YES THE BEST 911 BORACAY

Wednesday, August 31, 2011

Dahil sa perwisyo, Pamahalaang probinsyal ng Aklan, kakasuhan din ang BFI?


Ni Edzel Mainit, Senior Field Reporter, YES FM Boracay

Hindi malayong mangyari na maghabla pabalik ang pamahaalang probinsya ng Aklan laban sa Boracay Foundation Incorporated (BFI), para sa danyos perwisyo na likha ng mga ito, dahil sa naantala ang pagpapatupad ng proyektong reklamasyon sa Caticlan makaraang sampahan ito ng kaso ng BFI.

Ito ngayon ang inihayag ni Atty. Allen Quimpo dating kongresista ng Aklan at tumatayong tagapag-payo ng pamahalaang probinsya batay sa paniniwala nito lalo pa at pinilit umano ng BFI na magsampa ng kaso kahit batid na ng mga ito na walang masamang epekto ang proyekto sa kapaligiran.

Ayon dito, ang ganitong bagay, kung legalidad ang pag-uusapan, ay hindi imposible.

Pero ang hindi umano nito alam ngayon kung gagawin ito ni Aklan Governor Marquez, ang pagsampa ng kaso laban sa BFI, kung mapapatunayan ng probinsya na walang basehan ang alegasyon ng mga negosyanteng ito.

Naniniwala siya na marami ang apektado ng pagkaka-antalang ito ng proyekto lalo na sa kontraktor at mga turistang nakaranas ng kahirapan sa kakadaan umano sa Tabon Port.

Ngunit sa kabila ng pahayag na ito ni Quimpo, nilinaw niyang, nasa kay Gobernor Marquez parin ang disisyong kung kakasuhan pa nila ang BFI, kung sakaling sila ang palarin sa kasong isinampa laban sa kanila.

Samantala, dahil sa mga isyung namamagitan ngayon sa BFI at pamahalaan probinsya ng Aklan, hiniling naman ni Atty. Quimpo  sa BFI na sana ay hindi na nila pag-awayan pa ang mga bagay na katulad nito, sa halip ay magka-isa at magtulungan nalang sa pagpapa-unlad ng Boracay.

Kasabay ng kahilingang ito ng abogado, sinabi niyang ipinagmamalaki at masaya ang pamahalaang probinsya sa mga nagawa ng BFI lalo na sa pagpapaganda ng mga pasilidad at serbisyo nila sa mga turista.

Muslim Community sa Boracay, saganang ipinagdiwang ang pagtatapos ng Ramadan


Ni Edzel Mainit, Senior Field Reporter, YES FM Boracay

Masaganang ipinagdiwarang ng Muslim Community sa Boracay ang pagtatapos ng Ramadan.

Sa huling araw ng pag-aayuno nila kahapon ng tanghali, sabay-sabay nilang pinagsaluhan ang pagkaing inihanda para sa pagdirawang at pagtatapos ng pinakabanal na araw na ito, batay sa kanilang panampalataya.

Ayon kay Mike Mananos, Board of Director ng Muslim Association sa isla, pinagsaluhan ng mahigit isang libong Muslim ang pagkaing inhanda, na sila din mismo ang nag-ambag ambag para sa naturang pagdiriwang.

Aniya, naghanda ang mga ito ng mga masasarap na pagkain, katulad ng kalabaw, manok, salad at kung anu-ano pa, at masayang pinagsaluhan ito, lalo pa at isang buwan din umano silang walang halos kinain sa loob ng tatlumpung araw, maliban na lang sa gabi kung saan doon lamang sila makakakain at maaring makaka-inom ng tubig.

Pagkatapos ng ng salu-salo, ang ilang umano sa kanila ay kanya-kanyang nagliwaliw kasama ang pamilya, katulad sa paliligo sa dagat, swimming pool sa isla at maging sa labas ng Malay.

Hindi pa dito nagtatapos ang aktibidad nila dahil kinagabihan ay magtatagisan din ang mga ito sa larangan ng basketball para sa midget at senior division, pati na sa sa domino at chess.

Samantala, nabatid rin mula kay G. Mananos na mahigpit na ipinagbabawal sa mga katulad nila ang pagkain ng baboy, hotdog, at maging ang pag-inom ng nakakalasing na inumin, pati na ang pagsusugal at pakiki-apid kung hindi kasal.

