’y dinala sa Aklan Provincial Police Office para sa karampatang disposisyon.

Nabatid na matagal nang sinu-surveillance ng mga otoridad ang umano’y illegal na gawain ng mga suspek sa Boracay.  

Mga Miyembro ng Boracay Ati Community, ipinagdiwang ang International Indigenous People’s Day

Ni Shelah Casiano, Easy Rock Boracay

Nakiisa ang Boracay Ati Community sa International Day of the World's Indigenous People na ipinagdiwang noong Biyernes, Agosto 9.

Ayon kay Program Management Team Coordinator Evangeline Tambuon, nagkaroon ng palatuntunan ang Ati Community sa Sitio Lugutan, na sinundan naman ng isang beach clean-up.

Ang International Day of the World's Indigenous People ay ideklara sa General Assembly of the United Nations noong December 1994 at ipinagdiriwang tuwing ikasiyam ng Agosto.

Layunin nitong mapangalagaan ang karapatan ng mga katutubo sa buong mundo.

Samantala, itinanggi ni Tambuon ang tungkol sa isang grupo ng mga katutubong namamalimos sa beach front ng Boracay.

Wala umano gumagawa nito sa kanilang grupo, lalo pa’t ito’y ipinaintindi nila sa kanilang mga anak.

Hindi rin umano dapat nilalahat ng mga tao ang salitang “Ati” dahil karamihan sa kanila ay sa nagtatrabaho sa mga resort at establisemyento sa isla.

Bagama’t aminado si Tambuon na binibigyang pansin din ito ng LGU Malay, nagtataka rin umano ito kung bakit mawawala at bumabalik pa rin ang mga nasabing grupo ng mga namamalimos.

Magkaganoon pa man, aniya, ay nagpapatuloy pa rin ang mga programa para sa mga katutubo katulad ng pabahay, edukasyon, at empowerment.| translated by Bert Dalida, YES FM Boracay

The Apprentice Asia Champion, mainit na tinanggap ng mga Aklanon

Ni Jay-ar Arante, YES FM Boracay

Mainit na tinanggap ng mga kababayang taga Malinao at ng mga taga Aklan ang kauna-unahang nanalong Pilipino sa The Apprentice Asia noong Biyernes, Agosto 9, sa kanyang pagdating sa Kalibo International Airport.

Siya ay si Jonathan Allen Salazar Yabut na tubong Tambuan, Malinao, Aklan.

Marami ang nag-abang kay Jonathan kabilang na ang mga estudyante at guro ng mga paaralan sa Malinao, ibat-ibang media sa bansa, NGOs at ang mga opisyal ng pamahalaang lokal ng Aklan.

Sinundan naman ito ng parada patungo sa bayan ng Malinao at doon ay nagkaroon ng maikling programa at pagkilala sa kagalingang ibinahagi ni Jonathan sa bansa.

Ang kanyang pagbisita kahapon sa kanyang tinubuang lupa ay naging inspirasyon at higit na ipinagmamalaki ng kanyang mga kababayan.

Ibinahagi naman nito ang kanyang tagumpay sa mga kababayan at kung paano niya napagtagumpayan ang kanyang narating ngayon.

Nagbigay din siya ng mensahe katulad ng mangarap at abutin ito, maging matapang sa mga pagsubok at harapin ang bukas ng may pag-asa.

Aniya, ang pagiging isang lider ay pagbibigay ng espasyo sa kanyang mga taga-sunod para sila rin ay kuminang.

Samantala, sa kanyang pagbabalik sa Malaysia para inaasahang magsisimula na siya sa kanyang trabaho sa Air Asia bilang chief of staff.