Ikinatuwa naman ng mga Muslim na naging mapayapa ang kanilang pagdirawang ng Ramadan.

PNP Regional Director Querol, sa Boracay nagdiwang ng Ramadan


Ni Edzel Mainit, Senior Field Reporter, YES FM Boracay

Naging pangunahing pandanggal sa ika-labing apat na taong na pagdiriwang ng pagtatapos ng Ramadan sa Boracay si PNP Regional Director PS/Supt. His Excellency Sultan Cipriano Querol, tumatayong pinuno ng mga Muslim Community sa buong rehiyong ito.

Malugod siyang na tinaggap ng mga Muslim sa Boracay lalo pa at mas pinili umano ng opisyal na ito na sa isla pa magdiwang pinakabanal na araw ng mga Muslim kasama ang mga ito.

Maliban kay Querol, nakihalubilo din si Supt. Sammuel Nacion, hepe ng Boracay Police, Sangguniang Bayan Member Dante Pagsugiron, SB Member Jupiter Gallenero, Punong Brgy ng Manoc-manoc Abram Sualog at ilan pang opisyal ng nabangit na barangay.

Bagama’t simpleng pagdiriwang lamang ang kanilang ginawa, ikinatuwa naman ng mga Muslim ang pagtatapos ng Ramadan lalo pa at sa labas ng kanilang mosque ay sabay-sabay na pinagsaluhan ang mga nakahain pagkain.

Nabatid naman mula kay Mike Mananos, Board of Director ng Muslim Association sa Boracay, na may mahigit isang libong katao silang mga Muslim sa isla ngayon, na ang ikinabubuhay ay panga-ngalakal o pagnenegosyo.

Samantala, ayon kay G. Mananos, ipinagmamalaki pa rin nila ang pagiging Muslim, at hindi sila nagagalit kung tawagin sila sa ganong pagkilala, maliban na lamang kung ang paggamit sa salitang Muslim ay inihahambing sa mga masamang gawain dahil hindi naman umano totoong masama sila.

Probinsya, hindi nababahala sa kahihinatnan ng kaso


Ni Edzel Mainit, Senior Field Reporter, YES FM Boracay

Nilinaw ni Atty. Allen Quimpo, dating kongresista ng Aklan at tumatayong tagapag-payo ng pamahalaang probinsyal ng Aklan, na hindi nangangahulugang nababagabag o nag-aalala na ngayon ang pamahalaang probinsya sa resulta ng oral argument at maging sa disisyon ng Supreme Court.

Ito ay kasunod ng paghiling ni Aklan Governor Carlito Marquez sa BFI na i-atras na lang ang kasong isinampa ng nasabing organisasyon sa pamahalaang probinsyal.

Sa kabila ng pahayag na ito ni Quimpo, kampante pa rin sila at nagtitiwala sa desisyon ng korte, lalo pa at hindi pa umano napapakinggan ng Supreme Court ang panig nila.

Hindi maikakaila na marami ngayon ang nagtataka kung bakit kailangan pang hilingin ni Governor Marquez sa BFI kung malaki ang pag-asa nila na mapanalunan ang kasong isinampa laban sa kanila, kung hindi man lang ito nababahala sa resulta.

Samantala, kinuntra naman ng abogado ang naging pahayag ni Loubell Cann ng BFI Board of Trustees, na nanga-ngamba sila na baka hindi sundin ng probinsya ang 2.6  hectare na reklamasyon at sa halip ay ang apat napung hektarya ang gagawin nila.

Ayon naman sa sagot ni Quimpo, ang apatnapung hektarya ay kasama lamang sa pangarap ng probinsya, pero ang 2.6 hectare lamang umano ang saklaw at sakop ng legal na dukomentong hawak ng probinsya.

Pagpapabawi sa kaso ng BFI laban sa probinsya, ipinaliwanag ni Atty. Quimpo

Ni Edzel Mainit, Senior Field Reporter, YES FM Boracay

“I-withdraw na lang ang kaso para hindi na tayo magkakahiyaan pa”.

Ito ngayon ang sinabi ni Atty Allen Quimpo, dating kongresista ng Aklan at tumatayong tagapag-payo ng pamahalaang probinsya, patungkol sa kasong ihinabla ng Boracay Foundation Incorporated (BFI) laban sa pamahalaang probinsyal kaugnay pa rin sa makontrobersiyang proyekto sa Caticlan: ang reklamasyon.

Paliwanag ni Quimpo, mas mabuting bawiin na lang ng BFI ang kaso dahil wala namang basehan ang kanilang mga alegasyon.

Ang pahayag na ito ng dating kongresista ay kasunod ng pag-amin nito na totoong hiniling ni Aklan Governor Carlito Marquez na bawiin ang kaso laban sa kanila lalo pa at hindi umano mapapatunayan ng BFI na may masamang epekto ang proyekto ito sa isla dahil sa mga resulta ng tatlong pag-aaral na ginawa sa Caticlan ng mga sayantipiko.

Ito, ayon kay Quimpo, ang rason ng paghihimok ng gobernador, dahil na rin sa kawalan ng basehan ng mga alegasyon ng mga stakeholders kaya dapat na bawiin na lamang ang kaso.

Pero sa kabila ng sinabing ito ng abogado, maaari umanong may maasahang settlement sa gitna ng probinsya at BFI, iyon ay kapag nag withdraw umano ang mga negosyanteng ito.

Samantala, mariin namang sinabi ni Quimpo na magkakaibigan pa rin sila ngayon ng BFI sa kabila ng kanilang kinakaharap sa kasalikuyan, gayong kasama at nagtutulung-tulungan umano sila sa pagpapa-unlad ng Boracay para sa ikakabuti ng isla.

Boracay Dragon Frisbee Team, nakapag-uwi ng silver medal


Ni Edzel Mainit, Senior Field Reporter, YES FM Boracay

Sa pangalawang pagkakataon ay nakapag-uwi ng silver medal ang Boracay Dragon Team na nagrepresenta sa koponan ng Pilipinas sa larangan ng Frisbee.

Ito ay makaraang napayukod ng mga ito ang India, Ireland, Germany at Currier Island sa eliminasyon pati na din ang Canada sa quarter finals at Italy sa semi finals.

Hinarap ng nasabing koponan ang United States sa finale sa open division, at umiskor ng 13-9, pabor sa Estados Unidos.

Ang pakikipagsagupaang ito ng mga manlalarong mula sa isla ng Boracay ay kaugnay pa rin sa 3rd World Championships of Beach Ultimate sa Lignano Sabbiadoro sa bansang Italy.

Nagsimula ang nasabing kompitisyon nitong ika dalawampu’t isa ng Agosto na magtatapos naman sa ika-dalawampu’t walo ng buwan at taong kasalukuyan.

Matatandaang noong taon ng 2007 ay nasungkit din ng Boracay Dragons ang silver medal, matapos nitong talunin ang bansang Italy sa ginanap na 2nd World Champions of Beach Ultimate sa Brazil.

Samantala, sa text message ni James Yap sa YES FM, isa sa mga miyembro ng nasabing koponan, kinumpirma nitong sa ika-tatlumpu ng Agostyo ng kasalukuyan ay darating ang buong team sa bansa, mula sa Italy.

Pagtalima sa kompromiso, pinagdududahan ni Cann


Ni Edzel Mainit, Senior Field Reporter, YES FM Boracay

Papasok sa kompromiso basta hindi lalampas pa sa 2.6 hectares ang reklamasyon sa Caticlan.

Ito ngayon ang “wish” ng Boracay Foundation Incorporated (BFI) sa pamahalaang probinsya, taliwas sa nakasaad sa reclamation plan ng may proposisyon na 40 hectare.

Aniya, maliban dito, kapag pumayag ang kabilang kampo sa hinihiling nila kasama ang pag-aaral ukol sa isyung pangkapaligiran, mistulang nanalo na rin umano ang BFI sa lagay na iyon.

Pero nilinaw nito na itutuloy pa rin nila ang kaso, sapagkat duda pa rin sila na masusunod ito, dahil 40 ektaryang reklamasyon ang nakasaad sa mga dokumento ng probinsya.

Subalit, isinatinig ni Cann na hindi sila tutol sa 2.6 hectare na ito, at maging sa plano nilang itayong gusali mula sa tinamanbakan lugar na ito sa Caticlan. Ang kanila lamang ay kung tatalima sa napagkasunduan nila ang probinsya.

Desisyon ng Supreme Court sa kaso ng BFI, wala pang linaw


Ni Edzel Mainit, Senior Field Reporter, YES FM Boracay

Nalalapit na ang oral arguments para sa kasong isinamapa ng Boracay Foundation Incorporated (BFI) sa Supreme Court, kaya umaasa ngayon ang nasabing organisasyon na nalalapit na lang din na ilabas ng korte ang desisyon sa kaso.

Ito ang inihayag ni Loubell Cann, dating pangulo at kasalukuyang miyembro ng Board of Trustees ng BFI.

Ayon dito, sa oras na matapos na ang oral argument na hiling ng Korte Suprema sa apat na kampong maghaharap sa darating na ika-labingtatlo ng Setyembre , na kinabibilangan ng inakusahan partido, ang Department of Environment and Natural Recourses (DENR), Provincial Government at Philippine Reclamation Authority (PRA), ay bubuo na ng desisyon ang korte.

Pero nilinaw ni Cann na sa oral argument na gagawin sa darating na Setyembre, ang abogado nila ang mag-rerepresenta sa bahagi BFI.
Subalit sa mga nagnanais umano na mag-obserba ng oral argument, may iilang miyembro ng BFI at Sangguniang Bayan ang dadalo upang ipakita ang suporta sa kasong isinampa nila.
Sa kabila ng sinabing ito ni Cann, hindi umano nito ngayon masisiguro kung kelan maglalabas ng desisyon ang SC. 

BFI, walang planong mag-withdraw sa kaso; kompromiso, posible pang mangyari


Ni Edzel Mainit, Senior Field Reporter, YES FM Boracay

Aminado ngayon si Loubell Cann, dating pangulo at kasalukuyang miyembro ng Board of Trustees ng Boracay Foundation Incorporated (BFI), na humiling si Aklan Governor Carlito S. Marquez sa nasabing organisasyon na i-atras ang kaso na isinampa na may kaugnayan sa reklamasyon sa Caticlan.

Subalit mariin nitong sinabi na walang plano ang BFI na pagbigyan ang kahilingan ng gobernador, batay umano sa napagpasayahan ng mga kanilang mga miyembro.

Paliwanag ni Cann, nasa Supreme Court na ang kaso kaya itutuloy nila ito, lalo pa at nalalapit na lang ang oral arguments.

Pero sinabi nito na hindi imposible na pumasok sila sa isang kompromiso na ilalatag ng probinsya sa kanila.

Ngunit nilinaw niya na sa bagay na ito ay napakahirap umanong gumawa ng desisyon.

Sa kabila ng pahayag ni Cann, sinabi ng huli na ipapaubaya na lang nial sa korte ang pagdedesisyon sa nasabing kaso.

Samantala, ang hinggil sa kompromiso umanong papasukin nila kung sakali man ay pag-uusapan pa kasama ng kanilang abogado kung anu-ano ang mga bagay na maari isama sa kanilang kasunduan ng probinsya.

Dahil kahit sila ay hindi rin umano sigurado kung pahihintulutan ito ng korte.

LGU Malay, muling mangungutang


Ni Edzel Mainit, Senior Field Reporter, YES FM Boracay

Panibagong kasunduan sa utang o loan na naman sa isang bangko sa Bayan ng Kalibo ang papasukin ngayon ng lokal na pamahalaan ng Malay, batay na rin sa kahilingan ni Mayor John Yap.

Ito ay upang makabili ng dalawang bagong heavy equipment o backhoe na siyang gagamitin sa land fill ng Malay na makikita sa Brgy. Kabulihan.

Bagama’t walang halagang nabanggit sa konseho kung ilang milyon ang uutangin, napag-alaman naman mula sa Sangguniang Bayan na nagkakahalaga ng mahigit kumulang labingwalong milyong piso ang isa sa nasabing equipment.

Nabatid din ng Sanggunian ang kahalagahan ng mga heavy equipment na ito, at matapos ang mga pagdinig ay lubusan nang inaprobahan ang resolosyon, upang bigyang pahintulot ang Alkalde na pumasok sa kasunduan para makapag-utang.

Matatandaan noong taong 2010, ay umutang din ang bayan na ito ng milyun-milyong halaga, para gamitin sa proyektong land fill.

Samantala, tiwala naman ang konseho na mayroong sapat na mapagkukunan ang lokal na pamahalaan ng Malay para makapag bayad sa uutanging ito.